1. Sar diches o ciacimos?

 SAR MANUȘA le Iehovasche, amen iubisaras o ciacimos cai arachel-pe ando Lil le Devlesco. Pe leste vazdeam amaro pachiamos. (Rom. 10:17) Sa cadea, arăsleam te pachias ciaces că o Iehova cărdea i congregația creștino caște avel „o stâlpo hai i temelia le ciacimaschi”. (1 Tim. 3:15) Amen așunas bucuriasa codolendar cai sile angla amende. Von ajutin amen te hachiaras le ciacimata andai Biblia hai den amen îndrumări pala sar camel o Del. (Evr. 13:17)

2. Cadea sar sicavel-pe ando Iacov 5:19, so daștil te avel amența chiar vi pala so prinjiandeam o ciacimos?

² Chiar cana sam ando ciacimos hai pachias că o Iehova îndrumil peschi organizația, daisaras te arăsas te ‘duriaras amen le ciacimastar’. (Citisar Iacov 5:19.) Sea so camel o Satan si te cherel amen te na mai pachias amen andi Biblia hai andi îndrumarea cai del amen i organizația le Devleschi. (Ef. 4:14)

3. Sostar trebul te încăras zurales co ciacimos? (Efeseni 6:13, 14)

³ Citisar Efeseni 6:13, 14. Na pa but timpo, o Satan va phenela bare hohaimata, cai va cherena bute manușen te așen contra le Iehovasche. (Rev. 16:13, 14) Sa cadea, daisaras te ajucăras amen ca o Satan te del sea peschi zor caște athavel le manușen le Iehovasche. (Rev. 12:9) Anda codoia, trebul te sichioas savi si i diferența mașcar o ciacimos hai le hohaimata, hai te alosaras te așunas le ciacimastar. (Rom. 6:17; 1 Pet.  1:22) Cadaia va ajutila amen te așias andi viața ando baro necazo!

4. So va avela te dichas ande cado articolo?

⁴ Ande cado articolo, va avela te dichas dui buchia cai va ajutina amen te hachiaras savo si o ciacimos cai avel andai Biblia hai te așunas le îndrumări cai aven catar i organizația le Devleschi. Pala codoia, va avela te dichas trin sfaturi cai va ajutina amen te încăras mai dur co ciacimos dacă las amen pala lende.

SO VA AJUTILA AMEN TE HACHIARAS SAVO SI O CIACIMOS?

5. Sar ajutil amen i dar le Iehovastar te hachiaras savo si o ciacimos?

⁵ I dar le Iehovastar. Sicavas iech lași dar le Devlestar cana iubisaras-les cadea de but că ci camas te cheras chanci cai daștil te duchavel-les. Camas anda sea o ilo te hachiaras so si mișto hai so si nasul, savo si o ciacimos hai savo si o hohaimos, hai cadea te na hasaras amaro amalimos le Iehovasa. (Prov. 2:3-6; Evr. 5:14) Anda codoia că, butivar, so ciaiol le manușen te cheren na-i mișto dichlo andel iacha le Iehovasche, trebul te las sama ca i dar le manușendar te na arăsăl mai zurali sar amari iubirea anda o Iehova.

6. So arăsle te cheren le 10 israeliți anda codoia că sas lenghe dar le manușendar?

⁶ Dacă daras mai but le manușendar sar le Devlestar, daisaras te arăsas te duriaras amen le ciacimastar. Te dichas so cărde le 12 căpetenii cai găle te dichen garades o Them Promiso angla ca o Iehova te del-les le israelițenghe. Deș anda cadal murșa mechle ca i dar andal canaaniți te avel mai zurali sar lenghi iubirea anda o Iehova. Von phende caring le israeliți: „Ci daisaras te vazdas amen contra cado poporo, anda codoia că sile mai zurale sar amen”. (Num. 13:27-31) Pe iech rig lenghe dumes sas-le ciace, anda codoia că, andel iacha le manușenghe, le canaaniți sas-le mai zurale sar le israeliți. Tha, dacă le israeliți gândinas-pe că ci daștinas te maren penghe  dușmanen avelas sar cana bâstrenas o zuralimos le Iehovasco. Codola 10 murșa trebunas te încăren penghi goghi ca so camelas te cherel o Iehova le israelițența. Sa cadea, von trebunas te anen penghe amintea so cărdea o Iehova mai anglal anda lende. Cadea, von daștinas te hachiaren că le canaaniți ci sas-le chanci angla o baro zuralimos le Iehovasco. Tha, na sar codola murșa bi pachiamasco, o Iosua hai o Caleb camle te aven mișto dichle le Devlestar. Von phende le israelițenghe: „Dacă o Iehova dichel amen lașe iachența, vo va îngărela amen ciaces ande cado them . . . hai va dela-les amenghe”. (Num. 14:6-9)

7. Sar daisaras te zuriaras amari dar caring o Iehova? (Dich vi i imaginea.)

⁷ Sar daisaras te zuriaras amari dar caring o Iehova? Cheras cadaia cana gândisaras amen so camel o Iehova angla te cheras iech alosarimos. (Ps. 16:8) Cana citis le relatări biblico, puș tut: „So cărdemas me ande codoi situația?”. Te phenas că sanas vi tu code cana le 10 căpetenii phende le israelițenghe că ci va daștina te maren-pe contra o Canaano. Camleanas anda sea o ilo te cheres so si mișto andel iacha le Iehovasche hai te sicaves chi iubirea caring leste? Sau mechleanas tut perado catar i dar le manușendar? Le israeliți anda codo timpo ci camle te pachian o ciacimos cai phende lenghe o Iosua hai o Caleb. Cadea că, o Iehova ci mechlea-len te jian ando Them Promiso. (Num. 14:10, 22, 23)

8. Savi buchi trebul te das amari zor te bariaras hai sostar?

⁸ I umilința. O Iehova sicavel o ciacimos codolenghe umili. (Mat. 11:25) Cana prinjiandeam o ciacimos, samas umili hai mechleam amen sicade. (Fap. 8:30, 31) Tha trebul te las sama te na arăsas phuchiarde. Dacă sam baricane, daisaras te arăsas te pachias că amaro modo gândimasco si sa cadea de lașio sar le principii andai Biblia hai le îndrumări cai aven catar i organizația le Iehovaschi.

9. Sar daisaras te așias vi mai dur umilo?

⁹ So daisaras te cheras caște așias vi mai dur umilo? Si importanto te anas amenghe andi goghi chichi de țâne sam amen pașa o Iehova, amaro baro Del. (Ps. 8:3, 4) Mai but, te mangas le Iehovas te ajutil amen te phiravas amen vi mai umilo hai te mechas amen sicade. O Iehova va ajutila amen te dichas lesche gânduri – cai sichioas-len anda lesco Lil hai catar leschi organizația – mai cuci sar amare gânduri. Sa cadea, cana citisaras andai Biblia, te rodas buchia cai sicaven că o Iehova iubil i umilința hai dichel nasul iachența o baricanimos hai o phuchiarimos. Mai but, de chi zor te așes umilo cana si tuche dini te cheres iech buchi importanto sau cai cherel tut te aves dichlo le coaverendar.

TE ÎNCĂRAS ZURALES CO CIACIMOS

10. Cas alosardea o Iehova caște sicavel pesche manușenghe so te cheren?

¹⁰ Te pachias amen mai dur andi organizația le Iehovaschi. Ando Israelo purano, o Iehova phendea pesche manușenghe so te cheren prin o Moise hai prin o Iosua. (Ios. 1:16, 17) Chichi timpo le israeliți dichle codole murșen că sas-le șiute le Iehovastar te aven angla lende, len sas-len but miștimata. Pala șăla bărșa, cana cărdea-pe i congregația creștino, o Iehova alosardea le 12 apostolen caște sicaven le phralenghe so trebunas te cheren. (Fap. 8:14, 15) Pala codoia, o Iehova alosardea vi avere phuren anda o Ierusalimo te cheren cadaia. Anda codoia că lenas-pe pala so phenenas codol murșa loialo, „le congregații zuriarenas-pe ando pachiamos hai lengo număro bariolas ande fiesavo ghies”. (Fap. 16:4, 5) Vi aghies, dacă las amen pala so phenel amenghe  i organizația le Iehovaschi, si amen but miștimata. So avelas ando ilo le Iehovasco dacă ci avelas te așunas codolendar cai vo șiutea-len angla amende? Caște jianas cadaia, te dichas so cărde le israeliți cana sas-le po drom caring o Them Promiso.

11. So nasulimos avilea opral le israeliți cai ci camle te așunen codolestar cai o Iehova șiutea-les te avel angla lende? (Dich vi i imaginea.)

¹¹ Cana le israeliți sas-le po drom caring o Them Promiso, le bare manușa anda o poporo vazdine-pe contra le Moisesche hai ci sicade pachiv caring i buchi cai o Iehova dea-la lesche te cherel-la. Von phende: „Sea o poporo si sfânto [na numai o Moise], savore anda lende, hai o Iehova si mașcar lende!”. (Num. 16:1-3) Si ciaces, „sea o poporo” sas sfânto. Tha o Iehova alosardea le Moises te avel angla Lesco poporo. (Num. 16:28) Cadea că, cana prasade le Moises, cadal murșa vazdine-pe contra le Iehovasche. Anda lende, lengo miștimos – te avel-len mai but zuralimos hai te aven mai prinjiande – sas mai importanto sar te cheren i voința le Iehovaschi. Cadea că, o Del mudardea le manușen cai vazdine-pe contra lesche hai vi codolen cai așile de lenghi rig. (Num. 16:30-35, 41, 49) Cadea că, daisaras te pachias ciaces că vi aghies o Iehova dichel jiungales codolen cai ci camen te așunen catar le îndrumări cai aven prin leschi organizația.

12. Sostar daisaras te pachias amen vi mai dur andi organizația le Iehovaschi?

¹² Daisaras te pachias amen ciaces vi mai dur andi organizația le Iehovaschi. Cana dichiol-pe mișto că trebul iech paruimos ande sar si hachiardo iech ciacimos biblico sau anda sar si cărdi amari buchi, o Corpo de Guvernare ci încărel-pe parpale te cherel cadaia. (Prov. 4:18) Von cheren cadai buchi anda codoia că camen, mai but sar oriso, te aven mișto dichle le Iehovastar. Sa cadea, von den sea penghi zor ca le alosarimata cai cheren-len te aven cărde pala o Lil le Devlesco, pala savo  trebul te len-pe sea le manușa le Iehovasche.

13. So si „le dumes sasteveste” hai sar ajutin amen cadala te na duriaras amen le ciacimastar?

¹³ ‘Te las amen vi mai dur pala le dumes sasteveste.’ (2 Tim. 1:13) „Le dumes sasteveste” si le sicaimata creștino cai arachas-len andi Biblia. (Ioan 17:17) Amaro pachiamos silo vazdino pe cadal sicaimata. I organizația le Iehovaschi zuriarel amen te na duriaras amen catar cadal sicaimata. Dacă cheras cadea, o Iehova va avela amența.

14. Sar duriarde-pe chichiva creștini catar „le dumes sasteveste”?

¹⁴ So daștil te avel amența dacă ci mai las amen pala „le dumes sasteveste”? Te dichas iech exemplo. Ando iechto secolo, mașcar chichiva creștini astarde te phiren le dumes că o ghies le Iehovasco avilea. Daștilas-pe că cadaia arachelas-pe ande iech lilorro cai pachialas-pe că sas scriime le Pavelostar. Chichiva creștini anda Tesalonic pachiaie so așunde hai astarde te phenen vi averenghe. Von ci cărde penghe timpo te dichen mișto dacă so așunde sas ciaces. Dacă anenas penghe andi goghi so sicadea-len o Pavel cana sas-lo lența, ci avileas te mechen-pe athade. (2 Tes. 2:1-5) O Pavel phendea lenghe te na pachian oriso așunenas. Hai caște ajutil-len te jianen save sas lesche lila, vo phandadea pesco duito lil caring le tesaloniceni cadea: „Dicta mânro saluto, le Pavelosco, scriime mânre vastesa, cai si iech semno ande fiesavo lil; cadea scriiv me”. (2 Tes. 3:17)

15. Sar daisaras te ferisaras amen catar le buchia hohamne cai fan-pe că sile ciace? Den iech exemplo. (Dich vi le imagini.)

¹⁵ So daisaras te sichioas anda le dumes cai phendea-len o Pavel caring le tesaloniceni? De fiesavi data cana așunas vareso cai na-i cadea sar sichileam andai Biblia sau cana așunas vareso cai cherel amen te așias le muiesa pâtărdo, trebul te sicavas goghiaverimos. Andi purani Uniunea Sovietico, codola cai așile amenghe contra dine le phralen iech lil cai falas-pe că avel catar o sedio mondialo. Ando lil phenelas-pe ca le phrala te cheren iech aver organizația von corcore, caște na mai avel-len  phanglimos le coavere phralența. Tha, von ci mechle-pe athade anda codoia că dine penghi sama că so phenelas-pe ando lil ci sas pala so sichile andai Biblia. Vi aghies, le dușmani le ciacimasche folosin-pe catar o interneto hai le rețele de socializare caște athaven amen hai te cheren amen te na mai așias chidine. So daisaras te cheras caște ‘na mechas amen sigo athade’ cadale buchiandar? Trebul te pușias amen dacă so așunas sau so citisaras si pala o ciacimos cai sichileam-les. (2 Tes. 2:2; 1 Ioan 4:1)

16. Cadea sar sicavel-pe ando Romani 16:17, 18, so trebulas te cheras cana varecon phenel buchia cai ci sile pala o ciacimos?

¹⁶ Te așias chidine codolența cai sile loialo le Iehovasche. O Del camel te anas lesche închinarea ande iech than amare phralența. Va avela te așias chidine chichi timpo încăras zurales co ciacimos. Oricon phenel vareso cai ci si pala o ciacimos cherel le phralen andai congregația te na mai așen chidine hai andi pacea. Cadea că, o Del phenel amenghe ‘te duriaras amen lendar’. Dacă ci cheras cadaia, von daștin te cheren vi amen te duriaras amen le ciacimastar. (Citisar Romani 16:17, 18.)

17. Sostar si importanto te hachiaras savo si o ciacimos hai te încăras zurales leste?

¹⁷ Dacă hachiaras savo si o ciacimos hai încăras zurales leste, va avela te așias pașa o Iehova hai te avel amen iech pachiamos zuralo. (Ef. 4:15, 16) Cana cheras cadaia, va avasa ferime catar le sicaimata hohamne le Satanosche hai ci va avela te mechas amen athade lendar. Mai but, ando baro necazo, va avela te așias pașă le Iehovastar, cai va lela sama amendar. Cadea că, te încăras zurales co ciacimos, hai „o Del la paceaco” va avela amența! (Filip. 4:8, 9)