1, 2. Phenen sar daștin te arăsăn le sicaimata biblico mai importanto anda amende cana aven paruimata ande amari viața.

 ANDO ghies cana si lengo abiav, o jamutro hai i bori așunen atento i cuvântarea bazome pi Biblia anda i căsătoria. Cadaia ci si i iechto data cana așunen cadal sicaimata biblico. Tha, acana cadala astaren te aven mai importanto anda lende. Sostar? Anda codoia că acana von va trebuna te len-pe pala lende, sar rrom hai rromni.

² Sa cadea si le buchia vi cana iech rrom hai iech rromni arăsăn te aven dada. Ando timpo cai nachlea, daștil-pe că, von așunde but cuvântări anda o bariarimos le șiavengo. Tha acana, că len va avela len iech șiavo hai va trebula te bariaren-les, von hachiaren că cadal sicaimata arăsăn mai importanto anda lende. O bariarimos ieche șiavesco, si ciaces iech bari responsabilitatea. Cadea că, cana aven paruimata ande amari viața, daisaras te dichas ande iech modo nevo le sicaimata biblico mișto prinjiande. Anda codoia, le slujitori le Iehovasche citisaren o Cuvânto le Devlesco hai gândisaren-pe ca le buchia cai citisarde-le „ande sea le ghiesa” anda lenghi viața, cadea sar sas phendo le regenghe israeliți andal puraimata. (Deut. 17:19)

3. So va dichaia ande cado articolo?

³ Le daden silen iech andal mai bare privilegii cai daștin te aven ieche creștinos, codo te sicaven penghe șiaven anda o Iehova. Tha von trebun te cheren mai but sar numai te phenen lenghe buchia anda o Del. Von camen te șion ando ilo penghe șiavengo iech iubirea zurales bari anda leste. Sar daștin te cheren cadaia? Ande cado articolo, va dichaia ștar sicaimata biblico cai del-le o Iehova andal dada. (2 Tim.  3:16) Sa cadea, va avela te dichas so miștimata sas chichiva daden creștini anda codoia că line-pe pala cadal sicaimata biblico.

4. So sicaimos biblico daștil te ajutil le daden te șion ando ilo lenghe șiavengo iech iubirea zurales bari anda o Iehova? (Iacov 1:5)

⁴ Sicaimos 1: Roden i îndrumarea le Iehovaschi. Manghen le Iehovas te del tumen goghiaverimos caște ajutin tumare șiaven te bariaren iech bari iubirea anda leste. (Citisar Iacov 1:5.) O Iehova si o mai lașio jeno cai daștil te sicavel-ame sar te cheras cadaia. Ita dui buchia. I iechto: O Iehova jianel o mai mișto sar te avel iech dad. (Ps. 36:9) Hai i duito: Lesche sicaimata goghiaver sile sea o timpo lașe. (Is. 48:17)

5. a) Sar ajutil i organizația le Iehovaschi le daden? b) So sichilean anda o modo sar bariarde penghe șiaven o phral hai i phei Amorim anda o materialo video?

⁵ O Iehova del but haben spiritualo le daden prin pesco Cuvânto hai peschi organizația. (Mat. 24:45) Sar exemplo, arachen-pe but sfaturi lașe andel articolea „Ajutorii andal familii”, cai cărde partea but bărșa anda i revista Ușten!, hai acana arachas-le po site-o jw.org. Sa cadea, but interviuri hai aver materialea video pa amaro site-o daștin te ajutin le daden te bariaren penghe șiaven cadea sar phenel o Iehova. * (Prov. 2:4-6)

6. So phendea iech dad anda i îndrumarea cai vo hai leschi rromni primisarde-la catar i organizația le Iehovaschi?

⁶ But dada sicade penghi recunoștința anda o ajutorii cai del-les o Iehova prin peschi organizația. Iech dad po anav Joe phenel: „Ci si ușoro te bariares trine șiaven ando ciacimos. Me hai mânri rromni mangas sea o timpo le Iehovas te ajutil-ame. Butivar dichleam că iech articolo sau iech materialo video avile exacto cana trebulas te ajutin-ame te nachas părdal i situația ande savi samas. O fapto că rodas te șioas amaro pachiamos ande so phenel amenghe o Iehova te cheras ajutisardea-ame o mai but”. O Joe hai leschi rromni dichle că cadal materialea ajutisarde but lenghe șiaven te pașion le Iehovastar.

7. Sostar si importanto ca le dada te aven iech lașio exemplo andal șiave? (Romani 2:21)

 ⁷ Sicaimos 2: Aven iech lașio exemplo anda tumare șiave. Le șiave dichen atento sea so cheren lenghe dada hai butivar len-pe pala lende. Si ciaces, niciech andal dada ci silo perfecto. (Rom. 3:23) Cu sea cadala, le dada goghiaver den penghi zor te aven exemplea lașe anda penghe șiave. (Citisar Romani 2:21.) Iech dad phenel: „Cadea sar iech cotor manro țârdel ande peste o pai, sa cadea vi le șiave len-pe pala sea so amen phenas hai cheras. Mai but, von va phenena amenghe cana va dichena că ci cheras vareso so sicavas len că trebulas te cheren”. Cadea că, dacă camas ca ando ilo amare șiavengo te bariol i iubirea anda o Iehova, trebul mai anglal te dichen amende cadai iubirea.

8, 9. So sichilean catar o Andrew hai catar i Emma?

⁸ Si but moduri prin save le dada daștin te ajutin penghe șiaven te iubin le Iehovas. Iech phral po anav Andrew cai siles 17 bărșa phenel: „Mânre dada sicade-ma chichi de importanto si o manglimos. Ande fiesavi riat, mânro dad manghelas-pe le Iehovasche ande iech than manța, chiar cana me cărdemas deja mânro manglimos. Amare dada phenenas butivar manghe hai mânra pheiache: «Daștin te manghen tumen le Iehovasche ori chichivar camen». Cadea, o manglimos arăslea zurales cuci anda mande. Aghies, si manghe zurales ușoro te mangav-ma le Iehovasche, anda codoia că dichav-les sar ieche Dades iubitorii”. Dada, na bâstrăn niciechdata so but daștil te ajutil tumari iubirea anda o Iehova tumare șiaven!

⁹ I Emma si iech aver exemplo. Laco dad mechlea pesca familia hai lachi dei așilea te del le but camimata cai vo cărdea-le. Voi phenel: „Butivar, mânri dei arăsălas bi lovengo. Tha, voi phenelas sea o timpo că o Iehova lel sama pe pesche slujitori. Daisardem te dichav că prin o modo sar trailas peschi viața, voi sicadea că pachialas ciaces cadai buchi. Mânri dei cherelas sea so sicadea man te cherav”. Cadea că, le dada daștin te sicaven penghe șiaven prin lengo lașio exemplo chiar cana nachen prin pharimata. (Gal. 6:9)

10. Cana daștinas le dada israeliți te den duma penghe șiavența anda o Iehova? (Deuteronomo 6:6, 7)

¹⁰ Sicaimos 3: Den duma butivar tumare șiavența. Andel puraimata, o Iehova phendea le israelițenghe te sicaven penghe șiaven anda leste mai butivar. (Citisar Deuteronomo 6:6, 7.) Le dada daștinas mai butivar ande iech ghies te den duma penghe șiavența hai te ajutin-le te bariaren ande pengo ilo i iubirea anda o Iehova. Iech șiavorro israelito daștilas te beșel but timpo pașa pesco dad cana ajutilas-les te cherel buchi i phuv sau te chidel i recolta. Iech șeiorri israelito daștilas te beșel but timpo pașa peschi dei cana ajutilas-la te suvel hai ca aver buchia ando chăr. Ande cado timpo, le dada daștinas te den duma penghe șiavența anda mai but buchia importanto, sar exemplo, anda sar si o Iehova hai anda o modo sar vo lelas sama pe lenghi familia.

11. Cana daștinas le dada creștini te den duma penghe șiavența?

¹¹ Aghies, i viața parudea-pe. Ande but thema, le dada ci daștin te beșen penghe șiavența ando timpo le ghiesesco. Daștil-pe că le dada sile ca i buchi, hai le șiave ca i școala. Cadea că, le dada trebun te cheren penghe timpo te den duma penghe șiavența. (Ef. 5:15, 16; Filip. 1:10) Iech ocazia sar cadaia si cana beșen ande iech than lența  ca i închinarea andi familia. Iech phral tărno po anav Alexander phenel: „Mânro dad pregătil-pe sea o timpo andai închinarea andi familia hai ci mechel ca niciech buchi te ciorel amendar cado timpo ande savo beșas ande iech than. Pala i închinarea, das duma anda mai but buchia”.

12. So daștinas te cheren le șăre la familiache cana încăren i închinarea andi familia?

¹² So daștin te cheren le șăre la familiache ca lenghe șiave te simțon-pe mișto ca i închinarea andi familia? Daștinas te sichion le șiavența anda o nevo lil Bucurisar-tu viațatar anda sea o timpo!. Cado șucar lil daștil te cherel te avel tumenghe mai ușoro te den duma. Ca le șiave te pâtren-pe caring tumende hai te den duma anda so si ande lengo ilo hai goghi, ci trebulas te ortosaren-le hai te phenen lenghe so ci cheren mișto ando timpo cana san ca i închinarea andi familia. Den tumari zor te na holiaren tumen cana le șiave phenen vareso cai avel contra le sicaimata biblico. Mai mișto avelas te bucurin tumen că ci încăren-pe parpale te phenen so si ande lengo ilo hai zuriaren-le te cheren cadaia vi mai dur. Numai cadea va daștina te ajutin-le, dacă jianen ciaces so pachian.

13. Cana mai daștin le dada te ajutin penghe șiaven te pașion le Iehovastar?

¹³ Le dada trebun te roden sea o timpo te ajutin penghe șiaven te pașion le Iehovastar. Von ci trebun te ajucăren i închinarea andi familia caște den duma lența anda amaro lașio Del. Iech dei po anav Lisa phenel: „Ajutisardeam amare șiaven te dichen le șucar buchia anda o Iehova andai creația. Sar exemplo, cana amaro jucăl chălelas-pe hai cherelas amare șiaven te asan, phendeam lenghe, că cadea sar amen, amaro Del asal hai silo fericime”.

14. Sostar si importanto ca le dada te ajutin penghe șiaven te alosaren penghe lașe amala? (Proverbe 13:20)

¹⁴ Sicaimos 4: Ajutin tumare șiaven te alosaren penghe lașe amala. O Cuvânto le Devlesco sicavel claro că le amala daștin te cheren-ame manușa mai lașe sau mai nasul. (Citisar Proverbe 13:20.) Cuci dada, jianen con si tumare șiavenghe amala? Prinjianen-le hai beșlean ande iech than lența? So daștin te cheren caște ajutin  tumare șiaven te aven amala codolența cai iubin le Iehovas? (1 Cor. 15:33) Daștin te ajutin-le te alosaren penghe lașe amala cana acharen tumende phrala cai silen iech amalimos chidino le Iehovaia, caște cheren vareso ande iech than tumența hai tumare șiavența. (Ps. 119:63)

15. So daștin te cheren le dada caște ajutin penghe șiaven te alosaren penghe ciace amala?

¹⁵ Te dichas i experiența ieche dadeschi po anav Tony, cai phenel so cărdea ande iech than pesca rromnia caște ajutin penghe șiaven te aven-le ciace amala. „De but bărșa, me hai mânri rromni acharas amende chăre diferime phralen hai pheian, vi mai phure hai vi mai tărne. Has ande iech than hai pala codoia cheras i închinarea andi familia. Cadaia si iech șucar ocazia te prinjianas mai mișto codolen cai iubin le Iehovas hai slujin lesche anda sea o ilo. Cadea, sas amen but miștimata cana ande amaro chăr avile supraveghetori, misionari, hai vi aver phrala. Amare șiave sichile but buchia anda le experiențea cai phende-le, o zelo cai sicade-les hai anda i phari buchi cai cheren-la anda o Iehova. Sea cadala ajutisarde amare șiaven te pașion le Iehovastar”. Dada, roden ocazii ca tumare șiave te beșen ande iech than manușența cai silen iech amalimos chidino le Iehovaia!

16. So daștin te cheren le dada cana lengo șiavo alosarel te na slujil le Iehovasche?

¹⁶ Tha dacă, chiar cana cărdean sea so daisardean, tumaro șiavo alosarel te na slujil le Iehovasche? Na pachian că ci sanas dada lașe. O Iehova dea savorenghe anda amende – vi tumare șiavenghe – libero-arbitro, adică te alosaras te slujisaras lesche sau nici. Dacă tumaro șiavo alosardea te mechel le Iehovas, pachian vi mai dur că va avela parpale. Gândin tumen ca i ilustrarea anda o șiav hasardo. (Luca 15:11-19, 22-24) Cado tărno cărdea but buchia nasul, tha ji la urmă parudea-pe hai risailo. Tha chichiva daștinas te phenen: „Daștil te întâmplol-pe ciaces vi ande amare ghiesa cadai buchi?”. Da. Cadaia sicavel i experiența ieche tărne phraleschi, cai sas vi vo iech șiav hasardo, po anav Elie.

17. Sar zuriarel-tu i experiența le phraleschi Elie?

 ¹⁷ O Elie phenel: „[Mânre dada] dine penghi zor te șion ande mânro ilo i iubirea anda o Iehova hai anda lesco cuvânto, i Biblia. Tha, cana somas tărno șiavo, astardem te avel man iech phiraimos nasul”. O Elie camelas te sicavel că si iech șiav lașio tha cana ci dichenas-les lesche dada vo cherelas buchia nasul. Chiar cana lesche dada cărde sea so daisarde caște pașiol le Iehovastar, vo ci camlea lengo ajutorii. O Elie tilardea de chăral hai astardea te îngărel iech viața cai sas contra le sicaimata biblico. Tha, poiechdata, delas duma andai Biblia iecheia anda lesche amala. O Elie mai phenel: „Chichi demas duma mai but anda o Iehova, cadichi mai but gândisardem-ma Leste. Locăs tha siguro, le semințea le ciacimasche, cai mânre dada dine penghi zor te șion-le ande mânro ilo, astarde te barion”. Pala iech timpo, o Elie avilea parpale co ciacimos. * Te gândisaras-ame chichi de bucurime sas-le lesche dada, cana dichle că lenghi phari buchi te șion ando ilo lenghe șiavesco i iubirea anda o Iehova, ci sas de ivea! (2 Tim. 3:14, 15)

18. So si ande tumaro ilo cana dichen le daden cai cheren sea so daștin caște ajutin penghe șiaven te iubin le Iehovas?

¹⁸ Dada, sas tumenghe dino iech daro zurales șucar le Devlestar, te bariaren tumare șiaven caște arăsăn te slujin le Iehovasche! (Ps. 78:4-6) Si ciaces, ci si ușoro te cheren cadaia. Anda codoia, așaras tumen anda tumari phari buchi. Dacă va avela te den tumari zor vi mai dur, caște ajutin tumare șiaven te iubin le Iehovas hai ‘te bariaren-le andi disciplina hai o sicaimos’ amare Dadesco, daștin te pachian că lesco ilo bariol cana dichel i șucar buchi cai cheren-la! (Ef. 6:4)