1. So phenel amenghe o Iehova te cheras?

O IEHOVA ‘arachel peschi plăcerea andi iubirea loialo’. (Os. 6:6) Vo phenel amenghe anda sea o ilo te cheras vi amen sa cadea. Prin o profeto Mica, o Del phenel amenghe ‘te iubisaras i iubirea loialo’. (Mica 6:8, n.s.) Tha, mai anglal trebul te hachiaras so si i iubirea loialo.

2. So si iubirea loialo?

² Andi Biblia – Traducerea la lumeachi nevi, i expresia „iubirea loialo” apăril cam 230-var. So si voi? Cadea sar phenel „o Glosaro de termeni biblici” anda cadai traducerea, i iubirea loialo si „i iubirea zurali cai si varecas caring iech aver manuș hai cai cherel-les te așel loialo pașa codo cas iubil. Cadai expresia sili folosime butivar anda i iubirea le Devleschi caring le manușa tha vi anda i iubirea mașcar le manușa”. O Iehova si o mai baro exemplo cai sicavel i iubirea loialo. Mai dur, va avela te dichas sar sicavel o Iehova cadai calitatea caring le manușa. Ando articolo cai avel, va dichaia o modo ande savo le slujitori le Iehovasche daștin te len-pe pala lesco exemplo, hai te sicaven iech caring aver cadai iubirea.

3. So sicadea o Iehova anda peste le Moisesche?

³ Țâra timpo pala so încaladea pesche poporos anda o Egipto, o Iehova sicadea chichiva buchia le Moisesche anda peste hai dea lesche duma anda pesco anav hai anda pesche calități. Vo phendea: „Iehova, Iehova, iech Del îndurătorii hai pherdo compasiunea, cai ci holiavel-pe sigo hai barvalo andi iubirea loialo hai ciacimos, cai sicavel iubirea loialo anda mii, cai iertil o nasulimos, i greșeala, hai o păcato!”. (Ex. 34:6, 7) Prin cadal cuvintea cai arăsen ando ilo, o Iehova  sicadea le Moisesche iech șucar buchi anda peschi iubirea loialo. Savi si cadaia?

4, 5. a) So phendea o Iehova anda peste? b) Ca so pușimata va arachaia o răspunso mai dur?

⁴ O Iehova phendea anda peste na numai că sicavel iubirea loialo tha că silo „barvalo andi iubirea loialo”. Cadal cuvintea apărin andi Biblia de încă efta-var. (Num. 14:18; Neem. 9:17; Ps. 86:15; 103:8; Ioel 2:13; Iona 4:2) De fiesavi data voi referil-pe numai ca o Iehova, niciechdata ca le manușa. Si zurales interesanto că chiar o Iehova alosardea te sicavel anda peste cadai șucar calitatea. Hachiaras catar că i iubirea loialo si zurales importanto anda leste. * O rege David phendea: „O Iehova, chi iubirea loialo arăsăl ji ca le ceruri . . . Chichi de cuci si chi iubirea loialo, o, Devla! Ca i ucial che phachenghi garaven-pe le șiave le manușenghe”. (Ps. 36:5, 7) Si vi anda amende sa cadea de cuci i iubirea loialo le Devleschi cadea sar sas anda o David?

⁵ Caște hachiaras mai mișto cadai calitatea va dichaia dui pușimata: Caring caste sicavel o Iehova iubirea loialo? Hai sar anel amenghe miștimata i iubirea loialo le Iehovaschi?

6. Caring caste sicavel o Iehova iubirea loialo?

⁶ I Biblia sicavel că daisaras te iubisaras but buchia mașcar save „i mol hai o uleio”, „o ortomos”, „o prinjianimos” hai „o goghiaverimos”. (Prov. 12:1; 21:17; 29:3) Cu sea cadala i expresia „iubirea loialo” ci si folosime niciechdata ca le buchia. Voi sili sicadi numai caring le manușa. Cadea că o Iehova ci sicavel cadai calitatea caring oricon, tha numai caring codola cai silen iech amalimos chidino leia. Amaro Del si loialo pesche amalenghe. Les siles iech scopo zurales șucar amența hai ci va încărela-pe parpale niciechdata te iubil-ame.

7. Sar sicadea o Iehova iubirea caring sea le manușa?

⁷ O Iehova sicavel iubirea caring sea le manușa. O Isus phendea caring o Nicodim: „Cadea de but iubisardea o Del la lumea, că dea pesche șiaves unico-năștime, ca oricon sicavel pachiamos ande leste te na avel distrugime tha te avel-les viața veșnico”. (Ioan 3:1, 16; Mat. 5:44, 45)

8, 9. a) Sostar sicavel o Iehova iubirea loialo caring pesche slujitori? b) So va dichaia mai dur?

⁸ Cadea sar dichleam, o Iehova sicavel iubirea loialo numai caring codola cai silen iech amalimos chidino leia, adică  lesche slujitori. Cadai ideea dichiol-pe claro anda le cuvintea le regesche David hai le profetosche Daniel. O David phendea: „Sicav vi mai dur iubirea loialo codolenghe cai prinjianen tut”. „I iubirea loialo le Iehovaschi încărel veșnico caring codola cai daran lestar.” Hai o Daniel phendea: ‘O, Iehova, o ciacio Del, cai sicaves iubirea loialo caring codola cai iubin tut hai respectin che porunci’.  (Ps. 36:10; 103:17; Dan. 9:4) Cadal cuvintea inspirime sicaven că o Iehova sicavel iubirea loialo caring pesche slujitori cai prinjianen-les, daran lestar, iubin-les hai respectin lesche porunci. O Iehova șiol de iech partea peschi iubirea loialo anda codola cai anen lesche închinarea.

⁹ Angla te slujisaras le Iehovasche sas amen leschi iubirea cai vo sicavel-la sea le manușenghe. (Ps. 104:14) Tha, sar lesche închinători bucurisaras-ame vi catar leschi iubirea loialo. O Iehova phenel: „Mânri iubirea loialo ci va duriarela-pe tutar”. (Is. 54:10) Cana dea duma anda peschi experiența, o David phendea: „O Iehova va avela te phiravel-pe ande iech modo specialo codoleia cai silo loialo lesche”. (Ps. 4:3) Sar trebul te sicavas vi amen că si cuci anda amende cadai iubirea loialo cai sicavel-la amenghe o Iehova? Ando Psalmo 107:43 phenel-pe: „Codo cai silo goghiaver va lela sama pe cadal buchia hai va gândila-pe but ca le buchia pherde iubirea loialo cai cherel-le o Iehova”. Acana că dichleam cado sfato inspirime va dichaia trin buchia prin save i iubirea loialo le Iehovaschi anel miștimata ande amari viața.

10. So miștimata anel amenghe te jianas că i iubirea loialo le Devleschi încărel veșnico? (Psalmo 31:7)

¹⁰ I iubirea loialo le Devleschi si veșnico. Cadai expresia importanto anda i iubirea loialo sili sicadi de 26-var ando Psalmo 136. O Psalmo începol cadea: „Anen mulțumiri le Iehovasche că silo lașio – leschi iubirea loialo încărel veșnico”. (Ps. 136:1) O refreno „leschi iubirea loialo încărel veșnico” apăril ande fiesavo verseto le psalmosco. Cana citisaras sea o Psalmo, amaro ilo bariol te jianas că o Iehova sicavel iubirea  loialo ande but moduri hai bi te încărel-pe parpale. Cado refreno sicavel că i iubirea le Iehovaschi caring pesche slujitori ci paruvel-pe. Chichi de but zuriarel-ame te jianas că o Iehova ci mechel codolen cai slujin lesche! Tha, vo astarel-pe zurales lendar hai așel pașa lende vi mai but cana sile duchade. Sar anel amenghe miștimata cado ciacimos? Cana gândisaras-ame că o Iehova si pașa amende cadaia cherel-ame te avas zurales bucurime hai del amen o zuralimos cai trebul-ame caște daisaras te nachas părdal le pharimata hai te jias mai dur po drom la viațaco. (Citisar Psalmo 31:7.)

11. Cadea sar phenel-pe ando Psalmo 86:5, so cherel le Iehovas te iertil?

¹¹ I iubirea loialo cherel le Devles te avel iertătorii. Cana iech anda lesche slujitori cai cărdea iech păcato căil-pe sincero hai mechel pesco phiraimos nasul, i iubirea loialo cherel le Iehovas te iertil-les. O David phendea anda o Iehova: „Vo ci phiradea-pe amența pala amare păcatea, ci dea amenghe so meritisaras anda le jiungale buchia cai cărdeam-le”. (Ps. 103:8-11) Chiar o David simțosardea chichi de pharo si te avel tut iech conștiința pherdi, tha vi că o Iehova si ‘gata te iertil’. Vo phenel o motivo anda savo o Iehova iertil ande peschi rugăciunea anda o Psalmo 86:5. (Citisar) O Iehova iertil anda codoia că silo barvalo andi iubirea loialo caring sea codola cai acharen-les.

12, 13. So daștil te ajutil-ame dacă sam perade catar le sentimentea cai doșaren-ame anda chichiva greșeli cai cărdeam-le mai anglal?

¹² Cana păcătuisaras, si normalo ba chiar cherel amenghe mișto te avel-ame iech conștiința pherdi anda codoia că cadaia cherel-ame te căisaras-ame hai te camas te ortosaras amare greșeli. Cu sea cadala, unii anda le slujitori le Iehovasche mechen-pe perade anda cadal sentimentea cai doșaren-le. O ilo doșarel-le hai cherel-le te pachian că o Iehova ci daștilas te iertil-len niciechdata vi cana căisarde-pe anda ilo. Dacă vi tut si tut cadal sentimentea na bâstăr că o Iehova camel anda sea o ilo te sicavel tuche iubire loialo.

¹³ Sar anel amenghe miștimata cado ciacimos? Vi cana sam imperfecți, daisaras te slujisaras le Iehovasche pherde bucuria hai  te avel-ame iech conștiința uji anda codoia că „o rat le Isusosco, lesco Șiav, ujiarel amen catar orisavo păcato”. (1 Ioan 1:7) Cana san perado anda chichiva greșeli na bâstăr că o Iehova camel, chiar si gata te iertil codolen cai căin-pe. Te dichas o phanglimos cai cherel-les o David mașcar i iubirea loialo hai i iertarea. Vo phendea: „Chichi de dur sile le ceruri catar i phuv cadea de bari si leschi iubirea loialo anda codola cai daran lestar. Chichi de dur si o than catar înclel o cham le thanestar cai perel, cadichi de but duriardea vo amendar amare păcatea”. (Ps. 103:11, 12) Ciaces, o Iehova ‘iertil anda sasto ilo’. (Is. 55:7)

14. Sar dea duma o David anda o modo ande savo feril amen i iubirea loialo le Devleschi?

¹⁴ I iubirea loialo le Iehovaschi feril amen spiritualo. Ande iech manglimos o David phendea: „Tu san iech than ande savo daștiv te garavav-ma, va avela te feris man catar o necazo. Che cingara bucuriatar va înconjurin-ma cana va avela te salvis-ma. . . . Codo cai pachial-pe ando Iehova silo înconjurime catar leschi iubirea loialo”. (Ps. 32:7, 10) Cadea sar ando puraimos le ziduri cai înconjurinas o foro ferinas codolen cai beșenas code, sa cadea le fapte cai cherel-le o Iehova anda iubirea, înconjurin-ame hai ferin amen angla le buchia nasul cai daștinas te șion amaro pachiamos co zumaimos. Sa cadea, anda codoia că siles iubirea loialo, o Iehova țârdea-ame peste. (Ier. 31:3)

15. So phanglimos si mașcar i iubirea loialo le Iehovaschi hai iech garaimos sau iech than siguro?

¹⁵ O David folosisardea aver comparația caște phenel o modo ande savo o Iehova feril pesche poporos: „O Del si mânro garaimos siguro, o Del cai sicavel iubirea loialo caring mande!”. Sa cadea o David mai phendea anda o Iehova: „Vo si mânri iubirea loialo hai mânro zuralimos, mânro garaimos siguro hai Codo cai eliberil man, mânro scuto hai Codo caste arachlem iech than te garavav man”. (Ps. 59:17; 144:2) Sostar phendea o David că i iubirea loialo le Iehovaschi si sar iech garaimos hai iech than zuralo? Ande orisavo than andai lumea traisaras, chichi timpo slujisaras le Iehovasche vo feril amen ca amaro amalimos leia te na rimol-pe. Sa codoi asigurarea arachas-la ando Psalmo 91: „Va avela te phenav le Iehovasche: «Tu san mânro garaimos hai mânro zuralimos»”. (Ps. 91:1-3, 9, 14) Vi o Moise camlea te cherel iech imaginea sa cadea ande amari goghi caște sicavel că o Iehova feril amen. (Ps. 90:1, n.s.) Mai but cana phurilo, o Moise șiutea cadala imagineache iech detalio șucar. Vo phendea: „Mânro Del si iech garaimos anda timpuri zurales purane, lesche vasta veșnico sile tela tute”. (Deut. 33:27, n.s.) So sicaven amenghe anda o Iehova le cuvintea „lesche vasta veșnico sile tela tute”?

16. Save si dui moduri prin save binecuvântil-ame o Iehova? (Psalmo 136:23)

¹⁶ Anda codoia că o Iehova si amaro garaimos, simțosaras că sam ande iech than siguro. Cu sea cadala, po iechdata, nachas prin pharimata cai cheren-ame te avas perade. Sar ajutil-ame o Iehova ande cadal momentea? (Citisar Psalmo 136:23.) Vo șiol pesche vasta tela amende, vazdel amen pherdo grija hai ajutil-ame te beșas pale ande pânrănde. Sar anel amenghe miștimata cado ciacimos? Jianas că si amen sea o timpo o ajutorii le Iehovasco. Sa cadea, simțosaras leschi binecuvântarea ande dui moduri. Ando iech than, si amen iech garaimos siguro oricai traisaras pi phuv. Ando duito than, si amen iech Dad cai lel sama pe amende pherdo iubirea.

17. So daisaras te pachias zurales? (Psalmo 33:18-22)

¹⁷ Cadea sar dichleam, daisaras te pachias zurales că o Iehova va dela-ame pesco vast cana nachas prin zumaimata hai va avela pașa amende caște încăras zuralo amaro pachiamos. (2 Cor. 4:7-9) O profeto Ieremia phendea: „Anda codoia că le Iehovas siles iech iubirea loialo amen ci peleam, anda codoia că lesche îndurări ci terminin-pe niciechdata”. (Plâng. 3:22) Daisaras te pachias zurales că po drom la viațaco i iubirea loialo le Iehovaschi va avela sea o timpo pașa amende anda codoia că cadea sar phendea o psalmisto, „i iach le Iehovaschi dichel caring codola cai daran lestar, caring codola cai ajucăren leschi iubirea loialo”. (Citisar Psalmo 33:18-22.)

18, 19. a) So camas te încăras ande amari goghi? b) So va avela te hachiaras mai mișto ando articolo cai avel?

¹⁸ So camas te încăras ande amari goghi? Angla te avas slujitori le Iehovasche sas amen i iubirea savi o Iehova sicavel-la sea le manușenghe, tha acana, sar lesche închinători, bucurisaras-ame vi catar leschi iubirea loialo. Anda codoia că le Iehovas siles cadai calitatea, vo lel-ame ande peschi angali hai feril amen. Vo va avela te încărel-ame sea o timpo pașă lestar hai va avela te încărel peschi promisiunea anda amende. Vo camel te avas lesche amala anda sea o timpo! (Ps. 46:1, 2, 7) Cadea că, prin orisave zumaimata va avela te nachas, o Iehova va dela-ame pesco zuralimos cai trebul-ame caște așias lesche loiali.

¹⁹ Dichleam o modo ande savo o Iehova sicavel iubirea loialo caring pesche slujitori. Cu sea cadala, o Iehova ajucărel ca vi amen te sicavas iubirea loialo iech caring aver. Sar? Cadai buchi va avela te hachiaras-la mai mișto ando articolo cai avel.