1, 2. So daisaras te pușias-ame cana si duma anda amare manglimata?

 PUȘLEAN-TU vroiechdata dacă o Iehova del-tu răspunso ca le manglimata? Dacă da, ci san o corcoro. But phrala hai pheia pușle-pe sa cadai buchi, vi mai but cana nachle prin pharimata. Butivar si amenghe mai pharo te dichas sar del-ame o Iehova răspunso ca amare manglimata cana sam duchade.

² Ande cado articolo, va avela te dichas sostar daisaras te pachias că o Iehova del-ame răspunso ca amare manglimata. (1 Ioan 5:15) Sa cadea, va avela te dichas le pușimata cai aven: Sostar daștilas te fal-pe, poiechdata, că o Iehova ci del-ame răspunso ca le manglimata? Sar del-ame răspunso o Iehova aghies ca le manglimata?

3. Sostar camel o Iehova te mangas-ame lesche?

³ I Biblia sicavel amenghe că o Iehova iubil-ame but hai că sam cuci ande lesche iacha. (Hag. 2:7; 1 Ioan 4:10) Anda codoia, vo acharel-ame te mangas lesco ajutorii ando manglimos. (1 Pet. 5:6, 7) O Del camel te ajutil-ame te așias pașa leste hai te del-ame o zuralimos te nachas părdal le pharimata cai si amen.

4. Catar jianas că o Iehova del răspunso ca le manglimata pesche slujitorenghe? (Dich vi i imaginea.)

⁴ I Biblia del duma butivar anda slujitori le Iehovasche cai primisarde răspunso ca penghe manglimata. Iech anda lende si o rege David. Ande peschi viața, les sas-les but dușmani zurale. Cadea că, vo rodea o ajutorii le Iehovasco ando manglimos. Iech data, vo manglea-pe cadea: „O, Iehova, așun mânro manglimos,  banghiar chio can caring mânro zuralo manglimos anda ajutorii! Anda chi loialitatea hai anda chio ortomos, de-man răspunso!”. (Ps. 143:1) O Iehova așundea lesche manglimata hai hastradea-les. (1 Sam. 19:10, 18-20; 2 Sam. 5:17-25) Anda codoia, o David daisardea te phenel pherdo pachiamos: „O Iehova silo pașă sea codolendar cai acharen-les”. (Ps. 145:18) Vi amen daisaras te pachias cadaia!

5. Primisarde sea o timpo le slujitori le Iehovasche răspunso ca lenghe manglimata cadea sar ajucărde-pe von? Den iech exemplo. (Dich vi i imaginea.)

⁵ O Iehova daștilas te na del-ame o răspunso cai ajucărdeam-les ca amare manglimata. O apostolo Pavel hachiardea cado ciacimos. Vo manglea le Iehovas te duriarel lestar ‘iech canro ando mas’. Trin-var manglea-pe anda cado baro pharimos. Dea o Iehova răspunso ca lesche manglimata? Da, tha na cadea sar ajucărdea-pe o Pavel. Ando than te duriarel lesco pharimos, o Iehova dea-les o zuralimos cai sas-les nevoia caște slujil lesche mai dur pherdo pachiamos. (2 Cor. 12:7-10)

6. Sostar daștil-pe, poiechdata, te fal-pe că o Iehova ci del-ame răspunso ca amare manglimata ?

⁶ Poiechdata, daștil-pe că vi amen primisaras iech răspunso ca amare manglimata cai nai-lo cadea sar ajucărdeam-ame. Tha daisaras te pachias ciaces că o Iehova jianel so si ande amaro miștimos. Te na bâstras că vo „daștil te cherel but mai but sar mangas sau nachel prin amari goghi”. (Ef. 3:20) Cadea că, o răspunso ca amare manglimata daștil te avel cana ajucăras-ame o mai țâra sau ande iech felo cai ci gândisardeam-ame niciechdata.

7. Sostar daștil-pe că trebul te paruvas le buchia anda save mangas-ame? Den iech exemplo.

⁷ Cana hachiaras mai mișto savi si i voința le Iehovaschi, daștil-pe că trebul te paruvas le buchia anda save mangas-ame. Te dichas o exemplo le phralesco Martin Poetzinger. Ca țâra timpo pala so lea-pe pesca rromniaia, vo sas-lo phandado ande iech lagăro de concentrare nazisto. Mai anglal, vo manglea le Iehovas te del-les drom othar caște daștil te lel sama pe peschi rromni hai te jial pale andi predicarea. Cu sea cadala, pala dui curche, vo ci dichlea chanci cai te sicavel lesche că avelas te înclel othar. Anda codoia, vo manglea-pe cadea: „Iehova, mangav tut, sicav manghe so cames te cherav”. Pala codoia, astardea te gândil-pe prin so pharimata nachenas le coaver phrala anda o lagăro. But mașcar lende sas-le zurales duchade anda penghe rromnia hai șiave. Pala codoia, o phral Poetzinger manglea-pe pale hai phendea: „Iehova, mulțumisarav tuche anda i nevi buchi  cai dean-la manghe te cherav-la. Ajutisar-ma te zuriarav hai te vazdav mânre phralen”. Ande le enia bărșa cai vo beșlea ando lagăro, vo dea peschi zor te cherel cadaia.

8. So ci trebul te bâstras cana mangas-ame?

⁸ Te na bâstras că le Iehovas siles iech scopo hai că va pherela-les co timpo alosardo lestar. Lesco scopo si te chosel anda sea o timpo sea le pharimata cai cheren-ame te avas cadea de duchade, sar si le dezastrea naturalo, o nasfalimos hai o merimos. Cadal paruimata va avena prin lesco Regato. (Dan. 2:44; Rev. 21:3, 4) Tha, ji atunci, o Iehova mechel ca o Satan te rail opral i lumea. b (Ioan 12:31; Rev. 12:9) Dacă o Iehova lașiarelas acana le pharimata le manușenghe, daștilas te fal-pe că o raimos le Satanosco si lașio. Cadea că, chiar cana trebul te ajucăras ji cana o Iehova va pherela pesche promisiuni, cadaia ci însemnol că vo mechel-ame bi ajutorosco aghies. Te dichas chichiva buchia cai cherel-le o Iehova caște ajutil-ame.

9. Sar ajutil-ame o Iehova cana trebul te alosaras mișto so te cheras? Den iech exemplo.

⁹ O Iehova del-ame goghiaverimos. Vo phenel amenghe că va dela-ame goghiaverimos caște alosaras mișto so te cheras. Si amen nevoia catar o goghiaverimos le Devlesco vi mai but cana trebul te alosaras buchia cai va paruvena sea amari viața, sar avelas dacă așias corcore sau căsătorisaras-ame. (Iac. 1:5) Te dichas i experiența iecha pheiachi corcori po anav Maria. c Voi slujilas bucurime sar pioniera regularo cana prinjiandea ieche phrales. Voi phenel: „Ando timpo so amaro amalimos cărdiolas sea mai chidino, vi amare sentimentea iech caring aver cărdionas sea mai zurale. Hachiardem că trebulas te alosarav so te cherav. Beșlem but timpo hai manglem-ma zurales le Iehovasche anda cadai buchi. Sas-man nevoia te sicavel manghe so te cherav, tha jianglemas că vo ci va avela te alosarel ande mânro than”. I Maria pachial că o Iehova dea-la răspunso ca lache manglimata anda goghiaverimos. Sar? Voi rodea te prinjianel mai but buchia ande le articolea cai denas duma anda so nachelas voi hai arachlea o răspunso ca lache pușimata. Sa cadea, voi șiutea ande pesco ilo le goghiaver sfaturi cai dea-la lachi dei, cai slujil pherdi loialitatea le Iehovasche. Cadal sfaturi ajutisarde-la te dichel so simțosarelas ciaces caring codo phral. Ji la urmă, voi daisardea te cherel iech alosarimos goghiaver.

10. Cadea sar phenel-pe ando Filipeni 4:13, so va cherela o Iehova caște ajutil pesche slujitoren? Den iech exemplo. (Dich vi i maginea.)

¹⁰ O Iehova del-ame zuralimos te na mechas-ame. Cadea sar cărdea vi anda o apostolo Pavel, o Iehova va dela-ame zuralimos te nachas părdal le pharimata. (Citisar Filipeni  4:13.) Te dichas sar o Iehova ajutisardea ieche phrales po anav Benjamin te așel zuralo andel bare pharimata prin save nachlea. Cana sas-lo tărno, vo beșlea but bărșa pesca familiaia andel tabere de refugiați andai Africa. O Benjamin phenel: „Manglem-ma sea o timpo le Iehovasche hai phendem lesche te del-ma o zuralimos te cherav so si mișto ande lesche iacha. O Iehova așundea mânre manglimata hai dea-ma pacea andi goghi, tromai caște phenav i vestea lași mai dur, hai vi publicații caște încărav mânro pachiamos zuralo”. Vo mai phenel: „Cana citisardem prin so nachle but phrala hai pheia hai hachiardem sar ajutisardea-le o Iehova te na mechen-pe, somas vi me zuriardo te așiav lesche loialo”.

11, 12. Sar daștil o Iehova te alosarel te del-ame o răspunso ca le manglimata prin amare phrala hai pheia? (Dich vi i imaginea.)

¹¹ O Iehova ajutil-ame prin amare phrala hai pheia. Andi riat anglal te del peschi viața anda amende, o Isus manglea-pe anda sea o ilo. Vo manglea zurales le Iehovas te na mechel te nachel prin i lajiav te avel doșardo că ci sicadea lesche pachiv. Ando than te cherel so manglea-les o Isus, o Iehova sicadea pesco ajutorii cana bișialdea lesche iech îngero, iech anda lesche phrala anda o cerii, caște zuriarel-les. (Luca 22:42, 43) O Iehova daștil te ajutil vi amen cana amare phrala hai pheia zuriaren-ame prin iech telefono sau aven amende. Cadea că, te das amari zor te rodas te zuriaras amare phralen prin iech „lașio cuvânto”. (Prov. 12:25)

¹² Te dichas i experiența iecha pheiachi po anav Miriam. Ca chichiva curche pala so mulea laco rrom, i Miriam sas-li chăre corcori, hasardi hai zurales duchadi. Ci daștilas te așiavel-pe anda o roimos hai camelas te del duma varecasa. I Miriam phenel: „Ci sas-ma zuralimos te sunisarav chanicas, cadea că manglem-ma le Iehovasche. Chiar ando timpo so roiemas hai manglemas-ma, sunisardea o telefono. Sas iech phuro de congregație, iech lașio amal”. I Miriam sas-li zuriardi catar o phral hai leschi rromni. Voi pachial anda sea o ilo că o Iehova cărdea codole phures te del lache telefono.

13. Den iech exemplo cai sicavel sar daștil o Iehova te del răspunso ca amare manglimata prin manușa cai ci slujin lesche.

¹³ O Iehova daștil te ajutil-ame prin manușa  cai ci slujin lesche. (Prov. 21:1) Poiechdata, caște del răspunso ca le manglimata lesche slujitorenghe, o Iehova cherel manușen cai ci anen lesche închinarea te aven ande lengo ajutorii. Sar exemplo, vo cărdea ca o rege Artaxerxes te mechel ca o Neemia te jial parpale ando Ierusalimo caște ajutil te vazdel-pe pale o foro. (Neem. 2:3-6) Vi aghies o Iehova daștil te cherel codolen cai ci slujin lesche te ajutin-ame.

14. Sar zuriardea-tu i experiența le pheiachi Soo Hing? (Dich vi i imaginea.)

¹⁴ Iech phei po anav Soo Hing simțosardea că o Iehova ajutisardea-la prin iech medico. Lache șiaves siles mai but nasfalimata le șăreia. Iech data, les sas-les iech baro accidento, cadea că voi hai laco rrom trebuisarde te mechen penghi buchi caște len sama pe leste. Anda codoia, astardea te aven-len pharimata le lovența. I Soo Hing phendea că simțosardea că ci mai si zuralimos ande late te jial mai dur. Voi șiordea pesco ilo angla o Iehova hai manglea-les te ajutil-la. Sar dea-la răspunso o Iehova? Lengo medico camlea te arachel iech modo caște ajutil-le. Cadea că, von daisarde te primin iech ajutorii catar o stato hai iech than cai te beșen țâra lovența. I Soo Hing phendea: „Dichleam o vast le Iehovasco sar încaladea-ame anda codo pharimos. Vo silo ciaces «Codo cai așunel le manglimata»”. (Ps. 65:2)

15. So ajutisardea iech pheia te hachiarel că o Iehova delas-la răspunso ca lache manglimata?

¹⁵ Amaro Dad cerisco, o mai butivar, ci del răspunso ca amare manglimata ande iech modo nemaidichlo. Tha daisaras te pachias ciaces că o răspunso cai del-les amenghe si exacto so si amen nevoia caște așias lesche loiali. Cadea că, trebul te avas atento caște rodas te dichas le răspunsuri le Iehovasche ca amare manglimata. Iech phei po anav Yoko simțosardea că o Iehova ci delas răspunso ca lache manglimata. Anda codoia, voi astardea te scriil ande iech carnețelo so manghelas catar o Iehova. Pala so nachlea iech timpo, voi dichlea-pe pale ca so scriisardea ando carnețelo hai dea peschi sama că o Iehova dea-la răspunso ca le mai but anda le manglimata cai cărdea-le, vi ca chichiva cai bâstărdeaias-le. Cadea că, si importanto te așias po than poiechdata hai te gândisaras-ame sar del-ame răspunso o Iehova ca amare manglimata. (Ps. 66:19, 20)

16. Sar daisaras te sicavas pachiamos cana si duma anda amare manglimata? (Evrei 11:6)

 ¹⁶ Sicavas pachiamos na numai cana mangas-ame le Iehovasche, tha vi cana hachiaras lesco răspunso ca amare manglimata, indiferento savo avelas cado. (Citisar Evrei 11:6.) Te dichas i experința le phraleschi Mike hai lesca rromniachi, Chrissy. Von camenas anda sea o ilo te slujin co Betelo. O Mike phenel: „But bărșa iech pala aver, șiuteam cereri anda o servicio co Betelo hai mangleam-ame anda cadaia butivar, tha ci samas acharde niciechdata”. O Mike hai i Chrissy pachiaie vi mai dur că o Iehova jianelas sar daștilas te folosil-le o mai mișto ande peschi buchi. Cadea că, von dine vi mai dur sea so sas-len mai lașio anda o Iehova hai slujisarde sar pionieri regulari andel thana cai sas nevoia mai bute phralendar hai ajutisarde ca le proiectea andal construcții teocratico. Aghies, von sile andi buchi itineranto. O Mike phenel: „O Iehova ci dea-ame răspunso ca amare manglimata sea o timpo cadea sar ajucărdeam-ame, tha dea-ame răspunso, ande iech modo mai lașio sar gândisardeam-ame vroiechdata”.

17, 18. Cadea sar phenel-pe ando Psalmo 86:6, 7, so daisaras te pachias?

¹⁷ Citisar Psalmo 86:6, 7. O psalmisto David pachialas anda sea o ilo că o Iehova așunelas lesche manglimata hai că delas-les răspunso lende. Vi amen daștil te avel amen sa cado pachiamos. Le exemplea cai dichleam-le cheren-ame te pachias că o Iehova daștil te del-ame goghiaverimos hai zuralimos caște na mechas-ame. Vo daștil te alosarel te del-ame răspunso ca amare manglimata prin amare phrala hai pheia sau chiar prin manușa cai ci slujin lesche încă, caște ajutin-ame ande vroiechfelo.

¹⁸ Chiar cana o Iehova daștilas te na del-ame sea o timpo o răspunso cai ajucărdeam-les ca amare manglimata, amen jianas că vo va dela-ame răspunso lende. Vo va dela-ame exacto so trebul amenghe cana trebul amenghe. Te mangas-ame vi mai dur, pherde pachiamos că o Iehova așunel-ame hai că va lela sama pe amende aghies, hai andi lumea nevi ‘va dela codolenghe jiuvinde sea so camel lengo ilo’. (Ps. 145:16)