1. Sostar si mișto te pregătisaras-ame anda iech dezastro?

 CANA sam pregătime salvisaras amari viața. Sar exemplo, cana si iech dezastro, codola cai pregătisarde-pe de mai anglal daștin mai sigo te așen jiuvinde hai te ajutin vi averen. Iech organizația cai ajutil le manușen andai Europa phendea: „Iech lași pregătirea daștil te cherel i diferența mașcar i viața hai o merimos”.

2. Sostar trebul te pregătisaras-ame anda o baro necazo? (Matei 24:44)

² O baro necazo va astarela de iechdata. (Mat. 24:21) But dezastrea aven neajucărde, tha amen jianas mișto că o baro necazo va avela. Acana cam 2 000 bărșa, o Isus phendea pesche continuatorenghe te aven pregătime anda cado ghies. (Citisar Matei 24:44.) Dacă sam pregătime va avela amenghe mai ușoro te nachas părdal cadal phare ghiesa hai te ajutisaras vi averen te cheren sa cadea. (Luca 21:36)

3. Sar ajutil-ame te avas pregătime anda o baro necazo o fapto te na mechas-ame hai te sicavas mila hai iubirea?

³ Te dichas trin buchia cai ajutin-ame te avas pregătime anda o baro necazo. So va avela te cheras cana va trebula te phenas iech mesajo pharo anda i cris hai cadaia va cherela le manușen te așen amenghe contra? (Rev. 16:21) Dacă așias zurale ando pachiamos hai ci mechas-ame va daisaraia te așunas le Iehovastar, hai va avela te pachias că vo va ferila-ame. So va avela te cheras dacă amare phrala va hasarena chichiva sau sea penghe buchia? (Hab. 3:17, 18) I mila va cherela-ame te ajutisaras-len. So va avela te cheras dacă, pala o ataco cai va anela-les contra amenghe i coaliția andal națiuni, va trebula te beșas chidine amare phralența hai pheianța ande iech țâno than? (Ezec. 38:10-12) I iubirea anda amare phrala va ajutila-ame te nachas părdal cadal phare ghiesa.

4. Sar sicavel i Biblia că trebul te așias mai dur zurale hai te sicavas vi mai but mila hai iubirea?

 ⁴ O Cuvânto le Devlesco phenel amenghe te așias zurale bi te mechas-ame, te sicavas mila hai iubirea. Ando Luca 21:19 phenel-pe: „Așen zurale hai cadea va salvina tumari viața”. Ando Coloseni 3:12 sicavel-pe: „Len pe tumende i mila”. Hai ando 1 Tesaloniceni 4:9, 10 citisaras: „O Del sicavel tumen te iubin tumen iech averes. . . . Tha, zuriarav tumen phralale te cheren cadaia mai dur sea mai but”. Sea cadal dumes sas-le scriime andal discipoli, cai ci mechenas-pe, sicavenas mila hai iubirea. Tha von trebunas te bariaren cadal buchia vi mai dur. Vi amen trebul te cheras sa cadea. So daștil te ajutil-ame? Va avela te dichas sar sicade le dintune creștini fiesavi calitatea. Pala codoia, va avela te dichas sar daisaras te las-ame pala lende hai cadea te sicavas că vi amen sam pregătime anda o baro necazo.

5. Sar daisarde le creștini anda o iechto secolo te așen zurale andel pharimata?

⁵ Le creștini anda o iechto secolo trebunas te așen zurale ando pachiamos hai te na mechen-pe. (Evr. 10:36) Avreal le pharimata prin save nachenas sea le manușa, len sas-len vi aver pharimata sar jene cai anenas închinarea le Iehovasche. But mașcar lende sas-le persecutime na numai catar le conducători religioși iudei hai catar le autorități romano, tha vi catar lenghe familii. (Mat. 10:21) Hai poiechdata, ando mașcar la congregațiaco, von trebunas te len sama ca le sicaimata apostato neciace, cai camenas te hulaven i congregația. (Fap. 20:29, 30) Chiar cana nachle prin cadal pharimata, le creștini ci mechle-pe. (Rev. 2:3) So ajutisardea-le? Von gândisarde-pe ca le slujitori le Iehovasche andal puraimata cai așile zurale hai ci mechle-pe, cadea sar sas o Iov. (Iac. 5:10, 11) Von manghle le Iehovas te del-le zuralimos. (Fap. 4:29-31) Hai încărde ande penghi goghi le miștimata cai avelas te anel-le o fapto că ci mechenas-pe. (Fap. 5:41)

6. So sichioas catar i phei Merita?

⁶ Vi amen daisaras te așias zurale ando pachiamos dacă rodas te dichas so sichioas catar codola cai ci mechle-pe. Arachas lengo exemplo andi Biblia hai ande amare publicații. I Merita, iech phei anda Albania, cărdea cadai buchi hai daisardea te așel zurali cana lachi familia așilea lache contra hai vi marelas-la. Voi phenel: „Mânro ilo sas-lo zuriardo cana sichilem mai but anda o Iov. Chiar cana nachelas prin bare pharimata hai ci jianelas con andea pe leste sea cadal buchia, vo phendea: «Ji ca o palutno phurdimos, ci va avela te mechav mânro pachiamos!». (Iov 27:5) Gândisarde-ma că mânre pharimata si but mai țâne sar codola cai sas le Iovos. Mai but, me jianav castar aven mânre pharimata.”

7. Chiar cana aghies ci nachas prin iech baro pharimos, so trebulas te sichioas te cheras încă de acanara?

⁷ Daisaras te așias zurale bi te mechas-ame cana das duma mai butivar le Iehovaia anda amare pharimata hai șioras amaro ilo angla leste. (Filip. 4:6; 1 Tes. 5:17) Chiar cana ci naches prin bare pharimata acana, manghes le Iehovas te ajutil-tu cana san perado, duchado sau cana ci jianes so te cheres? Dacă acana cheres tuche timpo te pâtres chio ilo angla o Iehova hai te manghes lesco ajutorii andel pharimata de fiesavo ghies, vi ando viitorii, cana va avena tut pharimata mai bare, ci va încăreia-tu parpale te des duma leia. Va avela te pachias ciaces că vo jianel mișto cana hai sar te ajutil-tu. (Ps. 27:1, 3)

8. Sar sicavel o exemplo la pheiaco Mira că dacă așias zurale aghies va avaia pregătime andal zumaimata cai va avena? (Iacov 1:2-4) (Dich vi i imaginea.)

⁸ Dacă acana așias zurale andel pharimata, va avela te cheras cadaia vi cana va avela o  baro necazo. (Rom. 5:3) But slujitori le Iehovasche dichle că pala so nachle mișto părdal fiesavo zumaimos le pachiamasco, cadaia ajutisardea-le te aven pregătime anda le coaver zumaimata. O fapto că ci mechle-pe cărdea-le mai cuci andel iacha le Iehovasche hai zuriardea lengo pachiamos că amaro Del silo gata te avel pașa pesche slujitori sea o timpo. Cana si amen cado pachiamos si amenghe mai ușoro te așias zurale andel pharimata cai va avena. (Citisar Iacov 1:2-4.) I Mira, iech pionera anda Albania, hachiardea că o fapto că ci mechlea-pe andel pharimata, cărdea-la te așel loialo le Iehovasche. Poiechdata, voi pachial că chanicas nai-les mai but pharimata sar la. Tha pala codoia, anel ande peschi goghi sar o Iehova sas-lo pașa late andel 20 bărșa cai nachle hai phenel pesche: „Ași zurali ando pachiamos! Dacă meches-tu acana, sea le bărșa ande save o Iehova zinghiardea pesco vast caște ajutil-tu te așes zurali, va avena hasarde”. Vi tu daștis te gândis-tu ca sar dea-tu o Iehova zuralimos te așes ande pânrende ji acana. Na bâstăr că vo dichel sea le pharimata prin save naches hai vo va pochinela-tu. (Mat. 5:10-12) Hai cana va astarela o baro necazo, tu jianes deja sar te așes zuralo bi te meches-tu hai va cameia te cheres cadaia vi mai dur.

9. Sar sicade mila le phrala andai congregația anda Antiohia?

⁹ Te dichas so sas cana le creștini anda Iudeea nachle prin iech baro bochalimos. Cana așunde anda cadaia, le phrala andai Antiohia catar i Siria simțosarde iech bari mila caring lenghe phrala anda Iudeea. Mai but, von cărde sigo vareso caște ajutin-le. I Biblia sicavel că von „alosarde te bișialen ajutoarea le phralenghe cai beșenas andi Iudeea, fiesavo pala so daștilas”. (Fap. 11:27-30) Chiar cana le phrala cai nachenas prin cado bochalimos beșenas dur lendar, le creștini andai Antiohia dine sea penghi zor caște ajutin-le. (1 Ioan 3:17, 18)

10. Sar daisaras te sicavas mila caring le phrala cai nachen prin iech dezastro? (Dich vi i imaginea.)

¹⁰ Vi amen daisaras te sicavas mila caring le phrala cai nachen prin iech dezastro naturalo sau aver pharimata. Cana așunas anda cadala, cheras sigo vareso – sar exemplo, phenas le phralenghe că camas te das amaro vast te ajutisaras, cheras donații sau mangas-ame anda codola cai nachen prin pharimata. b (Prov. 17:17) Ando bărș 2020, sas cărde mai but sar 950 comitetea anda o ajutorii cana si iech dezastro, caște lel-pe sama pe codola cai sas-len nevoia andi pandemia de COVID-19. Le phrala hai pheia cai slujin ande cadal comitetea meritin te aven așarde anda i phari buchi cai cheren-la. Mașcar o ajutorii cai den-les von si te îngăren le buchia materialo cai trebun le phralenghe, te zuriaren-le te așen pașă le Iehovastar, hai poiechdata, te lașiaren sau te vazden pale lenghe chăra sau le thana andai închinarea. So cheren-le te den sea penghi zor ande cadai buchi? I bari mila cai silen ando ilo caring penghe phrala hai pheia. (Dich vi 2 Corinteni 8:1-4.)

11. Sar daisaras te das pachiv amare Dadesche cerisco prin amaro phiraimos pherdo mila?

¹¹ Cana sicavas amari mila pala iech dezastro, le coaver manușa dichen amari phari buchi cai cheras-la. Sar exemplo, ando bărș 2019, o uragano Dorian peradea iech sala le Regatoschi anda Bahamas. Ando timpo so amare phrala vazdenas pale i sala, pușle catar iech furnizoro cai ci sas-lo Martoro sode trebunas te pochinen anda iech buchi cai trebulas cărdi. Cado  phendea lenghe: „Camav te cherav iech donația hai ci camav love po echipamento, pe le materialea hai pi buchi cai cherav-la. . . . Camav te cherav vi me vareso anda tumari organizația. Sea so cheren anda tumare amala arăslea ande mânro ilo”. Le mai but manușa ci prinjianen le Iehovas. Tha but jene anda lende dichen so cheren le Martori le Iehovasche. So bari pachiv si amen că prin amaro phiraimos pherdo mila daisaras te cheras le manușen te pașion catar amaro Del cai silo „barvalo andi mila”. (Ef. 2:4)

12. Sar ajutil-ame o fapto că sicavas acana mila te avas pregătime anda o baro necazo? (Revelația 13:16, 17)

¹² Vi ando baro necazo va trebula te sicavas mila. Sostar? I Biblia sicavel că codola cai ci va șiona-pe andi politica va nachena prin pharimata – vi acana, hai vi ando baro necazo. (Citisar Revelația 13:16, 17.) Daștil-pe că bute phralen hai pheian ci va mai avela-len so trebul lenghe caște train. I mila caring lende va cherela-ame te ajutisaras-le. Amen camas ca, atunci cana amaro Rege, o Cristos Isus, va avela te cherel peschi cris, te arachel-ame că sicavas mila hai te phenel amenghe: „Aven, . . . hai moștenin o Regato”. (Mat. 25:34-40)

13. Cadea sar sicavel-pe ando Romani 15:7, so cărde le creștini anda o iechto secolo caște bariaren penghi iubirea iech caring aver?

¹³ I iubirea sicavelas con sas le ciace creștini ando iechto secolo. Tha, sas lenghe ușoro te sicaven iubirea iech caring aver? Te gândisaras-ame so diferime sas-le iech averestar le phrala andai congregația anda Roma. Chichiva anda lende sas-le iudei, hai sas-le bariarde pala i Legea mozaico. Aver, avenas andal națiuni hai sas-le bariarde ande aver cultura. Chichiva jene mașcar lende sas-le sclavi hai aver manușa libero, cai daștil-pe că încărenas sclavi. Sar daștinas le creștini te nachen părdal cadal diferențea hai te bariaren penghi iubirea iech caring aver? O apostolo Pavel zuriardea-le: „Primisaren tumen anda ilo iech averen”. (Citisar Romani 15:7.) So hachiarenas le creștini anda Roma prin cadal dumes? Andi șib originalo cadai expresia „primisaren tumen anda ilo” însemnol te sicaves lașimos sau ospitalitatea caring varecaste, sar exemplo, te achares-les ande chio chăr sau te avel iech anda che pașarde amala. O apostolo Pavel phendea caring o Filimon te primil anda sea o ilo lesche sclavos cai nașelas, o Onisim. (Filim. 17) I Priscila hai o Aquila ‘primisardea anda sea o ilo’ le Apolos hai line-les pende chăre caște ajutin-les. Vo prinjianelas mai țâra buchia anda o Isus sar von. (Fap. 18:26) Chiar cana sas-le diferime, le creștini ci mechle ca le diferențea de mașcar lende te duriaren-le iech averestar, tha von primisarde-pe anda sea o ilo.

14. Sar sicade iubirea i Anna hai laco rrom?

¹⁴ Vi amen daisaras te sicavas iubirea caring amare phrala hai pheia cana cărdioas pașarde amala lența. Cadaia va cherela vi len te sicaven penghi iubirea anda amende. (2 Cor. 6:11-13) Te dichas prin so nachlea i Anna hai laco rrom. Ca țâra timpo pala so găle ande penghi nevi repartiția sar misionari andi Africa de Vest, astardea i pandemia de COVID-19. Cadea că, von ci daisarde te beșen ande iech than le phralența andai nevi congregația. Tha sar daisarde von te sicaven penghi iubirea? Von sunisarde video le phralen andai congregația caște prinjianen-le mai mișto. Cadai buchi arăslea ando ilo le phralengo hai astarde vi von te den-le po iech telefono hai te bișialen lenghe mesajea. Sostar cărde le misionari cadai buchi? I Anna phenel: „Ci va avela te bâstrav le phralen hai pheian cai sicade iubirea caring mande hai mânri familia vi cana gălea amenghe mișto tha vi andel pharimata. Cadaia ci mai choslea-pe anda mânri goghi hai cărdea vi man te sicavav iubirea caring le coaver”.

15. So sichioas catar i Vanessa? (Dich vi i imaginea.)

 ¹⁵ But mașcar amende sam ande congregații cai le phrala hai pheia sile diferime amendar. Daisaras te bariaras amari iubirea caring lende dacă dichas so si lașio ande lende. Iech phei po anav Vanessa, cai slujil andi Noua Zeelandă, dichlea cadaia pe peschi morci. Anda late sas pharo te hachiarel-pe chichiva jenența andai congregația. Tha ando than te duriarel-pe codolendar cai holiarenas-la, voi alosardea te beșel mai but timpo lența. Cadea, voi daisardea te dichel sostar sile cuci anda o Iehova. I Vanessa phenel: „De cana mânro rrom silo supraveghetorii de circumscripție, amen prinjianas vi mai bute phralen hai pheian cai sile diferime amendar hai si manghe mai ușoro te hachiarav-ma le coaverența. Acana ciaiol-ma but că ando poporo le Iehovasco si manușa cadea de diferime. Si ciaces, vi le Iehovas ciaiol-les, anda codoia vo țârdea peste manușen de orisavo felo”. Cana sichioas te dichas le coaveren cadea sar dichel-le o Iehova sicavas că iubisaras-le. (2 Cor. 8:24)

16. Sostar si cadea de importanto i iubirea caște așias jiuvinde ando baro necazo? (Dich vi i imaginea.)

¹⁶ Caște așias jiuvinde ando baro necazo trebul te sicavas iubirea. Sar va ferila-ame o Iehova cana va astarela o baro necazo? Andel puraimata o Iehova phendea le israelițenghe so trebulas te cheren cana avelas te astarel o ataco contra o Babilono: „Jia andre ande che camere hai phande le udara pala tute!”. (Is. 26:20) Daștil-pe că vi amen va trebula te cheras sa cadai buchi ando baro necazo. Le „camere” daștin te aven le congregații. O Iehova phenel că, ando baro necazo, va ferila-ame dacă așias pașa amare phrala. Anda codoia, trebul te das sea amari zor încă de acanara na numai te suportisaras le phralen pașa amende tha vi te sichioas te bariaras amari iubirea caring lende. Numai cadea daisaras te așias jiuvinde.

17. So va daisaraia te cheras ando baro necazo dacă pregătisaras-ame încă de acanara?

¹⁷ „O baro ghies le Iehovasco” va anela but pharimata le manușenghe. (Țef. 1:14, 15) Vi le manușa le Iehovasche va nachena prin pharimata. Tha dacă pregătisaras-ame încă de acanara, va daisaraia te așias liniștime hai te ajutisaras averen. Ci va avela te mechas-ame, indiferento prin so pharimata va trebula te nachas. Hai cana amare phrala va avena duchade, va sicavaia lenghe mila hai va avela te ajutisaras-le. Sa cadea, va avela amen iech amalimos mai chidino le phralența dacă sichioas încă de acanara te iubisaras-le. O Iehova va dela-ame sar pochinimos viața veșnico ande iech lumea cai le dezastrea hai le pharimata va avena bâstărde. (Is. 65:17)