1. So trebun te alosaren sea le manușa?

 AGHIES, sea le manușa trebun te alosaren: te așen pașa o Iehova Del, cai si o Suverano ciacio le universosco, sau te așen pașa lesco dușmano ratavalo, o Satan o Beng. Savore trebun te alosaren de caschi partea camen te aven hai chonic ci daștil te așel neutro. Lengo viitorii veșnico încărel catar so va alosarena te cheren. (Mat. 25:31-33, 46) Ando ‘baro necazo’, va avela te primin iech semno, ori caște așen jiuvinde, ori caște aven chosle pa i phuv. (Rev. 7:14; 14:9-11; Ezec. 9:4, 6)

2. a) Cadea sar phenel-pe ando Evrei 10:35-39, so sam zuriarde te cheras? b) Sar va ajutila-ame o lil Revelația?

² Citisar Evrei 10:35-39. Dacă alosardean te așes pașa i suveranitatea le Iehovaschi, cărdean iech alosarimos goghiaver. Tha cames anda sea o ilo te ajutis vi averen te alosaren mișto. Caște cheres cadaia, daștis te folosisares le sicaimata anda o lil Revelația. Vo sicavel sar va arăsăna codola cai așen contra le Iehovasche, tha vi le miștimata cai ajucăren codolen cai așen loialo pașa leschi suveranitatea. Si importanto te prinjianas mai but buchia anda cado subiecto, anda codoia că, cadea va avela te zuriaras amari hotărârea te slujisaras mai dur le Iehovasche. Sa cadea, va avela te ajutisaras vi averen te alosaren mișto hai te încăren zurales ca so alosarde.

3. So pușimata va dichaia ande cado articolo?

³ Ande cado articolo, va avela te das răspunso ca dui pușimata: 1) So miștimata va avena codolen cai așen pașa i suveranitatea le Iehovaschi? hai 2) So va avela codolența cai va alosarena te așen pașa i fiara zurales loli, sicadi ando lil Revelația?

4. Cas dichel o apostolo Ioan pașa o Isus ando cerii?

⁴ Andi viziunea, o apostolo Ioan dichel dui grupuri cai alosarde te așen pașa i suveranitatea le Iehovaschi hai cai va primina viața veșnico. Ando iechto grupo si 144 000 jene. (Rev. 7:4) Von sile line pa i phuv caște cheren iech guverno, sau iech Regato, ando cerii, pașa o Isus. Cadala va raina opral i phuv ande iech than leia. (Rev. 5:9, 10; 14:3, 4) Andi viziunea, o Ioan dichel-le că beșen le Isusoia po plain cerisco Sion. (Rev. 14:1)

5. So va avela na pa but timpo le creștinența machle cai mai așile încă pi phuv?

⁵ Ando timpo so nachlea, mii manușa sas-le alosarde te cheren partea anda codola 144 000. (Luca 12:32; Rom. 8:17) Cu sea cadala, caring o Ioan si phendo că, ando timpo le sfârșitosco, numai iech număro țâno anda cadala, va avena andi viața pi phuv. „Codola cai așile” va primina o palutno ‘sigilio’, adică i aprobarea le Iehovaschi, angla so te astarel o baro necazo. (Rev. 7:2, 3; 12:17) Pala codoia, ca iech anumime timpo ando baro necazo, cadala va jiana co cerii, pașa le creștini machle cai phandade deja loialo penghi cursa pi phuv, hai cadea o număro 144 000 va arăsăla te avel completo. Von va raina sar regi pașa o Isus ando Regato le Devlesco. (Mat. 24:31; Rev. 5:9, 10)

6, 7. a) So grupo dichel mai dur o Ioan hai so hachiaras anda le jene cai cheren partea anda leste? b) Sostar si importanto anda sea le slujitori le Iehovasche o capitolo 7 anda o lil Revelația, orisavi speranța silen?

⁶ Mai dur, o Ioan dichel „iech bari mulțimea”. Na sar codola 144 000, le jene anda cado grupo ci daștin te aven înghine. (Rev. 7:9, 10) So jianas anda lende? Caring o Ioan phenel-pe: „Cadala sile codola cai aven anda o necazo o baro. Von halade penghe robe hai parniarde-le ando rat le Mielosco.” (Rev. 7:14) Pala so va așena jiuvinde ando baro necazo, le jene andai ‘bari mulțimea’ va traina pi phuv hai va bucurina-pe catar bare miștimata. (Ps. 37:9-11, 27-29; Prov. 2:21, 22; Rev. 7:16, 17)

⁷ Orisar avelas, că samas alosarde te jias ando cerii sau te așias pi phuv, dichas-ame andi imaginea sicadi andi Revelația, o capitolo 7? Si ciaces că, savore camas cadai buchi. So șucar timpo ajucărel-ame! Amaro ilo va bariola bucuriatar că alosardeam te așias pașa i guvernarea le Iehovaschi. Mai dur, va avela te dichas chichiva buchia anda o lil Revelația anda o baro necazo. (Mat. 24:21)

8. Sar va astarela o baro necazo hai so va cherena le mai but andal manușa?

⁸ Cadea sar dichleam ando articolo cai nachlea, na pa but timpo o sistemo politico cadala lumeaco va marela-pe contra o Babilono o Baro, o imperio mondialo la religiaco neciaci. (Rev. 17:16, 17) Cadai buchi va cherela te astarel o baro necazo. So va avela pala codoia? Va avena but manușa ca i închinarea ciaci? Nici. I Revelația, o capitolo 6, sicavel că, ande codol momentea zurales phare, codola cai ci slujin le Iehovasche va rodena te garaven-pe ca o sistemo politico hai comercialo, cai sile sar le plaina. Anda codoia că ci alosarde te așen pașa Lesco guverno, o Iehova va dichela-le că așen contra lesche. (Luca 11:23; Rev. 6:15-17)

9. Sar va avena diferime le slujitori le Devlesche catar sea le coaver manușa ando baro necazo hai so va avela pala codoia?

⁹ Ande cadai perioada zurales phari, va  dichiola-pe claro că le slujitori loialo le Iehovasche sile diferime catar sea le coaver manușa. Von va așena o corcoro grupo pa i phuv cai va slujila le Devlesche hai cai ci va camela te așel de i partea la ‘fiarachi’. (Rev. 13:14-17) O fapto că codola loiali așen zurale hai pherde pachiamos, va cherela codolen cai sile contra le Iehovasche te astaren-pe holiatar. Cadea că, iech coaliția de națiuni va atachila o poporo le Devlesco pa sea i phuv. Cadai buchi pherdi holi sili sicadi ande iech modo profetico sar o ataco cai va anela-les o Gog anda Magog. (Ezec. 38:14-16)

10. Cadea sar phenel-pe andi Revelația 19:19-21, so va cherela o Iehova cana va avena atachime lesche slujitori?

¹⁰ So va cherela o Iehova cana va dichela cado ataco zuralo? Vo phenel amenghe: „Va avela te astarav-ma holiatar”. (Ezec. 38:18, 21-23) I Revelația, o capitolo 19, sicavel so va avela pala codoia. O Iehova bișialel pesche Șiaves caște feril Lesche slujitoren pa i phuv hai caște marel-pe contra lenghe dușmani. Ande cado marimos, pașa o Isus va avena „le armate anda o cerii” – le îngeri loialo ande iech than codolența 144 000. (Rev. 17:14; 19:11-15) Sar va sfârșila-pe cado războio? Sea le manușa hai le organizații cai așen contra o Iehova va avena chosle cu sea pa i phuv. (Citisar Revelația 19:19-21.)

11. Savo si o mai baro evenimento anda o lil Revelația?

¹¹ Te gândisaras-ame so va avela ando ilo le slujitorenghe loialo le Iehovasche, cai va așena jiuvinde pala o războio ande savo sas-le chosle le dușmani le Devlesche! So bari bucuria va avela ande lenghe ile ande codo timpo! Chiar cana va anela but bucuria ando cerii i distrugerea le Babilonosco o Baro, si iech aver buchi cai va anela vi mai but bucuria. (Rev. 19:1-3) Cado si o mai baro evenimento anda o lil Revelația: „o abiav le Bacresco”. (Rev. 19:6-9)

12. Cadea sar phenel-pe andi Revelația 21:1, 2, cana va avela o abiav le Bacresco?

¹² Cana va avela cado abiav? Chiar cana sea codola 144 000 va avena ando cerii, chiar angla so te astarel o Armaghedono, na atunci va avela o abiav le Bacresco. (Citisar Revelația 21:1, 2.) Cado evenimento va avela pala so va sfârșila-pe o Armaghedono, cana sea le dușmani le Devlesche va avena chosle anda sea o timpo. (Ps. 45:3, 4, 13-17)

13. So va reprezentila o abiav le Bacresco anda codola cai len partea leste?

¹³ So va reprezentila o abiav le Bacresco anda codola cai len partea leste? Cadea sar iech căsătoria si o phanglimos mașcar iech murș hai iech jiuvli, sa cadea cadai căsătoria simbolico si o phanglimos mașcar o Isus Cristos, o Rege, hai codola 144 000, leschi ‘bori’. Cado baro evenimento va cherela te astarel o nevo guverno cai va raila opral i phuv anda 1 000 bărș. (Rev. 20:6)

14, 15. So phenel i Revelația, o capitolo 21, anda codola 144 000? (Dich i imaginea pa i coperta.)

¹⁴ Mai dur, andi Revelația, o capitolo 21, anda codola 144 000 phenel-pe că sile sar iech foro zurales șucar, cai bușiol „O Nevo Ierusalimo”. (Rev. 21:2, 9) Cadale foros siles 12 bara de temelie pe save si scriime „12 anava codolenghe cai sas le 12 apostoli le Bacresche”. Sostar si cadaia zurales interesanto anda o Ioan? Lesco anav silo scriime pe iech anda cadal bara. So bari pachiv si lesche sicadi! (Rev. 21:10-14; Ef. 2:20)

 ¹⁵ Cado foro simbolico silo sar niciech aver foro. Lesco baro drom silo cărdo anda sumnacai ujo, siles 12 udara anda miriclea, pe lesche ziduri hai temelii si cuci bara, hai lesche dimensiuni sicaven iech echilibro perfecto. (Rev. 21:15-21) O Ioan dichel că vareso lipsol hai phenel: „Ci dichlem niciech templo ando foro, anda codoia că o Iehova Del, O Mai Zuralo, si lesco templo hai sa cadea si vi o Bacro. Opral o foro ci trebul te strălucil o cham sau o șionoto, anda codoia că i gloria le Devleschi cherel te avel udud ande leste, hai leschi lampa si o Bacro.” (Rev. 21:22, 23) Codola cai cheren partea anda o Nevo Ierusalimo va daștina te jian directo co Iehova. (Evr. 7:27; Rev. 22:3, 4) Cadea, o Iehova hai o Isus sile o templo anda cado foro.

16. So miștimata va avena le manușen ando Raimos de Iech Mia Bărș?

¹⁶ O ilo codolengo machle bariol cana gândin-pe cadale foroste! Tha vi le slujitori le Iehovasche cai silen i speranța te train pi phuv, trebun te den penghi zor te jianen mai but anda cado subiecto. Ando Raimos de Iech Mia Bărș, o Nevo Ierusalimo va anela but miștimata. O Ioan dichel cadal miștimata că șioren-pe sar iech len ande savo si „o pai la viațaco”. De iech rig hai de aver pașa i len si „le cașta la viațache”, cai cheren patrina „anda o sastiarimos le națiunengo”. (Rev. 22:1, 2) Sea le manușa cai va traina atunci va daștina te țârden miștimata anda cadal buchia. Le manușa cai așunen le Devlestar va arăsăna țâra po țâra te aven perfecto. Ci va mai avena nasfalimata, ducha hai ci va mai șiorena-pe asfa anda duch. (Rev. 21:3-5)

17. Cadea sar sicavel-pe andi Revelația 20:11-13, con va bucurila-pe catar le miștimata cai va avena ando Raimos de Iech Mia Bărș?

¹⁷ Con va țârdela miștimata anda cadal buchia? Ando iechto than, i bari mulțimea cai va așela andi viața co Armaghedono, ande iech than le șiavența cai daștinas te năștin-pe lenghe andi lumea nevi. Tha i Revelația, o capitolo 20, phenel că le mule va avena jiuvindime. (Citisar Revelația 20:11-13.) ‘Codola orta’, le slujitori le Iehovasche cai mule, ande iech than ‘codolența neorta’, le manușa cai ci arăsle te prinjianen mai but buchia anda o Iehova, va avena uștiade viațate pi phuv. (Fap. 24:15; Ioan 5:28, 29) Sicavel cadaia că sea le manușa cai  mule va avena jiuvindime ando Raimos de Iech Mia Bărș? Nici. Codola cai anda nasulimos ci camle te slujin le Iehovasche chichi traisarde ci va avena andine parpale viațate. Len sas len cadai ocazia, tha prin so alosarde te cheren, von sicade că ci meritin te train ando Paradiso. (Mat. 25:46; 2 Tes. 1:9; Rev. 17:8; 20:15)

18. Sar va avena le manușa cana va nachena le 1 000 bărș?

¹⁸ Cana va nachena le 1 000 bărș, sea le manușa pa i phuv va arăsăna perfecți. Chonic ci va mai avela duchado anda o păcato cai avilea catar o Adam. (Rom. 5:12) O armai le păcatosco adamico va avela choslo cu sea. Cadea că daștil te phenel-pe că le manușa pa i phuv ‘va avena viațate’ sar manușa perfecți cana va nachena le 1 000 bărș. (Rev. 20:5)

19. Sostar trebul ca le manușa te nachen părdal iech palutno testo?

¹⁹ Cadea sar jianas, o Isus așilea loialo chiar vi atunci cana o Satan camlea te zumavel lesco pachiamos. Va alosarena te așen loialo le Iehovasche, sea le manușa perfecți cana o Satan va camela te zumavel-le? Fiesavo va trebula te sicavel de caschi partea alosarel te avel, cana o Satan va avela mechlo avri anda o abiso pala 1 000 bărș. (Rev. 20:7) Codola cai va sicavena că sile loialo pala o palutno testo va primina viața veșnico hai va bucurina-pe catar i ciaci libertatea. (Rom. 8:21) Codola cai va jiana pala o Satan hai va vazdena-pe contra le Iehovasche, va avena chosle anda sea o timpo, ande iech than le Bengheia hai lesche benghența. (Rev. 20:8-10)

20. So si ande chio ilo cana gândis-tu ca le bare profeții anda o lil Revelația?

²⁰ So si ande amare ile pala so dichleam cadal sicaimata anda o lil Revelația? Bariol amaro ilo cana gândisaras-ame că traisaras ando timpo cana pheren-pe cadal profeții! Camas te acharas vi averen caște aven pașa amende andi închinarea uji cai anas-la le Devlesche. (Rev. 22:17) Ando timpo so abia ajucăras te aven cadal buchia anda viitorii, sam zuriarde te phenas cadea sar o apostolo Ioan: „Amin! Av, Raia Isus!”. (Rev. 22:20)