1, 2. Sostar si vi mai șucar i viața varecaschi pala o bolimos?

 O BOLIMOS pherel amare ile bucuriatar. Codola cai cheren cadaia silen i bari pachiv te aven andi șucar familia le Iehovaschi. Von sicaven so silen ando ilo, cadea sar phendea vi o David: „Voime si codo cas alosares-les hai anes-les pașa tute caște beșel ande che barea”. (Ps. 65:4)

² Cu sea cadala, o Iehova ci anel oricas ande peschi familia. Cadea sar dichleam ando articolo cai nachlea, o Iehova camel te phandel iech amalimos chidino numai codolența cai camen te aven lesche amala. (Iac. 4:8) Cana des chi viața le Iehovasche hai boles tut, pașios lestar ande iech modo specialo. Daștis te pachias anda sea o ilo că, pala codoia, vo ‘va avela te șiorel opral tute but miștimata, ji cana ci va lipsola tuche chanci’. (Mal. 3:10; Ier. 17:7, 8)

3. So trebul te cherel fiesavo manuș cai dea peschi viața le Iehovasche hai boldea-pe? (Eclesiasto 5:4, 5)

³ Si ciaces, cana boles tut abia astarel chi viața sar manuș le Iehovasco. Pala codoia, va avela te cheres sea so daștis caște încăres o solaharimos cai cărdean-les le Iehovasche, chiar cana va avela te naches prin pharimata sau chio pachiamos va avela zumado. (Citisar Eclesiasto 5:4, 5.) Acana că san iech discipolo le Isusosco, va avela te des sea chi zor te les tut pala leste hai te încăres lesche porunci anda sea o ilo. (Mat. 28:19, 20; 1 Pet. 2:21) Mai dur, va avela te diches sar daștis te cheres cadaia.

 LE TUT VI MAI DUR PALA O ISUS CHIAR CANA CHIO PACHIAMOS SILO ZUMADO

4. So camlea te sicavel o Isus cana phendea că lesche discipoli avenas te phiraven iech „stâlpo de tortură”? (Luca 9:23)

⁴ Pala o bolimos, va avela te naches vi prin pharimata. O Isus sicadea că lesche discipoli avenas te phiraven iech „stâlpo de tortură” na anda iech ghies, tha „ande fiesavo ghies”. (Citisar Luca 9:23.) Camlea o Isus te phenel că lenghi viața avelas te avel sea o timpo pherdi pharimata? Nici. Vo camlea te sicavel că, pașa le miștimata cai va avela-len, von va nachena vi prin pharimata. Hai chichiva anda cadala daștinas te aven zurales phare. (2 Tim. 3:12)

5. So miștimata phendea o Isus că va avela codolen cai mechle palal but buchia anda o Iehova?

⁵ Daștil-pe că chi familia așilea tuche contra sau mechlean palal vareso cai anelas tuche love caște șios o Regato po iechto than ande chi viața. (Mat. 6:33) Daștis te pachias anda sea o ilo că o Iehova dichel sea cadal buchia. (Evr. 6:10) Mai but, le dumes cai phendea-len o Isus sile vi anda tute: „Na-i chonic cai mechlea chăr sau phrala sau pheia sau dei sau dad sau șiave sau phuvea anda mande hai anda i vestea lași hai te na primil 100 var mai but acana, ande cado timpo – chăra hai phrala hai pheia hai deia, șiave hai phuvea, ande iech than persecuțiența – , hai ando sistemo cai avel, viața veșnico”. (Mar. 10:29, 30) Si ciaces, le miștimata cai si tut acana sile but mai bare sar orisavi buchi cai mechlean-la palal. (Ps. 37:4)

6. Sostar trebul te mares tut contra „o camnimos le masesco” vi pala o bolimos?

⁶ Iech pharimos cai trebul te îngăres-les vi pala o bolimos si „o camnimos le masesco”. (1 Ioan 2:16) Ji la urmă, tu san vi mai dur iech manuș imperfecto. Poiechdata, daștis te simțosares tut cadea sar o apostolo Pavel, cai phendea: „Pala o manuș de andral ciaiol man i legea le Devleschi, tha dichav ande mânro corpo iech aver legea, cai marel-pe contra i legea cai si ande mânri goghi hai încărel man phanglo tela i legea le păcatoschi savi si ande mânro corpo”. (Rom. 7:22, 23) Daștil-pe că vi tu simțosares tut perado anda che covlimata. Cu sea cadala, dacă beșes hai gândisares tut ca o solaharimos cai cărdean-les cana dean chi viața le Iehovasche, daștis te așes zuralo angla o păcato. Mai but, cana chio pachiamos va avela zumado, cado solaharimos va ajutila tut te jias angle. Sar?

7. Sar va ajutila tut o bolimos te așes loialo le Iehovasche?

⁷ Cana iech manuș del peschi viața le Iehovasche, vo ci mai trail anda peste. (Mat. 16:24) Cadaia însemnol că, cana avel tuche te cheres vareso cai si nasul andel iacha le Iehovasche, va avela te phenes „na”. Cadea că, cana chio pachiamos va avela zumado, ci va avela te gândis tut prea but ca so trebul te cheres, anda codoia că tu jianes că trebul te cheres iech corcori buchi, te așes loialo le Devlesche. Chio ilo va avela hotărâme te cherel so si mișto andel iacha le Iehovasche. Hai chio pachiamos va avela sar le Iovosco, cai, chiar cana nachlea prin bare pharimata, phendea hotărâme: „Ci va avela te mechav mânro pachiamos!”. (Iov 27:5)

8. Sar zuriarel tut o manglimos cai cărdean-les cana dean chi viața le Iehovasche te naches părdal orisavi buchi cai daștil te zumavel chio pachiamos?

⁸ Cana beșes hai gândisares tut ca so phendean le Iehovasche ando manglimos cana dean chi viața lesche, va avela te araches o zuralimos te duriares tutar orisavi buchi cai daștil te zumavel chio pachiamos. Sar  exemplo, avelas te diches tut pala avereschi rromni sau pala avereaco rrom? Nici. Tu solahardean le Iehovasche că ci va avela te cheres niciechdata cadaia. Dacă ci meches le buchia nasul te barion ande chio ilo, ci va trebula pala codoia te des chi zor te încalaves-len cothar. Tu ci va avela te phires „po drom codolengo nasul”. (Prov. 4:14, 15)

9. Sar va ajutila tut o bolimos te șios le Iehovas po iechto than ande chi viața?

⁹ Te phenas că iech manuș del tut iech than buchiaco cai ci mechel tut te jias ca sea le întruniri. So va avela te cheres? Va avela te beșes prea but te gândis tut ca so trebul te alosares? Nici. Mai anglal te araches cadai buchi, tu alosardean deja că ci va avela te jias ca iech than buchiaco sar cado. Cadea, ci va avela te simțosares tut spidime te jias ca codoi buchi hai pala codoia te rodes sar te șios le Iehovas po iechto than ande chi viața. Sar daștil te ajutil tut o exemplo le Isusosco? Vo sas-lo hotărâme te cherel so sas lașio andel iacha pesche Dadesche. Cadea sar vo, vi tu va avela te aves hotărâme te duriares tutar orisavi buchi cai daștil te rimosarel chio amalimos le Devlesa, savesche dean chi viața. (Mat. 4:10; Ioan 8:29)

10. Sar va ajutila tut o Iehova pala o bolimos te les tut sea o timpo pala o Isus?

¹⁰ Sea le pharimata hai zumaimata prin save naches sicaven le Iehovasche că san hotărâme te les tut sea o timpo pala o Isus. Daștis te pachias anda sea o ilo că o Iehova va ajutila tut. I Biblia phenel: „O Del silo fidelo hai ci va mechela te aven zumade mai but sar daștin te phiraven, tha, cana va avela o zumaimos, vo va pregătila tumenghe vi i calea te înclen, caște daștin te nachen părdal leste”. (1 Cor. 10:13)

 SO DAȘTIS TE CHERES CAȘTE LES TUT SEA O TIMPO PALA O ISUS?

11. Savi si iech buchi prin savi daștis te sicaves că les tut pala o Isus? (Dich vi le imagini.)

¹¹ O Isus slujisardea anda sea o ilo le Iehovasche. O manglimos, ajutisardea-les te încărel pesco amalimos chidino le Devlesa. (Luca 6:12) Vi tu daștis te les tut pala o Isus dacă, pala o bolimos, cheres mai but buchia cai ajutin tut te pașios le Iehovastar. I Biblia phenel: „Sar ji acana barileam ando pachiamos, te phiras vi mai dur ande iech modo orta pe sa codo drom”. (Filip. 3:16) Poiechdata, va avela te așunes le relatări le phralenghe hai le pheianghe cai camle te cheren mai but andi buchi le Iehovaschi. Daștil-pe că von cărde i Școala anda le Evanghelizatori le Regatosche sau mutisaile ande iech than cai si nevoia mai bari. Dacă vi tu cames te cheres cadaia, cher sea so daștis caște arăsăs ca so șiutean tuche andi goghi. (Fap. 16:9) Tha so daștis te cheres dacă acana chi situația ci mechel tut? Na gândisar tut că san mai tele sar codola cai cheren mai but. Na bâstăr că i mai importanto buchi si te așes zuralo ando pachiamos. (Mat. 10:22) O Iehova dichel cuci sea so tu daștis te cheres ande leschi buchi. Cana slujis le Iehovasche loialo hai cheres sea so daștis anda leste, sicaves că les tut pala o Isus. (Ps. 26:1)

12, 13. So daștis te cheres dacă chio ilo ci mai țârdel tut cadea de but te cheres buchi anda o Iehova? (1 Corinteni 9:16, 17) (Dich vi o chenarii „ Naș vi mai dur andi cursa”.)

¹² So trebulas te cheres dacă fal tut că ci mai manghes tut anda sea o ilo sau dacă ci mai ciaiol tut cadea de but i predicarea? Sau daștil-pe că ci mai araches cadea de but bucuria andi citirea la Bibliachi, cadea sar mai anglal. Ci trebul te pachias că o spirito le Iehovasco ci mai si opral tute. San iech manuș  imperfecto hai, poiechdata, chio ilo daștil te paruvel-pe. Dacă pala o bolimos diches că ci mai cheres buchi anda o Iehova sea che zuralimasa, gândisar tut co apostolo Pavel. Vo camlea ciaces te lel-pe pala o Isus, tha jianglea că, poiechdata, ci avelas lesche te cherel cadaia sea pesche zuralimasa. (Citisar 1 Corinteni 9:16, 17.) Vo phendea: „Chiar cana cherav-la bi te țârdel man o ilo, sa așel iech buchi cai sas manghe dini andel vasta”. Cadea că, o Pavel sas-lo hotărâme te cherel vi mai dur peschi buchi anda o Iehova, chiar cana ci țârdelas-les o ilo sea o timpo te cherel cadaia.

¹³ Cadea că, na le tut pala chio ilo imperfecto cana trebul te cheres iech alosarimos. Av hotărâme te cheres so si mișto, vi cana ci țârdel tut o ilo. Dacă cheres vi mai dur cadaia, chio ilo va paruvela-pe hai va camela mai but te cherel so si mișto. Ji atunci, cher tuche timpo te sichios corcoro andai Biblia, te manghes tut le Iehovasche, te jias ca le întruniri hai andi predicarea. Cadala va ajutina tut te les tut sea o timpo pala o Isus. Cana le phrala hai le pheia va dichena că cames te așes zuralo ando pachiamos, vi von va avena zuriarde. (1 Tes. 5:11)

„DICHEN SEA O TIMPO DACĂ SAN ANDO PACHIAMOS”

14. So trebul te pușias amen hai sostar? (2 Corinteni 13:5)

¹⁴ Avelas mișto ca, pala o bolimos, te dichas mai butivar so si ande amaro ilo. (Citisar 2 Corinteni 13:5.) Dich dacă manghes tut ande fiesavo ghies, dacă citis hai sichios andai Biblia, dacă jias ca le întruniri hai andi predicarea. Gândisar tut sar daștis te cheres mai mișto cadal buchia. Daștis te pușes tut: „Jianav te sicavav le mai bare ciacimata andai Biblia? So daștiv te cherav caște ciaiol man mai but i predicarea? Sicaven mânre manglimata că șiorav mânro ilo angla o Iehova hai pachiav man ande leste? Jiav ca fiesavi întrunirea? Sar daștiv te cherav mai but ca le întruniri hai te avav mai atento?”.

15, 16. So sichioas catar o Robert?

¹⁵ Cana rodes so si ande chio ilo, trebul te diches ciaces che covlimata. Le buchia prin save nachlea iech phral po anav Robert ajutin amen te hachiaras mai mișto cadaia. Vo phenel: „Cana somas cam 20 bărșengo, sas man iech than buchiaco cai cărdemas buchi dipaș ghies. Ande iech ghies, pala i buchi, iech colega achardea man late chăre. Voi phendea că va avela te avas corcore hai va avela te simțosaras  amen mișto ande iech than. Astardem te phenav lache că si man aver buchia te cherav, tha ji la urmă, phendem lache ciaces sostar ci camav te jiav”. Si mișto că o Robert așilea zuralo angla cado athaimos. Tha, pala codoia, cana gândisardea-pe ca so cărdea, dea peschi sama că daisardeas te cherel le buchia mai mișto. Vo phenel: „Ci somas cadea de hotărâme sar o Iosif, cai duriardea sigo pestar o athaimos hai ci camlea te sovel la rromniasa le Potifaroschi. (Gen. 39:7-9) Mai but, ci avelas manghe te pachiav chichi de pharo sas manghe te phenav lache «na». Cadaia cărdea man te hachiarav că trebul te zuriarav mânro amalimos le Iehovasa”.

¹⁶ Dacă, cadea sar o Robert, rodes te diches ciaces so si ande chio ilo, va avela tut but miștimata. Sar exemplo, chiar cana așilean zuralo angla iech athaimos, daștis te pușes tut: „Pala sode timpo phendem «na»?”. Dacă diches că trebul te cheres lașiarimata, na av prea holiardo pe tute. Av voime că acana jianes so covlimos daștis te lașiares. De duma le Iehovasa anda che pharimata hai cher sea so daștis caște așes zuralo hai te așunes lestar. (Ps. 139:23, 24)

17. Sar așardea o anav le Iehovasco o Robert?

¹⁷ Mai si vareso cai sichioas anda so nachlea o Robert. Vo mai phendea: „Pala so phendem mânra colegache că ci camav te jiav late chăre, voi phendea manghe: «Nachlean o testo!». Pușlem-la so camel te phenel. Iech anda lache amala, cai ci mai sas-lo Martoro le Iehovasco, phendea lache că sea le tărne Martori cheren buchia nasul garades. Cadea că, voi phendea pesche amalesche că camel te dichel dacă vi me som cadea. Barilea mânro ilo cana hachiardem că așardem o anav le Iehovasco prin mânro phiraimos”.

18. So san hotărâme te cheres pala o bolimos? (Dich vi o chenarii „ Mai but articolea cai daștin te ajutin tut”.)

¹⁸ Cana des chi viața le Iehovasche hai boles tut, sicaves că cames te așares lesco anav, oriso avelas. Daștis te pachias ciaces că o Iehova prinjianel mișto le pharimata hai le athaimata prin save naches. Vo va dela tut but miștimata anda codoia că des sea chi zor caște așes lesche loialo. Na bâstăr că, prin pesco spirito sfânto, vo va dela tut o zuralimos cai si tut nevoia. (Luca 11:11-13) Le ajutorosa le Iehovasco, va avela te les tut mai dur pala o Isus vi pala o bolimos.