1. Ca so daisaras te ajucăras-ame hai so pachiamos si amen?

 CANA cheras amari buchi andi predicarea, daisaras te ajucăras-ame ca le manușa te așen amenghe contra. Daștil-pe că, ando viitorii, cadaia va avela sea mai but. (Dan. 11:44; 2 Tim. 3:12; Rev. 16:21) Cu sea cadala, si amen o pachiamos că o Iehova va dela-ame o ajutorii cai trebul amenghe. Sostar? O Iehova ajutisardea de fiesavi data pesche slujitoren te daștin te cheren le buchia cai sas lenghe dine, orichichi de phare sas-le cadala. Sar iech exemplo anda cadaia, va avela te dichas chichiva buchia prin save nachlea o profeto Ezechiel, cai predichisardea le iudeienghe îngărde ando Babilono.

2. So phendea o Iehova anda le manușa savenghe trebulas te predichil o Ezechiel hai so va dichaia mai dur? (Ezechiel 2:3-6)

² So felo manușa sas-le codola savenghe trebulas te predichil o Ezechiel? O Iehova phendea anda lende că sas-le „bilajiavune”, că sas-len iech „ilo baresco” hai că ‘vazdine-pe contra lesche’. Von sas-le cadea sar le canră hai le scorpioni. Cadea că, hachiaras sostar o Iehova phendea mai butivar le Ezechielosche: „Te na daras”. (Citisar Ezechiel 2:3-6.) O Ezechiel daisardea te cherel peschi buchi hai te predichil cadale manușenghe anda codoia că: 1) sas-lo bișialdo le Iehovastar, 2) sas-lo zuriardo catar o spirito sfânto hai 3) zuriardea pesco pachiamos prin le Devlesche dumes. Mai dur, va avela te dichas sar ajutisarde le Ezechielos cadal trin buchia hai sar daștin te ajutin vi amen.

3. So dumes zuriarde le Ezechelos hai sar sicadea lesche o Iehova că silo pașa leste?

³ O Iehova phendea caring o Ezechiel: „[Me] bișialav-tu”.  (Ezec. 2:3, 4) Cadal dumes zuriarde le Ezechielos. Vo siguro andea ande peschi goghi că o Iehova folosisardea dumes sar cadala cana numisardea sar profeți le Moises hai le Isaias. (Ex. 3:10; Is. 6:8) Vo jianelas vi că o Iehova ajutisardea cadale duie profețen te nachen părdal le pharimata cai sas-len. Cadea că, cana o Iehova phendea lesche dui-var: „Bișialav-tu”, o Ezechiel pachiaia ciaces că o Iehova va avela pașa leste. Sa cadea, ando lil Ezechiel arachas butivar i expresia: „O cuvânto le Iehovasco avilea mande”. (Ezec. 3:16) Mai but, vi i expresia: „O cuvânto le Iehovasco avilea pale mande” sili folosime butivar. (Ezec. 6:1) Cadea că, o Ezechiel jianelas anda sea o ilo că vo sas-lo bișialdo le Iehovastar. Mai but, anda codoia că sas o șiavo ieche rașaiesco, daștil-pe că vo jianelas catar lesco dad sar, ando timpo cai nachlea, o Iehova zuriardea pesche profețen că va avela pașa lende. Sar exemplo, Vo phendea caring o Isaac, o Iacob hai o Ieremia: „Me som tusa”. (Gen. 26:24; 28:15; Ier. 1:8)

4. So dumes zuriarde le Ezechielos?

⁴ So avenas te cheren le mai but israeliți cana avenas te așunen o mesajo phendo catar o Ezechiel? O Iehova phendea: „O chăr le Israelosco ci va camela te așunel, anda codoia că man ci camen te așunen-ma”. (Ezec. 3:7) Cana le israeliți ci camle te așunen le Ezechielos, o ciacimos si că von ci camle te așunen le Iehovas. Cadal dumes zuriarde-les că, o modo sar avenas te phiraven-pe leia ci avelas te sicavel că vo ci cărdea mișto peschi buchi sar profeto. O Iehova mai phendea lesche că, atunci cana o mesajo anda i cris va pherela-pe, le manușa „va jianena că sas iech profeto mașcar lende”. (Ezec. 2:5; 33:33) Daisaras te pachias ciaces că, cadal dumes zuriarde le Ezechielos hai dine-les o tromai cai trebulas lesche caște cherel peschi buchi.

5. Cadea sar sicavel-pe ando Isaia 44:8, so zuriarel-ame?

⁵ Cana gândisaras-ame că o Iehova si codo cai bișaldea-ame vi amen sam zuriarde. Vo sicavel amenghe iech bari pachiv hai phenel anda amende că sam lesche „martoria”. (Is. 43:10) So șucar privilegio si amen! Cadea sar le Ezechielos, o Iehova zuriarel vi amen: „Na daran!”. Tha sostar ci trebul te daras catar codola cai așen amenghe contra? Anda codoia că vi amen, cadea sar o Ezechiel, sam bișialde le Iehovastar hai vo silo pașa amende. (Citisar Isaia 44:8.)

6. a) Sar sicavel amenghe o Iehova că va avela pașa amende? b) So zuriarel-ame?

⁶ O Iehova phenel amenghe că va avela pașa amende. Sar exemplo, chiar angla so te phenel: „Tumen san mânre martoria”, vo phendea: „Cana va avela te naches prin paia, me va avela te avav tusa, cana va avela te naches prin lena, von ci va pachiarena-tu. Cana va avela te phires prin iag, ci va avela te thabos hai i iag ci va thabarela-tu”. (Is. 43:2) Poiechdata, andi predicarea, nachas, te phenas cadea, prin paia hai iag, adică si amen but pharimata hai phare zumaimata. Cu sea cadala, le ajutoroia le Iehovasco, amen predichisaras mai dur. (Is. 41:13) Sa cadea sar andel ghiesa cana traisardea o Ezechiel, o mesajo cai phenas-les ci silo așundo catar le mai but manușa. Tha amen jianas că o modo sar phiraven-pe ci sicavel că amen ci cărdeam mișto amari buchi sar martori le Devlesche. Amare ile sile zuriarde anda codoia că amen jianas că o Iehova bucuril-pe cana phenas mai dur pherde pachiamos lesco mesajo. O apostolo Pavel scriisardea: „Fiesavo va primila pesco pochinimos pala leschi phari buchi”. (1 Cor. 3:8; 4:1, 2) Iech phei, cai sili pioniera de but timpo, phendea: „Jianav că o Iehova pochinel amari buchi, hai cadaia anel manghe but bucuria”.

7. So sas ando ilo le Ezechielosco ori chichivar gândilas-pe ca i viziunea cai primisardea-la? (Dich i imaginea pa i coperta.)

⁷ O Ezechiel hachiardea chichi de zuralo si o spirito sfânto cana dichlea ande iech viziunea sar cado cherel buchi opral le creaturi spiritualo zurale hai opral le bare roți catar iech vurdon cerisco. (Ezec. 1:20, 21) So cărdea o Ezechiel cana dichlea cadai viziunea? Chiar vo phenel: „Pelem la fațaia ca i phuv”. (Ezec. 1:28) O profeto cărdea cadai buchi anda codoia că lesco ilo pherdilea-pe catar iech bari pachiv caring o Del. Daisaras te pachias că, ori chichivar gândisardea-pe ca i bari viziunea cai dichlea-la, o Ezechiel zuriardea vi mai but pesco pachiamos că daștilas te cherel peschi buchi le ajutoroia cai avel prin o spirito sfânto le Devlesco.

8, 9. a) Sar ajutisardea le Ezechielos i porunca le Iehovaschi? b) Ande so aver modo zuriardea o Iehova le Ezechielos?

⁸ O Iehova poruncisardea le Ezechielosche: „Șiav le manușesco, vazde-tu ande pânrende caște dav duma tusa”. Cadai porunca ande iech than le spiritoia le Devlesco dine le Ezechielos o zuralimos cai trebulas lesche caște vazdel-pe. Vo scriisardea: „O spirito avilea andre ande mande hai cărdea-ma te vazdav-ma”. (Ezec. 2:1, 2) Țâra timpo pala codoia, tha vi ande sea lesco servicio, o Ezechiel sas-lo zuriardo catar „o vast le Iehovasco”, adică catar o spirito sfânto. (Ezec. 3:22; 8:1; 33:22; 37:1; 40:1) O spirito le Devlesco dea le Ezechielos o zuralimos cai trebulas lesche caște cherel peschi buchi hai te predichil le manușenghe cai sas-le „șărale” hai cai sas-len iech „ilo baresco”. (Ezec. 3:7) O Iehova phendea caring o Ezechiel: „Cărdem chio mui sa cadea de zuralo sar lengo mui hai chio cicat sa cadea de zuralo  sar lenghe cicata. Cărdem chio cicat sar iech diamanto, mai zuralo sar o bar. Te na daras lendar hai te na izdras daratar catar lengo mui”. (Ezec. 3:8, 9) Si sar cana o Iehova phenelas le profetosche: „Na mech-tu perado catar cadal șărale manușa. Me va avela te zuriarav-tu”.

⁹ Pala codoia, o spirito le Devlesco îngărdea le Ezechielos ando than cai trebulas te predichil. O profeto scriisardea: „O vast le Iehovasco sas-lo zuralo opral mande”. Trebuisardea lesche iech curco caște sichiol hai te hachiarel mișto o mesajo cai trebulas te phenel-les. (Ezec. 3:14, 15) Pala codoia, o Iehova phendea lesche te jial ca iech plai, cai ‘o spirito gălea andre ande leste’. (Ezec. 3:23, 24) O profeto sas-lo gata te astarel pesco servicio.

10. So trebul amenghe caște daisaras te cheras amari buchi andi predicarea hai sostar?

¹⁰ So trebul amenghe caște daisaras te predichisaras? Caște arachas o răspunso, te gândisaras-ame co Ezechiel. Mai anglal te astarel te predichil, o spirito sfânto dea-les o zuralimos cai trebulas lesche. Vi amen daisaras te cheras amari buchi andi predicarea numai le ajutoroia le spiritosco sfânto. Sostar? Anda codoia că o Satan îngărel iech războio amența hai camel te cherel-ame te na mai predichisaras. (Rev. 12:17) Dacă dichas prin le iacha le manușenghe fal-pe că o Satan silo but mai zuralo sar amen hai că ci daisaras te așias lesche contra. Tha, prin i predicarea, amen maras-les. (Rev. 12:9-11) Sar? Cheras cadaia cana ci mechas-ame darade lestar. De fiesavi data cana predichisaras, o Satan silo perado. Cadea că, cana amen cheras mai dur amari buchi andi predicarea chiar cana nachas prin opoziția, cadaia sicavel că o Iehova del-ame zuralimos prin pesco spirito sfânto hai sam cuci ande lesche iacha. (Mat. 5:10-12; 1 Pet. 4:14)

11. So va cherela o spirito sfânto anda amende hai so daisaras te cheras caște avel amenghe dino?

¹¹ So aver vareso mai sichioas andal dumes le Iehovasche cai sicaven că vo ‘cărdea zurale o mui hai o cicat le Ezechielosche’? O spirito  le Devlesco daștil te del-ame o zuralimos cai trebul amenghe caște nachas părdal orisavo pharimos cai si amen andi predicarea. (2 Cor. 4:7-9) Tha so daisaras te cheras caște avel amenghe dino o spirito sfânto? Trebul te mangas-les sea o timpo le Iehovastar hai te pachias zurales că o Iehova așunel amare manglimata. O Isus sicadea pesche discipolen: „Manghen mai dur . . . , roden mai dur . . . , maren mai dur”. Sar răspunso, o Iehova „va dela spirito sfânto codolenghe cai manghen-les lestar”. (Luca 11:9, 13; Fap. 1:14; 2:4)

12. Cadea sar sicavel-pe ando Ezechiel 2:9–3:3, cathar avelas o sulo cai sas dino le Ezechielosche hai so sas ande leste?

¹² O Ezechiel sas-lo zuriardo na numai catar o spirito sfânto, tha vi catar le Devlesche dumes. Andi viziunea, o Ezechiel dichlea iech vast cai încărelas iech sulo. (Citisar Ezechiel 2:9–3:3.) Cathar avelas cado sulo? So sas scriime ande leste? Hai sar zuriardea le Ezechielos? O sulo avelas catar o trono le Devlesco. Daștil-pe că, o Iehova folosisardea iech anda le ștar îngeri cai o Ezechiel dichlea-le mai anglal caște del-les cado sulo. (Ezec. 1:8; 10:7, 20) Ando sulo sas le dumes le Devlesche – iech baro mesajo anda cris, cai o Ezechiel trebulas te phenel-les ca le exilați cai vazdine-pe contra o Del. (Ezec. 2:7) Cado mesajo sas-lo scriime vi anglal vi palal po sulo.

13. So phendea o Iehova le Ezechielosche te cherel le suloia hai sostar sas-lo gulo?

¹³ O Iehova phendea le profetosche te hal o sulo hai ‘te pherel pesco păr leia’. O Ezechiel așundea catar o Iehova hai halea sea o sulo. So însemnol cadai partea andai viziunea? O Ezechiel trebulas te hachiarel zurales mișto o mesajo cai trebulas te phenel-les. Cado trebulas te cherel partea anda leste hai te cherel buchi ca lesco ilo. Pala codoia, întâmplosardea-pe vareso neajucărdo. O Ezechiel dichlea că o sulo „sas-lo gulo sar i mierea”. (Ezec. 3:3) Sostar? Anda o Ezechiel i bari pachiv cai sas lesche dini te reprezentil le Iehovas, sas iech experiența guli hai șucar. (Ps. 19:8-11) Vo sas-lo recunoscătorii anda codoia că o Iehova alosardea-les te slujil lesche sar profeto.

14. So ajutisardea le Ezechielos te avel gata te astarel te cherel i buchi cai sas lesche dini?

¹⁴ Pala codoia, o Iehova phendea caring o Ezechiel: „Așun sea le dumes cai va avela te phenav-le tuche hai șiu-le ande chio ilo”. (Ezec. 3:10) Cadea o Iehova phendea le Ezechielosche te încărel ande peschi goghi le dumes scriime ando sulo hai te gândil-pe lende. Cadaia zuriardea o pachiamos le profetosco hai, ande sa codo timpo, pregătisardea-les te phenel le manușenghe cado pharo mesajo. (Ezec. 3:11) Anda codoia că o mesajo le Devlesco sas ande lesco ilo hai pe lesche ușta, o Ezechiel sas-lo gata te astarel te cherel i buchi cai sas lesche dini. (Dich vi o Psalmo 19:14.)

15. So trebul ‘te șioas ando ilo’ caște cheras mai dur amari buchi andi predicarea?

¹⁵ Caște cheras mai dur amari buchi andi predicarea, vi amen trebul te zuriaras amaro pachiamos prin le dumes le Devlesche. Si zurales importanto ‘te șioas ando ilo’ sea le dumes cai phenel-le amenghe o Iehova. Aghies, vo del amenghe duma prin lesco Cuvânto scriime, i Biblia. So daisaras te cheras ca o Cuvânto le Devlesco te cherel vi mai dur buchi ca amari goghi, amaro ilo hai phiraimos?

16. So trebul te cheras le cuvântoia le Devlesco hai sar daisaras te șioas-les ande amaro ilo?

¹⁶ Ca amaro corpo te avel zuralo, trebul te has haben hai te mechas-les te digeril-pe. Sa cadea, ca amaro pachiamos te avel zuralo trebul  te sichioas mai but buchia anda o Cuvânto le Devlesco hai te gândisaras-ame ca so citisardeam. Cadea că te na bâstras o sicaimos anda o sulo! O Iehova camel ‘te pheras amaro păr’ lesche Cuvântoia, adică te das amari zor te hachiaras-les sea mai mișto. Daisaras te cheras cadaia cana mangas-ame le Iehovasche, citisaras hai gândisaras-ame ca so citisardeam. Mai anglal, cana mangas-ame pregătisaras amaro ilo caște hachiaras le gânduri le Devlesche, pala codoia citisaras iech cotor andai Biblia hai așias po than caște gândisaras-ame ca so citisardeam. Sar va ajutila-ame cadaia? Cana hachiaras sea mai mișto o Cuvânto le Devlesco, amaro pachiamos va avela sea mai zuralo.

17. Sostar si importanto te gândisaras-ame ca so citisardeam andai Biblia?

¹⁷ Sostar si importanto te citisaras i Biblia hai te gândisaras-ame late? Anda codoia că cadea primisaras o zuralimos savestar si amen nevoia caște predichisaras o mesajo anda o Regato aghies hai ando viitorii pașardo te phenas o zuralo mesajo anda cris. Sa cadea, cana gândisaras-ame ca le șucar calități le Iehovasche, amaro amalimos leia va avela sea mai zuralo. Cadea că, va avela amen pacea hai amaro ilo va avela pherdo catar iech guli bucuria. (Ps. 119:103)

18. So va trebuna te jianen ande pengo ilo le manușa anda amaro teritorio hai sostar?

¹⁸ Amen ci sam profeți cadea sar sas o Ezechiel. Cu sea cadala, camas te phenas mai dur o mesajo le Iehovasco, scriime ande lesco Cuvânto, ji cana Vo va pachiala că cadai buchi sas cărdi cadea sar camel. Cadea că, cana va avela o ghies la crisaco, le manușa anda amaro teritorio ci va daștina te phenen că ci sas lenghe phendo te len sama sau că o Del ci dichlea caring lende. (Ezec. 3:19; 18:23) Mai but, von va trebuna te jianen ande pengo ilo că o mesajo cai predichisardeam-les sas-lo le Devlestar.

19. So va dela amen zuralimos te cheras amari buchi andi predicarea?

¹⁹ Cadea că, so va dela amen zuralimos te cheras amari buchi andi predicarea? Sa codol buchia cai zuriarde le Ezechielos: sam bișalde le Iehovastar, sam zuriarde prin o spirito sfânto hai zuriaras amaro pachiamos anda o Cuvânto le Devlesco. Le ajutoroia le Iehovasco, va avela te daisaras te cheras mișto i buchi cai sas amenghe dini hai va avela te jias mai dur „ji co sfârșito”. (Mat. 24:13)