1. So dichen but manușa cana aven i dintuni data ca amare întruniri? (Dich vi i imaginea.)

 TE GÂNDISARAS-AME ca i scena cai avel: iech rrom pesca rromniaia aven i dintuni data ca iech întrunirea catar i sala le Regatoschi. Cana dichen i iubirea andai congregația hai so șucar phiraven-pe le phrala lența sile zurales uimime. Po drom caring chăre, i rromni phenel pesche rromesche: „Simțosardem-ma cadea de mișto! Ci mai prinjiandem niciechdata manușa cadea de lașe sar le Martori le Iehovasche”.

2. Sostar arăsle te aven perade chichiva jene?

² I iubirea cai si mașcar le ciace creștini si zurales specialo. Tha, cu sea cadala, le Martori le Iehovasche ci sile perfecto. (1 Ioan 1:8) Cana arăsas te prinjianas mai mișto codolen andai congregația, va avela te dichas vi lenghe covlimata. (Rom. 3:23) Si nasul că chichiva mechle ca le coaverenghe imperfecțiuni te peraven-le.

3. Pala so sile prinjiande le ciace continuatori le Isusosche? (Ioan 13:34, 35)

³ Te dichas pale o verseto pe savo bazol-pe o articolo. (Citisar Ioan 13:34, 35.) Savo si o semno cai sicavel con si le ciace creștini? I iubirea, na i perfecțiunea. Mai but, dichas că o Isus ci phendea: „Prin cadaia va jianena tumen că san mânre discipoli”, tha vo phendea: „Prin cadaia va jianena savore că san mânre discipoli”. Cadea, o Isus sicadea că na numai lesche discipoli, tha vi codola avreal i congregația avenas te hachiaren con si le ciace creștini. Sar? Pala i ciaci iubirea cai si mașcar lende.

4. So daștinas chichiva manușa te pușen-pe anda le ciace creștini?

 ⁴ Chichiva manușa cai ci sile Martori le Iehovasche daștinas te pușen-pe: „Sar daștil i iubirea te sicavel save si le ciace creștini? Sar sicadea o Isus iubirea caring pesche apostoli? Hai sar daisaras vi amen aghies te sicavas iubirea cadea sar o Isus?”. Savore daisaras te gândisaras-ame cadale pușimatande. Cadaia va ajutil-ame te bariaras amari iubirea, vi mai but cana dichas le coaverenghe imperfecțiuni. (Ef. 5:2)

5. So camlea te phenel o Isus ando Ioan 15:12, 13?

⁵ O Isus phendea că lesche continuatori avenas te aven prinjiande pala iech iubirea mai specialo. (Citisar Ioan 15:12, 13.) Vo dea-le i porunca cai avel: „Te iubin tumen iech averes cadea sar me iubisardem tumen”. So camlea o Isus te phenel? Si duma anda iech iubirea pherdi sacrificio, iubirea cai daștilas te cherel ieche creștinos vi te merel anda pesche phrala dacă trebul. b

6. Sar sicavel o Cuvânto le Devlesco chichi de importanto si i iubirea?

⁶ O Cuvânto le Devlesco sicavel amenghe chichi de importanto si i iubirea. Sar exemplo, anda but manușa cadala si chichiva andal versetea cai placian-le o mai but: „o Del silo iubirea” (1 Ioan 4:8), „te iubis che pașardes sar tut” (Mat. 22:39), „i iubirea pachiarel but păcatea” (1 Pet. 4:8), „i iubirea ci nachel niciechdata” (1 Cor. 13:8). Cadala versetea hai vi aver ajutin-ame te hachiaras că trebul te bariaras hai te sicavas iubirea.

7. Sostar ci va daștila niciechdata o Satan te chidel manușa pa sea i phuv cai te iubin-pe iech averes?

⁷ But manușa pușen-pe: „Sar daștiv te jianav savi si i ciaci religia? Sea le religii phenen că lende si o ciacimos, tha fiesavea sila  sicaimata diferime anda o Del. O Satan cărdea te aven cadea de but religii neciace pi phuv, că andal manușa si zurales pharo te den penghi sama savi si i ciaci religia. Tha, vo ci va daștila niciechdata te chidel manușa pa sea i phuv cai te iubin-pe iech averes. Numai o Iehova daștil te cherel cadaia. Daisaras te pachias ciaces cadai buchi anda codoia că i iubirea avel catar o Iehova. Numai codolen cas o Iehova binecuvântil hai del-le pesco spirito sfânto daștil te avel-len cadai iubirea. (1 Ioan 4:7) Anda codoia o Isus phendea că pala i ciaci iubirea cai sicaven-la iech caring aver daștin te aven prinjiande lesche ciace continuatori.

8, 9. So hachiarde but manușa cana dichle i iubirea anda o mașcar le Martorengo le Iehovasche?

⁸ Cadea sar phendea o Isus de mai anglal, but manușa dichen con si lesche ciace continuatori pala i iubirea cai sicaven-la iech caring aver. Sar exemplo, iech phral po anav Ian anel pesche andi goghi sar simțosardea-pe ca o iechto congreso ca savo gălea. Cado sas-lo încărdo pe iech stadiono de pașa lesco chăr. Chichiva șionența mai anglal, vo gălea sa pe codo stadiono caște dichel iech mecio. O Ian phenel: „Le manușa cai sas-le co congreso phirade-pe zurales diferime catar le manușa cai sas-le te dichen o mecio. Le Martori sicavenas respecto, sas-le șucar hureade hai lenghe șiave phiravenas-pe șucar”. Vo mai phenel: „So placiaia-ma o mai but sas că cadala manușa sas-le mulțumime hai dichiolas-pe i pacea pe lengo mui. Camlem vi me te avav sa cadea. Ci anav manghe amintea niciech cuvântarea cai sas încărdi ande codo ghies, tha o phiraimos le Martorengo ci choslea-pe anda mânri goghi”.  c Si ciaces, i iubirea cai si mașcar amende cherel-ame te phiravas-ame cadea de șucar. Anda codoia că iubisaras amare phralen hai pheian, phiravas-ame lașimaia lența hai sicavas lenghe pachiv.

⁹ Iech phral po anav John simțosardea-pe sa cadea cana astardea te jial ca le întruniri la congregațiache: „Ci avilea manghe te pachiav că savore phiravenas-pe amalicanes . . . ; falas-pe că sile sfinți. Lenghi ciaci iubirea cărdea-ma te pachiav că arachlem i ciaci religia”. d Cadal experiențea hai but aver sicaven că o poporo le Iehovasco si le ciace creștini.

10. Cana trebul te sicavas vi mai but iubirea caring amare phrala? (Dich i nota de subsol.)

¹⁰ Niciech anda amende ci silo perfecto. Anda codoia, poiechdata, amare phrala va phenena sau va cherena buchia cai va holiarena-ame. e (Iac. 3:2) Cana aven cadal situații daisaras te sicavas că iubisaras ciaces le phralen prin o modo sar phiravas-ame lența. Mai dur va avela te dichas so sichioas catar o Isus ande cadai privința. (Ioan 13:15)

11. So buchia nasul anda pengo phiraimos sicade o Iacov hai o Ioan? (Dich vi i imaginea.)

¹¹ O Isus ci ajucărdea perfecțiunea catar lesche continuatori. Mai but, vo ajutisardea-le te paruven le buchia nasul anda pengo phiraimos caște aven cuci andel iacha le Iehovasche. Iech data, le apostoli Iacov hai Ioan șiute penga deia te manghel catar o Isus bare thana anda lende ando Regato. (Mat. 20:20, 21) Cadea,  o Iacov hai o Ioan sicade că sas-le baricane hai că camenas te aven mai importanto sar le coaver. (Prov. 16:18)

12. Numai o Iacov o Ioan phirade-pe nasul ande codoi situația? Explichin.

¹² O Iacov hai o Ioan ci sas le corcore cai phirade-pe nasul ande codoi situația. I Biblia sicavel sar simțosarde-pe le coaver apostoli: „Cana le coaver deș așunde anda cadaia, von holiarde-pe zurales pe le dui phrala”. (Mat. 20:24) Chiar cana ci jianas ciaces so întâmplosardea-pe mai dur, daisaras te gândisaras-ame că le dui phrala hai le coaver apostoli astarde te han-pe. Daștil-pe că cadala phende lenghe: „Con pachian că san tumen caște manghen bare thana ando Regato? Tumen ci san le corcore cai cărde buchi phares pașa o Isus. Vi amen sam sa cadea de lașe sar tumen caște manghas bare thana!”. Oriso gândisarde sau phende, von bâstărde că trebunas te sicaven sea o timpo iubirea hai lașimos iech caring aver.

13. So cărdea o Isus cana le apostoli phirade-pe nasul? (Matei 20:25-28)

¹³ So cărdea o Isus ande cadai situația? Vo ci astardea-pe holiatar. Mai but, vo ci phendea că avelas te rodel aver apostoli, mai lașe hai mai umili, cai daștinas oricana te sicaven iubirea iech caring aver. Ando than te cherel cadaia, o Isus dea duma pherdo răbdarea  lența, anda codoia că vo jianelas că von camenas te cheren so si mișto. (Citisar Matei 20:25-28.) Vo phiradea-pe mai dur lașimaia lența, chiar cana cadaia ci sas nici i dintuni hai nici i palutni data cana le apostoli hale-pe anda con si o mai baro anda lende. (Mar. 9:34; Luca 22:24)

14. Ande so cultura barile le apostoli le Isusosche?

¹⁴ Si ciaces că o Isus jianelas ande so cultura barile lesche apostoli. (Ioan 2:24, 25) Von barile ande iech than cai le conducători religioși sicavenas că le manușa sas-le mișto dichle numai cana sas-len iech baro rango. (Mat. 23:6; dich vi o materialo video Le scamina de anglal andai sinagoga, anda i nota de studiu catar o verseto anda Matei 23:6.) Sa cadea, le conducători religioși iudei pachianas-pe mai orta sar le coaver. f (Luca 18:9-12) O Isus hachiardea că o gândimos anda o than cai barile, daisardeas te rimosarel o modo sar dichenas pen hai le coaveren. (Prov. 19:11) O Isus ci ajucărdea prea but catar lesche discipoli hai nici na holiardea-pe cana cherenas greșeli. O Isus jianelas că lesche apostolen sas-len iech ilo lașio. Cadea că, pherdo răbdarea vo sicadea-le te aven mai umili hai iubitori, ando than te aven phuchiarde hai te camen te sicaven con si o mai baro mașcar lende.

15. So daisaras te sichioas anda i relatarea anda o Iacov hai o Ioan?

¹⁵ Daisaras te sichioas but buchia anda i relatarea anda o Iacov hai o Ioan. Von greșisarde cana mangle bare thana ando Regato, tha vi le coaver apostoli greșisarde cana mechle ca cadai buchi te hulavel-le. Tha o Isus sicadea lașimos hai iubirea caring sea le 12 apostoli. So sichioas cathar? Na-i importanto numai so cheren aver, tha vi so cheras amen cana dichas lenghe imperfecțiuni hai greșeli. So trebul te cheras cana iech phral sau phei holiaren-ame? Daisaras te pușias-ame: „Sostar holiarel-ma cadea de but so cărdea o phral? Sicavel mânro phiraimos iech buchi nasul anda mande cai trebul te lașiarav-la? Nachel o jeno cai holiardea-ma prin iech pharimos? Vi cana si man sostar te avav holiardo, daștiv te sicavav iubirea hai te iertisarav?”. Cana phiravas-ame iubireaia averența sicavas că sam ciace continuatori le Isusosche.

16. So aver vareso daisaras te sichioas catar o Isus?

¹⁶ O exemplo le Isusosco sicavel-ame că trebul te das amari zor caște hachiaras amare phralen hai pheian. (Prov. 20:5) Amen ci daisaras te dichas so si ando ilo le manușengo cadea sar o Isus. Tha daisaras te sicavas răbdarea cana amare phrala hai pheia holiaren-ame. (Ef. 4:1, 2; 1 Pet. 3:8) Daștil te avel amenghe mai ușoro te cheras cadaia, cana das amari zor te hachiaras o modo sar barile von. Te dichas iech exemplo.

17. So miștimata țârdea iech supraveghetoro de cirscumscripție anda codoia că dea peschi zor te prinjianel mai mișto ieche phrales?

¹⁷ Iech supraveghetoro de circumscripție anda Africa de Est anel pesche andi goghi că iech data, prinjiandea iech phral cai falas-pe că ci phiravelas-pe șucar. So cărdea o supraveghetoro? Vo phenel: „Ando than te beșav dur lestar, dem mânri zor te prinjianav-les mai mișto”. Cadea, o supraveghetoro prinjiandea chichiva buchia anda o modo  sar barilea o phral hai sar le buchia prin save nachlea cărde-les te phiravel-pe cadea. O supraveghetoro mai phenel: „Cana hachiardem chichi de pharo sas mai anglal anda cado phral te hachiarel-pe averența hai chichi de but parudea-pe, barilea ande mânre iacha. Arăsleam lașe amala.” Butivar cana das amari zor caște hachiaras mai mișto amare phralen hai pheian si amenghe mai ușoro te sicavas iubirea caring lende.

18. So pușimata daisaras te șioas amenghe dacă iech phral holiardea-ame? (Proverbe 26:20)

¹⁸ Ande chichiva situații, daisaras te pachias că trebul te das duma ieche phralesa cai holiardea-ame. Tha, mai anglal, avelas mișto te șioas amenghe chichiva pușimata: „Prinjianav mișto sea le buchia? (Prov. 18:13), Duchadea-ma vo bi te del peschi sama? (Ecl. 7:20), Cărdem vi me, vroiechdata, iech greșeala sar cadaia? (Ecl. 7:21, 22), Dacă dav duma leia, va avela te lașiarav i situația sau te rimosarav-la vi mai but?”. (Citisar Proverbe 26:20.) Dacă șioas amenghe pușimata sar cadala, daisaras te hachiaras că i iubirea anda amaro phral, daștil te cherel-ame te nachas părdal leschi greșeala.

19. So cames te cheres?

¹⁹ Sar grupo, le Martori le Iehovasche sicaven că si le ciace discipoli le Isusosche. Fiesavo anda amende, sicavas că sam lesche continuatori cana phiravas-ame iubireaia hai lașimaia amare phralența, vi cana greșin contra amenghe. Cana cheras cadea, ajutisaras vi averen te jianen savi si i ciaci religia hai te cărdion slujitori le Iehovasche, o Del la iubireaco. Cadea că, te das vi mai dur sea amari zor te phiravas-ame iubireaia, anda codoia că cado si o semno cai sicavel con si le ciace creștini.