ARTICOLO STUDIOSCHE 23
GHILI 28 Te avas le Iehovasche amala!
O Iehova acharel amen te avas lesche amala
„Mânri țărha va avela lența hai me va avela te avav lengo Del.” (EZEC. 37:27)
ANDA SO DAS DUMA
Cado articolo va ajutila amen te dichas cuci o fapto că o Iehova achardea amen te beșas ande leschi țărha simbolico hai va ajutila amen te hachiaras sar lel vo sama pesche amalendar.
1, 2. So bari pachiv del o Iehova pesche manușenghe loialo?
DACĂ varecon pușelas tut con si o Iehova anda tute, so avelas te phenes lesche? Daștil-pe că diches-les sar chio Dad, chio Del hai chio Amal. Si vi but aver buchia cai daisaras te phenas-len anda o Iehova. Tha dichlean-les vroiechdata sar iech Jeno cai acharel tut peste chăre?
2 O rege David phendea că o amalimos mașcar o Iehova hai lesche manușa loialo si sar o phanglimos cai si mașcar iech manuș cai acharel averen peste chăre hai codola cai jian leste. Ando Psalmo 15:1, vo pușlea: „O, Iehova, con daștil te avel achardo ande chi țărha? Con daștil te beșel pe chio plain sfânto?”. (Ps. 15:1) Prin cadal dumes cai aven le Devlestar hachiaras că daisaras te avas le Iehovasche amala. So bari pachiv del amen o Iehova!
O IEHOVA CAMEL TE AVAS LESCHE AMALA
3. Con sas o dintuno jeno achardo le Iehovastar ande peschi țărha hai so simțonas iech caring aver?
3 Angla te astarel te cherel sea le buchia, o Iehova sas-lo corcoro. Pala codoia, o Iehova cărdea pesche dintune Șiaves hai achardea-les te beșel lesa ande leschi țărha simbolico. Cadaia pherdea bucuriatar o ilo le Iehovasco. I Biblia phenel că vo „arachelas peschi bari bucuria” ande pesco Șiavo, o dintuno jeno achardo lestar. Hai vi anda o Isus phenel-pe că ‘sas voime sea o timpo angla leste’. (Prov. 8:30)
4. Sar bariardea o Iehova peschi țărha hai cas mai achardea ande late?
4 O Iehova cărdea vi avere îngeren hai achardea-len ande peschi țărha. I Biblia sicavel că le îngeri sile „le șiave le Devlesche” hai că von sile voime te beșen ande iech than le Iehovasa. (Iov 38:7; Dan. 7:10) But bărșa, le amala le Devlesche sas-le numai codola cai beșle lesa ando cerii. Mai târzio, o Iehova bariardea peschi țărha hai achardea vi le manușen pa i phuv te aven ande late. Mașcar cadala sas o Enoh, o Noe, o Avraam hai o Iov. Andi Biblia sicavel-pe că cadal manușa loialo ‘phirenas le ciace Devlesa’, adică sas-le lesche amala. (Gen. 5:24; 6:9; Iov 29:4; Is. 41:8)
5. So sichioas andai profeția anda Ezechiel 37:26, 27?
5 Andel but bărșa cai nachle, o Iehova achardea vi mai dur pesche amalen caște aven ande leschi țărha. (Citisar Ezechiel 37:26, 27.) Anda i profeția le Ezecheloschi hachiaras că o Iehova camel anda sea o ilo ca lesche manușen loialo te avel-len iech amalimos chidino lesa. O Del promitil că va phandavela „lența iech solaharimos paceaco”. Cadai profeția sicavel că va avela iech timpo cana le creștini machle hai codola cai silen i speranța te train pi phuv va beșena ande iech than andi țărha simbolico le Iehovaschi hai va avena „iech corcori turma”. (Ioan 10:16) Acana, traisaras ande codo timpo!
O IEHOVA LEL SAMA AMENDAR ORICAI SAM
6. Sar daștil iech manuș te avel achardo andi țărha le Iehovaschi hai cai arachel-pe cadai țărha?
6 Andel ghiesa purane, i țărha sas iech than ande savo iech manuș daștilas te odihnil-pe hai te feril-pe catar i vremea jiungali. Iech jeno cai sas achardo andi țărha varecaschi jianelas că codo manuș avelas te lel sama mișto lestar. Cana das amari viața le Iehovasche, vo acharel amen te beșas ande leschi țărha simbolico. (Ps. 61:4) Cade si amen sea so trebul amenghe caște avel amen iech amalimos zuralo le Iehovasa hai te avas amala codolența cai, cadea sar amen, beșen andi țărha le Devleschi. Cadai țărha ci arachel-pe numai ande iech corcoro than. Manușa anda sea le thema daștin te aven acharde andi țărha le Iehovaschi. Dacă sanas tiliardo ande aver them, daștil-pe ca iech congreso specialo, code dichlean tut vi avere phralența hai pheianța saven silen i bari pachiv te beșen andi țărha le Iehovaschi. Cadea că, i țărha le Devleschi si oricai beșen lesche manușa loialo. (Rev. 21:3)
7. Sostar daisaras te phenas că le manușa loialo le Iehovasche cai mule așen vi mai dur ande leschi țărha? (Dich vi i imaginea.)
7 Tha so daisaras te phenas anda le manușa loialo le Iehovasche cai mule? Așen von vi mai dur ande leschi țărha? Da! Sostar daisaras te pachias cadaia? I Biblia sicavel că codola cai mule sile jiuvinde andi goghi le Iehovaschi. O Isus phendea: „Că le mule va avena uștiade opre, vi o Moise sicadea andi relatarea anda i tufa anda canră, cana phenel anda o Iehova că si «o Del le Avraamosco, o Del le Isaacosco hai o Del le Iacobosco». Vo ci silo iech Del codolengo mule, tha codolengo jiuvinde, că anda leste sea sile jiuvinde”. (Luca 20:37, 38)
Vi le manușa loialo le Iehovasche cai mule așen mai dur ande leschi țărha (Dich o paragrafo 7)
SO MIȘTIMATA SI AMEN, THA SO TREBUL TE CHERAS
8. So miștimata si codolen cai beșen andi țărha le Iehovaschi?
8 Cadea sar iech țărha si iech than cai iech manuș daștil te odihnil-pe hai te feril-pe catar le pericolea, sa cadea i țărha le Iehovaschi feril lesche manușen orisavea buchiatar cai daștilas te rimosarel lengo amalimos lesa hai del-len iech ciaci speranța anda o viitorii. Dacă așias pașa o Iehova, orisavo nasulimos cai daștil te cherel-les amenghe o Satan ci va încărela anda sea o timpo. (Ps. 31:23; 1 Ioan 3:8) Andi lumea nevi, o Iehova va lela sama vi mai dur pesche amalendar loialo hai ci va mechela ca niciech buchi te rimosarel lengo amalimos lesa. Mai but, vo va chosela o merimos. (Rev. 21:4)
9. Sar ajucărel o Iehova te phiraven-pe codola cai beșen ande leschi țărha?
9 Anda amende si iech bari pachiv te avas andi țărha le Iehovaschi, adică te avel amen iech amalimos chidino lesa cai daștil te încărel anda sea o timpo. Tha sar trebul te phiravas amen dacă camas te beșas vi mai dur ande leschi țărha? Te gândisaras amen. Dacă varecon acharel tut peste, daștil-pe că cames te jianes sar trebul te phiraves tut leste chăre. Te phenas că o jeno cai achardea tut peste, camel te des tele andal pânre angla so te jias andre ando chăr, hai tu va avela te cheres so phendea tuche vo. Sa cadea, camas te jianas so ajucărel o Iehova codolendar cai camen te așen ande leschi țărha. I iubirea anda o Iehova zuriarel amen te cheras sea so daisaras „caște avas cuci ande lesche iacha cu sea”. (Col. 1:10) Mai but, chiar cana dichas le Iehovas sar amaro Amal, jianas că vo si vi amaro Del hai amaro Dad. (Ps. 25:14) Anda codoia, vo meritil te sicavas lesche pachiv anda sea o ilo. Si importanto te na bâstras niciechdata con si o Iehova hai te bariaras vi mai but amari pachiv caring leste. Cadaia ajutil amen te na cheras niciech buchi cai daștilas te duchavel lesco ilo. Si ciaces, savore camas ‘te phiras modesto amare Devlesa’. (Mica 6:8)
O IEHOVA CI CĂRDEA DIFERENȚEA MAȘCAR LE MANUȘA ANDEL GHIESA PURANE
10, 11. Sar sicadea o Iehova că ci cherel diferențea mașcar le israeliți ando pustio Sinai?
10 O Iehova ci cherel diferențea mașcar le manușa cai beșen ande leschi țărha. (Rom. 2:11) Daisaras te hachiaras mai mișto cadaia cana dichas sar phiradea-pe o Iehova le israelițența ando pustio Sinai.
11 Pala so încaladea avri anda Egipto pesche manușen, o Iehova șiutea rașaia cai te cheren buchi co tabernacolo. Sa cadea, o Iehova phendea vi caring le leviți te cheren chichiva buchia ca i țărha sfânto. Lelas sama o Iehova mai but codolendar cai cherenas buchi ando tabernacolo sau codolendar cai beșenas pașa leste sar le coavere jenendar? Nici, anda codoia că o Iehova ci cherel diferențea.
12. Sar sicadea o Iehova că ci cărdea diferențea mașcar le manușa anda lesco poporo? (Exodo 40:38) (Dich vi i imaginea.)
12 Fiesave israelitos daștilas te avel-les iech amalimos chidino le Iehovasa, chiar cana ci cherelas iech buchi specialo sau ci beșelas pașa o tabernacolo. Sar exemplo, o Iehova camlea ca sea o poporo te dichel o stâlpo norosco hai iagaco cai sas opral o tabernacolo. (Citisar Exodo 40:38.) Cana o noro vazdelas-pe opral i țărha, sea le israeliți, chiar vi codola cai beșenas dur catar i tabăra hai o tabernacolo, daștinas te dichen-les. Cadea că, lenas penghe buchia, chidenas penghi țărha hai tiliarenas ande iech than le coaverența. (Num. 9:15-23) Sa cadea, savore daștinas te așunen claro le dui trompete rupune cai sicavenas că trebulas te tiliaren. (Num. 10:2) Dacă iech manuș beșelas pașa o tabernacolo, cadaia ci sicavelas că sas-les iech amalimos mai chidino le Iehovasa sar codola cai beșenas mai dur lestar. Mai but, fiesavo israelito daștilas te avel amal le Iehovasa hai te pachial ciaces că vo va îndrumila-les hai că va lela sama lestar. Sa cadea vi aghies, ande orisavo than beșas pi phuv, o Iehova lel sama amendar, feril amen hai sicavel amenghe iubirea.
O than cai sas șiuto o tabernacolo sicavelas că o Iehova ci cherel diferențea mașcar le manușa (Dich o paragrafo 12)
O IEHOVA CI CHEREL DIFERENȚEA MAȘCAR LE MANUȘA ANDA AMARE GHIESA
13. Phenen iech buchi prin savi o Iehova sicavel că ci cherel diferențea mașcar le manușa aghies.
13 Aghies, chichiva manușa le Iehovasche beșen pașă catar o sedio mondialo sau catar iech Betelo le Martorengo le Iehovasche. Aver chiar cheren buchi ande cadal thana. Cadea că, von len partea ca le buchia cai cheren-pe code hai bucurin-pe te beșen ande iech than codolența cai sile angla i organizația. Aver phrala vizitin le congregații hai aver den sea pengo timpo andi buchi le Devleschi. Tha, le mai but phrala ci daștin te cheren sea cadala. Dacă chi situația ci mechel tut te cheres mai but andi buchi le Iehovaschi, daștis te pachias anda sea o ilo că vi tu san lesco amal cai beșel ande leschi țărha. Vo lel sama fiesavestar mașcar amende hai vo iubil sea pesche manușen, sa cadea de but! (1 Pet. 5:7) O Iehova lel sama ca sea lesche manușa te aven zurale ando pachiamos, del-len îndrumarea hai feril-len oricana silen nevoia.
14. So exemplo mai ajutil amen te hachiaras că o Iehova ci cherel diferențea mașcar le manușa?
14 O Iehova sicavel că ci cherel diferențea mașcar le manușa vi anda codoia că mechlea i Biblia ca sea le jene pa i phuv te daștin te citin-la. O Sfânto Lil le Devlesco sas scriime andi șib ebraico, aramaico hai grecisco. Codola cai jianen te citin i Biblia ande cadal șiba silen iech amalimos mai zuralo le Iehovasa sar le coaveren cai ci jianen? Nici. (Mat. 11:25)
15. Sar sicavel o Iehova că ci cherel diferențea mașcar le manușa? (Dich vi le imagini.)
15 O Iehova ci acharel amen te avas lesche amala numai anda codoia că sam manușa sicade sau că prinjianas le șiba originalo la Bibliache. O Iehova del pesco goghiaverimos sea le manușenghe pa sea i phuv, indiferento chichi de sicade sile sau nici. Lesco Lil, i Biblia, sas-lo traducime ande mii șiba. Cadea, manușa pa sea i phuv daștin te prinjianen lesche sicaimata hai te arăsăn lesche amala. (2 Tim. 3:16, 17)
Sar sicaven le but șiba ande save sas traducime i Biblia că o Del ci cherel diferențea mașcar le manușa? (Dich o paragrafo 15)
AȘ ANDI ȚĂRHA LE IEHOVASCHI
16. Cadea sar phenel ando Fapte 10:34, 35, sar daisaras te așias andi țărha le Iehovaschi?
16 Si iech bari pachiv anda amende te avas acharde andi țărha simbolico le Iehovaschi. Na-i aver Amal mai lașio hai iubitorii sar amaro Dad cerisco, cai acharel amen anda sea o ilo te beșas lesa ande iech than. Sa cadea, vo ci cherel diferențea mașcar le manușa. Oricon așunel lestar daștil te avel lesco amal, indiferento catar țârdel-pe, cai beșel, sode bărșa siles, dacă si murș sau jiuvli, dacă si iech manuș sicado sau nai-les lil. (Citisar Fapte 10:34, 35.)
17. So va avela te dichas ando articolo cai avel?
17 O rege David pușlea: „O, Iehova, con daștil te avel achardo ande chi țărha? Con daștil te beșel pe chio plain sfânto?”. (Ps. 15:1) Prin o David, o Iehova dea răspunso che cadal pușimata ando Psalmo 15. Ando articolo cai avel, va avela te dichas so buchia trebul te cheras caște așias mai dur amala le Iehovasa.
GHILI 32 Așen pașa o Iehova!
