Codola cai citisaren sigo cadai relatarea daștin te șion penghe o pușimos de opral. Va avela te dichas că si duma anda dui manușa cai sile sa codo anav hai va avela te hachiaras so daisaras te sichioas anda so întâmplosardea-pe.

Le reges Saul anda Israelo sas-les efta șiave hai dui șeia. Lesco iechto șiavo sas o Ionatan. Pala codoia, i Rițpa, i concubina le Sauloschi, cărdea lesche iech aver șiavo po anav Mefiboșet. Si interesanto că vi le Ionatanos sas-les iech șiavo cai bușiolas sa Mefiboșet. Cadea, le reges Saul sas-les vi iech șiavo, hai vi iech nepoto cai sas-le sa codo anav.

Iech data, o Saul camlea te mudarel sea le gabaonițen, cai beșenas mașcar le israeliți. Cadaia sas iech buchi nasul. Sostar? Anda codoia că ando timpo le Iosuasco, mașcar le șăre cai sas opral le israeliți hai le gabaoniți sas phandado iech solaharimos andai pacea. (Ios. 9:3-27)

Cado solaharimos sas-lo valabilo vi andel ghiesa le regesche Saul. Anda codoia că șindea cado solaharimos hai camlea te mudarel sea le gabaonițen, sas andini „opral o Saul hai lesco chăr … doș anda rat”. (2 Sam. 21:1) Pala codoia, cana o David arăslea rege, le gabaoniți cai așile jiuvinde dine lesche duma anda cado baro neciacimos cai sas cărdo. O David pușlea-le sar daștilas te lașiarel i buchi nasul cai cărdea-la o Saul, ca o Iehova te binecuvântil pale o them. Von ci mangle love, tha mangle ca efta andal șiave codolesche „cai cărdea o plano te chosel-le pa i phuv” te aven lenghe dine caște mudaren-le. O David cărdea so mangle. (2 Sam. 21:2-6)

Ji atunci, o Saul hai o Ionatan sas-le deja mudarde ando marimos. O Mefiboșet, o șiav le Ionatanosco, trailas. Vo așilea bango de cana sas-lo șiavorro pala so pelea, hai ci sas-les sar te șiol-pe ando ataco lesche paposco contra le gabaoniți. O David phandadea iech solaharimos mașcar peste hai o Ionatan, cai avileas te anel miștimata vi lesche șiavenghe. Cadea că sas sicado lașimos vi caring o Mefiboșet, o șiav le Ionatanosco. (1 Sam. 18:1; 20:42) I relatarea phenel: „O rege [David] simțosardea mila caring o Mefiboșet, o șiav le Ionatanosco, o șiav le Saulosco, anda codoia că o David hai o Ionatan, o șiav le Saulosco, cărde iech solaharimos angla o Iehova”. (2 Sam. 21:7)

Cu sea cadala, o David cărdea so mangle le gabaoniți hai dea ande lengo vast le duie șiaven le Saulosche – iech anda lende bușiolas Mefiboșet – hai panji anda lesche nepoți. (2 Sam. 21:8, 9) Cadea, sas duriardi i doș anda rat cai sas andini opral o Israelo.

Cado episodo na-i numai istoria. I legea le Devleschi phenelas claro: „Le șiave te na aven mudarde anda so cheren lenghe dada”. (Deut. 24:16) O Iehova ci avileas te mechel te aven mudarde le dui șiave hai le panji nepoți le Saulosche dacă avileas nedoșale. Mai dur, sa codoi legea phenelas: „Iech manuș va avela mudardo numai anda lesco păcato”. Le efta urmași le Saulosche cai mule line partea ande iech anumime modo ca o mudarimos le gabaonițengo. Cadea că, codola efta pochinde anda so cărde.

Anda cadai relatarea, sichioas că varecon ci daștil te lașiarel le buchia nasul cai cherel-le cana gândil-pe hai phenel că ci cherel aver vareso sar numai te lel-pe pala so sas lesche phendo te cherel. Iech proverbo sicavel but goghiaverimos hai phenel: „Lașiar i rig cai așel angla chio pânro hai va avela te phires mișto pe che droma”. (Prov. 4:24-27; Ef. 5:15)