1. So cuci sicaimata sichilean cana astardean te studiis i Biblia?

 MAI anes tuche andi goghi so cuci sicaimata sichilean cana astardean te studiis i Biblia? Daștil-pe că așilean uimime cana așundean că le Devles siles iech anav. Daștil-pe că lea-pe iech bar pa chio ilo cana sichilean că o Del ci chinuil le manușen andi iag. Hai, daștil-pe, că sanas zurales voime cana hachiardean că daștis te diches pale codolen drago cai mule tuche hai că daștis te trais pașa lende ando Paradiso, pi phuv.

2. So cărdean pala so sichilean sar gândil o Iehova? (Efeseni 5:1, 2)

² Ando timpo so sichilean anda o Cuvânto le Devlesco, arăslean te iubis le Iehovas sea mai but. Cadai iubirea cărdea-tu te cheres so sichilean. Cadea că, hachiardean sar daștis te alosares mai mișto so te cheres ande chi viața. Parudean chi goghi hai chio phiraimos, anda codoia că camlean te aves cuci andel iacha le Iehovasche. Dean chi zor te les-tu pala chio Dad cerisco, cadea sar iech șiavorro lel-pe pala pesco dad. (Citisar Efeseni 5:1, 2.)

3. So daisaras te pușias-ame?

³ Savore daisaras te pușias-ame: „Iubiv acana mai but le Iehovas sar cana boldem-ma? Arăslem te lav-ma sea mai but pala o modo sar gândil hai sar phiravel-pe o Iehova, vi mai but cana sicavav iubirea mânre phralenghe hai pheianghe? Dacă „i iubirea cai sas tut mai anglal” șudrilea, na av perado. Vi le creștini anda o iechto secolo nachle prin cadaia. Cu sea cadala, o Isus ci duriardea-pe lendar. Daștis te pachias ciaces că vo ci va duriarela-pe nici tutar! (Rev. 2:4, 7) Vo jianel că daștis te bariares pale i iubirea cai sas tut mai anglal cana sichilean o ciacimos.

4. So va dichaia ande cado articolo?

⁴ Ande cado articolo va avela te dichas sar daisaras te bariaras amari iubirea anda o Iehova hai anda le coaver. Pala codoia, va avela te dichas chichiva miștimata cai va avena amen hai vi averen cana bariaras amari iubirea.

5, 6. Prin so pharimata nachlea o Pavel hai so ajutisardea-les te cherel mai dur peschi buchi anda o Del?

⁵ Le Pavelos sas-les iech șucar viața andi buchi le Devleschi, tha nachlea vi prin but pharimata. O Pavel phirelas but hai jialas ande thana duriarde. Ande codola ghiesa ci sas ușoro te cheres codola bare droma. Poiechdata vo sas-lo „ando pericolo anda le lena” hai „ando pericolo anda le ciora”. Sa cadea, butivar vo sas-lo mardo catar codola cai așenas lesche contra. (2 Cor. 11:23-27) Hai chichiva anda lesche phrala creștini ci sicavenas sea o timpo că anda lende sas cuci so cherelas vo caște ajutil-len. (2 Cor. 10:10; Filip. 4:15)

⁶ Sar daisardea o Pavel te cherel mai dur peschi buchi anda o Del? I Biblia hai le buchia prin save nachlea ande peschi viața ajutisarde-les te prinjianel mișto le Iehovas. O Pavel arăslea te pachial anda sea o ilo că o Iehova Del iubilas-les. (Rom. 8:38, 39; Ef. 2:4, 5) Sa cadea, vi vo bariardea iech zurali iubirea anda o Iehova. Vo sicadea cadai iubirea ‘prin codoia că slujisardea codolenghe sfinți hai că slujisardea lenghe vi mai dur’. (Evr. 6:10)

7. Sar daisaras te bariaras amari iubirea anda o Iehova?

⁷ Daisaras te bariaras amari iubirea anda o Del cana cheras amenghe timpo te sichioas corcore anda lesco Cuvânto. Ando timpo so citis iech cotor andai Biblia, de chi zor te hachiares so sicavel tuche cado anda o Iehova. Șiu tuche le pușimata: „Sar sicavel cadai relatarea că o Iehova iubil-ma? Sostar cherel-ma te iubiv vi me le Iehovas?”.

8. Sar daștil o manglimos te bariarel amari iubirea caring o Del?

⁸ Iech aver buchi cai daștil te bariarel amari iubirea anda o Iehova si te șioras amaro ilo angla leste mai butivar ando manglimos. (Ps. 25:4, 5) O Iehova va cherela peschi partea hai va dela-ame răspunso ca amare manglimata. (1 Ioan 3:21, 22) I Kali b, iech phei andai Asia, phenel: „Mânri iubirea anda o Iehova sas mai anglal phangli catar so sichilem anda leste. Tha, cana dichlem sar delas-ma vo răspunso ca le manglimata, cadai iubirea barilea sea mai but ande mânro ilo. Cadaia cărdea-ma te camav vi mai but te cherav so les ciaiol-les.

9. Sar sicadea o Timotei că bariarelas peschi iubirea andal phrala?

⁹ Cana cărdea iech andal droma sar misionaro, o Pavel prinjiandea ieche lașe tărnes po anav Timotei, cai iubilas le Iehovas hai vi le manușen. Pala chichiva bărșa, o Pavel phendea caring le filipeni: „Nai-ma chonic cai te avel-les iech atitudinea sar leschi, cai te lel sama ciaces tumendar”. (Filip. 2:20) Cade o Pavel ci așardea le Timoteios anda codoia că cherelas mișto peschi buchi hai că încărelas șucar teme, tha anda codoia că iubilas le phralen. Daisaras te pachias că le phrala abia ajucărenas ca o Timotei te jial lende andi congregația. (1 Cor. 4:17)

10. Sar sicade i Anna hai laco rrom penghi iubirea andal phrala?

¹⁰ Vi amen camas te sicavas amari iubirea caring le phrala prin o ajutorii cai das-les lenghe. (Evr. 13:16) Te dichas sar cărdea cadaia i Anna, anda savi deam duma ando articolo cai nachlea. Pala iech baro brâșând, voi hai laco rrom găle ca iech familia phralenghi hai dichle că o acoperișo catar lengo chăr pelea. Cadea că, le phralen ci mai sas-len hureaimata uje. I Anna phenel: „Leam lenghe hureaimata, haladeam-le hai andeam-le parpale șucar lașarde. Anda amende sas iech țâni buchi, tha cadaia phandadea mașcar amende iech amalimos  zuralo cai încărel ji acana”. Lenghi iubirea andal phrala cărdea la Anna hai lache rromes te ajutin cadala familia. (1 Ioan 3:17, 18)

11. a) Sar simțon-pe le coaver cana sicavas lenghe iubirea? b) Cadea sar sicavel-pe andel Proverbe 19:17, sar dichel o Iehova i iubirea cai sicavas-la caring le coaver?

¹¹ Cana sicavas iubirea hai lașimos caring le coaver, von dichen că amen das amari zor te las-ame pala o Iehova. Tha daștil-pe că ci va avela te jianas niciechdata chichi de recunoscători sile anda amaro lașimos. I Kali anda savi deam duma mai anglal, anel pesche andi goghi iubireaia catar codola cai ajutisarde-la cana sas-li tărni. Voi phenel: „Naisarav anda ilo sea le pheianghe cai cărde penghe timpo te jian manța andi predicarea. Von lenas-ma de chăral, acharenas-ma te has ande iech than hai lenas sama te arăsav mișto parpale chăre. Abia acana hachiarav chichi de but dine penghi zor anda mande hai von cărde cadaia pherde iubirea”. Si ciaces, na savore cas ajutisaras-le va daștina te sicaven penghi recunoștința. I Kali mai phenel: „Camlemas anda sea o ilo te pochinav parpale le pheian cai ajutisarde-ma anda lengo baro lașimos. Tha ci jianav cai beșen acana. Cu sea cadala, o Iehova jianel hai mangav-ma ca vo te pochinel-le parpale ande mânro than”. Cado si iech baro ciacimos. O Iehova dichel vi i mai țâni buchi cai cheras-la anda le coaver. Vo dichel amaro lașimos sar iech cuci daro hai vo ci așel niciechdata camado. (Citisar Proverbe 19:17.)

12. Sar daștin le phrala te sicaven penghi iubirea caring i congregația? (Dich vi le imagini.)

¹² Dacă san phral, so daștis te cheres caște sicaves iubirea caring le coaver hai te ajutis-le? Iech phral tărno po anav Jordan pușlea ieche phures so daștilas te cherel caște ajutil mai but andi congregația. Mai anglal, o phuro așardea-les anda le șucar buchia cai cherelas-le  deja hai dea-les vi chichiva sfaturi. Sar exemplo, vo phendea lesche te avel mai sigo ca i sala le Regatoschi hai te del lașio ghies le phralen cana arăsăn, te del răspunsuri ca le întruniri, te cherel predicarea ande iech than lesca grupaia de serviciu hai te rodel te dichel so buchia daștilas te cherel anda le coaver. Cadal sfaturi ajutisarde le phrales Jordan na numai te sichiol te cherel neve buchia tha vi te bariarel peschi iubirea anda lesche phrala hai pheia. O Jordan hachiardea că iech phral astarel te ajutil averen angla so te avel iech slujitoro auxiliaro, hai pala leschi numirea vo cherel cadaia mai dur. (1 Tim. 3:8-10, 13)

13. Sar ajutisardea i iubirea le phrales Christian te avel pale phuro?

¹³ Dacă mai anglal sanas slujitoro auxiliaro sau phuro, daștis te pachias că o Iehova ci bâstrăl i buchi cai cărdean-la hai i iubirea cai îngărdea-tu te slujis lesche. (1 Cor. 15:58) Sa cadea, vo dichel i iubirea cai sicaves-la mai dur. Iech phral po anav Christian sas-lo perado cana ci mai sas-lo phuro. Cu sea cadala, ita so phenel vo: „Alosardem te cherav sea so daisardem caște slujiv le Iehovasche anda iubirea, indiferento că somas phuro sau nici”. Ando timpo, vo sas-lo pale numime phuro. O Christian phenel: „Izdralas iech țâra o ilo ande mande cana hachiardem că va avela te slujiv pale. Tha, dacă o Iehova, ande lesco baro lașimos, mechlea-ma te slujiv pale sar phuro, i iubirea anda Leste hai anda mânre phrala ajutisardea-ma te alosarav te cherav pale cadai buchi”.

14. So sichioas anda so phendea iech phei andai Georgia?

¹⁴ Le slujitori le Iehovasche sicaven iubirea vi caring le manușa cai nai-le Martori. (Mat. 22:37-39) Sar exemplo, i Elena, iech phei andai Georgia, phenel: „Mai anglal, i  corcori buchi cai cherelas-ma te predichiv sas i iubirea anda o Iehova. Tha, ando timpo so mânri iubirea caring leste bariolas sea mai but, vi mânri iubirea andal manușa bariolas. Dem mânri zor te hachiarav prin so pharimata nachenas hai pușlem-ma anda soste te dav duma lența caște daștiv te arăsav ca lengo ilo. Chichi gândisardem-ma mai but lende cadichi mai but camlem te ajutiv-le”. (Rom. 10:13-15)

15, 16. Casche anel miștimata o fapto că sicavas iubirea? (Dich le imagini cai sicaven puneri andi scena.)

¹⁵ Cana sicavas iubirea caring amare phrala, na numai len silen miștimata. Pala so astardea i pandemia de COVID-19, iech phral po anav Paolo hai leschi rromni ajutisarde bute pheian mai phure te folosin penghe telefoanea sau tabletea caște cheren predicarea. Iech phei anda savi sas mai pharo, sichilea ji la urmă te folosil pesco dispozitivo. Cadea, voi daisardea te acharel pesche neamuren ca i Comemorarea. Șovardeș anda cadala sas-le conectime prin videoconferința. O ajutorii cai o Paolo hai leschi rromni dine-les, andea miștimata na numai la pheiache tha vi lache neamurenghe. Mai târzio, i phei scriisardea le phralesche Paolo: „Nais tuche că pherdo răbdarea sicadean-ame, codolen cai sam mai phure. Ci va avela te bâstrav niciechdata i grija le Iehovaschi hai chi phari buchi cai cărdean-la caște ajutis-ame”.

¹⁶ Anda cadai experiența hai vi anda aver, o Paolo sichilea iech bari buchi: i iubirea si mai importanto sar o prinjianimos sau sar amare  talentea. Vo anel ande peschi goghi: „Mai anglal somas supraveghetoro de circumscripție. Acana, dav mânri sama că chiar cana le phrala daștil-pe că bâstărde le teme cai încărdem-le, von ci bâstărde le buchia cai cărdem-le anda lende”.

17. Con mai țârdel miștimata cana sicavas iubirea?

¹⁷ Cana sicavas iubirea caring le coaver, vi amen si amen miștimata neajucărde. O Jonathan, anda Noua Zeelandă, sicavel că cadal dumes si ciace. Ande iech savato pala-mismeri, cana sas iech baro tachimos, vo dichlea iech pionero cai predichilas po drom. Andel ghiesa de savato cai avile, o Jonathan gălea vi vo le phralesa andi predicarea. Atunci vo ci dea peschi sama so but miștimata avelas te aven-les că alosardea te sicavel lașimos. O Jonathan phenel: „Ande codo timpo, ci ciaiolas-ma i predicarea. Tha, pala so dichlem sar cado pionero sicavelas o ciacimos hai sar așunenas-les le manușa, iech ciaci iubirea anda i predicarea astardea ande mânro ilo. Mai but, cărdem manghe iech lașio amal cai ajutisardea-ma te barioav spiritualo, te arachav bucuria andi predicarea hai te pașioav le Iehovastar”.

18. So camel o Iehova te cheras?

¹⁸ O Iehova camel ca fiesavo anda amende te barioas andi iubirea caring leste hai caring le coaver. Cadea sar dichleam, daștil te avel amen iech iubirea zurali anda o Iehova cana citisaras anda lesco Cuvânto, cana gândisaras-ame leste hai cana das duma leia ando manglimos. Daisaras te bariaras amari iubirea anda amare phrala hai pheia cana das-le iech vast caște ajutisaras-le. Ando timpo so amari iubirea bariol, va avela te pașioas sea mai but le Iehovastar hai amare phralendar, hai va avela te bucurisaras-ame catar cadal amalimata veșnico!