1, 2. So motivea si amen te sicavas iubirea loialo iech caring aver?

SI AMEN but motivea te sicavas iubirea loialo iech caring aver. Arachas chichiva anda cadala ande le proverbe inspirime cai aven: „Te na mechel tut i iubirea loialo hai i fidelitatea. . . . Atunci va avela te primis favoarea hai va aveia prinjiando sar iech manuș cai silo goghiaver andel iacha le Devlesche hai le manușenghe”, „Iech manuș cai siles iubirea loialo cherel pesche mișto”, „Con rodel o ortomos hai i iubirea loialo va arachela viața”. (Prov. 3:3, 4; 11:17, n.s.; 21:21)

² Dichleam trin motivea anda save trebul te sicavas iubirea loialo. O iechto: Sam cuci andel iacha le Iehovasche. O duito: Cheras mișto amenghe, sar exemplo phandas amalimata chidine. O trinto: Ando viitorii va avela-ame viața veșnico hai but aver miștimata. Ciaces, meritil te das amari zor caște ascultisaras so phenel amenghe o Iehova: „Sicaven iech caring aver iubirea loialo hai îndurarea!”. (Zah. 7:9)

3. Ca so pușimata va arachaia o răspunso ande cado articolo?

³ Ande cado articolo, va arachaia o răspunso ca ștar pușimata: Caring caste trebul te sicavas iubirea loialo? So sichioas anda o lil Rut anda cadai calitatea? Sar daisaras te sicavas iubirea loialo? So miștimata va avena-ame dacă sicavas iubirea loialo?

4. Sar daisaras te sicavas iubirea loialo cadea sar o Iehova? (Marcu 10:29, 30)

⁴ Cadea sar dichleam ando articolo cai nachlea, o Iehova  sicavel iubirea loialo – iech sentimento zuralo andai afecțiunea loialo – numai caring codola cai iubin-les hai slujin lesche. (Dan. 9:4) Camas te avas „imitatori le Devlesche sar niște șiave iubime”. (Ef. 5:1) Cadea că, camas te bariaras iubirea loialo ande amare ile caring amare phrala hai pheia, adică te astaras amen zurales lendar hai te beșas but timpo pașa lende. (Citisar Marcu 10:29, 30.)

5, 6. So daștil te ajutil-ame te hachiaras mai mișto so si i iubirea loialo?

⁵ Si ciaces, caște sicavas iubirea loialo caring amare phrala, trebul te hachiaras mișto so si voi. Daisaras te cheras cadai buchi cana comparisaras i iubireaia loialo la loialitateaia, cadea sar sili voi hachiardi le manușendar.

 ⁶ Te gândisaras-ame, sar exemplo, ieche manușeste cai cherel buchi ca sa codoi compania de but bărșa. Daisaras te phenas anda leste că si iech manuș cai cherel buchi loialo hai silo demno pachiamasco. Tha, vo ci cherel buchi anda iubirea caring le directori, cas daștil-pe că ci dichlea-le niciechdata. Sa cadea, daștil-pe că ci si sea o timpo de acord le buchianța ca i compania phenel-le sau cherel-le. Les arăsăn-les le love cai primil-le hai daștil-pe că vi mai dur va avela te cherel buchi code ji ca i pensia, dacă ci del-pe lesche aver than mai lașio.

7, 8. a)So cherel ieche manușes te sicavel iubirea loialo? b) Sostar va avela te dichas chichiva versetea anda o lil Rut?

⁷ I diferența mașcar i loialitatea sicadi ando  paragrafo 6 hai i iubirea loialo încărel catar so si ande amaro ilo. So cărdea le slujitoren le Iehovasche anda puraimos te sicaven iubirea loialo? Na iech sentimento șudro anda datoria, tha sentimentea tate cai aven anda ilo. Iech anda cadal slujitori si o David. Le sentimentea uje caring o Ionatan, lesco amal, cărde-les te sicavel lesche iubirea loialo vi cana cadalesco dad camelas te mudarel-les. Chiar vi pala chichiva bărșa pala so o Ionatan mulea, anda codoia că sas-les iubirea loialo, o David sicadea vi mai dur lașimos caring cadalesco șiav, o Mefiboșet. (1 Sam. 20:9, 14, 15; 2 Sam. 4:4; 8:15; 9:1, 6, 7)

⁸ Mai dur, va avela te dichas chichiva versetea anda o lil biblico Rut. So va avela te sichioas anda i iubirea loialo catar cadal manușa sicade ande cado lil? Sar daisaras te aplichisaras le buchia cai sicavas-le ande amare amalimata le phralența hai le pheianța andai congregația? *

9. So cărdea la Naomia te phenel că o Iehova așelas lache contra?

⁹ Ando lil Rut, si duma anda i Naomi, lachi bori i Rut hai o Boaz, iech manuș cai daralas le Devlestar hai cai sas-lo neamo le rromeia la Naomiaco. Anda codoia că po Ierusalimo avilea iech baro bochalimos, i Naomi, laco rrom hai lenghe dui șiave tiliarde ando Moab. Code o rrom la Naomiaco mulea. Lache dui șiave line penghe rromnia, tha vi cadala mule. (Rut 1:3-5; 2:1) Anda codoia că nachlea prin cadal buchia nasul, i Naomi pelea ande iech bari duch. Le ileia phagărdo, voi pachiaia că o Iehova așelas lache contra hai voceaia zurali phendea: „O vast le Iehovasco risardea-pe contra manghe”. „Codo O Mai Zuralo cherdea mânri viața zurales cărchi.” Hai mai phendea: „O Iehova așilea manghe contra  hai Codo O Mai Zuralo andea o pharimos pe mande”. (Rut 1:13, 20, 21)

10. So cărdea o Iehova cana așundea le cuvintea cai phendea-le i Naomi?

¹⁰ Sar dichlea o Iehova le cuvintea pherde duch phende catar i Naomi anda leste? Vo ci risardea o dumo caring peschi slujitoarea cai sas-li zurales duchadi. Ba mai but, vo sicadea empatia caring late. O Iehova hachiarel că „i asuprirea daștil te diliarel le goghiaveres”. (Ecl. 7:7) Cu sea cadala, i Naomi trebulas ajutime caște hachiarel că o Iehova silo pașa late. So cărdea o Iehova? (1 Sam. 2:8) Vo phendea caring i Rut te sicavel iubirea loialo caring i Naomi. I Rut camlea anda sea o ilo te avel pașa peschi sasui hai ajutisardea-la pherdi lașimos te na mai avel cadea de peradi hai te avel pale zurali spiritualo. So sichioas catar i Rut?

11. Sostar te ajutisaras codolen cai sile andel pharimata?

¹¹ I iubirea loialo cherel-ame te ajutisaras codolen cai sile andel pharimata. Cadea sar i Rut, cai sicadea iubirea loialo, le phrala hai le pheia camen te aven pașa lenghe phrala cai nachen prin pharimata sau cai sile perade. Von iubin penghe phralen hai camen sigo te cheren sea so trebul caște ajutin-len. (Prov. 12:25, n.s.; 24:10) Cadea, von ascultin catar so phendea o apostolo Pavel: „Te den duma șucar codolența perade, te ajutin codolen covle hai te sicaven răbdarea caring savore”. (1 Tes. 5:14)

12. Savo si po iechdata o mai lașio modo caște ajutisaras ieche phrales perado?

¹² O mai lașio modo caște ajutisaras ieche phrales perado si te ascultisaras-les hai te phenas lesche că iubisaras-les. O Iehova dichel atento cana sicavas intereso hai lașimos caring lesche cuci bacrea. (Ps. 41:1) Cadea sar phenel-pe andel Proverbe 19:17: „Con sicavel mila caring codo cai si cioro, împrumutil le Iehovas hai Vo va pochinela-les parpale anda so cărdea”.

13. Na cadea sar i Orpa, so alosardea i Rut te cherel hai sar sicadea cadai buchi iubirea loialo? (Dich i imaginea pa i coperta.)

¹³ Hachiaras vi mai mișto so si i iubirea loialo cana dichas le evenimentea cai sas pala soste o rrom la Naomiaco hai lache șiave mule. Cana așundea că „o Iehova ortosardea pesche iacha caring pesco poporo hai dea-les haben”, i Naomi camlea te jial parpale ande laco them cai barilea. (Rut 1:6) Le dui boria tiliarde laia po drom, tha, pala codoia i Naomi phendea lenghe trinvar te risaren-pe ando Moab. So sas pala codoia? „I Orpa ciumidea pesca sasuia hai tiliardea. Tha i Rut așilea laia.” (Rut 1:7-14) Tha, cana alosardea te risarel-pe, i Orpa ascultisardea so phendea lache i Naomi. Voi cărdea so manglea-pe latar. Tha, i Rut cărdea mai  but. Vi cana sas-li libero te tiliarel, i Rut pherdi iubirea camlea te beșel pașa peschi sasui, cai trebulas te avel ajutime. (Rut 1:16, 17) I Rut așilea pașa i Naomi na te cherel peschi datoria tha anda iubirea, iech iubirea loialo. So sichioas anda cadai buchi?

14. a) Sar len-pe pala o exemplo cai mechlea-les i Rut but phrala hai pheia? b)Cadea sar phenel-pe ando Evrei 13:16, so sacrificii dichel cuci o Del?

¹⁴ I iubirea loialo cherel-ame te cheras mai but sar ajucărel-pe amendar. Cadea, sar ando puraimos, but phrala hai pheia alosaren te sicaven iubirea loialo caring penghe phrala chiar vi caring codola cai ci dichle-le niciechdata. Sar exemplo, cana si iech dezastro naturalo, camen vi von te cheren vareso. Dacă varecon andai congregația nachel prin pharimata le lovența, von camen sigo te cheren vareso. Cadea sar le creștini anda o iechto secolo anda i Macedonia, von ci cheren numai so ajucărel-pe lendar. Von den sea penghi zor, hai den ‘chiar mai but sar daisaren’ caște ajutin penghe phralen cai silen nevoia ajutorostar. (2 Cor. 8:3) O Iehova si zurales bucurime cana dichel că sam pherde iubirea loialo iech caring aver! (Citisar Evrei 13:16.)

15, 16. Sar sicadea i Rut că ci mechlea-pe?

¹⁵ Andi relatarea anda i Rut hai anda i Naomi si but cuci sicaimata. Te dichas chichiva.

¹⁶ Na mech-tu. Cana i Rut phendea caring i Naomi că va avela te jial laia andi Iuda, co începuto i Naomi ci camlea. Tha i Rut ci mechlea-pe. So întâmplosardea-pe anda codoia că i Rut ci mechlea-pe? „Cana dichlea că i Rut sas-li hotărâme te jial laia, i Naomi ci mai phendea lache chanci.” (Rut 1:15-18)

17. So va ajutila amen ca vi mai dur te avas pașa amare phrala?

¹⁷ So sichioas amen: Trebul amenghe răbdarea caște ajutisaras codolen perade, anda codoia ci trebul te mechas-ame sigo. Co începuto iech phral sau iech phei daștilas te na camel amaro ajutorii, tha i iubirea loialo va cherela amen vi mai dur te avas pașa lende. (Gal. 6:2) Si amen i speranța că pala iech timpo va camena amaro ajutorii hai cadea, va avela te zuriaras-len caște daștin te jian mai dur.

18. So buchi cărdea ca i Rut te avel duchadi?

¹⁸ Na holiar-tu sigo. Cana i Naomi hai i Rut arăsle ando Betleemo, i Naomi dichlea-pe iechența anda codola cai prinjianelas-le. Voi phendea lenghe: „Cana tiliardem sas man but buchia, tha o Iehova cărdea te risarav man nanghe vasteia”. (Rut 1:21) Chichi de duchadi sas i Rut cana așundea cadaia! Voi dea sea peschi zor caște ajutil la Naomia, rovlea laia, zuriardea-la hai sas pașa late but ghiesa ji cana arăsle co Betleemo. Cu sea cadala, i Naomi phendea: „O Iehova cărdea te risarav-ma nanghe vasteia”. Vi cana i Rut sas pașa late, le cuvintea cai phendea-le i Naomi sicavenas sar cana ci sas cuci anda late o ajutoro cai dea-les lache lachi bori. I Rut sas-li zurales duchadi! Cu sea cadala voi așilea pașa i Naomi.

19. So va ajutila-ame te așias pașa iech phral perado cai duchavel-ame prin so phenel?

¹⁹ So sichioas amen: Iech phral perado daștilas te duchavel-ame prin so phenel vi cana deam sea amari zor te ajutisaras-les. Cu sea cadala, te cheras sea so daisaras caște na dichas lesco phiraimos sar iech buchi nasul. Amen camas te așias pașa  codola cai nachen prin situații phare hai te rughisaras le Iehovas te ajutil-ame te anas lenghe mângâierea ande iech felo sau aver. (Prov. 17:17)

20. So cărdea ca i Rut te astarel zuralimos caște jial mai dur?

²⁰ Zuriar averen. I Rut sicadea iubirea loialo caring i Naomi tha acana chiar vi voi trebulas te avel zuriardi hai o Iehova cărdea ca o Boaz te zuriarel-la. Vo phendea caring i Rut: „O Iehova te pochinel tut parpale anda so cărdean hai chio pochinimos te avel cu sea catar o Iehova, o Del le Israelosco, tela casche phaca avilean te garaves tut”. Cadal cuvintea cai avile anda ilo zuriarde-la but. I Rut phendea caring o Boaz: „Andean manghe mângâierea hai dean duma șucar caring chi slujitoarea”. (Rut 2:12, 13) Cadal cuvintea phende co momento potrivime dine-la o zuralimos cai trebuisardea-la caște jial mai dur.

21. Cadea sar phenel-pe ande Isaia 32:1, 2, so ajutorii den le phure co momento potrivime?

²¹ So sichioas amen: Codola cai sicaven iubirea loialo caring penghe phrala trebun vi von po iechdata te aven zuriarde. Cadea sar o Boaz phendea caring i Rut că laco lașimos ci nachlea bi te avel dichlo, vi le phure de congregație dichen le eforturi cai cheren-le le phrala caște ajutin penghe phralen hai sicaven penghi recunoștința caring cadala. Cana așaren-le anda ilo co momento potrivime, von den le phralen hai le pheian o zuralimos cai trebul-len caște jian mai dur. (Citisar Isaia 32:1, 2.)

22, 23. Sar parudea i Naomi pesco phiraimos hai sostar? (Psalmo 136:23, 26)

²² Pala codoia, o Boaz dea haben la Ruta hai la Naomia. (Rut 2:14-18) Sar zuriardea cadai buchi la Naomia? Voi phendea:  „[O Boaz] te avel binecuvântime catar o Iehova, cai ci încărdea-pe parpale te sicavel iubirea loialo caring codola jiuvinde hai caring codola mule!”. (Rut 2:20a) Cadai buchi cărdea ca i Naomi te paruvel-pe. Mai anglal voi phenelas duchadi: „O Iehova așilea manghe contra”, tha acana voi phenel bucurime: „O Iehova … ci încărdea-pe parpale te sicavel iubirea loialo”. So cărdea ca i Naomi te paruvel pesco phiraimos?

²³ Ji la urmă, i Naomi dichlea o vast le Iehovasco ande peschi viața. Prin i Rut, o Iehova ajutisardea-la ande laco drom caring i Iuda. (Rut 1:16) Sa cadea, i Naomi dichlea o ajutorii le Iehovasco cana o Boaz, ‘iech anda lenghe neamuri cai sas lengo răscumpărătorii’, dea-le anda sea o ilo haben. * (Rut 2:19, 20b, n.s.) Voi gândisardea-pe: „Acana jianav că o Iehova ci mechlea-ma. Vo sas-lo manța sea o timpo”. (Citisar Psalmo 136:23, 26.) I Naomi simțosardea iech bari recunoștința caring i Rut hai o Boaz, anda codoia că cadala ci mechle-la! Cadai buchi cărdea ca savore te aven bucurime!

24. Sostar camas te sicavas sea o timpo iubirea loialo caring amare phrala?

²⁴ Te dichas so sichileam anda o lil Rut anda i iubirea loialo. Cadai calitatea cherel-ame te na mechas sigo amare phralen cai nachen prin pharimata. Sa cadea, i iubirea cherel-ame te das sea amari zor caște ajutisaras averen. Si importanto ca le phure de congregație te zuriaren co momento potrivime codolen cai sicaven iubirea loialo. Cana amare phrala sile pale zurale spiritualo simțosaras iech bari bucuria. (Fap. 20:35) Tha, savo si o mai importanto motivo caște sicavas iubirea loialo? Camas sincero te avas plăcuto le Iehovasche cai si „barvalo andi iubirea loialo”. (Ex. 34:6; Ps. 33:22)