1. Cathar jianas că o Iehova camel te avel pașă amendar?

 O IEHOVA acharel-ame te pașioas lestar. (Iac. 4:8) Vo camel te avel amaro Del, amaro Dad hai amaro Amal. O Iehova așunel amare manglimata hai ajutil-ame andel pharimata. Sa cadea, prin leschi organizația, vo sicavel-ame hai feril-ame. Tha so trebul te cheras caște pașioas le Iehovastar?

2. Sar daisaras te pașioas le Iehovastar?

² Daisaras te pașioas le Iehovastar cana mangas-ame lesche, cana citisaras anda lesco Cuvânto hai cana gândisaras-ame ca so citisardeam. Cadea, amaro ilo pherel-pe bucuriatar hai aprecierea caring leste. Mai but, sam vi mai zuriarde te așunas lestar hai te așaras-les, cadea sar vi meritil. (Rev. 4:11) Chichi prinjianas mai mișto le Iehovas, cadichi mai but pachias-ame ande leste hai ande leschi organizația.

3. Sar camel o Beng te duriarel-ame catar o Iehova hai leschi organizația, tha so daisaras te cheras caște așias zurale angla lesche athaimata? (Psalmo 31:13, 14)

³ Tha o Beng, camel te duriarel-ame le Iehovastar, vi mai but cana nachas prin pharimata. Sar cherel vo cadaia? Vo camel te cherel-ame țâra po țâra te na mai pachias-ame ando Iehova hai ande leschi organizația. Tha amen daisaras te așias zurale angla lesche athaimata. Dacă amaro pachiamos ando Iehova silo zuralo, ci va avela te duriaras-ame niciechdata catar amaro Del hai leschi organizația. (Citisar Psalmo 31:13, 14.)

4. So va dichaia ande cado articolo?

⁴ Mai dur, va avela te das duma anda trin pharimata cai aven avreal i congregația. Fiesavo anda cadala daștilas te covliarel  amaro pachiamos ando Iehova hai ande leschi organizația. Sar daștinas te duriaren-ame le Iehovastar cadal pharimata hai so daisaras te cheras caște așias contra le eforturi le Satanosche?

5. Sar daștin le pharimata te cheren-ame te hasaras amaro pachiamos ando Iehova hai leschi organizația?

⁵ Poiechdata savore nachas prin pharimata. Daștil-pe că amari familia așel amenghe contra sau hasardeam amari buchi. Sar daștinas cadal pharimata te cheren-ame te hasaras amaro pachiamos andi organizația le Iehovaschi hai te duriarel-ame lestar? Cana nachas prin pharimata mai but timpo, daisaras te simțosaras-ame perade sau chiar te hasaras amari speranța. O Satan folosil-pe cadalendar caște cherel-ame te pachias că o Iehova ci iubil-ame. Mai but, vo camel te cherel-ame te pachias că o Iehova hai leschi organizația sile doșale anda amari duch. Ande cado athaimos mechle-pe astarde vi chichiva israeliți cana sas-le ando Egipto. Mai anglal, von pachianas anda sea o ilo că o Iehova șiutea le Moises hai le Aaronos te eliberil-le andai sclavia. (Ex. 4:29-31) Tha, pala codoia, cana o faraono astardea te phiravel-pe nasul lența, von doșarde le Moises hai le Aaronos anda lenghe pharimata hai phende lenghe: „Tumen cărdean ca o faraono hai lesche slujitori te urân-ame hai șiutean ande lengo vast i sabia caște mudaren-ame!”. (Ex. 5:19-21) Von șiute i doș pe le slujitori loialo le Devlesche. So nasul sas cadaia! Dacă vi tu naches prin iech pharimos cai încărel de but timpo, so daștis te cheres caște na hasares chio pachiamos ando Iehova hai leschi organizația?

6. So sichioas catar o profeto Habacuc anda sar te așias zurale cana nachas prin pharimata? (Habacuc 3:17-19)

⁶ Pâtăr chio ilo angla o Iehova ando manglimos hai mang-les te ajutil-tu. O profeto Habacuc nachlea prin but pharimata. Pala so fal-pe, iechdata, vo chiar pușlea le Iehovas dacă duchal-les lestar. Cadea că vo șiordea pesco ilo angla o Iehova ando manglimos. Vo phendea: „Ji cana, o Iehova, va avela te dav cingar pala o ajutorii hai tu ci așunes? . . . Sostar meches i asuprirea?”. (Hab. 1:2, 3) O Iehova dea răspunso ca o manglimos lesche slujitoresco loialo. (Hab. 2:2, 3) Pala so așilea hai gândisardea-pe ca le ocazii cana o Iehova hastradea pesche poporos andel puraimata, o profeto astardea te avel pale bucurime. Vo arăslea te pachial anda sea o ilo că le Iehovas duchalas-les lestar hai că vo va avela pașa leste caște daștil te nachel părdal orisavo pharimos. (Citisar Habacuc 3:17-19.) So sichioas-ame? Cana nachas prin pharimata, te pâtras amaro ilo angla o Iehova ando manglimos hai te phenas lesche sea so simțosaras. Pala codoia, te mangas-les te ajutil-ame. Cadea, o Iehova va dela-ame o zuralimos cai trebul amenghe caște daisaras te jias angle. Hai cana simțosaras lesco ajutorii, amaro pachiamos cărdiol vi mai zuralo.

7. So camle te cheren le neamuri la pheiache Shirley hai so ajutisardea-la te na hasarel pesco pachiamos ando Iehova?

⁷ Cher mai dur buchia cai ajutin-tu te așes pașa o Iehova. Te dichas sar ajutisardea cadaia iecha pheia anda Papua Noua Guinee, po anav Shirley b. Voi hai lachi familia sas-le zurales ciore, hai poiechdata phares cherenas te avel-le so te han. Iech anda lache neamuri camlea te cherel-la te hasarel pesco pachiamos ando Iehova. Vo phendea lache: „Phenes că o spirito sfânto ajutil-tu, tha ci dichiol-pe niciech ajutorii. I familia sa ciori si. Numai hasares chi vremea cana predichis”.  I Shirley phenel: „Chiar arăslem te pușav-ma: «Duchal le Devles amendar sau nici?». Cadea că sigo manglem-ma le Iehovasche hai phendem lesche sea so sas ande mânri goghi. Citisardem mai dur andai Biblia hai anda amare publicații, gălem andi predicarea hai ca le întrunii”. Na pala but timpo, i Shirley hachiardea că o Iehova lelas sama pe lachi familia. Sas-len sea o timpo so te șion pi meseili hai sas-le voime. Voi phenel: „Simțosardem că o Iehova dea manghe răspunso co manglimos”. (1 Tim. 6:6-8) Dacă vi tu cheres mai dur buchia cai ajutin-tu te așes pașa o Iehova, chanci ci va duriarela-tu lestar, niciech pharimos hai niciech îndoiala.

8. Prin so daștinas te nachen le phrala cai sile angla amende andi organizația?

⁸ Prin o televizoro, o radio, le ziarea sau prin o interneto, amare dușmani phenen hohaimata anda le phrala cai sile angla amende andi organizația le Iehovaschi. (Ps. 31:13) Chichiva anda cadala sas-le phandade hai doșarde pe neciacimaste că cărde buchia nasul. Prin iech situația sar cadaia nachle vi le creștini anda o iechto secolo, cana o apostolo Pavel sas-lo phandado hai doșardo pe neciacimaste. So cărde von?

9. So cărde chichiva creștini cana o apostolo Pavel sas-lo phandado?

⁹ Cana o Pavel sas-lo phandado ca i Roma, chichiva phrala mechle-les. (2 Tim. 1:8, 15) Sostar? Sas lenghe oare lajiav le Paveloia anda codoia că le manușa dichenas-les sar iech manuș nasul? (2 Tim. 2:8, 9) Sau mechle-pe astarde daratar că vi von daștinas te aven phandade? Ci jianas sostar risarde o dumo caring o Pavel, tha ci si amenghe pharo te gândisaras-ame so sas ande lesco ilo. Vo nachlea prin but pharimata hai chiar sas-lo gata te merel anda lende. (Fap. 20:18-21; 2 Cor. 1:8) Amen ci camas te avas sar codola cai mechle le Pavelos cana sas lesche o mai pharo! So trebulas te avel ande amari goghi cana dichas că chichiva phrala cai silen autoritatea sile persecutime?

10. So ci trebul te bâstras cana le phrala cai sile angla amende sile persecutime hai sostar?

 ¹⁰ Te na bâstras sostar sam persecutime hai castar avel cadaia. Ando 2 Timotei 3:12, citisaras: „Sea codola cai camen te train andi devoțiunea sfânto ando phanglimos le Isus Cristosoia va avena vi von persecutime”. Cadea că, amen daisaras te ajucăras-ame ca o Satan te atachil le phralen cai sile angla amende. Vo camel te cherel-le te na așen loialo le Iehovasche hai te daraven-ame. (1 Pet. 5:8)

11. So sichioas catar o Onisifor? (2 Timotei 1:16-18)

¹¹ Te așias mai dur loialo pașa amare phrala. (Citisar 2 Timotei 1:16-18.) Cana o Pavel sas-lo phandado, o Onisifor ci phiradea-pe caring leste cadea sar le coaver. „Ci sas lesche lajiav [le Pavelosche] lanțurența”. O Onisifor rodea le Pavelos, hai cana arachlea-les, cărdea sea so daisardea caște ajutil-les soia sas-les nevoia, chiar cana trebuisardea te șiol peschi viața ando pericolo. So sichioas lestar? Te na mechas ca i dar le manușendar te daravel-ame sau te așiavel-ame catar o fapto te avas pașa amare phrala cai sile persecutime. Ando than te cheras cadaia, te sicavas că nai-le doșale hai te das amari zor te ajutisaras-le. (Prov. 17:17) Len silen nevoia catar amari iubirea hai ajutorii.

12. So sichioas catar le phrala hai pheia andai Rusia?

¹² Te gândisaras-ame ca le phrala hai le pheia andai Rusia, sar ajutisarde von penghe phralen cai sile phandade. Cana vroiech anda lende arăsăn angla o judecătorii, but phrala hai pheia aven co tribunalo caște aven pașa lende. So sichioas lendar? Cana le phrala cai sile angla amende sile prasade, phenen-pe hohaimata anda lende, sile phandade sau persecutime, ci trebul te daras. Te mangas-ame anda lende, te las sama pe le jene anda lenghe familii hai te rodas te cheras vi aver buchia prin save te ajutisaras-le. (Fap. 12:5; 2 Cor. 1:10, 11)

13. Sar daștil te covliarel amaro pachiamos ando Iehova hai leschi organizația o fapto că le coaver prasan-ame?

¹³ Le neamuri cai ci anen închinarea le Iehovasche sau amare colegi catar i buchi sau catar i școala daștinas te asan amendar anda codoia că predichisaras hai traisaras pala le bare norme moralo le Iehovasche. (1 Pet. 4:4) Von daștinas te phenen: „Placial-ma tutar sar manuș, tha chi religia si prea stricto hai purani”. Aver prasan-ame anda o modo sar phiravas-ame codolența excluși. Von daștinas te phenen: „Sar daștis te phenes anda tute că san iech manuș cai iubil le coaveren?”. Le buchia cai phenen-le le manușa anda amende daștin te șion i îndoiala ande amari goghi. Daisaras te astaras te pușias-ame: „Oare ci ajucărel o Iehova prea but mandar?” sau „Leschi organizația oare ci încărel-ma parpale te cherav so camav?” . Dacă vi tu naches prin cadai situația, so daștil te ajutil-tu te așes pașa o Iehova hai leschi organizația?

14. So trebulas te cheras cana le coaver prasan-ame anda codoia că încăras le norme le Iehovasche? (Psalmo 119:50-52)

¹⁴ Te avas hotărâme te încăras le norme le Iehovasche. O Iov sas iech murș cai încărdea le bare norme le Iehovasche chiar cana le coaver prasade-les anda cadaia. Iech anda lesche amala hohamne chiar camlea te cherel-les te pachial că anda o Del sas de ivea dacă încărelas sau nici lesche norme. (Iov 4:17, 18; 22:3) Tha o Iov ci pachiaia cadal hohaimata. Vo pachialas că le norme le Iehovasche anda so si mișto hai so si nasul sile orta, hai sas-lo hotărâme te încărel-le. O Iov ci mechlea pesco pachiamos cana le coaver cărde presiuni pe leste. (Iov 27:5, 6) So sichioas-ame catar o Iov?  Cana le coaver prasan-ame, te na pachias că le norme le Devlesche ci sile orta. An ande chi goghi chichi miștimata andea tuche o fapto că încărdean-le ande sea cado timpo. Av hotărâme te așes pașa i organizația cai rodel te aven încărde cadal norme! Cadea, orichichi de but prasan-ame le coaver, ci va avela te duriaras-ame le Iehovastar. (Citisar Psalmo 119:50-52.)

15. Sostar prasanas la pheia Brizit le jene anda lachi familia?

¹⁵ Te dichas prin so nachlea iech phei andai India, po anav Brizit. Le jene anda lachi familia prasanas-la anda laco pachiamos. Ca țâra timpo pala so i Brizit boldea-pe sar Martora le Iehovasche, ando bărș 1997, laco rrom cai ci silo Martoro, hasardea peschi buchi. Cadea că, vo alosardea ca, ande iech than lesca rromnia i Brizit hai lenghe șeianța, te jian te beșen ca lesche dada ande aver foro. Tha i Brizit avelas te nachel vi prin aver pharimata. Anda codoia că laco rrom ci arachlea pesche iech buchi, voi trebulas te cherel buchi cu normă întreagă caște lel sama pi familia. Mai but, i mai pașă congregația latar sas ca 350 kilometri. Tha, i familia lache rromeschi persecutisardea-la cadea de but anda laco pachiamos, că trebuisarde pale te muchin-pe. Pala codoia, bi te ajucărel-pe laco rrom mulea, hai mai târzio iech anda lache șeia mulea anda cancero ca numai 12 bărșa. Hai sar cana ci arăsănas sea cadala, lache neamuri doșarde la anda sea cadal pharimata. Von pheneas că dacă ci cărdileas iech Martora le Iehovasche ci avileas sea cadal buchia pe lende. Cu sea cadala, i Brizit pachiaia-pe mai dur ando Iehova hai așilea pașă catar leschi organizația.

16. So miștimata sas la pheia Brizit anda codoia că așilea pașa o Iehova hai leschi organizația?

¹⁶ Anda codoia că i congregația sas cadea de dur catar i Brizit, iech supraveghetoro de circumscripție zuriardea-la te predichil ando than cai beșelas hai te încărel le întruniri late chăre. Chiar cana, mai anglal, pachiaia că sas iech buchi zurales phari, i Brizit cărdea so phendea lache o phral. Predichisardea, încărdea întruniri late chăre hai cărdea pesche timpo  vi te încărel i închinarea andi familia lache șeianța. Cadea, i Brizit arăslea te astarel hai te încărel but studii biblico, hai but anda codola casa studiisardea bolde-pe. Ando bărș 2005, voi astardea te cherel o pionierato regularo. Laco pachiamos ando Iehova hai lachi loialitatea caring i organizația sas-le pochinde. Lache șeia slujin loialo le Iehovasche, hai, aghies, ando than cai beșel si dui congregații. I Brizit pachial anda sea o ilo că o Iehova dea-la o zuralimos te nachel părdal le pharimata hai te așel zurali angla le prasaimata cai avile catar lachi familia.

17. So trebulas te avas hotărâme te cheras?

¹⁷ O Satan camel te pachias că o Iehova va mechela-ame cana nachas prin pharimata hai că, dacă așias ande leschi organizația, cheras amari viața mai phari. O Satan camel te daravel-ame cana le phrala cai sile angla amende sile prasade, phenen-pe hohaimata anda lende, sile persecutime sau chiar phandade. Sa cadea, folosil-pe catar le prasaimata caște covliarel amaro pachiamos andel norme le Iehovasche hai ande leschi organizația. Tha, amen prinjianas zurales mișto lesche athaimata jiungale hai ci mechas-ame diliarde lestar. (2 Cor. 2:11) Te avas hotărâme te duriaras amendar le hohaimata le Satanosche hai te așias loialo caring o Iehova hai leschi organizația. Te na bâstras că o Iehova ci va mechela-ame niciechdata. (Ps. 28:7) Cadea că, te na mechas chanci te duriarel-ame lestar! (Rom. 8:35-39)

18. So va dichaia ando articolo cai avel?

¹⁸ Ande cado articolo, dichleam chichiva pharimata cai daștinas te aven avreal i congregația. Tha amaro pachiamos ando Iehova hai leschi organizația daștil te avel zumadi vi catar le pharimata cai aven anda o mașcar la congregațiaco. Sar daisaras te nachas părdal cadal zumaimata? Cadale pușimaste, va avela te arachas o răspunso ando articolo cai avel.