1. Prin so nachen chichiva manușa le Iehovasche?

 SO ȘUCAR si te jianas că le manușa le Iehovasche sile cuci ande lesche iacha. I Biblia phenel: „O Iehova arachel peschi plăcerea ande pesco poporo”. (Ps. 149:4) Tha, poiechdata, chichiva sile cadea de perade că arăsăn te pușen-pe: „Som vi me cuci andel iacha le Iehovasche?”. Vi andel purane ghiesa, chichiva manușa loialo le Iehovasche nachle prin cadaia. (1 Sam. 1:6-10; Iov 29:2, 4; Ps. 51:11)

2. Con si cuci andel iacha le Iehovasche?

² I Biblia sicavel că, chiar cana sam imperfecți, daisaras te avas cuci andel iacha le Iehovasche. Sar? Dacă sicavas pachiamos ando Isus Cristos hai bolas amen. (Ioan 3:16) Cadea, sicavas savorenghe că fal amen ciaces pharo anda so cărdeam mai anglal. Sa cadea, sicavas că solahardeam le Devlesche că va avela te cheras so camel vo amendar. (Fap. 2:38; 3:19) Chichi de but bariol o ilo le Iehovasco cana dichel că camas te pașioas lestar! Cana cheras sea so daisaras caște încăras amaro solaharimos, sam cuci andel iacha le Iehovasche hai sam lesche lașe amala. (Ps. 25:14)

3. Ca so pușimata va avela te arachas răspunso?

³ Atunci, sostar chichiva anda amende pachian că ci sile cuci andel iacha le Iehovasche? Sar sicavel amenghe vo că sam mișto dichle lestar? Hai so daisaras te cheras caște pachias că o Iehova arachel ciaces peschi plăcerea ande amende?

SOSTAR PACHIAN CHICHIVA CĂ CI SILE CUCI ANDEL IACHA LE IEHOVASCHE?

4, 5. So daisaras te pachias cana peravel amen o gândo că ci sam lașe chancesche?

⁴ But mașcar amende, încă de țâne, pachias că ci sam lașe chancesche. (Ps. 88:15) Iech phral po anav Adrián phenel: „De  cana somas țâno, pachiaiem că ci som lașio chancesche. Anav ande mânri goghi că cana somas șiavorro manglem le Iehovas ca mânri familia te arăsăl ando Paradiso. Tha me ci dichlem man cadea de lașio caște arăsav vi me code. O Tony, cai ci barilea sar iech Martoro, phenel: „Mânro dad hai mânri dei ci phende manghe niciechdata că iubin man sau că den-pe bare manța. Barilem le gândosa că ci cherav chanci mișto”.

⁵ Dacă o gândo că ci sam lașe chancesche peravel amen, te na bâstras că o Iehova țârdea amen peste. (Ioan 6:44) Vo dichel amende șucar buchia cai amen daștil-pe că ci dichas-len. Sa cadea, vo prinjianel mai mișto amaro ilo sar amen. (1 Sam. 16:7; 2 Cron. 6:30) Cadea că, te pachias-les ciaces cana phenel că sam cuci ande lesche iacha. (1 Ioan 3:19, 20)

6. Sar simțosardea-pe o apostolo Pavel anda le păcatea cai cărdea-len angla te bolel-pe?

⁶ Angla te prinjianas o ciacimos, chichiva mașcar amende cărdeam buchia nasul anda save doșaras amen vi acana. (1 Pet. 4:3) Hai aver creștini zurale ando pachiamos maren-pe vi acana contra lenghe covlimata. Tha so daștis te phenes anda tute? Pachias poiechdata că o Iehova ci daștil te iertil tut? Dacă da, va zuriarela tut o exemplo chichiva manușengo loialo le Iehovasche cai nachle vi von prin cadaia. Iech anda lende sas o apostolo Pavel. Vo sas-lo zurales perado catar pesche covlimata. (Rom. 7:24) Chiar cana falea-les pharo anda le păcatea cai cărdea-len hai boldea-pe, o Pavel phendea anda peste că sas „o mai țâno mașcar le apostoli” hai „o dintuno” mașcar le păcătoși. (1 Cor. 15:9; 1 Tim. 1:15)

7. So daisaras te pachias ciaces?

⁷ Amaro Dad andal ceruri promitil amenghe că va iertila amen dacă sicavas căința. (Ps. 86:5) Cadea că, cana fal amen ciaces pharo anda le păcatea cai cărdeam-len, daisaras te pachias că vo va încărela peschi duma hai va iertila amen. (Col. 2:13)

8, 9. So daisaras te cheras caște na mechas amen perade catar o gândo că ci arăsăl so cheras andi buchi le Iehovaschi?

⁸ Savore camas te das sea so si amen mai lașio le Iehovasche. Cu sea cadala, si jene cai pachian că orichichi de but cheren anda o Iehova ci arăsăl. Von pachian că ci daștin te aven cuci andel iacha le Iehovasche. Iech phei po anav Amanda phenel: „De fiesavi data cana camav te dav le Iehovas sea so si man mai lașio, fal man că ci arăsăl. Butivar, ajucărav mandar mai but sar daștiv te dav. Cana ci daștiv te cherav so șiutem manghe andi goghi som zurales peradi hai ci mai pachiav man ande mande. Ande codol momentea gândiv man că nici o Iehova ci mai pachial-pe ande mande”.

⁹ Sar daisaras te na mechas amen perade catar o gândo că ci arăsăl so cheras andi buchi le Iehovaschi? Te na bâstras că o Iehova jianel te mechel pestar hai că vo ci manghel amendar mai but sar daisaras te das-les. Vo dichel cuci so cheras anda leste, chichi timpo das-les sea so si amen mai lașio. Sa cadea, te gândisaras amen ca le manușa andai Biblia cai slujisarde le Iehovasche anda sea o ilo. Sar exemplo, o Pavel dea sea pesco timpo andi buchi le Iehovaschi mai but bărșa. Vo phirdea pe but droma hai cărdea but congregații. Tha, sar dichlea-les o Iehova cana leschi viața parudea-pe hai ci mai daisardea te cherel cadea de but andi predicarea? Ci mai dichlea-les cuci o Iehova? Nici. O apostolo Pavel cărdea vi mai dur sea so daisardea hai o Iehova dea-les but miștimata. (Fap. 28:30, 31) Sa cadea, poiechdata vi amen daisaras te das le Iehovas mai but hai aver data mai țâra. Anda leste o mai importanto si sostar slujisaras lesche. Mai dur, va avela te dichas chichiva buchia prin save o Iehova sicavel că sam lesche cuci.

 SAR SICAVEL O IEHOVA CĂ SAM LESCHE CUCI?

10. Sar daisaras „te așunas” le Iehovas că phenel amenghe că sam cuci ande lesche iacha? (Ioan 16:27)

¹⁰ Prin i Biblia. O Iehova camel te pachias ciaces că iubil amen hai că sam lesche cuci. Andi Biblia arachas scriime dui-var sar o Iehova phendea le Isusosche că iubilas-les hai că vo sas-lo cuci ande lesche iacha. (Mat. 3:17; 17:5) Ciaiolas tut te așunes le Iehovas te phenel tuche că vi tu san cuci ande lesche iacha? Aghies, o Iehova ci del duma amența anda o cerii, tha daisaras te așunas-les prin i Biblia. Cana citisaras so phendea o Isus andel evanghelii, si sar cana „așunas” o glaso le Iehovasco. (Citisar Ioan 16:27.) O Isus sicadea ciaces sar silo lesco Dad. Cadea că, cana citisaras le dumes pherde iubirea prin save o Isus sicadea că lesche continuatori imperfecto, tha loialo, sile cuci ande lesche iacha, si sar cana o Iehova phenel cadal dumes caring amende. (Ioan 15:9, 15)

11. Cana nachas prin pharimata sostar ci trebul te pachias că o Iehova hasardea peschi plăcerea ande amende? (Iacov 1:12)

¹¹ Prin so cherel vo. O Iehova camel anda sea o ilo te ajutil amen. Sar exemplo, vo lel sama te avel amen sea so trebul amenghe caște traisaras. Poiechdata, o Iehova mechel amen te nachas prin pharimata, cadea sar cărdea vi le Iovosa, cai sas iech manuș orta. (Iov 1:8-11) Tha, cana nachas prin pharimata te na pachias că o Iehova ci mai arachel peschi plăcerea ande amende. Ande cadal situații phare daisaras te sicavas le Iehovasche chichi de but iubisaras-les hai că șioas amaro pachiamos ande leste. (Citisar Iacov 1:12.) Mai but, cana nachas prin pharimata dichas vi amen leschi bari iubirea caring amende hai sar vo del amen zuralimos caște jias angle.

12. So sichioas anda so nachlea o phral Dmitrii?

¹² Te dichas prin so nachlea iech phral po anav Dmitrii, cai beșel andi Asia. Vo hasardea pesco than buchiaco hai, mai but șiona, ci arachlea pesche aver. Vo camlea te sicavel pesco pachiamos ando Iehova hai alosardea te jial mai but andi predicarea. Tha nachenas le șiona, hai o Dmitrii ci arachelas pesche niciech than buchiaco. Pala codoia, pelea cadea de nasfalo, că ci mai daștilas te uștel anda o pato. Vo pachiaia anda peste că ci mai silo lașio chancesche hai că ci mai si iech rrom hai iech dad lașio. Vo arăslea te pușel-pe dacă mai silo cuci andel iacha le Iehovasche. Tha, ande iech riat, leschi șeiorri scriisardea lesche pe iech lil le dumes anda Isaia 30:15: „Dacă așen liniștime hai si tumen pachiamos, va  avena zurale”. Pala codoia, andea lesche o lil co pato hai phendea lesche: „Dade, cana san perado citisar cadal dumes.” Atunci, o Dmitrii dea peschi sama chichi de but ajutisardea-len o Iehova. Les hai lesca familia sas-len sea so trebulas lenghe, sas-len haben, hureaimos hai iech than cai te soven. Vo phenel: „Sea so trebulas te cherav sas te beșav liniștime hai te pachiav man vi mai dur ando Iehova”. Dacă vi tu naches prin iech pharimos sar cado vi tu daștis te pachias anda sea o ilo că o Iehova silo pașa tute hai va zuriarela tut.

13. Prin caste sicavel o Iehova că sam cuci ande lesche iacha hai sar?

¹³ Prin le phrala. O Iehova sicavel că sam lesche cuci prin amare phrala hai pheia. Sar exemplo, vo daștil te șiol andi goghi le phralenghi te phenen amenghe dumes cai zuriaren amen cana si amen mai bari nevoia lendar. Iech phei andai Asia simțosardea că sili cuci andel iacha le Iehovasche cana nachlea prin mai but pharimata. Voi hasardea peschi buchi hai pelea zurales nasfali. Pala codoia, laco rrom cărdea iech baro păcato hai ci mai sas-lo phuro de congregație. Voi phenel: „Ci hachiardem sostar nachav prin cadal phare buchia. Pachiaiem că cărdem vareso nasul hai că ci mai somas cuci andel iacha le Iehovasche”. I phei manglea le Iehovas te sicavel lache că dichel-la cuci. Sar cărdea vo cadaia? Voi phenel: „Le phure dine duma manța hai ajutisarde man te dichav că o Iehova iubil man vi mai dur”. Pala iech timpo, voi manglea-pe pale le Iehovasche caște sicavel lache încă iech data că si cuci ande lesche iacha. I phei phenel: „Ande sa codo ghies, primisardem iech lil catar mai but phrala hai pheia andai congregația. Ando timpo so citisardemas lenghe șucar dumes, simțosardem că o Iehova așundea mânro manglimos”. Si ciaces, prin amare phrala hai pheia daisaras te dichas i iubirea amare Dadeschi andal ceruri hai că sam cuci ande lesche iacha. (Ps. 10:17)

14. Sar mai sicavel o Iehova că sam cuci ande lesche iacha?

 ¹⁴ O Iehova sicavel amenghe că sam cuci ande lesche iacha vi cana del amen lașe sfaturi prin le phrala. Sar exemplo, ando iechto secolo, o Iehova șiutea andi goghi le apostoloschi Pavel te scriil 14 lila caște zuriarel le phralen. Ande cadal lila o apostolo Pavel ci încărdea-pe parpale te phenel lenghe so trebunas te lașiaren, tha cărdea cadaia pherdo iubirea. Sostar camlea o Iehova te phenel cadal sfaturi ande pesche lila? Cadea sar iech lașio dad o Iehova ortosarel pesche șiaven anda codoia că „arachel peschi plăcerea” ande lende. (Prov. 3:11, 12) Cadea că, cana varecon del amenghe sfaturi andai Biblia, ci însemnol că o Iehova silo holiardo pe amende, tha că vo iubil amen hai că sam cuci ande lesche iacha. (Evr. 12:6) So aver buchia sicaven că sam cuci andel iacha le Iehovasche?

AVER BUCHIA CAI SICAVEN CĂ SAM CUCI ANDEL IACHA LE IEHOVASCHE

15. Casche del o Iehova pesco spirito sfânto hai so sicavel cadai buchi?

¹⁵ O Iehova del pesco spirito sfânto codolenghe cai sile cuci ande lesche iacha. (Mat. 12:18) Daștis te pușes tut: „Mechav ca o rodo le spiritosco te cherel buchi ande mânri viața?”. Sar exemplo, dean chi sama că san mai răbdătorii averența de cana prinjiandean o ciacimos? Chichi mai but des chi zor te sicaves o rodo le spiritosco, cadichi mai but va avela te pachias că san cuci andel iacha le Devlesche. (Dich o chenarii „ O rodo le spiritosco si . . .”.)

16. Casche dea o Iehova i buchi te phenen i vestea lași hai so si ande chio ilo cana jianes cadaia? (1 Tesaloniceni 2:4)

¹⁶ O Iehova dea i buchi te phenen i vestea lași codolenghe cai sile cuci ande lesche iacha. (Citisar 1 Tesaloniceni 2:4.) Iech phei po anav Jocelyn simțosardea că si cuci andel iacha le Iehovasche cana gălea andi predicarea. Voi phenel: „Ande iech teharin, uștilem zurales peradi. Simțosardem că chanicas nai-les nevoia mandar. Tha cărdemas o pionerato hai trebulas te jiav andi predicarea. Phendem iech țâno manglimos hai gălem”. Ande codoi teharin i Jocelyn arachlea iecha jiuvlea lași po anav Mary, cai camlea te sichiol andai Biblia. Pala chichiva șiona i Mary phendea că, angla ca i Jocelyn te marel ca laco udar, voi manglea-pe le Devlesche te ajutil-la. Cana gândil-pe ca cadai buchi i Jocelyn phenel: „Sas sar cana așundem le Iehovas că phenel manghe: «San manghe  cuci.»”. Si ciaces, na savore manușa andi predicarea va camena te den duma amența anda o ciacimos. Tha daisaras te pachias anda sea o ilo că cana das sea amari zor te das duma andai vestea lași le manușența, o Iehova dichel cadaia hai arachel peschi plăcerea ande amende.

17. So sichioas anda so phendea i Vicky anda i răscumpărarea? (Psalmo 5:12)

¹⁷ O Iehova prin i răscumpărarea, iertil le păcatea codolenghe cai sile cuci ande lesche iacha. (1 Tim. 2:5, 6) Tha, dacă amaro ilo ci pachial că sam cuci andel iacha le Iehovasche, chiar cana si amen pachiamos andi răscumpărarea hai sam bolde? Ando than te pachias amen ande amaro ilo, avelas mai mișto te pachias amen sea o timpo ando Iehova. Vo dichel lașe iachența codolen cai sicaven pachiamos andi răscumpărarea hai promitil lenghe că va dela-len but miștimata. (Citisar Psalmo 5:12; Rom. 3:26) Te dichas mai dur sar ajutisardea iecha pheia po anav Vicky te gândil-pe mai but ca i răscumpărarea. Ande iech ghies, pala so beșlea hai gândisardea-pe că o Isus dea peschi viața anda late, voi phendea: „Dem mânri sama că le Iehovas sas-les bari răbdarea manța . . . Tha, prin so gândisardem si sar cana phendem le Iehovasche: «Ci daștis te iubis ieche manușes cadea sar som me. I jertfa che Șiaveschi ci daștil te pachiarel mânre păcatea»”. Pala so hachiardea mai mișto so si i răscumpărarea, i Vicky astardea te simțosarel ande pesco ilo că o Iehova iubil-la. Vi amen va avela te simțosaras i iubirea le Iehovaschi hai că sam cuci ande lesche iacha dacă beșas hai gândisaras amen ca i răscumpărarea.

18. So daisaras te pachias ciaces dacă iubisaras vi mai dur amare Dades andal ceruri?

¹⁸ Si ciaces, camas te das sea amari zor te cheras so sichileam ande cado articolo. Cu sea cadala, daștil-pe că poiechdata va avela te simțosaras amen perade hai va avela te pușias amen dacă sam cuci andel iacha le Iehovasche. Cana si cadea, te na bâstras că o Iehova dichel cuci codolen „cai iubin-les”. (Iac. 1:12) Cadea că, iubisar mai dur le Iehovas hai rode te diches le buchia prin save sicavel tuche că san cuci ande lesche iacha. Încăr ande chi goghi că o Iehova „na-i dur niciechestar anda amende”. (Fap. 17:27)