1, 2. So întâmplol-pe cana le manușa bolen-pe hai so va dichaia mai dur?

 DICHLEAN vi tu vreoiechdata mai but jene cai bolenas-pe? Vi tu așundean sar dine anda sea o ilo răspunso ca le dui pușimata cai sas lenghe șiute angla te bolen-pe. Cana vazdine-pe anda o pai, iech bari bucuria dichiolas pe lengo mui. Codola cai sile code maren zurales anda penghe vasta, hai lenghe neamuri hai amala den-pe bare lența. Cam ande fiesavo curco bolen-pe mii manușa hai cărdion Martori le Iehovasche.

² Cames vi tu te boles-tu? Dacă da, tu san sar iech cuci bar cai strălucil ande cadai lumea cali le Satanoschi, anda codoia că tu alosardean te ‘rodes le Iehovas’. (Ps. 14:1, 2) Cado articolo sas cărdo vi anda codola tărne, tha vi anda codola mai phure cai camen te bolen-pe. Hai codola cai sile deja bolde va avena zuriarde te slujin le Iehovasche anda sea o timpo. Mai dur, va avela te dichas trin buchia cai va ajutina-ame te hachiaras sostar camas te slujisaras le Iehovasche.

3. Sostar iubin le slujitori le Iehovasche o ciacimos hai o ortomos? (Psalmo 119:128, 163)

³ O Iehova phendea pesche poporosche ‘te iubil o ciacimos’. (Zah. 8:19) O Isus zuriardea pesche continuatoren te roden o ortomos. (Mat. 5:6) Cadaia însemnol te cames anda sea o ilo te cheres sea so si orta, lașio hai ujo andel iacha le Devlesche. Iubis vi tu o ciacimos hai o ortomos? Amen pachias anda sea o ilo că da. Tu urâs o hohaimos hai sea so si neorta hai nasul. (Citisar Psalmo 119:128, 163.) Codola cai hohaven sicaven că len-pe pala o Satan, o conducătoro cadala lumeaco. (Ioan 8:44; 12:31) O Satan camel te meliarel o sfânto anav le Iehovasco  Del. O Beng astardea te phenel hohaimata anda o Del încă de cana le manușa risarde o dumo le Iehovasche ando Eden. Vo camel te sicavel că o Iehova si iech conducătoro cai gândil-pe numai peste hai silo nepachivalo, cai garavel le lașe buchia le manușendar. (Gen. 3:1, 4, 5) O Satan pherel vi mai dur i goghi hai o ilo le manușengo hohaimatanța anda o Iehova. Cana le manușa alosaren te na iubin o ciacimos, o Satan daștil te îngărel-le ca iech phiraimos nasul hai te arăsăn te cheren buchia neorta. (Rom. 1:25-31)

4. Sar sicavel o Iehova că si „o Del le ciacimasco”? (Dich vi i imaginea.)

⁴ O Iehova, „o Del le ciacimasco”, camel te sicavel o ciacimos codolen cai iubin-les. (Ps. 31:5) Cadea, vo ajutil le manușen te na mai aven athade catar le hohaimata le Satanosche. Mai but, vo sicavel-le te aven pachivale hai orta. Cadea, vo ajutil-le te avel-len iech șucar viața hai te avel-len pacea ando ilo. (Prov. 13:5, 6) Simțoseardean vi tu pe chi morci cadai buchi cana studiisardean i Biblia? Sichilean că le norme le Iehovasche si i mai lași îndrumarea anda sea le manușa, hai vi anda tute. (Ps. 77:13) Anda codoia, cames te încăres o ortomos le Iehovasco. (Mat. 6:33) Cames te cheres prinjiando o ciacimos, hai te sicaves că so phenel o Satan anda amaro Del si iech baro hohaimos. Tha sar daștis te cheres cadaia?

5. Sar daștis te așes pașa o ciacimos hai o ortomos?

⁵ Daștis te alosares te trais chi viața ande iech modo cai sicavel că așes de i rig le Iehovaschi. Si sar cana pheneias: „Ci pachiav le hohaimata le Satanosche hai așiav pașa o ciacimos. Camav ca o Iehova, o mai Baro anda universo, te avel mânro conducătorii hai te cherav so si orta ande lesche iacha”. Sar daștis te cheres cadaia? Phen le Iehovasche ando manglimos că cames te slujis lesche anda sea o timpo hai pala codoia cher o bolimos caște sicaves că dean chi viața lesche. I iubirea anda o ciacimos hai anda o ortomos si iech zuralo motivo caște alosares te boles-tu.

6. So motivea del-ame o Psalmo 45:4 te iubisaras le Isus Cristosos?

⁶ Sostar iubis le Isus Cristosos? Ando Psalmo 45:4 arachas chichiva lașe motivea. (Citisar.) O Isus iubil o ciacimos, i umilința hai o ortomos. Dacă vi tu iubis o ciacimos hai o ortomos, si normalo te iubis vi le Isus Cristosos. Gândisar-tu ca o tromai cai sicadea-les o Isus  cana așilea pașa so si orta hai ciacio. (Ioan 18:37) Tha sar sicadea o Isus umilința?

7. So placial-tu o mai but cana gândis-tu ca i umilința le Isusoschi?

⁷ O Isus sicadea umilința prin sea so cărdea. Vo ci ortosardea niciechdata i atenția caring peste, hai dea sea i pachiv pesche Dadesche. (Mar. 10:17, 18; Ioan 5:19) So si ande chio ilo cana hachiares so bari umilința sicadea o Isus? Siguro cherel-tu te iubis le șiaves le Devlesco hai te les-tu pala leste. Tha sostar si o Isus umilo? Anda codoia că o Iehova silo umilo, hai o Isus iubil hai lel-pe pala pesco Dad. (Ps. 18:35; Evr. 1:3) Ci cheren-tu sea cadal buchia te pașios vi mai but le Isusostar, cai sicavel ande iech modo perfecto sar silo o Iehova?

8. Sostar iubisaras le Isusos, amaro Rege?

⁸ Amen iubisaras le Isusos, amaro Rege, anda codoia că vo silo o mai lașio conducătorii. Chiar o Iehova sicadea pesche șiaves hai dea lesche i buchi te rail. (Is. 50:4, 5) Sa cadea, te gândisaras-ame ca i iubirea pherdi sacrificio cai sicadea-la o Isus. (Ioan 13:1) Anda codoia că si amaro Rege, o Isus meritil amari iubirea. O Isus phendea că codola cai iubin-les ciaces încăren lesche porunci hai si lesche amala. (Ioan 14:15; 15:14, 15) So bari buchi si te avas amala le șiaveia le Iehovasco!

9. Sar ameal o bolimos le creștinengo le bolimaia le Cristososco?

⁹ O Isus phendea claro că lesche discipoli trebul te aven bolde. (Mat. 28:19, 20) Vi vo boldea-pe. Si ciaces, lesco bolimos si diferime ande chichiva buchia catar o bolimos lesche continuatorengo. (Dich o chenarii „ Diferențea mașcar o bolimos le Isusosco hai o bolimos lesche continuatorengo.”) Tha mașcar cadala si vi buchia cai amean. Cana boldea-pe, o Isus sicadea că camel te cherel i voința pesche Dadeschi. (Evr. 10:7) Sa cadea, cana le continuatori le Cristososche bolen-pe, von sicaven angla aver că dine penghi viața le Iehovasche. Pala o bolimos, i mai importanto buchi anda lende si te cheren so camel o Iehova, na so camen von. Cadea, von len-pe pala o exemplo le Isusoco.

10. Sostar trebulas ca i iubirea anda o Isus te cherel-tu te boles-tu?

¹⁰ Si ciaces, tu pachias anda sea o ilo că o Isus si o Șiav unico-năștime le Iehovasco hai o Rege alosardo lestar te rail. Hachiares că o Isus silo umilo hai că lel-pe perfecto pala lesco Dad. Sichilean sar dea vo haben codolenghe bochale, sar zuriardea o ilo codolengo perade, hai sar sastiardea le nasfalen. (Mat. 14:14-21) Diches o modo ande savo conducil i congregația creștino aghies. (Mat. 23:10) Sa cadea, jianes că ando viitorii, va anela vi mai but miștimata le manușenghe, sar Rege le Regatosco le Devlesco. Sar daștis te sicaves chi iubirea anda leste? De chi zor te les-tu pala leste. (Ioan 14:21) Iech anda le buchia cai daștis te cheres-le si te des chi viața le Iehovasche hai te boles-tu.

11. Savo pachias că si o mai importanto motivo caște boles-tu hai sostar?

¹¹ Savo si o mai importanto motivo caște boles-tu? O Isus sicadea savi si i mai bari porunca dini le Devlestar: „Te iubis le Iehovas, chio Del, sea che ileia, sea che sufletoia, sea chia goghiaia hai sea che zuralimaia”. (Mar. 12:30) Sicaven cadal cuvintea vi chi iubirea anda o Del?

12. Sostar iubis le Iehovas? (Dich vi i imaginea.)

¹² Si tut but motivea caște iubis le Iehovas. Sar exemplo, hachiardean că vo silo i haing la viațachi hai că lestar avel „orisavi lași buchi hai orisavo daro perfecto.” (Ps. 36:9; Iac.  1:17) Fiesavi lași buchi cai anel tuche bucuria avel catar amaro Dad generoso hai iubitorii.

13. Sostar si i răscumpărarea iech daro cadea de cuci?

¹³ I răscumpărarea si o mai cuci daro cai dea-les amenghe o Iehova. Caște hachiaras chichi de cuci si, te gândisaras-ame ca o phanglimos cai si mașcar o Iehova hai lesco Șiavo. O Isus phendea: ‘O Dad iubil-ma’ hai „me iubiv le Dades”. (Ioan 10:17; 14:31) Andel miliardea bărșa cai nachle, lengo phanglimos arăslea sea mai zuralo. (Prov. 8:22, 23, 30) Te gândisaras-ame so bari duch simțosardea o Del cana mechlea ca lesco Șiavo te nachel prin bare ducha hai te merel. Cu sea cadala, anda codoia că vo iubil zurales but le manușen, hai vi tut, o Iehova camlea te del pesche Șiaves iubime sar jertfa, ca tu hai aver te daștin te train veșnico. (Ioan 3:16; Gal. 2:20) Cado si o mai baro motivo anda savo iubisaras le Devles.

14. Savi si i mai șucar buchi cai daștis te alosares te cheres-la?

¹⁴ Chi iubirea anda o Iehova barilea anda codoia că sichilean sea mai but buchia anda leste. Siguro cames te pașios sea mai but lestar acana hai anda sea o timpo. Pherdo iubirea vo zuriarel-tu te bucuris lesco ilo. (Prov. 23:15, 16) Daștis te cheres cadaia na numai prin so phenes, tha vi prin so cheres. O modo sar trais chi viața va sicavela că iubis ciaces le  Iehovas. (1 Ioan 5:3) Cadaia si i mai șucar buchi cai daștis te alosares te cheres-la ande chi viața.

15. Sar daștis te sicaves că iubis le Iehovas?

¹⁵ Sar daștis te sicaves că iubis le Iehovas? Mai anglal, trebul te cheres iech manglimos anda sea o ilo, ande savo te phenes le Iehovasche că des chi viața lesche. (Ps. 40:8) Pala codoia, sicaves vi averenghe că dean chi viața lesche, cana cheres o bolimos. Cadea sar deam duma mai anglal ande cado articolo, o bolimos si i mai importanto buchi cai daștis te alosares te cheres-la. Astares iech nevi viața, ande savi ci mai trais anda tute, tha anda o Iehova. (Rom. 14:8; 1 Pet. 4:1, 2) Daștil-pe că hachiares că si iech bari decizia, hai cadea si. Tha o bolimos pâtrel tuche o drom caring i mai șucar viața.

16. Cadea sar phenel-pe ando Psalmo 41:12, sar va pochinela o Iehova codolen cai camen te slujin lesche?

¹⁶ O Iehova si o mai generoso Jeno! Indiferento so des-les, vo va dela-tu sea o timpo parpale but mai but. (Mar. 10:29, 30) Vo phenel că va dela-tu i mai lași hai șucar viața, chiar vi ande cadai lumea purani, cai na pa but timpo ci va mai avela. Hai cado si numai o începuto. O drom pe savo astardean te jias pala o bolimos ci va terminila-pe niciechdata. Daștis te slujis che Dadesche veșnico. I iubirea cai si mașcar tute hai chio Dad cerisco va bariola sea mai but hai va avela te trais cadea de but sar vo, anda sea o timpo. (Citisar Psalmo 41:12.)

17. So daștis te des le Iehovas cai nai-les încă?

¹⁷ Chiar cana orisavi lași buchi hai orisavo momento șucar anda chi viața avel catar chio Dad cerisco, vi tu daștis te des-les vareso zurales cuci. Daștis te sicaves chi iubirea anda Codo cai cărdea o cerii hai i phuv cana des-les vareso cai nai-les încă: chi închinarea loialo andini anda sea o ilo. (Iov 1:8; 41:11; Prov. 27:11) Cado si ciaces o mai lașio modo te trais chi viața! Cadea că, chi iubirea anda o Iehova si o mai zuralo motivo caște boles-tu.

18. So pușimata daștis te șios tuche?

¹⁸ Va avela te boles-tu? Numai tu daștis te des o răspunso cadale pușimaste. Tha daștis  te pușes-tu: „Sostar mai ajucărav?” (Fap. 8:36) An tuche andi goghi le trin motivea cai dichleam-le ande cado articolo hai gândisar-tu lende. O iechto: iubis o ciacimos hai o ortomos. Șiu tuche o pușimos: „Ajucărav o timpo cana sea le manușa cai va traina pi phuv va iubina o ciacimos hai o ortomos?”. O duito: iubis le Isus Cristosos. Șiu tuche o pușimos: „Camav ca o Șiavo le Devlesco te avel mânro Rege hai te uștarav pe lesche urme?”. O trinto hai o mai importanto: iubis le Iehovas. Șiu tuche o pușimos: „Camav te bucuriv o ilo mânre Devlesco hai te slujiv numai lesche?”. Dacă o răspunso cadale pușimatande si „da”, atunci so motivea si tut te na boles-tu? Sostar mai ajucăres? (Fap. 16:33)

19. Sostar ci trebulas te încăres-tu parpale te boles-tu? Cher iech ilustrarea. (Ioan 4:34)

¹⁹ Dacă încărel-tu vareso parpale te boles-tu, gândisar-tu ca iech ilustrarea cai cărdea-la o Isus. (Citisar Ioan 4:34.) Vo phendea că te cheres i voința leschi Dadeschi si sar o haben. Sostar? Anda codoia că o haben si iech anda le mai lașe buchia cai dea-le amenghe o Iehova. O Isus jianelas că sea so manghel o Iehova amendar si ande amaro miștimos. O Iehova ci avelas te manghel amendar niciechdata vareso cai daștil te cherel amenghe nasul. Manghel o Iehova tutar te boles-tu? Sar te na! (Fap. 2:38) Daștis te pachias anda sea o ilo că, dacă va avela te boles-tu, va avena-tu but miștimata. Dacă varecon avelas te del tuche o mai lașio haben, încăreias-tu parpale te na has-les? Atunci, sostar te încăres-tu parpale te boles-tu?

20. So va dichaia ando articolo cai avel?

²⁰ Sostar mai ajucăres? But manușa phenen: „Ci som încă pregătime te bolav-ma”. O ciacimos si că, te des chi viața le Iehovasche, hai te boles-tu si i mai bari decizia cai daștis te les-la vroiechdata. Angla so te cheres cadaia, trebul tuche timpo te gândis-tu zurales mișto hai te cheres sea so daștis caște aves gata anda cado paso. Tha, dacă cames anda sea o ilo te boles-tu, sar daștis te pregătis-tu? Va dichaia o răspunso cadale pușimaste ando articolo cai avel.