1. So sas phendo codolenghe anda i mulțimea anda o iechto secolo te cheren?

IECH bari mulțimea murșența hai jiuvleanța anda mai but thema hai cai denas duma diferime șiba arăsle co Ierusalimo. Ande codo ghies întâmplosardea-pe vareso zurales șucar. Chichiva iudei, manușa simpli, den duma codolența cai avile, ande lenghi șib. Tha i mai bari buchi sas o mesajo cai phende-les cadal iudei hai o apostolo Petru. Codola anda i mulțimea așunen că daștin te aven salvime dacă sicaven pachiamos ando Isus Cristos. O mesajo arăslea cadea de zurales ande lengo ilo că cărdea-le te pușen: „So trebul te cheras?”. O Petru phendea lenghe parpale: „Fiesavo anda tumende te avel boldo”. (Fap. 2:37, 38)

2. So va dichaia ande cado articolo? (Dich i imaginea pa i coperta.)

² So întâmplosardea-pe mai dur sas vareso biajucărdo. Cam 3 000 manușa bolde-pe ande codo ghies hai cărdile discipoli le Cristososche. Anda codo momento începosardea i bari lucrarea ande savi cheren-pe discipoli, cai o Isus dea-la pesche continuatorenghe. Cadai buchi jial mai dur vi ando secolo 21. Aghies, ci daisaras te ajutisaras varecas te arăsăl co bolimos numai ande chichiva ceasurea. Trebul mai but șiona, iech bărș sau chiar mai but timpo ca iech manuș cai studiil te daștil te bolel-pe. Ca iech manuș te arăsăl iech discipolo le Isusosco trebul te aven cărde bare eforturi, cadea sar jianen codola cai silen iech studio biblico. Mai dur, va avela te dichas sar daisaras te ajutisaras codolen casa studiisaras i Biblia te cărdion discipoli le Isusosche.

3. Cadea sar phenel-pe ando Matei 28:19, 20, so trebul te cherel iech manuș cai studiil caște arăsăl ji co bolimos?

³ Angla so te bolel-pe iech manuș trebul te cherel so sichiol andai Biblia. (Citisar Matei 28:19, 20.) Cana codo cai studiil cherel so sichiol, silo sar o „manuș goghiaver” anda i ilustrarea le Isusoschi cai săpil but andi phuv caște vazdel pesco chăr po bar. (Mat. 7:24, 25; Luca 6:47, 48) Sar daisaras te ajutisaras codoles cai studiil te cherel so sichiol? Te dichas trin buchia.

4. Sar daisaras te ajutisaras codolen casa studiisaras te cheren sea o timpo progresea caring o bolimos? (Dich vi o chenarii „ Ajutisar codoles casa studiis te gândil-pe so trebul te cherel hai te cherel codol buchia”.)

⁴ Ajutisar codoles casa studiis te gândil-pe so trebul te cherel. Sostar trebul te cheres cadaia? Sar exemplo, dacă cames te jias pe iech lungo drom, daștis te gândis-tu de mai anglal cai va avela te așes po than caște diches chichiva șucar thana. Cadea ci va avela tuche phares te jias codo lungo drom. Sa cadea, cana codo cai studiil gândil-pe ce țâne buchia daștil te cherel ande iech harno timpo hai dichel că daisardea te cherel-le, vo va hachiarela că daștil te arăsăl vi te bolel-pe. Folosisar i secțiunea „So trebul te cheres” anda o lil Bucurisar-tu viațatar anda sea o timpo! caște ajutis codoles casa studiis te cherel progresea. Co sfârșito fiesavea lecțiaco, den duma anda o phanglimos cai si mașcar so trebul te cherel codo cai studiil hai so sichilea. Cana pachias că codo cai studiil trebul te cherel vi aver vareso, daștis te scriis cadala cai i secțiunea „Aver vareso”. Folosisar butivar cadai secțiunea caște des duma codoleia casa studiis anda ce țâne buchia daștil te cherel ande iech harno timpo hai ce buchia daștinas te len lestar mai but timpo.

5. Cadea sar phenel-pe ando Marcu 10:17-22, so phendea o Isus le barvale tărnesche te cherel hai sostar?

 ⁵ Ajutisar codoles casa studiis te cherel paruimata ande peschi viața. (Citisar Marcu 10:17-22.) O Isus jianglea că le barvale manușenghe avelas lenghe pharo te bichinen sea penghe barvalimata. (Mar. 10:23) Cu sea cadala, o Isus phendea ieche barvale tărnesche te cherel cado baro paruimos ande peschi viața. Sostar? Anda codoia că iubilas-les. Po iechdata, daștil te avel amenghe pharo te phenas codolesche casa studiisaras te cherel so sichilea anda codoia că pachias că ci silo pregătime te cherel o paruimos cai trebul. Si ciaces, le manușen sile nevoia timpostar caște mechen le obiceiuri greșime hai te len pe pende i nevi personalitatea. (Col. 3:9, 10) Tha, chichi mai sigo das duma codoleia casa studiisaras andal paruimata cai trebul te cherel-le, cadichi va avela te cherel-le mai sigo. Cana das duma leia anda cadal buchia, sicavas că camas ciaces lesco miștimos. (Ps. 141:5; Prov. 27:17)

6. Sostar trebul te folosisaras le pușimata cai ajutin-ame te hachiaras so pachial o manuș?

⁶ Si importanto te pușias codoles casa studiisaras so pachial anda iech subiecto. Cadaia va ajutila-ame te dichas so hachiarel hai so pachial vo. Dacă folosisares sea o timpo le pușimata co studio, va avela tuche mai ușoro te des duma anda subiectea mai sensibilo cana va trebula. Ando lil Bucurisar-tu viațatar anda sea o timpo! si but pușimata cai ajutin-tu te diches so pachial o manuș. Sar exemplo, andi lecția 04 arachas o pușimos: „So pachias că simțosarel o Iehova cana folosisares lesco anav?”, hai andi lecția 09: „Anda so cameias te rughis-tu?”. Daștil-pe că mai anglal va trebula timpo codolesche cai studiil caște gândil-pe so te phenel. Daștis te ajutis-les cana sicaves-les te gândil pi baza le versetenghi hai cana dichel le imagini.

7. Sar daisaras te folosisaras mișto le experiențea le phralenghe?

⁷ Iech data so o manuș hachiardea so trebul te cherel, folosisar le experiențea le phralenghe caște zuriares-les te cherel paruimata. Sar exemplo, dacă codolesche cai studiil si lesche pharo te jial ca le întruniri daștis te sicaves lesche o materialo video O Iehova ‘sicadea intereso caring mande’, catar i lecția 14, i secțiunea „Rode mai but”. Ande but lecții anda o lil Bucurisar-tu viațatar anda sea o timpo! si experiențea ca le secțiuni „Hachiar mai mișto” sau „Rode mai but”. * Le sama te na cheres comparații mașcar codo cai studiil hai aver varecon, hai na phen: „Dacă vo daisardea, vi tu daștis”. Mech ca o manuș te țârdel corcoro sicaimata anda leste. Mai mișto avelas te sicaves lesche so ajutisardea le manușes anda o materialo video te cherel cadea sar sicavel i Biblia. Mai but, daștis te phenes iech verseto importanto sau iech buchi cai cărdea-la o manuș anda o materialo video. Cana daștil-pe, țârde i atenția caring sar ajutisardea o Iehova codole manușes.

8. Sar daisaras te ajutisaras codolen casa studiisaras te iubin le Iehovas?

⁸ Ajutisar codoles casa studiis te iubil le Iehovas. Rode ocazii caște sicaves le calității le Iehovasche. Ajutisar codoles cai studiil te hachiarel că o Iehova silo iech Del fericime hai că silo pașa codola cai iubin-les. (1 Tim. 1:11; Evr. 11:6) Phen lesche sostar le sfaturi le Iehovasche sicaven că vo iubil-les hai sicav lesche că si ande lesco miștimos  dacă cherel so sichiol. (Is. 48:17, 18) Cana arăsăl te iubil le Iehovas, codo cai studiil va camela te cherel paruimata. (1 Ioan 5:3)

9. Cadea sar phenel-pe ando Marcu 10:29, 30, so daștil te ajutil ieche manușes te mechel chichiva buchia caște daștil te bolel-pe?

⁹ Caște progresil ji co bolimos, iech manuș cai studiil i Biblia trebul te mechel-pe chichiva buchiandar. Cadea sar o tărno barvalo, chichiva anda codola cai studiin trebun te mechen penghe buchia materialo. Dacă lenghi buchi uștarel le principii biblico, daștil-pe că va trebuna te paruven-la. But anda lende, daștil-pe, că trebun te mechen le amalen cai ci iubin le Iehovas. Averenghe, lenghi familia așel lenghe contra hai ci mai camen te aven ande iech than lența, anda codoia că ci placian-le le Martori le Iehovasche. O Isus phendea că anda unii manușa, daștil te avel pharo te cheren cadal sacrificii, tha vo promitisardea că codola cai urmin-les ci va cherena cadal sacrificii de ivea. Von va avena binecuvântime le Iehovastar cai va dela-le iech familia spiritualo iubitorii. (Citisar Marcu 10:29, 30.) Sar daștis te ajutis codoles cai studiil i Biblia te primil cado șucar cadouo?

10. So daisaras te sichioas anda so phendea o Manuel?

¹⁰ Av iech lașio amal anda codo casa studiis. Si zurales importanto ca codo cai studill te simțosarel că san ciaces interesime lestar. Te dichas so phenel o Manuel, cai beșel ando Mexico, anda o timpo cana studiilas i Biblia: „Angla fiesavo studio, o phral casa studiisardem pușelas-ma so mai cherav. Cadaia ajutisardea-ma te simțosarav-ma mișto hai daisardem te pâtrav mânro ilo caște dav duma leia anda orisavi buchi. Simțosardem că interesilas-pe ciaces mandar”.

11. Sostar si importanto te beșas ande iech than codolența casa studiisaras i Biblia?

¹¹ Beș ande iech than codoleia casa studiis, cadea sar cărdea vi o Isus pesche  continuatorența. (Ioan 3:22) Dacă codo cai studiil cherel progresea hai dacă si mișto, achar-les tute chăre ca iech cafeaua, te han ande iech than sau te dichen iech anda amare emisiuni pa broadcasting. Anda leste va avela zurales cuci iech invitația sar cadaia, vi mai but cana si le sărbători, cana daștil-pe că simțosarel-pe corcoro. O Kazibwe, cai beșel andi Uganda, phenel: „Ando timpo cana somas ande iech than le phraleia casa studiisardem, sichilem sa cadichi de but buchia anda o Iehova sar ando timpo le studiosco. Hachiardem chichi de but lel sama o Iehova pe pesche slujitori hai chichi de fericime sile von. Cadaia sas i viața cai camlem te avel vi man”.

12. Sostar trebulas te acharas co studio mai bute phralen?

¹² Achar co studio mai bute phralen. Po iechdata daștil-pe că pachias că si mai ușoro te jias corcore co studio sau te jias sa codole phraleia. Cu sea cadala, codo cai studiil amența va țârdela miștimata dacă acharas co studio mai bute phralen. O Dimitri, anda Moldova, phenel: „Fiesavo phral cai avelas mande co studio phenelas manghe șucar buchia ande pesco felo. Cadaia ajutisardea-ma te dichav aver moduri ande save daisardem te cherav so sichilem. Mai but, ci mai sas manghe cadichi de lajiav cana gălem i iechto data ca i întrunirea anda codoia că prinjiandem deja mai bute phralen hai pheian”.

13. Sostar trebul te ajutisaras codoles casa studiisaras i Biblia te avel ca le întruniri?

¹³ Ajutisar codoles casa studiis te avel ca le întruniri. O Iehova phenel pesche slujitorenghe te anen lesche închinarea ande iech than. Le întruniri sile iech partea importanto anda amari închinarea. (Evr. 10:24, 25) Mai but, amare phrala sile amari familia spiritualo. Cana sam ca le întruniri lența, si sar cana has ande iech than codolența anda amari familia. Cana ajutisaras codoles cai studiil te avel ca le întruniri, vo cherel iech anda le mai bare pași caring o bolimos. Tha daștil-pe te aven-les vi chichiva pharimata. Sar daștil te ajutil-les o lil Bucurisar-tu viațatar anda sea o timpo! te nachel părdal lende?

14. Sar daisaras te cheras codoles cai studiil te avel ca le întruniri?

¹⁴ Folosisar i lecția 10 anda o lil Bucurisar-tu viațatar anda sea o timpo! caște cheres codoles cai studiil te avel ca le întruniri. Chichiva phrala cai sile experiența sas-le manghle te folosisaren cadai lecția angla so te avel dino o lil hai sas-le zurales lașe rezultate. Si ciaces, ci trebul te ajucăres ji ca i lecția 10 caște achares codoles cai studiil ca le întruniri. Cher cadaia chichi mai sigo daștis hai phen lesche mai butivar. Le manușa sile diferime, anda codoia vi lenghe pharimata sile diferime. Cadea că încercosar te hachiares save si le necesități codolesche cai studiil tusa hai de chi zor te ajutis-les. Na mech-tu perado dacă nachel mai but timpo ji cana avel ca le întruniri. Av răbdătorii hai achar-les mai dur.

15. Ce daraimata daștin te aven codolen cai studiin?

¹⁵ Gândisar-tu cana vi tu studiisardean i Biblia. Încărdea-tu vareso parpale caște na cărdios iech Martoro le Iehovasco? Phendean tuche că ci va avela te daștis te predichis niciechdata chăr chărestar? Darailean că chi familia sau che amala va așena tuche contra? Dacă da, hachiares codoles casa studiis i Biblia. O Isus phendea că le manușen daștin te aven-le cadal daraimata. Cu sea cadala, vo phendea pesche  continuatorenghe te na mechen ca i dar te așavel-le te slujin le Iehovasche. (Mat. 10:16, 17, 27, 28) Sar ajutisardea o Isus pesche continuatoren te nachen părdal penghe daraimata? Hai sar daștis te urmisares lesco exemplo?

16. Sar daisares te sicaves codoles casa studiis te del duma averența anda so sichiol?

¹⁶ Sicav codoles cai studiil te del duma averența anda so sichiol. Cana o Isus bișaldea le discipolen te predichin, daștil-pe că von daraile iech țâra, tha o Isus ajutisardea-le prin o fapto că phendea lenghe casche hai so te predichin. (Mat. 10:5-7) Daisaras te urmisaras o exemplo le Isusosco cana ajutisaras codoles cai studiil te hachiarel casche daștil te predichil. Sar exemplo, daștis te pușes-les dacă jianel varecas casche anelas miștimata iech anumime ciacimos biblico. Pala codoia, ajutisar-les te pregătil-pe hai sicav lesche iech modo simplo ande savo te phenel cado ciacimos. Cana pachias că si mișto, de duma leia le idei anda le secțiuni: „Unii manușa phenen” sau „Unii daștinas te pușen-tu”, anda o lil Bucurisar-tu viațatar anda sea o timpo!. Cana cheres cadaia sicav codoles cai studiil te folosisarel i Biblia caște del răspunsuri simplo hai pherde tacto.

17. Sar daisaras te folosisaras o Matei 10:19, 20, 29-31 caște ajutisaras codoles casa studiisaras te pachial-pe ando Iehova?

¹⁷ Ajutisar codoles cai studiil te pachial-pe ando Iehova. O Isus phendea pesche discipolenghe că o Iehova va ajutila-le anda codoia că iubil-le. (Citisar Matei 10:19, 20, 29-31.) Phen vi tu codolesche cai studiil că o Iehova va avela vi pașa leste. Daștis te ajutis-les te șiol pesco pachiamos ando Iehova cana rughis-tu ande iech than leia anda so trebul te cherel. O Franciszek, anda Polonia, phenel: „O phral casa studisardem phenelas andel rugăciuni cai cherelas-le so trebulas te cherav. Cana dichlem sar o Iehova dea răspunsuri ca lesche rugăciuni, începosardem vi me te rughisarav-ma. Simțosardem o ajutorii le Iehovasco cana trebuisardea te lav manghe libero catar mânri nevi buchi caște daștiv te jiav ca le întruniri hai ca o congreso”.

18. Sar dichel o Iehova le eforturi cai cheren-le le creștini cai sicaven averen o ciacimos?

¹⁸ O Iehova silo zurales interesime codolendar cai studiin i Biblia. Sa cadea, vo iubil le creștinen cai sicaven averen o ciacimos hai cheren bare eforturi caște ajutin le manușen te pașion lestar. (Is. 52:7) Chiar cana aghies na-i tu iech studio biblico daștis te ajutis codolen cai studiin te progresin ji co bolimos cana jias ca lengo studio.