1, 2. Savo si iech motivo sostar trebulas te studiisaras o lil Revelația?

 GÂNDISAR-TU că san ca iech amal hai diches iech albumo foto. Ande le mai but poze si manușa cas ci prinjianes. Tha, cana arăsăs ca iech poza, diches-la mai atento. Sostar? Anda codoia că san chiar tu ande cadai poza. Cana diches-la, anes tuche amintea cai hai cana sas cărdi. Sa cadea, cames te des chi sama dacă mai prinjianes vi aver varecas andai poza. Cadai poza si cuci anda tute.

² Daisaras te phenas că o lil Revelația si sar cadai fotografia. Sostar? Si amen dui motivea te dichas le buchia cadea. O iechto: cado lil sas scriime anda amende. Chiar co începuto le lilesco citisaras: „Iech revelația catar o Isus Cristos, cai dea-la lesche o Del caște sicavel pesche sclavenghe le buchia cai trebun te aven na pa but timpo”. (Rev. 1:1) Cadea că, cado lil ci sas scriime anda sea le manușa, tha numai anda le slujitori le Iehovasche. Anda codoia, pachias că si iech bari buchi cana hachiaras că vi amen las partea caște pheren-pe le profeții anda cado șucar lil. Aver varesar phendo, das amari sama că sam „andi poza”.

3, 4. Cadea sar phenel-pe ando lil Revelația, cana va avela te pheren-pe le profeții anda leste hai so trebulas te cheras?

³ O duito motivo silo phanglo catar o timpo cana pheren-pe cadal profeții. O phuro apostolo Ioan sicadea o timpo cana avileas te pheren-pe: „Tela o zuralimos le spiritosco sfânto arăslem ando ghies le Raiesco”. (Rev. 1:10) Cam ando bărș 96 a.e., cana o Ioan scriisardea cadal cuvintea, „o ghies le Raiesco” sas încă zurales dur. (Mat. 25:14, 19; Luca 19:12) Cadea sar sicaven le profeții andai Biblia, cado ghies astardea ando bărș 1914, cana o Isus sas-lo cărdo Rege ando cerii. Anda cado bărș, le profeții andai Revelația cai silen  phanglimos le poporoia le Devlesco astarde te pheren-pe. Cadea că sam chiar ando „ghies le Raiesco”!

⁴ Anda codoia că traisaras ande cadal ghiesa specialo, trebul te ortosaras vi mai but amari atenția caring o sfato iubitorii anda Revelația 1:3: „Fericime si codo cai citil voceaia zurali hai fericime sile codola cai așunen cadal cuvintea anda cadai profeția hai încăren le buchia scriime ande late, că o timpo alosardo si pașă”. Cadea că, si zurales importanto te citisaras voceaia zurali le cuvintea andai profeția, te așunas-le hai te încăras-le. Mai dur, va avela te dichas chichiva anda lende.

5. Sar sicavel o lil Revelația chichi de importanto si te las sama ca amari închinarea te avel cuci andel iacha le Iehovasche?

⁵ Chiar anda o iechto capitolo le lilesco Revelația, hachiaras că o Isus jianel mișto sea so întâmplol-pe andel congregații lesche manușenghe. (Rev. 1:12-16, 20; 2:1) Cadai buchi dichiol-pe claro anda le mesajea cai o Isus bișaldea-le caring efta congregații anda Asia Mică. Cadea vo, ajutisardea le creștinen anda o iechto secolo te len sama ca lenghi închinarea te avel cuci andel iacha le Iehovasche. Mai but, le sfaturi cai dea-le vo ande codol mesajea sile lașe vi anda sea le slujitori le Iehovasche de aghies. So sichioas amen catar? Amaro conducătorii, o Isus Cristos, jianel mișto sar si amaro amalimos le Iehovaia. Vo dichel sea hai lel sama pe amende caște feril-ame. O Isus jianel so trebul te cheras caște avas mai dur cuci andel iacha le Iehovasche. Save si chichiva sfaturi dine le Isusostar pala save trebul te las-ame vi amen?

6. a) Cadea sar phenel-pe andi Revelația 2:3, 4, so sicadea o Isus că sas le creștinența anda Efes? b) So sichioas catar?

⁶ Citisar Revelația 2:3, 4. Te na hasaras i iubirea cai sas amen mai anglal anda o Iehova. Anda so phendea o Isus caring le jene andai congregația anda Efes dichiol-pe că von ci mechle-pe hai slujisarde mai dur le Iehovasche, chiar cana nachle prin mai but pharimata. Tha von hasarde i iubirea cai sas len mai anglal. Von trebunas te cheren te thabol pale i iubirea ande lenghe ile, ca lenghi închinarea te avel vi mai dur cuci andel iacha le Iehovasche. Sa cadea, vi amen trebul te cheras mai but sar te na mechas-ame. Trebul vi te avel-ame iech ilo ujo. Anda o Iehova si importanto so cheras, tha vi sostar cheras iech anumime buchi. So si ande amaro ilo si zurales importanto anda leste. Anda codoia că vo camel ca i închinarea cai anas-la lesche te avel andai iubirea. (Prov. 16:2; Mar. 12:29, 30)

7. a) Cadea sar phenel-pe andi Revelația 3:1-3, so dichlea o Isus ca le phrala andai congregația anda Sardes? b) So trebul te cheras amen?

⁷ Citisar Revelația 3:1-3. Te așias uștiade. Le phralen andai congregația anda Sardes sas len iech aver problema. Chiar cana cărde but buchia mai anglal ando servico le Iehovasco, acana arăsle ande iech lindr spiritualo. Anda codoia, o Isus phendea lenghe ‘te ușten’. So sichioas catar? Si ciaces că, o Iehova ci va bâstrăla niciechdata amari buchi. (Evr. 6:10) Cu sea cadala, ci trebul te pachias că le buchia cai cărdeam-le mai anglal ande lesco servicio arăsăn hai ci mai trebul te cheras chanci. Chiar cana aghies, daștil-pe că ci mai daisaras te cheras cadea de but sar mai anglal, trebul te cheras sea so daisaras „andi buchi le Raieschi” hai te așias uștiade ji co sfârșito. (1 Cor. 15:58; Mat. 24:13; Mar. 13:33)

8. So sichioas anda le cuvintea le Isusosche cai phendea-le le creștinenghe anda Laodiceea? (Revelația 3:15-17)

 ⁸ Citisar Revelația 3:15-17. Te cheras mai but buchia andi predicarea hai te slujisaras le Iehovasche anda sea o ilo. O mesajo le Isusosco caring i congregația anda Laodiceea sicadea iech aver problema. Le phrala sas-le ‘tachiorre’ ande soste privealas lenghi închinarea. Anda codoia că sas-le indiferento, o Isus phendea: „San bibahtalo [hai] demno roimasco”. Lengo ilo trebulas te thabol anda o Iehova hai anda i închinarea uji hai te aven pherde zelo. (Rev. 3:19) So sichioas amen? Dacă hasardeam anda amaro zelo hai ci mai si cadea de baro, trebul te das sea amari zor te dichas cuci le barvalimata spiritualo cai si amen. (Rev. 3:18) Ci camas niciechdata te mechas le buchia spiritualo te arăsăn po duito than ande amari viața anda codoia că camas te rodas te avel-ame iech viața mai lași.

9. Cadea sar sicavel-pe anda so phendea o Isus le creștinenghe anda Pergam hai Tiatira, catar so pericolo trebul te așias dur?

⁹ Te na banghiaras o can ca le sicaimata apostato. O Isus ortosardea chichiva creștinen anda Pergam anda codoia că încărenas zurales ca chichiva sicaimata neciace, cai cărde le phralen te na mai aven chidine ande iech than. (Rev. 2:14-16) Tha, așardea le creștinen anda Tiatira cai încărde-pe dur catar le ‘buchia profundo le Satanosche’ hai phendea lenghe ‘te încăren zurales’ co ciacimos. (Rev. 2:24-26) Le creștini covle spiritualo cai mechle-pe athade catar le sicaimata neciace trebunas te căin-pe. So daisaras te sichioas vi amen catar? Trebul te duriaras amendar orisavo sicaimos cai si contra o modo sar gândil o Iehova. Mai anglal, daștilas te fal-pe că le apostați len-pe pala so phenel i Biblia, tha ‘le buchia cai cheren-le’ sicaven că nici. (2 Tim. 3:5) Dacă das sea amari zor caște prinjianas sea mai mișto o ciacimos andai Biblia, va avela amenghe but mai ușoro te dichas hai te duriaras amendar le sicaimata neciace. (2 Tim. 3:14-17; Iuda 3, 4)

10. So aver vareso sichioas anda o mesajo le Isusosco caring le congregații anda Pergam hai Tiatira?

¹⁰ Te duriaras amendar i imoralitatea tela sea lache forme. Andel congregații anda Pergam hai Tiatira, mai sas vi aver problema. Chichiva creștini catar ci duriarde pendar i imoralitatea, hai anda codoia o Isus doșardea-le. (Rev. 2:14, 20) So sichioas amen? Ci daisaras te ajucăras-ame  ca o Iehova te phandavel pesche iacha hai te cherel-pe că ci dichel cana cheras vareso imoralo, chiar cana slujisaras lesche de mai but bărșa hai si amen chichiva privilegii. (1 Sam. 15:22; 1 Pet. 2:16) Vo camel te încăras lesche norme uje, chiar cana le norme anda cadai lumea rimosarde-pe cadea de but. (Ef. 6:11-13)

11. So sichileam ji acana? (Dich vi o chenarii „ Sicaimata anda amende”.)

¹¹ Sar daisaras te phenas harnes le buchia cai dichleam-le ji acana? Dichleam chichi de importanto si te las sama ca amari închinarea te avel cuci andel iacha le Iehovasche. Dacă aghies cheras vareso cai daștilas te cherel le Iehovas te na mai camel amari închinarea, trebulas te cheras sigo paruimata caște lașiaras le buchia. (Rev. 2:5, 16; 3:3, 16) Tha o Isus phendea vi aver buchi ande le mesajea bișalde caring le congregații.

12. So sichioas anda le mesajea bișalde catar o Isus codolenghe anda Smirna hai Filadelfia? (Revelația 2:10)

¹² Te dichas mai dur le mesajea bișalde catar o Isus caring le congregații anda Smirna hai Filadelfia. Vo zuriardea cadale creștinen te na daran catar le persecuții hai phendea lenghe că dacă va așena pherde pachiamos va avena pochinde parpale. (Citisar Revelația 2:10; 3:10) So sichioas amen aghies? Trebul te ajucăras-ame te nachas prin persecuții hai te avas gata te așias zurale cana va avena. (Mat. 24:9, 13; 2 Cor. 12:10) Sostar si importanto te na bâstras cadai buchi?

13, 14. So întâmplosardea-pe le poporoia le Devlesco de cana o Satan sas-lo șiudino tele pi phuv cadea sar sicavel-pe andi Revelația, o capitolo 12?

¹³ Anda o lil Revelația hachiaras că o poporo le Devlesco va avela persecutime ando „ghies le Raiesco”, adică ande amare ghiesa. Andi Revelația, o capitolo 12, sicavel-pe că, pala so o Regato le Devlesco sas-lo cărdo, ando cerii astardea iech războio. O Mihael, o Isus Cristos cai sas-lo glorifichime sar Rege ando cerii, hai lesche armatea, marde-pe contra o Satan hai lesche benga. (Rev. 12:7, 8) Cadea că, cadal dușmani le Devlesche sas-le marde hai șiudine pașa i phuv, cai cărde le manușen te aven zurales duchade. (Rev. 12:9, 12) Tha de atunci, so întâmplol-pe le poporoia le Devlesco?

¹⁴ O lil Revelația sicavel mai dur so cărdea o Satan. Anda codoia că ci mai daștil te jial ando cerii, vo ortosardea peschi holi caring le creștini machle cai mai așile pi phuv, cai reprezentin o Regato le Devlesco hai casche sas dini i „buchi te den duma anda o Isus”. (Rev. 12:17; 2 Cor. 5:20; Ef. 6:19, 20) Sar pherel-pe cadai profeția?

15. Con reprezintin „le duie martoren” andai Revelația, o capitolo 11, hai so întâmplosardea-pe lenghe?

 ¹⁵ O Satan astardea iech ataco contra le creștini machle cai sas-le responsabilo anda i lucrarea de predicare. Chichiva anda cadal phrala reprezentin „le duie martoren” andai Revelația, anda save phenel-pe că avelas te aven mudarde. * (Rev. 11:3, 7-11) Ande 1918, ohto andal phrala responsabilo sas-le condamnime pe neciacimaste hai fiesavo primisardea but bărșa ando phandaimos. Le mai but manușa pachiaie că, i buchi cadale creștinenghi machle sas-li ‘mudardi’, adică așiadi.

16. Sar parude-pe le buchia ande 1919 hai so cărdea vi mai dur o Satan?

¹⁶ Andi profeția andai Revelația, o capitolo 11, mai phenel-pe vi că, pala iech țâra timpo, le dui martori avelas te aven andine parpale viațate. Cana pherdea-pe cadai profeția, vareso bi ajucărdo întâmplosardea-pe chiar ando bărș cai avilea pala lenghi condamnarea. Co începuto le bărșesco 1919, cadal phrala machle sas-le mechle avri anda o phandaimos hai pala codoia le doșa cai sas-le andine contra lenghe, sas-le chosle. Le phrala astarde sigo te cheren pale penghi buchi, i lucrarea de predicare. Tha le atacuri le Satanosche contra o poporo le Devlesco ci așile po than. De atunci, vo cherel te șiorel-pe „iech bari len” de persecuții contra o poporo le Devlesco. (Rev. 12:15) Anda codoia, sea le slujitori le Iehovasche „trebun te așen zurale ando pachiamos hai te na mechen-pe”. (Rev. 13:10)

17. So ajutorii neajucărdo primisardea o poporo le Devlesco, chiar cana o Satan șiorelas atacuri contra leste?

¹⁷ Andai Revelația, o capitolo 12, mai hachiaras vi că o poporo le Devlesco avelas te primil ajutorii varecastar neajucărdo – „i phuv”, cai avelas te nachavel i „bari len” de persecuții. (Rev. 12:16) Cadal cuvintea pherdile-pe ciaces. Poiechdata, le sistemea juridico anda cadai lumea, ajutisarde o poporo le Devlesco. Butivar, le slujitori le Iehovasche sas-le arachle nedoșale catar i instanța hai primisarde iech anumime libertatea. Von folosisarde cado timpo, caște cheren i buchi cai sas lenghe dini le Iehovastar.  (1 Cor. 16:9) So cherel partea anda cadai buchi?

18. Savi si i mai importanto buchi cai cheras-la ande cadal ghiesa de palal?

¹⁸ O Isus phendea de mai anglal că lesco poporo avelas te phenel i ‘vestea lași anda o Regato’ le Devlesco pe sea i phuv angla so te avel o sfârșito. (Mat. 24:14) Cana cheren cadai buchi, von sile ajutime catar iech îngero, sau catar mai but îngeri, cai phenen i ‘vestea lași veșnico le manușenghe cai train pi phuv hai ca orisavi națiunea, tribo, șib hai them’. (Rev. 14:6)

19. So aver mesajo trebul te phenas?

¹⁹ I vestea lași anda o Regato ci si o corcoro mesajo cai trebul te phenen-les le slujitori le Devlesche. Von trebun te den iech vast vi ca i buchi le îngerenghi anda save citisaras andi Revelația, le capitolea 8-10. Cadal îngeri phenen că va avena mai but bare ‘pharimata’ contra codola cai ci camen o Regato le Devlesco. Cadea, le Martori le Iehovasche phenen iech mesajo anda i cris, cai silo sar ‘o pahos hai i iag’. Prin cado mesajo, von cheren prinjiandi i cris le Devleschi contra le but buchia cai cheren partea andai lumea le Satanoschi. (Rev. 8:7, 13) Le manușa trebun te așunen că o sfârșito si pașă, caște daștin te cheren bare paruimata ande lenghi viața hai, cadea, te așen jiuvinde cana va avela o ghies ande savo o Iehova va sicavela peschi holi. (Țef. 2:2, 3) Tha le manușa ci camen te așunen cado mesajo. Anda codoia, trebul amenghe but tromai te phenas-les. Ando baro necazo, o palutno mesajo anda i cris, va holiarela vi mai but le manușen. (Rev. 16:21)

20. So va avela te dichas ande le dui articolea cai aven?

²⁰ Si zurales importanto te încăras „le cuvintea anda cadai profeția” anda codoia că vi amen las partea caște pheren-pe le cuvintea anda o lil Revelația. (Rev. 1:3) Tha so daștil te ajutil-ame te nachas părdal le persecuții pherde pachiamos hai te phenas pherde tromai cadal mesajea? Va avela te avas zuriarde prin dui buchia: i iechto, so sicavel amenghe o lil Revelația anda le dușmani le Devlesche hai, i duito, le miștimata cai va avena-ame dacă așias loialo. Ande le coaver dui articolea cai aven, va avela te dichas cadal buchia.