1. So daștil te avel ande amari goghi cana gândisaras-ame ca iech manuș cai sicavel îndurarea?

DACĂ trebulas te phenas sar si iech manuș cai sicavel îndurarea, daștil-pe că gândisaras-ame varecaste cai sicavel lașimos, siles iech ilo lașio, silo pherdo mila hai ajutil averen. Daștil-pe că avel ande amari goghi i ilustrarea le Isusoschi anda o lașio samariteano. Cado manuș, chiar cana cherelas partea anda aver națiunea, „sicadea îndurarea” caring iech evreo cai sas-lo mardo catar le cior. O samariteano sicadea lesche mila hai lea sama pe leste pherdo iubirea. (Luca 10:29-37) Cadai ilustrarea sicavel iech șucar calitatea le Devleschi: i îndurarea. O Del sicavel îndurarea anda codoia că iubil-ame hai cherel cadaia ande fiesavo ghies.

2. Ande so aver modo daștil iech manuș te sicavel îndurarea?

² Si vi iech aver modo prin savo iech manuș daștil te sicavel îndurarea. Iech manuș cai sicavel îndurarea, daștilas te na pedepsil varecas cai meritil te avel pedepsime. O Iehova sicavel cadai îndurarea caring fiesavo anda amende. Ando Psalmo 103:10 citisaras: „Vo ci phiradea-pe amența pala amare păcatea”. Tha po iechdata, o Iehova alosarel te ortosarel mai zurales codolen cai păcătuin.

3. So pușimata va dichaia?

³ Ande cado articolo, va avela te dichas trin pușimata: Sostar sicavel o Iehova îndurarea? So phanglimos si mașcar o ortomos mai zuralo hai i îndurarea? So daștil te ajutil vi amen te avas îndurători? Te dichas le răspunsuri cai del-le i Biblia cadale pușimatande.

4. Sostar sicavel o Iehova îndurarea?

⁴ O Iehova silo bucurime te sicavel îndurarea. O apostolo Pavel sas-lo inspirime te scriil că o Del silo „barvalo andi îndurarea”.  Ande cado contexto, o Pavel sicadea că codola machle, chiar cana sile împerfecți, primisarde i speranța te train ando cerii anda codoia că o Del sicavel peschi îndurarea. (Ef. 2:4-7) Tha i îndurarea le Iehovaschi ci însemnol numai cadichi, si but mai bari. O David scriisardea: „O Iehova silo lașio savorența hai leschi îndurarea dichiol-pe claro ande sea lesche buchia”. (Ps. 145:9) Anda codoia că o Iehova iubil le manușen, vo sicavel lenghe îndurarea oricana arachel iech motivo te cherel cadai buchi.

5. Sar arăzlea o Isus te prinjianel i îndurarea le Iehovaschi?

⁵ O Isus jianel mai mișto sar oricon chichi de but camel o Iehova te sicavel îndurarea. Angla so te avel pi phuv, o Isus beșlea ande iech than pesche Dadeia ando cerii but timpo. (Prov. 8:30, 31) Ande sea cado timpo, o Isus dichlea butivar sar lesco Dad sicadea îndurarea caring le manușa păcătoși. (Ps. 78:37-42) Cana sicavelas le manușen, o Isus dea duma butivar anda cadai șucar calitatea lesche Dadeschi.

6. So ilustrarea cai arăsăl ando ilo folosisardea o Isus caște sicavel i îndurarea pesche Dadeschi?

⁶ Cadea sar dichleam ando articolo cai nachlea, o Isus sicadea prin iech parabola cai arăsăl ande amaro ilo, chichi de but camel o Iehova te sicavel îndurarea. O șiav andai parabola tiliardea chăral hai „hasardea sea pesco barvalimos anda codoia că îngărelas iech viața rimome”. (Luca 15:13) Mai târzio, vo căisardea-pe, sicadea umilința hai gălea parpale chăre. Sar phiradea-pe lesco dad cana dichlea-les? O tărno murș ci trebulas te ajucărel but ji cana te dichel cadaia. O Isus phendea: „Cana [o șiav] sas-lo încă dur, lesco dad dichlea-les hai cărdilea lesche iech bari mila lestar. Nașlea caring leste, lea-les andi angali hai ciumidea-les pherdo iubirea”. O dad phiradea-pe șucar pesche șiaveia. Sicadea lesche îndurarea, iertisardea-les hai primisardea-les parpale andi familia. Chiar cana o șiav cărdea iech baro păcato, o dad iertisardea-les anda codoia că falea-les nasul anda so cărdea. O dad îndurătorii andai ilustrarea reprezentil le Iehovas. Prin cadai ilustrarea cai arăsăl ande amaro ilo, o Isus sicadea chichi de but camel lesco Dad te iertil codolen cai sicaven ciaci căința. (Luca 15:17-24)

7. So phanglimos si mașcar o goghiaverimos le Iehovasco hai leschi îndurarea?

⁷ O Iehova sicavel îndurarea anda codoia că siles o mai baro goghiaverimos. O goghiaverimos le Iehovasco ci silo șudro,  iech calitatea la goghiachi. Tha i Biblia phenel că „o goghiaverimos de opral” silo „pherdo îndurarea hai roade lașe”. (Iac. 3:17) Cadea sar iech dad iubitorii, o Iehova jianel că trebul amenghe leschi îndurarea. (Ps. 103:13; Is. 49:15) Cana sicavel amenghe îndurarea, o Iehova del-ame iech speranța, chiar cana sam imperfecți. Cadea că, prin lesco baro goghiaverimos, o Iehova sicavel amenghe îndurarea de fiesavi data cana arachel iech motivo te cherel cadaia. Tha, o Iehova jianel vi cana ci trebul te sicavel îndurare. Ande lesco baro goghiaverimos, o Iehova silo îndurătorii, tha niciechdata ci silo de acord le buchianța nasul cai cheras-le.

8. So măsura trebul te lel-pe po iechdata hai sostar?

⁸ Tha, so trebulas te cheras dacă iech anda amare phrala alosarel te avel-les iech viața cai ci placial le Devles? O Pavel scriisardea tela inspirația ‘te na aven-ame phanglimata leia’. (1 Cor. 5:11) Codola cai ci căin-pe sile excluși andai congregația, iech măsura cai trebul te avel lini caște aven ferime le slujitori loiali le Iehovasche. Mai but, voi sicavel i sfințenia le Iehovaschi. Tha anda chichiva daștil te avel pharo to pachian că i excluderea sicavel i îndurarea le Devleschi. Mai dur, va avela te dichas cadai buchi.

9, 10. Cadea sar phenel-pe ando Evrei 12:5, 6, sostar si i excluderea iech măsura cai sicavel îndurarea? Cheren iech ilustrarea.

⁹ Cana așunas ca amare întruniri creștino că iech phral cai sas mai pașă amendar „ci mai silo Martoro le Iehovasco”, sam zurales duchade. Daisaras te pușias-ame dacă cadai măsura chiar trebuisardea te avel lini. Sicavel ciaces i excluderea îndurarea? Da. Cana iech manuș ci si ortome cana trebul, cadaia ci sicavel goghiaverimos, îndurarea sau iubirea. (Prov. 13:24) Daștil te ajutil i excluderea codoles cai ci căil-pe te paruvel pesco phiraimos? Da. I măsura anda i excluderea lini catar le phure ajutisardea bute jenen cai cărde bare păcatea te căin-pe, te paruven-pe hai te aven parpale andel vasta lenghe dadengo iubitorii. (Citisar Evrei 12:5, 6.)

¹⁰ Te cheras iech ilustrarea: Iech păstorii dichel că iech anda lesche bacrea sili nasfali. Vo jianel că caște sastiarel-la trebul te lel-la andai turma hai te șiol-la ande iech than corcori. Tha le bacrea sile sicade te beșen ande iech than, hai atunci cana sile îngărde dur catar i turma, len ci placial-le cadai buchi. Anda codoia că o păstorii alosarel te cherel cadai buchi, sicavel cadaia anda leste că silo nasul sau aspro? Siguro că na. Vo jianel că o nasfalimos daștil te nachel ca sea i turma dacă mechel i nasfali bacri mașcar le coaver bacrea. Cana șiol de iech partea i bacri nasfali, vo feril sea i turma. (Dich vi o Levitico 13:3, 4.)

11. a) Sar ameal iech manuș excluso iecha bacreaia cai sili nasfali? b) So ajutorii daștin te primin codola excluși?

¹¹ Cana iech slujitorii le Iehovasco silo excluso, vo silo sar iech bacri cai sili nasfali. Tha lesco nasfalimos si spiritualo. (Iac. 5:14) Sa cadea sar si iech nasfalimos fizico, vi cado nasfalimos daștil te lel-pe. Anda codoia, po iechdata, o manuș nasfalo trebul îngărdo dur catar i congregația. O ortomos sicavel i iubirea le Iehovaschi caring lesche slujitori loialo anda leschi turma. Mai but, cadaia daștil te covliarel o ilo codolesco cai păcătuisardea hai daștil te cherel-les te căil-pe. Chichi timpo silo excluso, vo daștil te jial ca le întruniri creștino, cai silo hrănime hai zuriardo spiritualo.  Sa cadea, vo daștil te primil publicații hai te dichel o JW Broadcasting^®. Cana le phure dichen lesco progreso, von daștin po iechdata te den-les sfaturi hai te phenel lesche so trebul te cherel caște avel pale sastevesto spiritualo. Cadea vo va daștila te avel pale iech Martoro le Iehovasco. *

12. Pherde iubirea hai îndurarea, so va cherena le phure de congregație anda varecon cai ci căil-pe?

¹² Si importanto te na bâstras că numai codola cai ci căin-pe sile excludime. Le phure jianen că trebun te gândin-pe zurales mișto angla so te len i decizia te excludin varecas. Von jianen că o Iehova ortosarel „chichi trebul”. (Ier. 30:11) Von iubin penghe phralen hai ci camen te cheren chanci cai daștil te cherel lenghe vroiech buchi nasul po plano spiritualo. Tha po iechdata, i iubirea hai i îndurarea cherel-le te den avri andai congregația anda iech timpo codoles cai păcătuisardea.

13. Sostar trebulas te avel excludime iech creștino anda Corint?

¹³ Te dichas so cărdea o apostolo Pavel cana iech creștino anda Corint ci sicadea căința. Vo trailas la rromneaia lesche dadeschi. So phiraimos lajiavuno! Ande iech cazo sar cado, i Legea dini le Israelosche phenelas: „Iech murș cai siles relații sexualo la rromneaia lesche dadeschi, cherel lajiavestar pesche dades. Le dui te aven mudarde”. (Lev. 20:11) Si ciaces, o Pavel ci manglea te avel mudardo. Cu sea cadala, vo phendea caring le corinteni te den avri andai congregația codole murșes. Lesco phiraimos imoralo cărdea nasul le coaverenghe andai congregația. Chichiva anda lende ci dichenas chanci jiungalo ande lesco phiraimos lajiavuno. (1 Cor. 5:1, 2, 13)

14. Sar sicadea o Pavel îndurarea caring o murș anda Corint cai sas-lo excluso hai sostar? (2 Corinteni 2:5-8, 11)

¹⁴ Pala iech timpo, o Pavel așundea că codo manuș cai sas-lo excluso cărdea bare paruimata. Vo căisardea-pe ciaces. Chiar cana lesco phiraimos cărdea but nasul la congregațiache, o Pavel phendea le phurenghe că ci camelas te avel „prea aspro”. Vo mai phendea: „Te iertisaren-les pherde lașimos hai te den duma șucar leia”. Te dichas sostar phendea o Pavel cadai buchi: „Ca leschi bari duch te na phaghel lesco ilo”. O Pavel simțosardea mila caring cado  manuș cai căisardea-pe. Vo ci camlea ca o manuș te avel cadea de perado, te na mai rodel iertarea. (Citisar 2 Corinteni 2:5-8, 11.)

15. Sar daștin le phure te ortosaren mai zurales hai te sicaven vi îndurarea ande sa codo timpo?

¹⁵ Le phure de congregație len-pe pala o exemplo le Iehovasco hai camen te sicaven îndurarea. Von va ortosarena mai zurales codoles cai păcătuisardea cana trebul, tha va sicavena îndurarea chichi de but daștil-pe. Cana ci cheren cadea, von ci sicaven îndurarea, tha mechen te aven cărde buchia nasul andi congregația. Tha, numai le phure trebun te sicaven îndurarea?

16. Cadea sar sicavel-pe andel Proverbe 21:13, sar phiravel-pe o Iehova codolența cai ci sicaven îndurarea?

¹⁶ Sea le creștini den penghi zor te sicaven îndurarea cadea sar o Iehova. Sostar? Iech motivo si codo că o Iehova ci așunel le manglimata codolenghe cai ci sicaven îndurarea caring aver. (Citisar Proverbe 21:13.) Niciech anda amende ci camas te arăsas ande cadai situația. Anda codoia, trebul te avas atento te na cărdiol ande amende iech ilo barăsco. Ci camas te phiravas-ame nasul ieche phraleia cai silo duchado. Tha, camas te avel-ame o can pâtărdo sea o timpo caște așunel cana „del cingar codo cioro”. Sa cadea, das amari zor te încăras ande amari goghi le cuvintea: „Anda codo cai ci sicavel îndurarea, i judecata va avela bi îndurareaco”. (Iac. 2:13) Cana pherde umilința das amari sama chichi de but trebul amenghe îndurarea, daștil-pe că va camaia vi mai but te sicavas îndurarea. Camas te avas înduratori vi mai but codolența cai aven parpale andi congregația.

17. Sar sicadea o rege David îndurarea?

¹⁷ O exemplo chichiva manușengo andai Biblia daștil te ajutil-ame te sicavas îndurarea hai te na phiravas-ame nasul codolența cai păcatuisarde. Iech anda cadala sas o rege David. Butivar, vo sicadea îndurarea anda sea o ilo. Chiar cana o Saul camlea te mudarel-les, o David sicadea îndurarea caring o machlo le Devlesco hai ci risardea lesche parpale o nasulimos niciechdata. (1 Sam. 24:9-12, 18, 19)

18, 19. Ande so situații ci sicadea o David îndurarea?

¹⁸ Cu sea cadala, o David ci sicadea îndurarea sea o timpo. Sar exemplo, cana o Nabal, iech manuș aspro, dea duma nasul caring leste hai ci camlea te del les hai lesche manușen haben, o David holiardea-pe hai camlea te mudarel le Nabalos hai sea le murșen anda lesco chăr. Tha, anda codoia că i Abigail, i rromni le Nabaloschi iech jiuvli lași hai răbdătorii, cărdea sigo vareso, o David ci șiordea rat bidoșalo. (1 Sam. 25:9-22, 32-35)

¹⁹ Aver data, o profeto Natan, dea duma le Davidoia anda iech manuș barvalo cai lea ieche manușestar cioro, i bacriorri saviate încărelas but. O David holiardea-pe zurales hai phendea: „Jiuvindo si o Iehova  că o manuș cai cărdea cadaia meritil te merel!”. (2 Sam. 12:1-6) O David jianelas că, pala i Legea mozaico, iech manuș cai ciorelas iech bacri trebulas te del parpale ștar bacrea ando than codolaco cai ciordea-la. (Ex. 22:1) Tha i condamnarea co merimos sas iech sentința but prea bari. O Natan ci dea duma anda iech buchi cai întâmplosardea-pe ciaces, tha, prin iech paramici, andea angla o David le buchia but mai nasul cai cărdea-le vo. Tha o Iehova sicadea iech îndurarea but mai bari caring o David sar o David caring o cior andai ilustrarea cai phendea-la o Natan. (2 Sam. 12:7-13)

20. So sichioas catar o David?

²⁰ Astardo holiatar, o David lea i hotârărea că o Nabal hai sea le murșa anda lesco chăr trebunas te meren. Hai pala codoia, o David phendea că o manuș andai ilustrarea cai phendea-la o Natan trebulas te merel. Daștil-pe că pușias-ame sostar andi duito situația iech manuș pherdo lașimos sar o David cărdea iech judecata cadea de phari? Te gândisaras-ame cana phendea o David cadal cuvintea. Les sas-les iech conștiința pherdi. Iech spirito aspro cai judechil sea o timpo ci sicavel iech lași spiritualitatea. Mai but, o Isus phendea pesche continuatorenghe: „Na mai judechin caște na aven judechime, că i judecata saveia judechin va avena judechime”. (Mat. 7:1, 2) Te avas sea o timpo atenți te na phivaravas-ame aspro, amare phralența, tha te avas ‘barvale andi îndurarea’, cadea sar amaro Del.

21, 22. Sar daisaras te sicavas îndurarea prin le buchia cai cheras-le anda aver?

²¹ I îndurarea na-i numai iech sentimento. Anda i îndurarea sas phendo că si „mila cai sili sicadi prin le buchia cai cheras-le”. Savore trebul te las sama pe le necesități codolenghe anda amari familia, anda amari congregația hai anda o than cai beșas. Si but buchia prin save daisaras te sicavas îndurarea. Trebul varecon zuriardo? Daisaras te îngăras varecasche haben sau te cheras aver buchi cai sicavel lașimos? Daisaras te beșas ande iech than hai te zuriaras ieche creștinos cai avel parpale andi congregația? Das amari zor te das duma averența anda o mesajo pherdo speranța la Bibliaco? Cadaia si iech anda le mai lașe moduri prin save daisaras te sicavas îndurarea caring savore. (Iov 29:12, 13; Rom. 10:14, 15; Iac. 1:27)

²² Dacă das amari sama so trebul averen, va avela te arachas but ocazii te sicavas îndurarea. Chichi de but bucuril-pe amaro Dad cerisco, cai silo „barvalo andi îndurarea”, cana las-ame pala lesco exemplo!