1. So phenel o lil Revelația anda le slujitori le Devlesche?

 O LIL Revelația sicavel că o Regato le Devlesco rail ando cerii hai că o Satan sas-lo șiudino tele othar. (Rev. 12:1-9) Cadai buchi andea pacea ando cerii, tha, anda amende andea but pharimata. Sostar? Anda codoia că o Satan ortosardea peschi holi contra le slujitori loialo le Iehovasche pa i phuv. (Rev. 12:12, 15, 17)

2. So va ajutila-ame te așias zurale?

² Sar daisaras te așias zurale hai pherde pachiamos angla le atacuri le Satanosche? (Rev. 13:10) Iech buchi cai ajutil-ame si te jianas so va avela ando viitorii. Sar exemplo, ando lil Revelația, o apostolo Ioan del duma anda chichiva miștimata cai va avena amen na pa but timpo. Mașcar cadala miștimata si vi o fapto că le dușmani le Devlesche va avena chosle anda sea o timpo. Mai dur, va avela te dichas so phenel o lil Revelația anda cadal dușmani hai so va avela lența ando viitorii.

3. Save si chichiva simboluri anda o lil Revelația?

³ Chiar anda o iechto verseto anda o lil Revelația, phenel-pe amenghe că le buchia cai va avela te citisaras-le sile amenghe sicade andel „simboluri”, adică ande iech șib figurativo. (Rev. 1:1) Cade citisaras anda chichiva fiare cai reprezentin le dușmani le Devlesche. Sar exemplo, si amenghe sicadi ‘iech fiara cai vazdelas-pe andai marea’. La sila „deș șinga hai efta șăre”. (Rev. 13:1) Mai dur, dichas „aver fiara, cai vazdelas-pe andai phuv”. Voi del duma sar iech balauro  hai cherel „te perel iag anda o cerii”. (Rev. 13:11-13) Pala codoia, si amenghe sicadi iech aver fiara, „zurales loli”, pe savi beșel iech prostituata. Cadala trin fiare reprezentin le dușmanen cai maren-pe de but timpo contra o Iehova Del hai lesco Regato. Anda codoia, si importanto te hachiaras con sile cadala. (Rev. 17:1, 3)

4, 5. Sar ajutin-ame le versetea anda Daniel 7:15-17 te hachiaras so si cadala simboluri andai Revelația?

⁴ Caște jianas con si cadal dușmani, trebul te hachiaras i șib simbolico ande savi del-pe duma anda lende. O mai lașio modo te cheras cadaia si te mechas ca i Biblia te explichil-pe corcori. But simboluri anda o lil Revelația sile explichime ande aver lila andai Biblia. Le profetos Daniel sas-les iech suno ande savo dichlea ‘ștar bare fiare cai avenas avri andai marea’. (Dan. 7:1-3) O Daniel sicavel că cadal ștar bare fiare reprezentin „ștar regi”, sau guvernea. (Citisar Daniel 7:15-17.) Cadai explicația claro ajutil-ame te hachiaras că vi le fiare anda save del-pe duma ando lil Revelația reprezentin sa zuralimata politico.

⁵ Mai dur, va avela te dichas chichiva simboluri sicade andi Revelația hai va avela te dichas sar ajutil-ame i Biblia te hachiaras so sile von. Mai anglal, va avela te dichas cas reprezentin le fiare andai viziunea. Pala codoia, va avela te dichas so va avela lența, hai co sfârșito avela te hachiaras sostar si importanto cadal evenimentea anda amende.

6. Con si i fiara cai sila efta șăre anda savi del-pe duma andi Revelația 13:1-4?

⁶ Con si i fiara cai sila efta șăre? (Citisar Revelația 13:1-4.) Cadai fiara si sar o leopardo, tha lache pânre si sar ieche rișesche, laco mui si sar o mui ieche leosche, hai sila vi deș șinga. Sea cadal buchia sicaven-pe vi anda le ștar fiare anda o lil Daniel, o capitolo 7. Tha ando lil Revelația ci sile sicade ștar fiare, tha numai iech corcori, cai sila sa cadal caracteristici. I fiara cai sila efta șăre ci reprezentil iech corcoro guverno sau iech corcoro imperio. Mai but, anda late phenel-pe că sila zuralimos „opral orisavo tribo, poporo, șib hai națiunea”. Cadea că hachiaras că la fiara sila mai but zuralimos sar ieche corcore guvernos naționalo. (Rev. 13:7) I fiara reprezentil sea le zuralimata politico cai raisarde opral le manușa ji acana. * (Ecl. 8:9)

7. So reprezentil fiesavo anda le efta șăre la fiarache?

⁷ So reprezentil fiesavo anda le ștar șăre la fiarache? I Revelația, o capitolo 17, ajutil-ame te jianas cado răspunso, anda codoia că del duma anda i imaginea la fiarachi anda Revelația, o capitolo 13. Andi Revelația 17:10, citisaras: „Si efta regi: panji sas perade, iech silo, hai ocoaver încă ci avilea; tha, cana va avela, va mai așela țâra timpo”. Anda sea le zuralimata politico cai folosisardea-le o Satan, anda efta phenel-pe că sas-le sar le „șăre” anda codoia că sas-len but zuralimos. Cadala si le zuralimata mondialo cai raisarde opral o poporo le Devlesco hai cai cărde lesche nasul. Cana o apostolo Ioan trailas, panji anda cadal zuralimata raisarde deja andi lumea: o Egipto, i Asiria, o Babilono, i Medo-Persia hai i Grecia. O șiov-to zuralimos, i Roma, sas o zuralimos mondialo o mai baro cana o Ioan scriisardea i revelația. Tha con avelas te  avel o efta-to hai o palutno zuralimos mondialo?

8. Con si o efta-to șăro la fiaraco?

⁸ Cadea sar va avela te dichas, le profeții anda o lil Daniel ajutin-ame te hachiaras con si o efta-to hai o palutno șăro la fiaraco. So zuralimos mondialo rail ande cado timpo le sfârșitosco, ando „ghies le Raiesco”? (Rev. 1:10) Si iech zuralimos cărdo anda dui guvernea cai cheren buchi ande iech than: o Regato Unito hai le Statele Unite ale Americii, adică o Zuralimos Mondialo Anglo-Americano. Cadea că daisaras te phenas că, cado si o efta-to șăro la fiaraco andai Revelația 13:1-4.

9. Cas reprezentil i fiara cai sila „dui șinga sar ieche bacres”?

⁹ Andi Revelația, o capitolo 13, citisaras că o efta-to șăro, o Zuralimos Mondialo Anglo-Americano, phiravel-pe sar iech fiara cai sila „dui șinga sar ieche bacres”, tha cai „astardea te del duma sar iech balauro”. „Voi cherel bare semnea, chiar cherel te perel iag anda cerii pi phuv, tela le iacha le manușenghe.” (Rev. 13:11-15) Le capitolea 16 hai 19 andai Revelația phenen anda cadai fiara că si „o profeto hohamno”. (Rev. 16:13; 19:20) O Daniel phenel iech buchi sar cadaia, cana phenel că o Zuralimos Anglo-Americano „va anela iech bari distrugerea”. (Dan. 8:19, 23, 24, n.s.) Cadal cuvintea sicaven exacto so sas ando Duito Războio Mondialo. Le dui bombe cai cărde te phandavel-pe o războio anda Pacifico sas-le cărde ande iech than catar le manușa sicade britanici hai americani. Prin cado ataco nuclearo, o Zuralimos Mondialo Anglo-Americano cărdea „te perel iag anda cerii pi phuv”.

10. Cas reprezentil „i imaginea la fiarachi”? (Revelația 13:14, 15; 17:8, 11)

¹⁰ Mai dur, del-pe duma anda iech aver fiara. Voi ameal zurales mișto la fiaraia cai sila efta șăre, i corcori deosebirea si că si zurales loli. Voi sili numime „o ohto-to rege”. * (Citisar Revelația 13:14, 15; 17:8, 11.) Anda cado rege phenel-pe că vazdea-pe, pala codoia că ci mai sas, hai ji la urmă avilea parpale. Cadaia ajutil-ame te hachiaras că cadai fiara si i Organizația Națiunilor Unite, cai cherel buchi ando miștimos le sistemosco politico mondialo. Mai anglal, cana sas cărdi, sas-la o anav i Liga le Națiunenghi. Pala codoia, phandadea peschi activitatea ando Duito Războio Mondialo. Mai târzio avilea parpale, tela i forma cai prinjianas-la aghies.

11. So cheren le guvernea, cai sile sar niște fiare, hai sostar ci trebul te daras lendar?

¹¹ Prin le hohaimata cai den-le mai dur, le guvernea, cai sile sar niște fiare, cheren le manușen te așen contra le Iehovasche hai lesche poporosche. Ande iech modo simbolico von va chidena ‘le regen pa sea i phuv’ anda o războio Armaghedon, ‘o baro ghies le Devlesco O Mai Zuralo’. (Rev. 16:13, 14, 16) Tha atunci, amen ci va avela te daras anda codoia că o Iehova, amaro Del O Mai Zuralo, va cherela sigo vareso caște salvil sea codolen cai așen pașa leschi suveranitatea. (Ezec. 38:21-23)

12. Sar va arăsăna le fiare anda o lil Revelația?

¹² Sar va arăsăna cadal fiare? I Revelația 19:20 phenel amenghe: „I fiara sas-li astardi, hai ande iech than laia, o profeto hohamno cai cărdea angla late le semnea prin save athadea codolen cai sas lenghe dino o semno la fiaraco hai codolen cai anen închinarea angla lachi imaginea. Le dui sas-le  șiudine de jiuvinde ando iagalo laco cai thabol sulfosa”. Cadea că, ando timpo so încă rain, cadal dușmani le Devlesche va avena distrugime anda sea o timpo.

13. So presiuni șion le guvernea pe le slujitori le Iehovasche?

¹³ So sichioas amen? Sar slujitori le Iehovasche, trebul te sicavas amari loialitatea caring leste hai caring lesco Regato. (Ioan 18:36) Cadaia însemnol te așias neutri, te na șioas-ame ande le buchia politico cadala lumeache. Tha daștilas te avel amenghe zurales pharo te încăras amari neutralitatea, anda codoia că le guvernea la lumeache manghen amendar te așias de lenghi partea, vi prin so phenas, hai vi prin so cheras. Codola cai mechen-pe athade primisaren o semno la fiaraco. (Rev. 13:16, 17) Tha o Iehova va duriarela pestar sea codolen cai primin cado semno hai von va hasarena i posibilitatea te train veșnico. (Rev. 14:9, 10; 20:4) Cadea că, hachiaras chichi de importanto si te așias zurale hai neutri, indiferento chichi de but presiuni șion-pe pe amende!

14. Cadea sar phenel-pe andi Revelația 17:3-5, so dichlea o Ioan bi te ajucărel-pe?

¹⁴ O apostolo Ioan dichlea mai dur vareso so ci ajucărelas-pe te dichel: iech jiuvli cai beșelas pe iech anda le fiare. (Rev. 17:1, 2, 6) Anda late phenel-pe că si sar ‘iech bari prostituata’ cai bușiol „o Babilono o Baro”. I jiuvli cherel „imoralitatea sexualo” le ‘regența pa i phuv’. (Citisar Revelația 17:3-5.)

15, 16. Cas reprezentil o Babilono o Baro hai sar arăsas te hachiaras cadai buchi?

¹⁵ Cas reprezentil o Babilono o Baro? Cadai jiuvli ci daștil te avel iech organizația politico anda codoia că, cadea sar phenel i profeția, cherel imoralitatea le bare manușența andai politica cadala lumeachi. (Rev. 18:9) Mai but, voi sili sicadi sar cana beșel pe iech fiara hai cherel sea so daștil caște șiol tela pesco pânro cadale conducătoren. Voi ci daștil te reprezentil nici o sistemo comercialo hașvalo andai lumea le Satanoschi. Anda cado del-pe duma ande aver than hai silo reprezentime catar „le negustori la phuveache”. (Rev. 18:11, 15, 16)

¹⁶ Andi Biblia, o cuvânto „prostituata” del duma anda codola cai phenen că slujin le Devlesche, tha cheren idolatria sau arăsăn te aven ande aver felo amala la lumeaia. (1 Cron. 5:25; Iac. 4:4) Na sar cadala, anda le jene cai anen închinarea pherde pachiamos le Devlesche, phenel-pe că sile ‘uje moralo’ sau „virgini”. (2 Cor. 11:2; Rev. 14:4) Anda codoia că o Babilono purano sas o centro la închinareaco neciaci, o Babilono o Baro trebul te reprezentil sea le forme andai închinarea neciaci. Mai but, cadai prostituata si o imperio mondialo la religiaco neciaci. (Rev. 17:5, 18; dich pe amaro site-o jw.org o articolo „So si o Babilono o Baro?”)

17. Sar va arăsăla o Babilono o Baro?

¹⁷ Sar va arăsăla o Babilono o Baro? I Revelația 17:16, 17 phenel amenghe: „Le deș șinga cai dichlean-le hai i fiara va urâna la prostituata, va pustiina-la, va mechena-la nanghi, va hana lache cotora masesche hai va thabarena-la cu sea andi iag. Că o Del șiutea lenghe ando ilo te îngăren ji le șăreste lesco gândo”. O Iehova va cherela le națiunen te folosin-pe catar i fiara zurales loli – adică catar i Organizația Națiunilor Unite – caște avel contra o imperio mondialo la religiaco neciaci hai va chosela-les cu sea. (Rev. 18:21-24)

18. So trebul te cheras caște na avel amen niciech phanglimos le Babilonoia o Baro?

 ¹⁸ So sichioas amen? Amari închinarea trebul te avel sea o timpo „uji hai sfânto andel iacha amare Devlesche hai Dadesche”. (Iac. 1:27) Camas te încăras-ame dur catar le buchia cai silen phanglimos le Babilonoia o Baro: sicaimata neciace, sărbători păgâno, norme moralo neuje sau buchia spiritisto. Sa cadea, camas te zuriaras vi mai dur le manușen te jian avri anda o imperio mondialo la religiaco neciaci, ca o Del te na doșarel-le anda le păcatea cadalesche. (Rev. 18:4)

19. Cas reprezentil ‘o baro balauro lolo sar i iag’?

¹⁹ O lil Revelația del duma vi anda „iech baro balauro lolo sar i iag”. (Rev. 12:3) Cado marel-pe contra o Isus hai lesche îngeri. (Rev. 12:7-9) Vo va avela contra o poporo le Devlesco prin iech ataco. Sa cadea, vo del zuralimos le guvernenghe, cai sile sar le fiare. (Rev. 12:17; 13:4) Cado balauro si „o purano sap, codo cai bușiol Beng hai Satan”. (Rev. 12:9; 20:2) Vo silo pala o dumo sea le coavere dușmanenghe le Iehovasche.

20. Sar va arăsăla o balauro o baro?

²⁰ Sar va arăsăla o balauro o baro? Andi Revelația 20:1-3 phenel-pe că iech îngero va avela te șiudel le Satanos ando abiso, cai si sar iech phandaimos. Atunci, o Satan ‘ci va mai athavela le națiunen ji cana ci va sfârșina-pe le 1 000 bărș’. Ji la urmă, o Satan hai lesche benga va avena chosle anda sea o timpo. Cadaia va întâmplola-pe cana va avena șiudine ando „iagalo laco hai pherdo sulfo”. (Rev. 20:10) Te gândisaras-ame sar va avela i lumea bi le Satanosco hai lesche benga! So șucar va avela atunci!

21. Sostar daisaras te avas fericime anda codoia că hachiaras so phenel-pe ando o lil Revelația?

²¹ Chichi de zuriarde sam că hachiaras cas reprezentin cadal simboluri anda o lil Revelația! Ande cado articolo, hachiardeam con si le dușmani le Iehovasche hai sar va arăsăna von. Si ciaces, „fericime si codo cai citil voceaia zurali hai fericime sile codola cai așunen cadal cuvintea anda cadai profeția”! (Rev. 1:3) Ando articolo cai avel, va avela te dichas so miștimata ajucăren le manușen loialo cana le dușmani le Devlesche va avena duriarde.