1, 2. Prin ce pharimata nachen but Martori le Iehovasche?

O APOSTOLO Pavel phendea le Timoteiosche hai vi sea le creștinenghe te cheren mișto pengo servicio. (2 Tim. 4:5) Soavră das amari zor te aplichisaras cado îndemno, tha na-i sea o timpo ușoro. Bute phralen hai pheian trebul-le iech baro tromai caște jian andi lucrarea de predicare. (2 Tim. 4:2) Te gândisaras-ame sar exemplo ca le phrala cai beșen andel thema cai amari activitatea sili așiadi sau interzicime. Von predichisaren chiar cana jianen că daștin te hasaren penghi libertatea.

² Le slujitori le Iehovasche nachen prin mai but pharimata, cai daștin te peraven-le. Sar exemplo, but jene cheren buchi phares numai caște avel lenga familia so trebul. Von camenas te jian mai but andi predicarea, tha, co sfârșito le curchesco von sile zurales chine. Aver phrala ci daștin te cheren but andi predicarea anda codoia că sile nasfale sau phure, hai unii anda cadala ci daștin nici măcar te înclen anda o chăr. Aver phrala simțosaren-pe sea o timpo că ci sile lașe chancesche. I Mary *, iech phei anda Oriento Mijlocio, phenel: „Trebul te cherav phares buchi caște încărav tela controlo mânre sentimentea cana som peradi hai cadaia cherel-ma te avav chini emoționalo hai ciorel mandar o timpo hai o zuralimos cai trebulas te dav-le andi lucrarea de predicare hai anda codoia simțosarav-ma doșali”.

3. So va dichaia ande cado articolo?

³ Chiar cana nachas prin pharimata, o Iehova daștil te del-ame o zuralimos cai trebul amenghe caște slujisaras lesche mai dur chichi daisaras andi situația ande savi sam. Mai dur, va avela te dichas sar daștil te ajutil-ame o Iehova. Tha, mai anglal va avela te dichas sar zuriardea vo le Pavelos hai le Timoteios te cheren pengo servicio chiar cana sas-le pharimata.

4. Prin ce pharimata nachlea o Pavel?

⁴ O Pavel nachlea prin but pharimata. Sar exemplo, vo sas-lo mardo, dino dab barența hai șiudino ando phandaimos. Ande cadal situații trebuisardea lesche but zuralimos. (2 Cor. 11:23-25) Po iechdata, ci sas lesche lajiav te phenel că silo perado. (Rom. 7:18, 19, 24) Le Pavelos sas-les vi iech „canro ando mas”, iech pharimos savestar camlea but te scăpil hai manglea le Iehovas zurales te duriarel-les lestar. (2 Cor. 12:7, 8)

5. So daisardea te cherel o Pavel ande pesco servicio, chiar cana sas-les pharimata?

⁵ O Iehova zuriardea le Pavelos te daștil te cherel pesco servicio chiar cana sas-les but pharimata. Te gândisaras-ame so cărdea o Pavel ande pesco servicio. Sar exemplo, cana sas-lo șiuto tela phandaimos ando chăr andi Roma, vo apărisardea pherdo zelo i vestea lași angla le conducători iudei hai angla le bare oficiali. (Fap. 28:17; Filip. 4:21, 22) Sa cadea, vo predichisardea bute jenenghe anda i garda pretoriano, hai vi codolenghe cai avenas leste. (Fap. 28:30, 31; Filip. 1:13) Ande sea codo timpo, o Pavel scriisardea tela inspirația chichiva lila cai andine miștimata vi le creștinenghe anda puraimata tha vi codolenghe de aghies. Mai but, prin lesco exemplo o Pavel zuriardea le phralen anda i congregația anda Roma, cadea că len sas-le „vi mai but tromai te vestin bi daraco o Cuvânto le Devlesco”. (Filip. 1:14) Chiar cana o Pavel ci daisardea te cherel cadichi de but sar camelas, vo cărdea sea so daisardea ande peschi situația hai cadaia cărdea ca „i vestea lași te avel îngărdi mai dur”. (Filip. 1:12)

6. Cadea sar phenel-pe ando 2 Corinteni 12:9, 10, so ajutisardea le Pavelos te cherel pesco servicio creștino?

⁶ O Pavel hachiardea că sea so cărdea ando servicio andino le Devlesche sas prin o zuralimos le lehovasco, na prin pesco zuralimos. Vo phendea că o zuralimos le Devlesco silo „cărdo perfecto ando covlimos”. (Citisar 2 Corinteni 12:9, 10.) Prin pesco spirito sfânto, o Iehova dea le Pavelos o zuralimos caște cherel mișto pesco servicio vi atunci cana sas-lo persecutime hai phandado sau cana nachlea prin aver situații phare.

7. Prin ce pharimata trebuisardea o Timotei te nachel caște cherel pesco servicio?

 ⁷ Vi o Timotei, iech colaboratoro mai tărno le Pavelosco, trebuisardea te pachial-pe ando zuralimos le Devlesco caște daștil te cherel pesco servicio. Vo sas pașa o Pavel ande lesche lungi călătorii misionaro. O Pavel bișaldea-les vi ande aver călătorii caște jial hai te zuriarel le congregații. (1 Cor. 4:17) Daștil-pe că o Timotei ci pachiaia că daștil te cherel i misiunea cai sas lesche dini, anda codoia o Pavel phendea lesche: „Chonic te na prasal-tu anda codoia că san tărno”. (1 Tim. 4:12) Mai but, ande cado timpo, le Timoteios sas-les iech „canro ando mas”, adică sas-lo ‘butivar nasfalo’. (1 Tim. 5:23) Tha o Timotei jianglea că, prin o spirito sfânto, o Iehova avelas te del-les o zuralimos cai trebulas-les caște predichil i vestea lași hai te slujil pesche phralenghe. (2 Tim. 1:7)

8. Sar del o Iehova zuralimos pesche slujitorenghe de aghies?

⁸ Aghies, o Iehova del pesche slujitoren „o zuralimos cai nachel o normalo” caște ajutil-le te slujin lesche mai dur pherde pachiamos. (2 Cor. 4:7) Mai dur, va avela te dichas ștar buchia prin save o Iehova zuriarel-ame caște așias loialo: i rugăciunea, i Biblia, amare phrala hai i lucrarea de predicare.

9. Sar daștil te ajutil-ame i rugăciunea?

⁹ Rugăciunea. Ando Efeseni 6:18, o Pavel phenel amenghe te rughisaras-ame „oricana” le Devlesche. O Iehova va dela răspunso ca amare rugăciuni prin o fapto că va dela-ame zuralimos. O Jonnie cai beșel andi Bolivia, simțosardea sar ajutisardea-les o Iehova cana nachlea prin phare zumaimata. Leschi rromni hai lesche dada cărdile nasfale ande sea codo timpo, hai trebuisardea te lel seama pe sea-l trin. Leschi dei mulea, hai leschi rromni hai lesco dad sastiarde-pe pala mai but timpo. Cana dichel parpale o Jonnie phenel: „So ajutisardea-ma de fiesavi data cana somas zurales perado sas le rugăciuni ande save dem duma le Iehovaia anda fiesavo pharimos cai sas-ma”. Cadea, o Iehova dea le Jonnies o zuralimos te jial mai dur. O Ronald, iech phuro de congregație anda Bolivia, nachlea prin sa cado pharimos. Vo așundea că lesca deia sas-la cancero, hai pala iech șion, voi mulea. O Ronald phenel so ajutisardea-les ande cadai situația: „Cana rughisarav-ma pâtrav mânro ilo angla o Iehova hai dav duma leia anda mânre ducha. Jianav că vo hachiarel-ma mai mișto sar oricon, chiar mai mișto sar hachiarav-ma me”. Po iechdata, daștil-pe că simțosaras că ci mai si ame zuralimos sau că ci jianas so te mangas andi rugăciunea. Tha o Iehova phenel amenghe te rughisaras-ame, chiar cana si amenghe pharo te phenas so si ande amari goghi hai ande amaro ilo. (Rom. 8:26, 27)

10. Cadea sar phenel-pe ando Evrei 4:12, sostar si importanto te citisaras andai Biblia hai te meditosaras ca so citisardeam?

¹⁰ Biblia. O Pavel citisardea le Scripturi caște primisarel zuralimos hai mângâierea. Sa cadea daisaras te cheras vi ame. (Rom. 15:4) Cana citisaras o Cuvânto le Devlesco hai meditosaras leste, o Iehova daștil te ajutil-ame prin pesco spirito te hachiaras sar aplichin-pe le Scripturi ande amari situația. (Citisar Evrei 4:12.) O Ronald, anda savo deam duma mai anglal, phenel: „Cărdem manghe o obiceio te citisarav ande fiesavi riat iech cotor andai Biblia. Meditosarav but ca le calități le Iehovasche hai ca o modo sar vo lel seama pe lesche slujitori, cadaia del-ma zuralimos te jiav mai dur”.

11. Sar dea i Biblia zuralimos iecha pheiache saveache mulea laco rrom?

 ¹¹ I meditarea ca o Cuvânto le Devlesco daștil te ajutil-ame te dichas cadea sar si ciaces amari situația. Ita sar ajutisardea i Biblia iecha pheia cai sas-li duchadi anda codoia că mulea laco rrom. Iech phuro de congregație phendea lache că daștilas te sichiol șucar buchia anda o lil Iov. Cana începosardea te citisarel i relatarea anda Iov, voi doșardea-les sigo anda leschi gândirea greșime, hai phendea ande peste: „Iov, na mai gândisar-tu numai ca che pharimata!”. Tha pala codoia dea peschi seama că vi la sas-la sa cadai atitudinea. I meditarea ajutisardea-la te paruvel peschi atitudinea hai dea-la o zuralimos caște daștil te nachel părdal i duch cai andea-la o merimos lache rromesco.

12. Sar zuriarel-ame o Iehova prin amare phrala?

¹² Amare phrala. O Iehova zuriarel-ame vi prin amare phrala. O Pavel scrisardea că camelas but ca vo hai lesche phrala ando pachiamos ‘te zuriaren-pe iech averes’. (Rom. 1:11, 12) Anda i Mary, anda savi deam duma mai anglal, si zurales cuci o timpo cana beșel ande iech than le phralența hai le pheianța. Voi phenel: „Caște ajutil-ma, o Iehova folosisardea-pe le phralendar hai le pheiandar cai nici na jianenas prin ce pharimata nachav. Von zuriarde-ma chiar cana sas-ma nevoia, prin lenghe cuvintea cai phende-le sau scriisarde-le manghe. Sa cadea, ajutil-ma but te dav duma le pheianța cai nachle prin sa codol buchia sar me hai te sichioav anda lenghi experiența. Vi le phure cheren-ma te simțosarav că sima iech cuci than andi congregația”.

13. Sar daisaras te zuriaras-ame iech averes ca le întruniri la congregațiache?

¹³ Iech andal mai lașe thana cai daisaras te zuriaras-ame iech averes si le întruniri la congregațiache. Cana jias ca le întruniri camas te zuriaras amare phralen hai te phenas lenghe anda ilo chichi de but iubisaras-le hai ce cuci sile von anda amende. Sar exemplo, angla so te începosarel iech întrunirea, iech phuro de congregație po anav Peter phendea iecha pheiache saveaco rrom nai-lo Martoro: „Nici na avel tuche te pachias chichi de but zuriares-ame cana dichas-tu cade! Sea o timpo che șiov șiave sile pregătime te aven hai te den răspunsuri ca le întruniri”. Lache iacha pherdile-pe asfența hai anda ilo phendea lesche parpale: „Ci avel tuche te pachias chichi nevoia sas-ma te așunav cadal cuvintea aghies!”.

14. Sar zuriarel-ame i lucrarea de predicare?

¹⁴ Lucrarea de predicare. Cana das duma averența andai i Biblia, simțosaras-ame zuriarde, chiar cana le manușa așunen-ame sau nici. (Prov. 11:25) Iech phei po anav Stacy simțosardea sar zuriardea-la i lucrarea de predicare. Cana varecon anda lachi familia sas excludime, voi sas zurales duchadi, doșarelas-pe hai phenelas că daisardeas te cherel mai but caște na întâmplol-pe cadaia. Ci daștilas te gândil-pe ca aver vareso. So ajutisardea cadala pheia te nachel părdal cadai situația phari? I lucrarea de predicare. Cana predichilas, voi gândilas-pe ca le manușa anda o teritorio cai sas-le nevoia ajutorostar. I Stacy phenel: „Ande codo timpo, o Iehova ajutisardea-ma te studiisarav varecasa cai cărdea sigo progresea, hai cadaia zuriardea-ma but. I buchi cai ajutil-ma o mai but si i lucrarea de predicare”.

15. So sichioas anda so phendea i Mary?

¹⁵ But phrala hai pheia ci daștin te cheren but andi predicarea, datorime la situațiache ande savi sile. Dacă vi tu san ande cadai situația, na bâstăr că o Iehova silo mulțumime cana cheres sea so daștis caște des-les so  si tut mai lașio. I Mary, anda savi deam duma mai anglal, găli ande iech congregația de șib străino. Mai anglal, simțosardea că ci cherel chanci andi congregația. Voi phenel: „Iech timpo, sea so daisardem te cherav sas te dav iech răspunso harno, te citisarav iech verseto biblico sau te dav iech plianto andi predicarea”. Cana dichelas că le coaver denas duma mai mișto i șib sar voi, i Mary simțolas că nai-li lași chancesche. Cu sea cadala, voi parudea peschi atitudinea cana hachiardea că o Iehova daștil te folosil-la, chiar cana ci jianelas mișto codoi șib. Voi phenel: „Le ciacimata cai salvin vieți sile zurales simplo, hai von si codola cai cheren le manușen te paruven-pe”.

16. So ajutil codolen cai ci daștin te înclen anda o chăr?

¹⁶ O Iehova dichel că camas te las partea ca i lucrarea de predicare, chiar cana ci daisaras te încleas anda o chăr. Vo daștil te del-ame ocazii te predichisaras codolenghe cai len seama pe amende chăre sau ando spitalo. Dacă dichas parpale soste cărdeam mai anglal hai so daisaras te cheras aghies, va avaia perade. Tha, dacă dichas o ajutorii cai del-les amenghe o Iehova aghies, va daisaraia te nachas părdal orisavo zumaimos pherde bucuria.

17. Cadea sar phenel-pe ando Eclesiasto 11:6, sostar trebul te predichisaras mai dur chiar cana ci dichas sigo le rezultatea?

¹⁷ Ci jianas save semințea le ciacimasche va astarena rădăcini hai va începona te barion. (Citisar Eclesiasto 11:6.) Sar exemplo, i Barbara, iech phei cai sila mai but sar 80  bărș, predichisarel butivar prin o telefono hai prin lila. Iech data, voi șiutea ande iech lil o număro anda 1 martie 2014 anda i revista O Turno de Veghe, cai arachel-pe o articolo: „So cărdea o Del anda tute?”. Pala codoia bișaldea o lil iecha familiache, bi te jianel că le dui, o rrom hai i rromni ci mai sas-le Martori le Iehovasche de but timpo. Von citisarde i revista butivar. O murș simțosardea că o Iehova delas duma leia directo. Le dui începosarde te jian ca le întrunire hai cărdile pale Martori le Iehovasche, pala mai but sar 27 bărș. Te gândisaras-ame chichi de zuriardi simțosardea-pe i Barbara cana dichlea ce șucar buchia cărdea laco lil!

18. So daisaras te cheras caște primisaras zuralimos le Devlestar?

¹⁸ O Iehova del-ame but buchia caște zuriarel-ame hai mașcar cadala si i rugăciunea, i Biblia, amare phrala hai i lucrarea de predicare. Cana folosisaras le buchia cai del-le amenghe vo, sicavas că si ame pachiamos ande leste că vo daștil hai camel te ajutil-ame. Cadea că, te șioas amaro pachiamos sea o timpo ande amaro Dad cerisco, cai camel „te sicavel pesco zuralimos ando miștimos codolengo casco ilo silo întrego caring leste”. (2 Cron. 16:9)