1. Chiar cana ci ajucărdean-tu, so cărde but anda codola cai prinjianes-le cana phendean lenghe o mesajo anda i Biblia?

ANES tuche amintea i iechto data cana dean chi seama că arachlean o ciacimos? Sea so sichlilean anda i Biblia sas zurales claro. Pachiaian că sea codola cai prinjianes-le va avena vi von bucurime te așunen le buchia cai arăslean te pachias-le. Pachiaian zurales că o mesajo la Bibliaco va paruvela lenghi viața hai că va dela-le iech viitorii șucar. (Ps. 119:105) Anda codoia, pherdo bucuria, phendean che neamurenghe hai che amalenghe le ciacimata cai arachlean-le. Tha ci ajucărdean-tu ca but jene anda lende te na camen te așunen so camlean te phenes lenghe.

2, 3. Sar dichenas le Isusos le mai but manușa anda lesco timpo?

² Ci trebulas te avas uimime cana aver ci camen te așunen o mesajo cai predichisaras-les. Ando iechto secolo, le mai but manușa ci acceptisarde le Isusos, chiar cana vo cherelas miracolea prin save sicavelas că o Del ajutilas-les. Sar exemplo, cana o Isus jiuvindisardea le Lazăros, codola cai așile lesche contra ci daisarde te phenen că codo miracolo ci sas ciacio. Cu sea cadala, le conducători iudei ci acceptisarde le Isusos sar Mesia. Mai but camle te mudaren vi les hai vi le Lazăros. (Ioan 11:47, 48, 53; 12:9-11)

³ O Isus jianglea că le mai but manușa ci avenas te pachian că vo si o Mesia. (Ioan 5:39-44) Vo phendea chichiva discipolenghe le Ioanosche o Botezătorii: „Fericime si codo cai ci arachel niciech motivo de poticnire ande mande”. * (Mat. 11:2, 3, 6) Sostar ci acceptisarde le Isusos cadichi de but manușa?

4. So va dichaia ande cado articolo?

 ⁴ Ande cado articolo hai ande codo cai avel, va avela te dichas sodeva motivea sostar but manușa anda o iechto secolo ci pachiaie ando Isus. Sa cadea, va avela te hachiaras sostar but manușa de aghies mechen ca sodeva buchia te așiaven-le te na așunen amaro mesajo. Va avela te dichas vi sar ajutil-ame iech zuralo pachiamos ando Isus te na poticnisaras-ame.

5. So daisardea te așiavel chichivan te pachian că o Isus sas-lo o promiso Mesia?

⁵ But manușa ci acceptisarde le Isusos, anda codoia că jianenas cai barilea vo. Chiar cana jiangle că o Isus sas iech lașio sicaitorii hai că cărdea miracolea, anda lende vo sas numai o șiav ieche tâmplarosco. Mai but, vo sas-lo anda Nazaret, iech foro, anda savo but manușa pachianas că ci sas-lo importanto. Chiar vi o Natanael, cai cărdilea pala codoia iech discipolo le Isusosco, phendea mai anglal: „Daștil te înclel vareso lașio anda Nazaret?”. (Ioan 1:46) Daștil-pe că le Natanaelos ci placeia-les o foro ande savo beșelas atunci o Isus. Sau daștil-pe că gândilas-pe ca i profeția anda Mica 5:2, cai phenelas că o Mesia avelas te năștil-pe ando Betleem, na ando Nazaret.

6. Sar daisardeias codola ando timpo le Isusosco te den penghi seama că vo sas o Mesia?

⁶ So phenen le Scripturi? O profeto Isaia phendea de mai anglal că le dușmani le Isusosche ‘ci va avena interesime la mai țâne buchiandar cai sicaven catar avel o Mesia’. (Is. 53:8) But anda cadal buchia sas-le profețime. Dacă avileas te roden mai mișto, avileas te jianen că o Isus năștisailo ando Betleem hai că sas-lo iech urmașo le regesco David. (Luca 2:4-7) Cadea, von avileas te hachiaren că o than ande savo năștisailo o Isus sas codo sicado andi profeția anda Mica 5:2. Atunci, sostar ci acceptisarde le manușa le Isusos? Anda codoia că sighiarde te țârden concluzii bi te prinjianen sea-l buchia, cadea că, von ci pachiaie ando Isus.

7. Sostar ci acceptin but manușa le slujitoren le Iehovasche?

⁷ Dichas cadai situația vi aghies? Da. Le mai but Martori le Iehovasche ci sile barvale sau bare manușa. Von sile dichle sar manușa „bi sicaimasco hai simplo”. (Fap. 4:13) Unii pachian că ci daștin te sicaven averen anda i Biblia, anda codoia că ci sas-le ca bare școli religioso. Aver phenen că le Martori le Iehovasche sile „iech religia americano”, chiar cana numai 1 anda 7 Martori beșen andel Statele Unite. Hai averenghe sas phendo că le Martori ci pachian ando Isus. Andel bărșa cai nachle, anda lende sas phendo că sile „comuniști”, „spioni americano” hai „extremiști”. Cadea că, codola cai așunen cadal buchia poticnin-pe anda codoia că ci prinjianen, sau ci camen te prinjianen o ciacimos andal Martori le Iehovasche.

8. Cadea sar phenel-pe andel Fapte 17:11, so trebulas te cheren le manușa caște jianen con si o poporo le Devlesco de aghies?

⁸ So daisaras te cheras caște na poticnisaras-ame? Trebul te dichas le dovezi. Cadea cărdea vi o evanghelisto Luca. Vo rodea „pherdo atenția sea-l buchia de mai anglal”, cadea încât codola cai citin lesco lil te pachian că sea so așunde anda o Isus si ‘demno pachiamasco’. (Luca 1:1-4) Le iudei anda o purano foro Bereea sas-le sa cadea sar o Luca. Cana așunde i vestea lași anda o Isus, von rodine ande le Scripturi ebraico caște dichen că so sas lenghe phendo sas ciaces. (Citisar Fapte 17:11.) Vi ame trebul te dichas le dovezi. Trebul te  dichas so sicaven-ame le slujitori le Devlesche hai te dichas so phenen le Scripturi. Sa cadea, si importanto te studiisaras i istoria le poporosco le Iehovasco andal timpuri moderno. Dacă rodas mișto ci va avela te avas coriarde catar le prejudecăți sau ci va avela te las-ame pala so phenen le manușa.

9. So întâmplosardea-pe cana o Isus ci camlea te sicavel le iudeienghe iech semno anda o cerii?

⁹ Ando timpo le Isusosco, anda unii iudei ci sas destul numai lesche sicaimata. Von camle mai but. Von mangle „iech semno anda o cerii”, prin savo te sicavel că vo sas o Mesia. (Mat. 16:1) Daștil-pe că von mangle cadaia anda codoia că hachiarde greșime o pasajo anda Daniel 7:13, 14. Cu sea cadala, ci avilea o timpo ca cadai profeția te pherdiol-pe. Le sicaimata le Isusosche trebuisarde te aven destul caște pachian că vo sas o Mesia. Cana ci camlea te sicavel lenghe o semno cai mangle-les von poticnisarde-pe. (Mat. 16:4)

10. Sar pherdea o Isus i profeția cai scriisardea-la o Isaia anda o Mesia?

¹⁰ So phenen le Scripturi? O profeto Isaia phendea anda o Mesia: „Ci va dela cingar, ci va vazdela pesco glaso hai ci va cherela te așunel-pe leschi vocea po drom”. (Is. 42:1, 2) O Isus cărdea pesco servicio pi phuv bi te del-pe baro hai bi te țârdel i atenția caring peste. Vo ci vazdea bare templea hai ci phiradea hureaimos specialo religioso. Mai but, vo ci manglea averendar te phenen lesche titluri importanto religioso. Ande lesco proceso, chiar cana leschi viața sas ando pericolo, vo ci camlea te cherel iech miracolo caște dichel-les o Irod. (Luca 23:8-11) Si ciaces, o Isus cărdea miracolea, cu sea cadala, lesco obiectivo principalo sas te predichil i vestea lași. „Anda codoia avilem”, phendea vo pesche discipolenghe. (Mar. 1:38)

11. Ce buchia greșime ajucăren unii manușa de aghies?

¹¹ Dichas cadai situația vi aghies? Da. But manușa sile impresionime catar le bare catedrale, ande save si cuci opere de artă,  catar le rașaia cai sile bare titluri hai catar le sărbători, cai lenghe origini hai so însemnon von sile de but timpo bâstărde. Tha so sichion anda o Del hai anda lesco scopo codola cai jian ca cadal servicii religioso? Codola cai aven ca amare întruniri creștino prinjianen so ajucărel o Iehova amendar hai sar te cheras leschi voința. Le Săli le Regatosche sile clădiri uje, modesto hai nebaricane. Codola cai sile opral amende ci phiraven iech hureaimos specialo hai nai-le titluri importanto. O Cuvânto le Devlesco si i baza anda amare sicaimata hai ande so pachias ame. Cu sea cadala, but manușa poticnin-pe anda codoia că pachian că o modo sar anas închinarea silo prea simplo, hai so sicavas na-i so von camen te așunen.

12. Cadea sar phenel-pe ando Evrei 11:1, 6, pe soste trebul te bazol-pe amaro pachiamos?

¹² So daisaras te cheras caște na poticnisaras-ame? O apostolo Pavel phendea le creștinenghe anda Roma: „O pachiamos avel andal buchia așunde, hai codola așunde aven prin o cuvânto anda o Cristos”. (Rom. 10:17) Cadea că, ame zuriaras amaro pachiamos cana studiisaras le Scripturi, na cana las partea ca le sărbători religioso nebiblico, indiferento chichi de șucar daștin te aven cadala andal iacha. Trebul te avel-ame iech pachiamos zuralo, bazome pe iech prinjianimos exacto, anda codoia că „bi pachiamasco ci daisaras te avas plăcuți le Devlesche”. (Citisar Evrei 11:1, 6.) Cadea că, ci trebul amenghe iech baro semno anda o cerii caște cherel-ame te pachias că arachleam o ciacimos. Dacă dichas atento le sicaimata anda i Biblia si destul caște na avel-ame niciech îndoiala.

13. Sostar doșarde but manușa le Isusos?

¹³ Andel ghiesa le Isusosche, le discipolenghe le Ioanosche o Botezătorii ci avilea lenghe te pachian că le discipoli le Isusosche ci postinas. O Isus phendea lenghe că, chichi timpo vo sas-lo jiuvindo ci sas-le sostar te postin. (Mat.  9:14-17) Cu sea cadala, le farisei hai aver manușa cai sas lesche contra doșarde le Isusos că ci respectilas lenghe obiceiuri hai holiarde-pe cana sastiardea le manușen ando sabato. (Mar. 3:1-6; Ioan 9:16) Pe iech partea, von sas-le baricane te phenen că respectinas o sabato, tha, pe aver partea, bichinenas bi te avel lenghe lajiav buchia ando templo. Von holiarde-pe cana o Isus doșardea-le anda cadai buchi. (Mat. 21:12, 13, 15) Tha le iudei, casche predichisardea andi sinagoga anda Nazaret sas-le zurales holiarde, cana o Isus folosisardea exemplea anda i istoria le Israeloschi caște sicavel chichi de egoisto hai bi pachiamasco sas-le von. (Luca 4:16, 25-30) O phiraimos le Isusosco ci sas cadea sar ajucărde-pe but manușa anda lesco timpo, hai cadaia cărdea bute jenen anda lende te poticnin-pe. (Mat. 11:16-19)

14. Sostar phendea o Isus că le tradiții le manușenghe cai avenas contra le Scriputuri ci sas-le lașe?

¹⁴ So phenen le Scripturi? O Iehova phendea prin pesco profeto Isaia: „Cado poporo pașiol mandar prin lesco mui hai del-ma pachiv le uștența, tha lengo ilo silo zurales dur mandar, hai lenghi dar mandar așel andel manușenghe porunci, sicade averendar”. (Is. 29:13) Le Isusos sas-les ciacimos cana phendea că le tradiții cai avenas contra le Scripuri ci sas-le lașe. Anda codoia că șionas le legi hai le tradiții le manușenghe mai opral sar le Scripturi, le iudei ci acceptisarde le Iehovas hai codoles cai bișaldea-les vo, o Mesia.

15. So ci placial bute manușen ca le Martori le Iehovasche?

¹⁵ Dichas cadai situația vi aghies? Da. But manușa holiaren-pe cana le Martori le Iehovasche ci respectin, cadea sar von, le tradiții nebiblico, sar avelas le ghiesa de naștere hai o Crăciuno. Aver sile zurales holiarde cana le Martori le Iehovasche ci len partea ca le sărbători naționalo sau ci încăren le obiceiuri anda o prahimos cai sile contra o Cuvânto le Devlesco. Codola cai poticnin-pe anda cadal motivea, daștil-pe, că pachian zurales că anen iech închinarea le Devlesche cadea sar camel vo. Tha von ci daștin te aven plăcuto lesche dacă încăren mai but ca le tradiții anda cadai lumea sar ca le sicaimata claro anda i Biblia. (Mar. 7:7-9)

16. Cadea sar phenel-pe ando Psalmo 119:97, 113, 163-165, so trebul te cheras hai so trebul te evitosaras?

¹⁶ So daisaras te cheras caște na poticnisaras-ame? Trebul te avel-ame iech zurali iubirea anda le legi hai principii le Iehovasche. (Citisar Psalmo 119:97, 113, 163-165.) Cana iubisaras le Iehovas ci va avela te acceptisaras niciech tradiția cai les ci placial-les. Mai but ci va avela te mechas ca niciech buchi te avel mai importanto sar amari iubirea anda o Iehova.

17. So ajucărenas-pe but iudei anda o timpo le Isusosco ande soste priveal o Mesia?

¹⁷ Unii iudei anda o timpo le Isusosco camle atunci iech paruimos politico. Von ajucărde-pe ca o Mesia te eliberil-le tela o jugo romano. Tha, cana camle te cheren-les rege, o Isus ci acceptisardea. (Ioan 6:14, 15) Le rașaia hai vi aver daraile că o Isus va anela iech paruimos politico cai va cherela le romanen te aven holiarico pe lende, hai cadea le conducători religioși va hasarena pengo zuralimos cai sas lenghe dino. Anda cadal griji politico, but iudei poticnisarde-pe.

18. Ce profeții biblico anda o Mesia ci line andi seama but iudei?

 ¹⁸ So phenen le Scripturi? But profeții phenas de mai anglal că o Mesia avelas te avel iech războinico zuralo. Tha, aver sicavenas că vo trebulas mai anglal te merel anda amare păcatea. (Is. 53:9, 12) Atunci, sostar but iudei anda o timpo le Isusosco pachianas cadal buchia greșime anda o Mesia? Anda codoia că von ci line andi seama le profeții cai ci rezolvinas lenghe probleme de atunci. (Ioan 6:26, 27)

19. So ajucăren but manușa amendar?

¹⁹ Dichas cadai situația vi aghies? Da. Aghies but manușa poticnin-pe anda codoia că ame ci șioas ame andi politica. Von ajucăren-pe ca vi ame te jias co voto cana si alegeri. Cu sea cadala, ame jianas că dacă alosaras amenghe iech conducătoro umano, ame das de iech partea le Iehovas. (1 Sam. 8:4-7) Sa cadea, unii manușa pachian că trebulas te vazdas școli hai spitalea hai te cheras mai but buchia caște ajutisaras averen. Von poticnin-pe anda codoia că dichen că das sea amari zor andi lucrarea de predicare ando than te rezolvisaras le pharimata cai si le manușen aghies.

20. Cadea sar sicaven le cuvintea le Isusosche anda Matei 7:21-23, savi trebul te avel i mai importanto buchi anda amende?

²⁰ So daisaras te cheras caște na poticnisaras-ame? (Citisar Matei 7:21-23.) Amari mai importanto buchi trebul te avel i lucrarea cai dea-la amenghe o Isus. (Mat. 28:19, 20) Ci trebul te mechas-ame niciechdata țârdine catar le buchia politico hai socialo anda cadai lumea. Ame iubisaras le manușen hai camas lengo miștimos. Tha, jianas că o mai lașio modo te ajutisaras le manușen si te sicavas-le anda o Regato le Devlesco hai te ajutisaras-le te cărdion amala le Iehovaia.

21. So trebul te avas hotărâme te cheras?

²¹ Ande cado articolo, dichleam ștar motivea anda save but iudei anda o iechto secolo ci acceptisarde le Isusos, motivea cai daștin te cheren vi sodeva manușen de aghies te na acceptin lesche continuatoren. Tha cadala ci si le corcore motivea de poticnire. Ando articolo cai avel, va avela te dichas aver ștar motivea. Cadea că, te avas hotărâme te cheras sea so daisaras caște na poticnisaras-ame hai te zuriaras amaro pachiamos.