Caște cheren i buchi cai sas lenghe dini, le Studenți andi Biblia trebunas te sicaven iech baro tromai. Von trebunas te phenen „i vestea lași” codolenghe umili, hai codolenghe nasul, că avel „o ghies la crisaco”.

O phral Hoskin, cai beșelas andi Canada, șiutea mărturia pherdo tromai, chiar cana aver așile lesche contra. Ando pașmilai le bărșesco 1921, dea duma ieche pastoroia metodisto. O phral Hoskin phendea lesche catar o începuto: „Trebulas te das duma șucar anda le Scripturi hai, chiar cana ci sam de acord ande sea le buchia, jianas vi le dui că trebul te das duma andi pacea hai te tiliaras cathar sar amala”. Tha ci sas cadea. O phral Hoskin phendea so sas mai dur: „Pala numai chichiva minutea, o pastoro phandadea o udar cadea de zurales, că mai sas iech țâra ca lesco geamo te phagiol”.

„Jia hai predichisar codolenghe cai ci jianen chanci anda o Del, na manghe!”, phendea lesche zurales o pastoro. O phral Hoskin ci phendea chanci, tha ando timpo so tiliarelas, phenelas ande peste: „Pachiav că chiar acana dem duma ieche manușeia cai ci prinjianel le Devles”.

O duito ghies, cana încărelas i predica, o pastoro holiardo phendea buchia nasul anda o phral. O phral Hoskin phenel: „Phendea le manușenghe te len sama, că som o mai baro hohamno cai șiutea vroiechdata pânro ande codo foro hai că trebulas te avav mudardo”. O phral Hoskin ci mechlea-pe darado, predichisardea mai dur hai le manușa așunenas-les. „Dem duma zurales șucar le manușența ande codo timpo. Chichiva manușa chiar phende: «Jianas că san iech slujitoro le Devlesco!» hai pușle man dacă daștinas te ajutin-ma sau dacă trebul manghe vareso.”

Andi revista Epoca de aur, * le Studenți andi Biblia publichisarde programea anda o studio la Bibliaco caște ajutin codolen cai camle te barion spiritualo. Iech andal programea bușiolas „Studio biblico andal tărne” hai ande leste sas pușimata anda save le dada trebunas te den duma ande iech than le șiavența. Le dada „șionas le șiavenghe cadal pușimata hai ajutinas-le te arachen le răspunsuri andi Biblia”. Chichiva  pușimata, sar avenas: „Chichi lila si la Biblia?”, ajutinas le șiaven te hachiaren bare ciacimata. Aver, sar avelas: „Va avela persecutime fiesavo creștino ande iech modo sau aver?”, pregătinas le tărnen te aven predicatori tromane.

O programo „Bare studii ando plano divino le bărșengo” sas anda le Studenți andi Biblia mai bare hai ande leste sas pușimata mai profundo savengo răspunso arachelas-pe ando iechto volumo anda le Studii andel Scripturi. Chiar cana cadal programea ajutisarde mii manușen cai citinas-le, andi revista Epoca de aur anda 21 decembria 1921 phendea-pe că le dui ci va mai avena. So cărdea te avel cado paruimos neajucărdo?

Codola cai sas-le opral i lucrarea hachiarde că le manușa trebunas te prinjianen le ciacimata biblico pe subiectea. Cadea că, ande noiembria 1921, sas dino o lil Harfa lui Dumnezeu. Le manușa cai camle te primin o lil sas-le șiute ande iech curso anda o studio la Bibliaco. Von studiinas corcore hai sas-le ajutime te hachiaren „so camelas te cherel o Del caște del le manușen viața veșnico”. Sar încărelas-pe cado studio?

Le manușesche cai lelas o lil sas lesche dino vi iech cartonașo pe savo sas scriime le pagini cai trebulas te citil-le. Ando curco cai avelas, sas lesche dino iech aver cartonașo pe savo sas mai but pușimata anda so citisardea. Tele po cartonașo, sas-le sicade le pagini cai o manuș trebulas te citil-le o curco cai avelas.

Ande 12 curche, o manuș primilas prin poșta ande fiesavo curco câte iech cartonașo bișaldo catar i congregația localo. Butivar, le cartonașea sas-le bișalde catar le phrala mai phure andai congregația sau codolendar cai ci daștinas te jian chăr chărestar. I Anna Gardner, anda Millvale, Pennsylvania, SUA, phenel: „Cana sas dino o lil Harfa lui Dumnezeu, mânri phei, i Thayle, cai ci jianelas te phirel, cărdea mai but andi predicarea hai bișaldea ande fiesavo curco cartonașe pușimatanța”. Pala so o manuș terminilas o curso, le phrala jianas leste chăre hai ajutinas-les te prinjianel mai but andai Biblia.

Co sfârșito le bărșesco, o phral Rutherford bișaldea iech lil caring sea le congregații. Vo phendea: „Ande cado bărș, o secerișo va avela mai baro sar niciechdata”. Vo delas duma anda i buchi cai așelas angla lende hai mai phendea: „Mai si but buchi te cheras. Zuriaren vi averen te len partea amența ande cado servicio binecuvântime.” Cadea sar ajucărdea-pe, le Studenți andi Biblia camle sigo te ajutin ande cadai buchi. O bărș 1922 avelas te arachel-le andi predicarea vi mai but hai avelas te phenen pherde tromai o mesajo anda Regato.