1. So bari bucuria ajucărelas le evreien cai sas-le mechle te tiliaren anda o Babilono?

 SAS iech ghies pherdo bucuria andal israieliți. „O Iehova Del cărdea ca o Cirus, o rege andai Persia”, te mechel le israielițen te tiliaren, pala so beșle mai but bărșa sar phandade ando Babilono. O rege del iech decreto, prin savo le evrei daștin te jian parpale ande pengo them „caște vazden pale o chăr le Iehovasco, o Del le Israelosco”. (Ezra 1:1, 3) So bari bucuria andea cado decreto! Le israeliți daștinas te anen parpale i închinarea uji ando them cai dea-les lenghe o Iehova.

2. Savi sas i iechto buchi cai cărde-la le evrei cai risaile parpale ande pengo them?

² Ando bărș 537 a.a.e., arăsle le dintune israieliți co Ierusalimo, cai sas i capitala le regatoschi anda sud le Iudasco. Von astarde te cheren buchi sigo caște vazden pale o templo hai, ando bărș 536 a.a.e., i fundația sas deja șiuti.

3. Con așilea contra le evreienghe hai sar?

³ Pala so le evrei astarde te cheren buchi caște vazden pale o templo, but manușa așile lenghe contra. Le manușa andal thema de pașa lende „camle te peraven o poporo anda Iuda hai te cheren-le te hasaren pengo tromai caște na mai cheren buchi”. (Ezra 4:4) Tha i situația cărdilea vi mai nasul. Ando bărș 522 a.a.e., o Artaxerxes * cărdilea o nevo rege andi Persia. Codola cai așenas lenghe contra, hachiarde că prin cado paruimos daștinas te așiaven le evreien te na mai cheren buchi caște vazden pale o templo. So cărde von? ‘Rodine te cheren nasulimata ando anav la legeaco.’ (Ps. 94:20) Von bișalde le regesche iech lil ande savo scriisarde, mașcar aver buchia, că le iudei camenas te vazden-pe contra leste. (Ezra  4:11-16) O rege pachiaia cadal hohaimata hai ci mai mechlea-le te vazden pale o templo. (Ezra 4:17-23) Cadea, i buchi, cai astarde-la pherde bucuria, sas așiadi po than. (Ezra 4:24)

4. So cărdea o Iehova pala so i buchi co templo sas așiadi? (Isaia 55:11)

⁴ Le manușa anda o them cai ci anenas închinarea le Iehovasche hai chichiva demnitari persani camenas zurales te așiaven i buchi cai cherenas-la le evrei caște vazden pale o templo. Tha o Iehova camelas ca i buchi te jial angle, hai vo pherel sea o timpo pesco scopo. (Citisar Isaia 55:11.) O Iehova alosardea iech profeto tromano po anav Zaharia, hai dea-les ohto bare viziuni caște zuriarel le evreien. Cadala ajutisarde-le te hachiaren că ci sas-len sostar te daran codolendar cai așenas lenghe contra hai zuriarde-le te cheren mai dur buchi. Mai dur, va avela te dichas i panjito viziunea, ande savi o Zaharia dichlea iech lampadarii hai dui cașta măslinosche.

5. So va dichaia ande cado articolo?

⁵ Savore daisaras te avas perade poiechdata. Anda codoia, i panjito viziunea cai dichlea-la o Zaharia, daștil te ajutil-ame cana nachas prin pharimata. Dacă das amari zor te hachiaras-la mai mișto, ci va avela te mechas-ame cana aver așen amenghe contra, cana avel iech paruimos ande amari viața hai cana si amenghe dine îndrumări cai ci hachiaras-le.

6. Sar zuriardea le evreien i viziunea anda Zaharia 4:1-3? (Dich i imaginea pa i coperta.)

⁶ Citisar Zaharia 4:1-3. Sar ajutisardea le evreien i viziunea anda o lampadarii hai le dui cașta măslinosche te cheren mai dur i buchi pherde tromai chiar cana le manușa așenas lenghe contra? Te dichas iech buchi zurales importanto. Anda o lampadarii ci lipsolas niciechdata o uleio. Anda le dui cașta măslinosche thabdelas sea o timpo o uleio ande iech ciaro. Anda cado ciaro, thabdelas o uleio mai dur ande le efta lămpi pa o lampadarii. Cadea, le lămpi thabonas sea o timpo. Cana o Zaharia pușlea: „So si cadala buchia?”, o îngero phendea lesche: „«Cadala ci va cărdiona-pe nici prin armata, nici prin o zuralimos le manușesco, tha numai prin mânro spirito», phenel o Iehova le armatengo”. (Zah. 4:4, 6) O uleio si o spirito sfânto le Iehovasco, iech baro zuralimos cai ci terminil-pe niciechdata. I bari armata anda o Imperio Persano, sas iech chanci angla o zuralo spirito le Iehovasco. Anda codoia că o Iehova sas pașa lende, codola cai vazdenas o templo, daștinas te nachen părdal o pharimos că le manușa așenas lenghe contra hai te cheren penghi buchi ji co sfârșito. Sea so trebulas te cheren sas te pachian-pe ande leste hai te astaren pale i buchi. Hai cadea cărde, chiar cana o decreto ci sas-lo choslo.

7. So paruimos avilea ando miștimos codolengo cai vazdenas pale o templo?

⁷ Bi te ajucăren-pe, avilea iech paruimos ando miștimos codolengo cai vazdenas o templo. Ando bărș 520 a.a.e., andi Persia astardea te rail o Darius o iechto. Ando duito bărș de cana railas, vo dichlea că o decreto cai sas-lo dino caște așiavel-pe i buchi hai te na mai vazdel-pe pale o templo, sas ilegalo. Cadea că, o Darius dea iech decreto, cai mechlea le evreien te cheren mai dur penghi buchi. (Ezra 6:1-3) So baro paruimos! Tha, o rege cărdea mai but sar cadaia. Vo phendea le manușenghe andal thema de pașa lende te na mai așiaven i buchi co templo, hai, vi mai but, te den-le love hai sea so sas-len nevoia. (Ezra 6:7-12) Cadea că, de cana sas-lo dino o decreto hai ji cana o templo sas-lo pale vazdino, ando bărș 515 a.a.e., nachle mai but sar ștar bărșa. (Ezra 6:15)

8. Sostar daștis te aves tromano cana aver așen tuche contra?

 ⁸ Vi aghies, but slujitori le Iehovasche nachen prin o pharimos că aver manușa așen lenghe contra. Sar exemplo, ande chichiva thema, le guvernea den sea penghi zor te așiaven amari buchi. Cadea că, amare phrala daștin te aven phandade hai ‘îngărde angla le guvernatori hai regi sar mărturia anda lende’. (Mat. 10:17, 18) Poiechdata, iech paruimos cai avel catar o guverno daștil te lașiarel i situația. Sau iech judecătorii lașio daștilas te del iech sentința ando miștimos amara buchiaco. Ande aver thema cai le phrala daștin te anen închinarea le Iehovasche libero, chichiva anda lende nachen prin o pharimos că le jene anda lenghi familia așen lenghe contra. (Mat. 10:32-36) Tha butivar, cadala den penghi sama că ci daștin te cheren amare phralen te na mai slujin le Iehovasche, cadea că ci mai așen lenghe contra. Hai, poiechdata, codola cai așile lenghe contra zurales, cărdile vi von mai târzio Martori le Iehovasche. Dacă vi tu naches prin o pharimos că aver așen tuche contra, av tromano, na mech-tu! O Iehova silo pașa tute hai ajutil-tu prin lesco zuralo spirito sfânto. Cadea că na-i sostar te daras.

9. Sostar sas perade chichiva evrei cana sas șiuti i fundația le neve temploschi?

⁹ Cana sas șiuti i fundația le neve temploschi, chichiva evrei mai phure rovenas. (Ezra 3:12) Cana andine penghe amintea sar sas o baro templo vazdino catar o Solomon, von gândisarde-pe că o nevo templo avelas te avel iech ‘chanci pașa codo’ cai sas mai anglal. (Hag. 2:2, 3) Cana dichle le diferențea mașcar o nevo templo, hai codo de aver data, sas-le zurales perade. Tha i viziunea cai sas le Zaharias avileas te ajutil-le te aven pale bucurime.

10. Sar ajutisardea le evreien so phendea o îngero ande Zaharia 4:8-10 te nachen părdal o fapto că sas-le perade?

¹⁰ Citisar Zaharia 4:8-10. O îngero phendea că le evrei „va bucurina-pe cana va dichena i dori anda plumbo cai încărel-la ando vast o [guvernatoro] Zorobabel”. So camlea te phenel vo? I dori anda plumbo sas iech instrumento folosime caște dichiol-pe dacă iech suprafața sili perfecto verticalo, sau orta. Cadea, o îngero sicadea le slujitorenghe le Devlesche că o nevo templo, chiar cana falas-pe mai țâno, avelas te avel vazdino hai avelas te avel cărdo cadea  sar camelas o Iehova. Dacă o Iehova avileas mulțumime cadale temploia, vi von trebuisardeas te aven. So camelas ciaces o Iehova sas ca i închinarea andini co templo te avel pala lesche norme. Dacă i mai importanto buchi andal evrei avileas codoia te anen închinarea le Iehovasche cadea sar camelas vo, von avileas te aven pale bucurime.

11. Prin so pharimata nachen chichiva slujitori le Iehovasche anda amare ghiesa?

¹¹ Butenghe anda amende daștil te avel pharo cana avel iech paruimos ande amari viața. Sar exemplo, chichiva phrala hai pheia cai slujisarde but bărșa sar misionari, slujitori ca le construcții, co Betelo sau ande aver felo, primisarde iech aver repartiția. Aver, anda codoia că sile mai phure, trebuisarde te mechen iech privilegio cai sas lenghe zurales cuci. Cana nachas prin paruimata sar cadala, si normalo te avas perade. Daștil-pe că mai anglal ci hachiaras sostar lea-pe cadai decizia sau ande amaro ilo pușas-ame sostar avilea ande amari viața cado paruimos. Daștil-pe că si amenghe doro catar i viața cai sas amen mai anglal, hai arăsas te avas perade cana gândisaras-ame că, acana, ci mai daisaras te cheras cadea de but anda o Iehova. (Prov. 24:10) Sar ajutil-ame i viziunea cai sas le Zaharias te das mai dur le Iehovasche sea so si amen mai lașio?

12. Sar ajutil-ame i viziunea cai sas le Zaharias te avel amenghe mai ușoro cana nachas prin iech paruimos?

¹² Caște avel amenghe mai ușoro cana avel iech paruimos ande amari viața, trebul te dichas le buchia cadea sar dichel-le o Iehova. Aghies, vo cherel bare buchia, hai amen si amen i bari pachiv că vo alosardea te cherel buchi ande iech than amența. (1 Cor. 3:9) Le buchia cai cheras-le andi organizația daștin te paruven-pe, tha i iubirea le Iehovaschi caring amende ci va paruvela-pe niciechdata. Cadea că, dacă amen sam codola cai nachas prin iech paruimos cai silo cărdo andi organizația, te na gândisaras-ame sea o timpo sostar sas cărdo cado paruimos. Ando than te rovas pala „le ghiesa cai nachle”, te mangas le Iehovas te ajutil-ame te dichas le miștimata cai anel-le cado paruimos. (Ecl. 7:10) Amari goghi ci trebulas te așel ca le buchia cai ci mai daisaras te cheras-le, tha ca le buchia cai daisaras te cheras-le ande amari nevi situația. Anda i viziunea cai sas le Zaharias, hachiaras că trebul te dichas le lașe buchia ande orisavi situația sam. Cadaia va ajutila-ame te avas bucurime hai te slujisaras loialo le  Iehovasche chiar cana nachas prin iech paruimos.

13. Sostar chichiva israeliți daisarde te pachian că i decizia te astarel-pe pale i buchi co templo sas iech dilimos?

¹³ Cana încă i buchi co templo sas-li așiadi, le dui murșa numime le Iehovastar, o baro rașai Ieșua (sau Iosua) hai o guvernatoro Zorobabel, „astarde te vazden pale o chăr le Devlesco”. (Ezra 5:1, 2) Anda chichiva evrei, cadai decizia daștil-pe că falea iech dilimos. I buchi co templo avelas te cherel-pe tela le iacha le dușmanenghe, cai avileas te cheren oriso caște așiaven-le. Anda codoia, o Zorobabel hai o Iosua trebulas te jianen că o Iehova sas-lo pașa lende. Sar phendea lenghe o Iehova cadaia?

14. Cadea sar phenel-pe ando Zaharia 4:12, 14, sar sas-le zuriarde o Zorobabel hai o Iosua?

¹⁴ Citisar Zaharia 4:12, 14. O îngero phenel caring o Zaharia că le dui cașta măslinosche reprezentin „codolen dui machle”, o Iosua hai o Zorobabel. Von sile sicade sar cana beșen „ande pânrănde pașa o Rai sea la phuveaco”, o Iehova. So bari pachiv sas lenghe sicadi! O Iehova pachialas-pe ande lende. Cadea că, vi le israeliți trebunas te pachian-pe ande oriso avileas te phenen lenghe o Iosua hai o Zorobabel, anda codoia că avelas catar codola cai alosardea-le o Iehova.

15. Sar sicavas că las-ame pala le îndrumări le Iehovasche anda lesco Cuvânto?

¹⁵ Aghies o Iehova sicavel o drom pesche poporosche prin pesco Cuvânto, i Biblia. Ande cado lil, vo phenel amenghe sar te anas lesche închinarea cadea sar camel vo. Sar sicavas că las-ame pala le îndrumări cai si amenghe dine anda lesco Cuvânto? Cana cheras amenghe timpo caște citisaras anda leste hai te hachiaras-les chichi mai mișto. Șiu tuche le pușimata: „Cana citisarav andai Biblia sau anda amare publicații, așiav po than caște gândiv-ma ca so citisardem? Rodav te hachiarav le ciacimata biblico cai sile mai phare? (2 Pet. 3:16) Sau nachav sigo părdal so citisarav?”. Dacă cheras amenghe timpo te hachiaras mai mișto so sicavel-ame o Iehova, va avela amenghe mai ușoro te las-ame pala lesche îndrumări hai te cheras i buchi cai dea-la amenghe, i lucrarea de predicare. (1 Tim. 4:15, 16)

16. So daștil te ajutil-ame te las-ame pala le îndrumări catar o ‘sclavo fidelo hai prevăzătorii’, vi cana ci hachiaras-le cu sea?

¹⁶ O Iehova del-ame îndrumarea vi prin  o ‘sclavo fidelo hai prevăzătorii’. (Mat. 24:45) Poiechdata, daștil-pe că ci hachiaras cu sea le îndrumări cai si amenghe dine. Sar exemplo, daștin te aven amenghe dine instrucțiuni caște jianas so te cheras cana si iech dezastro naturalo. Cu sea cadala, daisaras te gândisaras-ame că ci va întâmplola-pe ando than cai beșas. Sau, daisaras te pachias că o sclavo, lel măsuri prea zurale, caște feril-ame cana si iech pandemia. So daisaras te cheras cana nachas prin cadai situația? Te încăras ande amari goghi că le israelițen sas-len numai miștimata anda codoia că line-pe pala le îndrumări dine prin o Iosua hai o Zorobabel. Sa cadea, te gândisaras-ame vi ca aver relatări biblico cai sicaven chichi de importanto si te așunas le îndrumări. Poiechdata, o poporo le Devlesco primisardea instrucțiuni cai ci fanas goghiaver andel iacha le manușenghe. Tha, ji la urmă, sicadea-pe că sas-le le mai lașe hai hastrade lenghi viața. (Jud. 7:7; 8:10)

17. Sar zuriardea le evreien i panjito viziunea cai dichlea-la o Zaharia?

¹⁷ Chiar cana sas harni, i panjito viziunea cai dichlea-la o Zaharia zuriardea le evreien te paruven o modo sar dichenas penghi buchi hai i închinarea cai anenas-la le Iehovasche. Hai cana cărde so sichile andai viziunea, von dichle ciaces o vast le Iehovasco cai sas pașa lende hai dea-le îndrumarea. Prin o spirito sfânto, o Iehova ajutisardea-le te cheren mai dur i buchi hai te aven-le pale bucuria. (Ezra 6:16)

18. Sar daștil te ajutil-ame i viziunea cai dichlea-la o Zaharia?

¹⁸ I viziunea cai dichlea-la o Zaharia anda o lampadarii hai le dui cașta măslinosche daștil te ajutil-ame zurales but. Voi del-ame o zuralimos cai trebul amenghe cana nachas prin o pharimos că aver manușa așen amenghe contra, ajutil-ame te na hasaras amari bucuria cana ande amari viața avel iech paruimos hai zuriarel-ame te pachias-ame anda sea o ilo ande le îndrumări cai ci hachiaras-le. Cana nachas prin pharimata, te das amari zor te dichas so dichlea o Zaharia, adică buchia cai sicaven că o Iehova lel sama pe pesco poporo. Pala codoia, pherde pachiamos ando Iehova te cheras so sichileam anda cadai viziunea, hai te anas închinarea mai dur lesche anda sea o ilo. (Mat. 22:37) Dacă cheras cadea o Iehova va ajutila-ame te slujisaras lesche pherde bucuria anda sea o timpo. (Col. 1:10, 11)