Năștisailem ande 19 mai 1940, ando foro Amioûn, anda Liban. Pala chichiva bărșa, amari familia muchisailea ando foro Tripoli. Barilem ande iech familia șucar hai iubitorii. Mânre dada prinjiande hai iubisarde le Iehovas. Samas dui șiave hai trin șeia hai me somas o mai țâno. Anda mânre dada, ci sas importanto te avel-le love. Ande lenghi viața o mai importanto sas o studio la Bibliaco, le întruniri hai te ajutin averen te prinjianen le Devles.

Andi amari congregația sas chichiva creștini machle. Iech anda lende sas o Michel Aboud, cai încărdea o studio le lilesco andi congregația. Vo prinjiandea o ciacimos ando New York hai prin leste avilea o ciacimos ando Liban co începuto le bărșengo 1920. Cana ando Liban avile dui pheia cai cărde i Școala Galaad, i Anne hai i Gwen Beavor, o phral Michel phiradea-pe zurales șucar lența hai ajutisardea-le. Von arăsle amare lașe amala. But bărșa mai târzio, somas zurales bucurime te dichav la pheia Anne andel Statele Unite. Pala codoia, dichlem vi la pheia Gwen, cai căsătorisardea-pe le phraleia Wilfred Gooch hai slujisarde ande iech than co Betelo anda Londra.

Cana somas tărno sas țâra Martori ando Liban. Cu sea cadala, phendem averenghe o mesajo la Bibliaco pherdo zelo chiar cana but conducători religioși sas contra amenghe. Vi acana anav manghe amintea prin so nachleam atunci.

Ande iech ghies me hai mânri phei, i Sana, predichisardeam ande iech bloco. Co etajo cai predichisardeam, avilea iech rașai. Daștil-pe că varecon achardea-les. Vo prasadea mânra pheia, spildea-la pe scări hai voi dea-pe dab nasul. Varecon achardea i poliția. Cana le polițiști avile, line sama pe Sana caște primil o ajutorii cai trebulas lache. Von îngărde le rașaies ca i secția hai dichle că sas iech arma leste. O șefo la polițiaco, pușlea-les: „Ji la urmă tu so san? Iech manuș cai sicavel le manușen anda o Del, sau cai sicavel-le te maren-pe?”

Aver data, le phrala anda i congregația line andi chiria iech autobuzo caște predichisaras ande iech foro duriardo. Sas zurales șucar ji cana o rașai așundea că sam cothe hai chidinea bute manușen te aven contra amenghe. Von cărde amenghe nasul hai chiar șiudine barența ande amende. Dine cadea de zurales ande mânro dad, că vi acana anav manghe amintea lesco mui pherdo rat. Vo hai mânri dei risaile co autobuzo hai ame găleam pala lende darane. Ci va avela te bâstrav niciechdata so phendea mânri dei cana haladea le răni mânre dadesche: „O Iehova, iertisar-le rughiv-tu. Ci jianen so cheren.”

Iech aver data, cana samas ca amare neamuri ando foro cai năștisailem, ca mânro papo, avilea iech episcopo. Vo jianglea că mânre dada sile Martori le Iehovasche. Somas țâno, sas-ma numai șov bărș, cadea că vo camlea te daravel-ma hai pușlea-ma: „Phen manghe, tu sostar ci san boldo?”. Phendem lesche parpale că somas numai iech șiavorro hai că trebulas te prinjianav mai but buchia anda i Biblia hai te avel-ma iech pachiamos mai zuralo. Ci placiaia-les mânro răspunso hai phendea mânre paposche că somas bipachivalo.

Cadal experiențea nasul le rașaiența ci sas but. Le manușa anda Liban sas-le lașe hai ospitalieri, anda codoia but anda lende camle te den duma amența anda i Biblia hai sas ame but studii biblico.

Somas încă ca i școala cana iech phral tărno anda Venezuela avilea ando Liban. Ca le întruniri vo prinjiandea mânra pheia, la Wafa. Pala iech timpo, von line-pe hai găle andi Venezuela te beșen cothe. I Wafa scriisardea mai butivar mânre dadesche hai rughisardea-les te jias vi ame andi Venezuela anda codoia că sas lache zurales doro amendar. Ji la urmă, cadea cărdeam hai muchisardeam-ame.

 Arăsleam andi Venezuela ande 1953 hai beșleam ando Caracas, pașa o palato le președintosco. Anda codoia că somas iech șiavorro, placialas-ma te dichav sar o președinte nachelas pesca mașinaia de lux, conducime catar iech șofero personalo. Tha anda mânre dada ci sas ușoro te train cothe. Sea-l buchia parude-pe: o them, i șib, i cultura, o hamos hai i clima. Ji la urmă, cana simțosarde-pe iech țâra mai mișto ande codo than, avilea iech baro pharimos pe amende.

Mânro dad pelea nasfalo. Sas amenghe zurales pharo te dichas cadaia. Mai anglal vo sas iech manuș zuralo hai sastevesto, ci dichleam-les niciechdata nasfalo. Sas-les cancero co pancreaso hai trebulas te nachel prin iech intervenția chirurgicalo. Tha pala numai iech curco, mulea.

Si pharo te phenav ce duchade samas că hasardeam amare dades. Sas-ma numai 13 bărș. Ci avileas amenghe te pachias. Simțosardeam că ci va mai avaia fericime niciechdata. Iech timpo, anda mânri dei sas pharo te dichel că laco rrom ci mai sas-lo pașa late. Cu sea cadala, hachiardeam că i viața jial mai dur hai că o Iehova si pașa amende. Cana sas-ma 16 bărș, pala soste cărdem o liceo ando Caracas, camlem but te ajutisarav mânra familia le lovența.

Pala iech timpo, mânri phei, i Sana, căsătorisardea-pe ieche phraleia po anav Rubén Araujo, cai cărdea i Școala Galad hai avilea parpale andi Venezuela. Von alosarde te beșen ando New York. Mânri familia alosardea te jiav vi me ando New York ca facultatea. Cadea că, cothe beșlem ande iech than mânra pheiaia hai lache rromeia. Von ajutisarde-ma but te pașioav le Iehovastar. Andi congregația de șib spaniolă anda o Brooklyn cai samas, sas but phrala zurale spiritualo. Mașcar lende sas o Milton Henschel hai o Frederick Franz cai sas-le zurales cuci anda mande. Le dui slujisarde co Betelo anda Brooklyn.

Cana o iechto bărș ca i facultatea sas caring o sfârșito, începosardem te pușav-ma so te cherav mânra viațaia. Citisardem ando Turno de veghe mai but articolea anda phrala cai sas-le obiectivea spiritualo ando servicio le Iehovasco hai gândisardem-ma but lende. Mai but, dichlem ce bucurime sas le beteliști hai le pionieri anda amari congregația hai camlem vi me te avav sar von. Tha încă ci somas boldo. Jianglem că trebulas te dedichisarav mânri viața le Iehovasche. Cărdem cadaia hai boldem-ma ande 30 martia 1957.

Pala o bolimos camlem te lav iech aver decizia importanto: te începosarav o servicio cu timp integral. Camlem zurales but te cherav o pionierato tha jianglem că cadaia ci va avela ușoro, anda codoia că sas-ma iech programo pherdo ca i facultatea. Prin mai but lila phendem mânra deiache hai mânre phralenghe sostar camlem te  mechav i facultatea hai te avav parpale andi Venezuela caște începosarav o pionierato.

Gălem parpale ando Caracas andi iunia 1957. Tha mânri familia ci așelas prea mișto le lovența. Camlem te ajutisarav-le vi me, anda codoia cărdem buchi ca iech banca tha, camlem but vi te cherav o pionierato. Ji la urmă, anda codoia avilem parpale. Somas hotărâme te cherav le dui buchia. Chichiva bărșa cărdem buchi but timpo ca i banca hai cărdem vi o pionierato. Niciechdata ci mai somas cadea de ocupime, tha somas vi fericime!

Iech aver buchi cai cărdea-ma fericime sas i căsătoria iecha șucara pheia anda Germania po anav Sylvia, cai iubisardea but le Iehovas. Voi avilea andi Venezuela ande iech than pesche dadența. Pala iech timpo, sas ame dui șiave: o Michel (o Mike), hai i Samira. Mai but, leam amende vi mânra deia, caște las sama pe late. Anda codoia că sas-ma mai but responsabilități ci mai daisardem te cherav o pionierato tha ci hasardem mânro spirito de pionier. Me hai i Sylvia cărdeam o pionierato auxiliaro de fiesavi data cana sas ame concedii.

I situația anda savi dem duma co începuto le articolosco, sas cana le șiave sas-le încă ca i școala. Te phenav ciaces, sas-ma iech viața lași hai somas dichlo sar iech baro manuș ca i buchi. Cu sea cadala, camlem te avav prinjiando mai but sar iech slujitoro le Iehovasco. Gândisardem-ma but so te cherav ca le manușa te dichen-ma ande cado felo. Dem duma mânra rromniaia anda le love cai sas ame hai deam amari sama că, dacă mechav i buchi avelas te primisarav but love. Cadale lovența daisardeamas te traisaras mai but timpo, anda codoia că ci sas ame datorii hai camleam te cheras amari viața mai simplo.

Ci sas amenghe ușoro te las cadai decizia tha mânri cuci rromni hai mânri dei susținisarde-ma. Abia ajucărdem te avav pale iech pioniero. Sea-l buchia găle mișto tha primisardeam iech vestea cai ci ajucărdeam-ame.

Ande iech ghies, o doctoro phendea amenghe că i Sylvia așilea phari. Ci ajucărdeam-ame tha samas zurale bucurime. Gândisardem-ma ca le buchia cai cărdem-le ji atunci caște cherav o pionierato. Pușlem-ma so te cherav mai dur. Ci nachlea but timpo  hai obișnuisardeam-ame te jianas că va avela-ame încă iech șiavo, cadea că pregătisardeam amari goghi hai amaro ilo anda cadaia. Tha încă pușlem-ma dacă mai daisardemas te cherav o pionierato.

Pala soste deam duma anda amare obiectivea, alosardeam te na paruvas amare planuri. Amaro șiavo, o Gabriel, năștisailo andi aprilia 1985. Cu sea cadala, mechlem mânri buchi ca i banca hai începosardem pale o pionierato regularo andi iunia 1985. Pala iech timpo sas-ma o privilegio te cherav buchi ande iech than le phralența anda o Comiteto la filialaco. Anda codoia că i filiala ci sas ando Caracas, trebuisardea te jiav 80 km dur, ande dui sau trin ghiesa pe curcheste.

I filiala sas ando foro La Victoria, cadea că muchisardeam-ame cothe caște avas mai pașă le Betelostar. Cadaia sas iech baro paruimos anda amende. Som zurales bucurime că mânra rromnia hai le șiaven sas-le iech atitudinea lași. Mânri phei, i Baha, camlea te lel sama pe amari dei. O Mike căsătorisardea-pe tha i Samira hai o Gabriel beșenas încă amența hai, cana muchisardeam-ame, trebuisarde te mechen penghe amalen anda Caracas. Vi mânri cuci Sylvia trebuisardea te mechel o baro foro, bute manușența hai te sichiol te trail ande iech foro mai țâno, liniștime. Mai but soavră anda amende sichileam te beșas ande iech chăr mai țâno. Ciaces, cadai decizia andea bare paruimata.

Le buchia pale parude-pe. O Gabriel căsătorisardea-pe hai i Samira alosardea te beșel corcori. Pala codoia, ande 2007, me hai i Sylvia samas invitime te slujisaras co Betelo, cai sam vi acana. O Mike, amaro mai baro șiavo si phuro de congregație hai cherel o pionierato ande iech than pesca rromniaia, Monica. Vi o Gabriel silo phuro, hai slujil andi Italia, ande iech than pesca rromniaia, Ambra. I Samira cherel o pionierato hai slujil co Betelo de chăral.

Ande mânri viața trebuisardea te lav but decizii importanto. Cu sea cadala, ci fal man nasul chancestar. Ci parudemas chanci. Sile zurales cuci anda mande sea-l privilegii hai responsabilități cai sas-ma ando servicio le Iehovasco. Ande sea codo timpo, hachiardem chichi de importanto si te avel-ame iech amalimos chidino le Iehovaia. Indiferento că trebul te las decizii țâne sau bare, vo del-ame i pacea cai „nachavel orisavo hachiarimos”. (Filip. 4:6, 7) Me hai i Sylvia slujisaras co Betelo acana hai simțosaras că o Iehova binecuvântisardea-ame ande sea-l decizii cai leam-le.