Sostar o murș cai sas o mai pașardo neamo la Naomiaco phendea că avelas te rimosarel peschi moștenirea dacă avileas te lel sar rromni la Ruta? (Rut 4:1, 6)

Andel ghiesa biblico, dacă iech murș merelas bi te aven-les șiavorre, vazdenas-pe chichiva pușimata: So avelas te întâmplol-pe la phuveaia cai sas-les? Avelas te îngărel mai dur varecon o anav lesca familiaco sau avelas te hasarel-pe anda sea o timpo? Andi Legea mozaico arachel-pe o răspunso cadale pușimatande.

So întâmplolas-pe la phuveaia ieche murșeschi pala so merelas sau cana arăsălas cioro hai bichinelas-la? Cadaia daștilas te avel chindi parpale lesche phralestar sau ieche pașarde neamostar. Cadea, i phuv așelas andi familia. (Lev. 25:23-28; Num. 27:8-11)

Tha sar așelas jiuvindo o anav le murșesco cai mulea? Prin i căsătoria mașcar le cumnați, sar sas i căsătoria mașcar i Rut hai o Boaz. Iech murș lelas sar rromni la phivlea lesche phraleschi, caște cherel iech moștenitoro cai te îngărel mai dur o anav codolesco cai mulea hai te moștenil leschi phuv. Cado aranjamento pherdo iubirea sas ando miștimos la phivleaco. (Deut. 25:5-7; Mat. 22:23-28)

Sar exemplo, i Naomi, sas-li căsătorime ieche murșeia po anav Elimelec. Pala so vo hai lenghe dui șiave mule, ci mai așilea nici iech murș ande laco chăr cai te lel sama pe late. (Rut 1:1-5) Pala so gălea parpale andi Iuda, i Naomi phendea caring i Rut te manghel le Boazos te avel o răscumpărătoro la phuveaco. Vo sas iech neamo pașardo lache rromesco, o Elimelec. (Rut 2:1, 19, 20; 3:1-4) Tha o Boaz dea peschi sama că si iech neamo vi mai pașardo, savesco anav ci silo phendo andi Biblia. Cadea că, cado murș daștilas mai anglal te alosarel te avel o răscumpărătoro. (Rut 3:9, 12, 13)

Mai anglal, codo murș camlea te ajutil. (Rut 4:1-4) Vo jianelas că trebulas te pochinel vareso anda codoi phuv, tha vi hachiardea că i Naomi sas prea phuri te mai cherel iech șiavorro cai te moștenil i phuv cai mechlea-la o Elimelec. Cadea că, i phuv avelas te avel șiuti ca leschi moștenirea. Cadaia falas-pe iech lași afacerea anda leste.

Tha vo ci mai camlea te chinel parpale i phuv cana hachiardea că trebulas te lel sar rromni la tărnea Rut. Vo phendea: „Ci daștiv te chinav-la parpale, anda codoia că avelas te rimosarav mânri moștenirea”. (Rut 4:5, 6)

Dacă o mai pașardo neamo la Naomiaco, sau iech aver murș, lelas la tărnea Rut sar rromni, hai voi cherelas iech șiavorro, cado avelas te moștenil i phuv cai mechlea-la o Elimelec. Atunci, sar avelas ‘te rimosarel peschi moștenirea’ cado murș? I Biblia ci phenel, tha daștinas te aven chichiva explicații.

• Codo murș pachialas că avileas ande lesco hasarimos dacă chinelas i phuv cai mechlea-la o Elimelec, anda codoia că, ji la urmă, i phuv ci avileas leschi, tha le șiaveschi cai avelas te cherel-les i Rut.

• Vo trebulas te lel sama vi pi Naomi, hai vi pi Rut.

• Dacă codole murșes avileas-les deja șiavorre, cadala trebunas te hulaven i moștenirea le șiavorrența cai avileas te cherel-le i Rut.

• Dacă ci sas-les aver șiavorre, vi i phuv cai mechlea-la o Elimelec hai vi leschi avileas le șiavorreschi cai cărdeas-les i Rut. Cadaia însemnolas că i moștenirea avileas te arăsăl ca iech șiavorro cai phiravelas o anav le Elimelecosco, na lesco. Codo murș ci camlea te hasarel peschi moștenirea hai cadea mechlea ca o Boaz te avel o răscumpărătoro. O Boaz alosardea te cherel cadaia ca „i moștenirea codoleschi mulo te încărel jiuvindo o anav cadalesco”. (Rut 4:10)

Pala so fal-pe, codo murș cai sas o mai pașardo neamo la Naomiaco, sas-lo interesime mai but te îngărel mai dur pesco anav hai te încărel peschi moștenirea. Vo gândisardea-pe numai peste hai cadaia ci mechlea-les te gândil ujes. Tha, ando than te avel îngărdo mai dur, lesco anav hasardea-pe andi istoria, hai aghies amen nici na prinjianas lesco anav. Sa cadea, vo hasardea o baro privilegio cai sas le Boazos – te avel iech andal phure anda save avilea o Mesia, o Isus Cristos. So nasul așile le buchia anda cado murș cai gândisardea-pe numai ca pesco miștimos hai ci camlea te ajutil varecas cai sas andi nevoia. (Mat. 1:5; Luca 3:23, 32)