1. So daisaras te pușias amen?

SI TUCHE pharo po iechdata cana gândis-tu ca le buchia cai ajucăren amen – i distrugerea la religiachi neciaci, cana o Gog anda Magog va atachila hai o războio Armaghedon? Pușlean tut vroiechdata: „Va avela te încărav zuralo mânro pachiamos cana va avela te nachav prin cadal buchia cai daraven o ilo?”. Dacă nachlea prin chi goghi cado pușimos, o fapto te diches so phendea o Isus ando verseto pe savo bazol-pe o articolo va ajutila tut zurales but. O Isus phendea pesche discipolenghe: „Te na daral tumaro ilo. Sicaven pachiamos”. (Ioan 14:1) Dacă va avela amen iech pachiamos zuralo, va daisaraia te nachas părdal oriso va avela ando viitorii pherde pachiamos.

2. Sar daisaras te zuriaras amaro pachiamos hai so va avela te dichas ande cado articolo?

² Daisaras te zuriaras amaro pachiamos caște suportisaras le zumaimata cai va avena, cana dichas o modo sar phiravas amen cana nachas acana prin le zumaimata amare pachiamasche. Cana gândisaras-ame ca o modo ande savo phiravas amen cana nachas prin le zumaimata de aghies, daisaras te dichas le situații ande save trebul te zuriaras amaro pachiamos. Părdal orisavo zumaimos nachas, amaro pachiamos cherel-pe vi mai zuralo. Cadai buchi va ajutila-ame te suportisaras le zumaimata cai va avena. Mai dur, ande cado articolo, va avela te dichas ștar situații prin save nachle le discipoli le Isusosche hai cai sicade că trebulas te avel-len mai but pachiamos. Va mai avela te dichas so daisaras te cheras dacă va avela te nachas prin situații sar cadala hai sar pregătin amen von anda so va avela.

3. Sar ajutil amen o Matei 6:30, 33 te dichas le situații ande save trebul amenghe mai but pachiamos?

³ Orisavo șăro la familiaco camel te del la rromniache hai lesche șiavenghe haben, hureaimos hai iech than cai te beșen.  Tha, cana dichas le timpuri phare ande save traisaras, cadai buchi ci si sea o timpo ușoro. Ande chichiva situații, amare phrala hasarde penghi buchi hai, chiar dacă cărde sea so daisarde, ci arachle aver. Po iechdata, trebuisarde te na acceptin te avel-le iech buchi cai așelas contra ca le norme creștino. Ande cadal cazuri, trebul te pachias zurales că o Iehova va lela sama pe amende hai pe amari familia ande iech felo sau aver. Andi predica pa o plain, o Isus sicadea claro cadai buchi. (Citisar Matei 6:30, 33.) Dacă pachias zurales că o Iehova ci va avela te mechel amen, amare iacha va avena pe le buchia ciaces importanto – le interesea le Regatosche. Cana dichas sar lel o Iehova sama pe amende po plano materialo, simțosaras amen mai pașă lestar, hai amaro pachiamos zuriarel-pe.

4, 5. Sar ajutisardea o Iehova iecha familia cai sas-li îngrijiorime anda codoia că sas-la pharimata le lovența?

⁴ Te dichas sar ajutisardea o Iehova iecha familia andai Venezuela, îngrijiorime anda le pharimata le lovența. La familia Castro sas-la iech viața lași, hai cherelas buchi ca lachi ferma. Tha, chichiva manușa cai sas-len arme line lengo than hai phende lenghe te jian penghe othar. O șăro la familiaco, Miguel, phenel: „Acana traisaras anda so daisaras te șioas andi phuv pe iech țâra cotor phuveachi cai dea-la amenghe varecon anda țâra timpo. Co începuto fiesave ghiesesco, rughisarav le Iehovas te del amen le buchia cai trebun amenghe anda codo ghies”. Cadale phralen silen iech viața phari, tha von pachian zurales că o Iehova va lela sama pe le buchia materialo cai trebun lenghe hai șion o Regato po iechto than ande penghi viața. Von len partea ande fiesavo curco ca le întruniri hai jian sea o timpo andi predicarea hai o Iehova del-len le buchia cai trebun lenghe.

⁵ Ande cadai perioada phari, o Miguel hai leschi rromni, Yurai, gândisarde-pe ca o modo ande savo o Iehova lea sama pe lende. Po iechdata, o Iehova ajutisardea-le prin chichiva phrala, cai dine-len iech țâno ajutorii materialo sau ajutisarde le phrales Miguel te arachel pesche iech buchi. Aver data, o Iehova dea lenghe le buchia țâne cai trebunas len prin le operațiuni de ajutorare organizâme catar i filiala. O Iehova ci mechlea len niciechdata. Cadea că, o pachiamos sea le jenenghe andai familia zuriardea-pe. Pala so dea duma anda iech situația ande savi o Iehova ajutisardea-le, i Yoselin, lenghi șei mai bari, phendea: „O vast le Iehovasco dichlea-pe ande amari viața hai cadaia cărdea amen te avas zurales fericime. Anda mande, vo si iech amal castar încărel mânri viața”. I Yoselin mai phenel: „Le zumaimata prin save nachleam pregătisarde amen anda le zumaimata but mai phare cai va avena.

6. Sar daștis te zuriares chio pachiamos cana naches prin pharimata le lovența?

⁶ Naches vi tu prin pharimata le lovența? Dacă da, siguro ci si tuche ușoro. Dich cadai situația phari sar iech ocazia ande savi daștis te zuriares chio pachiamos. Rughisar-tu hai gândisar-tu ca le cuvintea le Isusosche anda Matei 6:25-34. Meditosar ca o exemplo chichiva phralengo cai cărde sea so daisarde  ande le Iehovaschi buchi hai cai simțosarde lesco ajutorii. (1 Cor. 15:58) Cadea, va avela te pachias zurales că o Iehova va ajutila vi tut cadea sar ajutisardea vi averen cai nachle prin situații sar chire. Vo jianel save si le buchia cai trebun-tu hai vi savo si o momento o mai lașio caște del-le tuche. De fiesavi data cana simțosares o vast le Iehovasco ande chi viața, chio pachiamos zuriarel-pe hai san mai pregătime anda le zumaimata mai phare anda o viitorii. (Hab. 3:17, 18)

7. Cadea sar phenel-pe ando Matei 8:23-26, sar șiutea „iech baro brâșând” co zumaimos o pachiamos le discipolengo?

⁷ Ando timpo so o Isus hai lesche discipoli sas-le pi marea, avilea iech zurales baro brâșând. (Citisar Matei 8:23-26.) O Isus folosisardea cadai ocazia caște ajutil le discipolen te den penghi sama că trebulas len mai but pachiamos. Ando timpo so i marea vazdelas le paia mai opre, hai cadala arăsănas andi barca, o Isus sovelas liniștime. Pherde dar, le discipoli uștiade-les hai rughisarde-les te salvil len. Tha o Isus ortosardea len pherdo lașimos: „Sostar daran cadea de zurales, manușa cai si tumen țâra pachiamos?”. Vi cana sas-le astarde daratar, le discipoli trebunas te pachian zurales că o Iehova daștilas te feril cadichi len, hai vi le Isusos. So sichioas anda cadai buchi? Dacă si amen iech pachiamos zuralo, daisaras te nachas părdal orisavo ‘baro brâșând’, literalo sau figurativo.

8, 9. Sar sas zumado o pachiamos la pheiaco Anel hai so ajutisardea-la?

⁸ Te dichas sar zuriardea pesco pachiamos i Anel, iech phei necăsătorime anda Puerto Rico, ando timpo so nachlea prin iech zumaimos pharo. Voi chiar nachlea prin „iech baro brâșând”. Ande 2017, o uragano Maria phagărdea laco chăr. Anda codoia că avilea cado dezastro, hasardea vi peschi buchi. I Anel phenel: „Ande codoi perioada phari, somas zurales îngrijorime. Cu sea cadala, anda codoia că rughisardem man, sichilem te șioav mânro pachiamos ando Iehova hai te na mechav ca le îngrijiorări te astaren man”.

⁹ So aver vareso ajutisardea la Anela te nachel părdal cado zumaimos? I ascultarea. Voi phenel: „Daisardem te avav calmo anda codoia că cărdem cadea sar phenenas le îndrumări catar i organizația. Dichlem o vast le Iehovasco cana le phrala zuriarde-ma spiritualo hai vi cana dine-ma ajutorii po plano materialo”. Voi mai phenel: „O Iehova dea man mai but sar daisardemas te mangav lestar, hai mânro pachiamos cărdea-pe vi mai zuralo”.

10. So mai daștis te cheres dacă aghies naches prin „iech baro brâșând”?

¹⁰ Avilea vi pe tute „iech baro brâșând”? San duchado că si iech dezastro naturalo? Sau san duchado anda iech brâșând figurativo, sar exemplo, iech pharo nasfalimos, cai peravel tut hai cherel-tu te simțosares că ci mai jianes caring te jias? Cu sea cadala, na mech ca i îngrijiorarea te așavel tut te na mai șios chio pachiamos ando Iehova. Rughisar- tu anda sea o ilo le Devlesche. Zuriar chio pachiamos hai gândisar-tu ca le situații ande save o Iehova ajutisardea tut. (Ps. 77:11, 12) Av siguro că vo ci va mechela tut niciechdata – nici aghies hai nici ando viitorii.

11. Sostar si importanto te ascultisaras codolendar cai sile angla amende?

¹¹ So mai daștil te ajutil amen te așias zurale andel zumaimata? I ascultarea, i calitatea phendi vi catar i Anel. Sichio te pachias-tu ande codola ande save o Iehova hai o Isus pachian-pe. Po iechdata, le îndrumări le phralenghe cai silen responsabilități daștinas te fan-tu că ci sile goghiaver. Tha na bâstăr că o Iehova binecuvântisarel i ascultarea. Cadaia salvil vieți, cadea sar sichioas anda lesco Cuvânto hai anda le experiențea amare phralenghe hai amare pheianghe. (Ex. 14:1-4; 2 Cron. 20:17) Cher tuche timpo te meditosares ca cadal exemplea. Cana cheres cadaia, ci va avela te încăres tut parpale te les-tu pala le îndrumări la organizațiache, cadichi aghies, hai vi ando viitorii. (Evr. 13:17) Cadea va daisareia te naches bidaraco părdal le pharimata but mai bare cai pașion. (Prov. 3:25)

12. Cadea sar phenel-pe ando Luca 18:1-8, so phanglimos si mașcar o pachiamos hai o fapto te suportisaras iech neortomos.

¹² O Isus jianelas că, anda codoia că cherelas-pe neortomos, o pachiamos le discipolengo avelas te avel șiuto co zumaimos. Anda codoia, vo phendea i ilustrarea anda Luca anda iech phivli cai rughilas sea o timpo ieche judecătoros neorta te cherel lache ortomos. Voi pachialas zurales că dacă ci mechelas-pe avelas te cherel-pe lache ortomos. Ji la urmă, o judecătorii cărdea lache ortomos. So sichioas amen anda cadai buchi? O Iehova ci si neorta. O Isus phendea: „Atunci, ci va cherela o Del ortomos codolenghe cai alosardea len hai cai den cingar caring leste ghies hai riat?”. (Citisar Luca 18:1-8.) Pala codoia, mai phendea: „Cana va avela o Șiav le manușesco, va arachela vo cado felo pachiamasco pi phuv?”. Cana cherel-pe amenghe iech neortomos, sicavas că si amen iech pachiamos zuralo, cadea sar i phivli, dacă sicavas răbdarea hai ci mechas-ame. Anda codoia că si amen pachiamos, pachias zurales că, mai sigo sau pala iech timpo, o Iehova va avela te cherel amenghe ortomos. Sa cadea, ci trebul te pachias că i rugăciunea ci daștil te ajutil amen. Po iechdata, daștil-pe te na avel amenghe te pachias sar del o Iehova răspunso ca amare rugăciuni.

13. Sar ajutisardea i rugăciunea iecha familia?

¹³ Te dichas i experiența iecha pheiachi po anav Vero, cai beșel andi Republica Democratico Congo. Cana chichiva soldați avile contra lengo gav, i Vero, laco rrom, cai ci si Martoro, hai lenghi șei cai sila 15 bărșa trebuisarde te nașen. Po drom, sas-le încărde catar iech controlo hai sas lenghe phendo că va avena mudarde. I Vero începosardea te rovel, hai lachi șei rodea te cherel-la te avel liniștime hai phendea voceaia zurali iech rugăciunea, ande savi phendea mai butivar o anav le Iehovasco.  Pala so așundea i rugăciunea, o comandanto pușlea-la: „Șeiorrie, con sicadea tut te rughisares-tu?”. Voi phendea: „Mânri dei sicadea man, pala i rugăciunea «Amaro dad»”. Atunci o comandanto phendea: „Daștin te tiliaren liniștime, hai o Iehova, tumaro Del, te lel sama pe tumende!”.

14. So daștilas te șiol co zumaimos amaro pachiamos hai so va ajutila amen te așias zurale?

¹⁴ Anda cadal experiențea, sichioas că ci trebul te bâstras chichi de but daștil te ajutil amen i rugăciunea. Tha, dacă ci primisaras sigo răspunso ca amare rugăciuni sau ande iech modo cadea sar ajucăras amen? Cadea sar i phivli andai ilustrarea le Isusoschi, te rughisaras amen vi mai dur hai te pachias zurales că o Del va avela pașa amende hai că, pala iech timpo, va avela te del amenghe răspunso ande o modo stabilime lestar. Te mangas sea o timpo le Iehovastar lesco spirito sfânto. (Filip. 4:13) Na pa but timpo, o Iehova va avela te binecuvântil amen cadea de but, că va avela te bâstras orisavi duch anda cado sistemo. Cana așias zurale andel zumaimata hai si amen o ajutorii le Iehovasco, cărdioas vi mai zurale caște daisaras te nachas părdal le zumaimata cai va avena. (1 Pet. 1:6, 7)

15. Cadea sar phendel-pe ando Matei 17:19, 20, prin so pharimos nachle le discipoli le Isusosche?

¹⁵ O Isus sicadea le discipolen că va daștina te nachen părdal orisavo pharimos dacă va avela-len pachiamos. (Citisar Matei 17:19, 20.) Iech data, von ci daisarde te încalaven iech demono, chiar cana mai anglal daisarde te cheren cadai buchi. So întâmplosardea-pe? O Isus phendea lenghe că trebulas lenghe mai but pachiamos. Sa cadea, mai phendea că iech pachiamos zuralo, avelas te ajutil len te nachen părdal orisave pharimata cai daștinas te aven sar le bare plaina. Vi amen daștin te aven-ame pharimata părdal save fal-pe că ci daisaras te nachas.

16. Sar ajutisardea o pachiamos la pheia Gleydi te nachel părdal iech situația zurales phari?

¹⁶ I Geydi, iech phei anda Guatemala, nachlea prin iech zumaimos zurales pharo. O Edi, laco rrom, sas-lo mudardo cana avelas parpale chăre catar iech întrunirea la congregațiachi. So ajutisardea-la te nachel părdal cadai duch zurales phari? Voi phenel: „I rugăciunea ajutil man te șiudav mânro pharimos po Iehova, hai cadaia del man pacea. O Iehova lel sama pe mande prin i familia hai le amala andai congregația. O fapto că lav partea anda sea o ilo ca le buchia spiritualo ajutil man te na mai simțosarav cadea de but i duch hai te nachav părdal fiesavo ghies bi te gândiv-ma prea but ca so va avela tehara. Pala so nachlem prin cadai experiența, hachiardem că, prin orisavo zumaimos va avela te nachav ando viitorii, va avela te daștiv te avav zurali anda codoia că va avela man o ajutorii le Iehovasco, le Isusosco hai la organizațiachi”.

17. Sar daisaras te nachas părdal le obstacolea cai sile sar chichiva plaina?

¹⁷ Hasardean ando merimos varecas cuci? Daștis te zuriares chio pachiamos ando jiuvindimos  cana citisares relatări biblico anda manușa cai sas-le andine pale viațate. Sas excludime iech jeno anda chi familia? Studiisar materialea cai zuriaren chio pachiamos că o modo ande savo ortosarel o Iehova si sea o timpo o mai lașio. Dich orisavo zumaimos pharo prin savo naches sar iech ocazia ande savi daștis te zuriares chio pachiamos. Phen le Iehovasche sea so si ande chio ilo. Na beș corcoro ande iech than, tha beș pașa che phrala hai pheia. (Prov. 18:1) Cher buchia cai den tut zuralimos te jias mai dur, chiar cana trebul te cheres cadaia asfența. (Ps. 126:5, 6) Încăr che lașe obiceiuri spiritualo hai le partea ca le întruniri, ca i predicarea hai citisar andai Biblia. Încăr jiuvindo andi goghi o viitorii zurales șucar cai pregătil-les amenghe o Iehova. Cana diches lesco ajutorii, chio pachiamos ande leste zuriarel-pe sea mai but.

18. So daștis te cheres dacă diches chichiva buchia cai sicaven că chio pachiamos si covlo?

¹⁸ Dacă le zumaimata prin save nachlean sau prin save naches sicade le covlimata che pachiamasche, na av perado. Cadaia daștil te avel iech ocazia te zuriares chio pachiamos. Mang le Iehovastar mai but pachiamos, cadea sar le apostoli le Isusosche, cai rughisarde-pe: „De amen mai but pachiamos!”. (Luca 17:5) Sa cadea, meditosar ca le experiențea sicade ande cado articolo. Cadea sar o Miguel hai i Yurai, gândisar tut ca sea le situații ande save dichlean o vast le Iehovasco. Cadea sar i Anel hai i șei la pheiachi Vero, rughisar-tu anda sea o ilo le Iehovasche vi mai but cana naches prin situații zurales phare. Hai, cadea sar i Geydi, av siguro că o Iehova daștil te ajutil tut prin chi familia sau le amala. Cana meches le Iehovas te del tut lesco vast andel zumaimata de aghies, arăsăs te pachias vi mai zurales că vo va ajutila tut te naches părdal vi le zumaimata anda o viitorii, orisave avenas cadala.

19. So sas-lo siguro o Isus hai so buchiatar daștis te aves siguro vi tu?

¹⁹ O Isus ajutisardea le discipolen te hachiaren ande so situații trebulas lenghe mai but pachiamos. Cu sea cadala, vo ci phendea niciechdata că von ci avenas te nachen părdal le zumaimata cai avenas ando viitorii. (Ioan 14:1; 16:33) Vo sas-lo siguro că, prin iech pachiamos zuralo, iech bari mulțimea va așela jiuvindi ando baro necazo. (Rev. 7:9, 14) Va aveia vi tu mașcar codola manușa? Da, prin o lașimos nemeritime le Iehovasco hai dacă cheres sea so daștis acana caște zuriares chio pachiamos! (Evr. 10:39)