Amare păcatea daștin te aven iertime numai prin o rat șiordo le Isusostar prin savo chindea amen parpale anda o păcato. (Ef. 1:7) Tha, i Biblia phenel că o Del, „ande pesco lașimos, iertisardea le păcatea cărde andel purane ghiesa”, adică angla so te avel dini i răscumpărarea. (Rom. 3:25) Sar daisardea o Iehova te cherel cadai buchi hai vi te așel iech Del orta?

Cana vo alosardea ca le manușa cai așunen lestar te aven salvime prin iech „descendența”, ande lesche iacha, sas sar cana i răscumpărarea sas deja pochindi. (Gen. 3:15; 22:18) O Del jianelas că, co timpo alosardo lestar, lesco Șiav unico-năștime avelas te camel te del i răscumpărarea. (Gal. 4:4; Evr. 10:7-10) Cana o Isus sas-lo pi phuv, sar reprezentanto le Iehovasco, lesche sas dino o zuralimos te iertil le păcatea angla so te del peschi viața anda amende. Vo daisardea te cherel cadai buchi ando miștimos codolengo saven sas-len pachiamos anda codoia că jianelas că leschi jertfa avelas te pachiarel lenghe păcatea. (Mat. 9:2-6)