1. Sostar but manușa ci jianen so te pachian?

AGHIES si mai but mii religii cai phenen că sile creștino hai că lenghi închinarea sili aprobime le Devlestar. Anda codoia daisaras te ajucăras-ame ca but manușa te na jianen so te pachian. Von daștinas te pușen-pe: „Si iech corcori religia ciaci sau sea le religii sile aprobime le Devlestar?”. Tha so daștil te phenel-pe anda amende? Pachias zurales că le Martoren le Iehovasche silen o ciacimos hai că o modo sar anen von închinarea silo aprobime le Iehovastar? Daisaras te pachias cadai buchi? Te dichas le dovezi.

2. Sostar pachiaia zurales o Pavel că sas-les o ciacimos? (1 Tesaloniceni 1:5)

² O apostolo Pavel pachiaia zurales că sas-les o ciacimos. Cado pachiamos ci bazolas-pe pe sentimentea. (Citisar 1 Tesaloniceni 1:5.) Vo rodea te zuriarel pesco pachiamos anda o Cuvânto le Devlesco hai pachialas zurales că „sea i Scriptura sili inspirime le Devlestar”. (2 Tim. 3:16) So arăzlea te pachial vo pala le cercetări cai cărdea-le? Andel Scripturi, o Pavel arachlea dovezi cai sicavenas ciaces că o Isus sas o promiso Mesia, dovezi cai le conducători religioși iudei jianenas-le tha nachle părdal lende. Pherde ipocrizia, von phenenas că cheren i voința le Devleschi, tha lengo phiraimos ci sicavelas cadai buchi. (Tit 1:16) Na cadea sar von, o Pavel ci alosardea te pachial numai chichiva sicaimata anda o Cuvânto le Devlesco hai te na camel te așunel le coaver. Vo sas gata te sicavel hai te aplichil „sea i voința le Devleschi”. (Fap. 20:27)

3. Trebul te jianas o răspunso ca sea le pușimata caște pachias zurales că si amen o ciacimos? (Dich vi o chenarii: „ Le buchia hai le gânduri le Iehovasche, sile «prea but te aven phende»”.)

³ Chichiva pachian că i religia ciaci trebul te daștil te del  o răspunso ca orisavo pușimos, chiar vi ca le pușimata savende i Biblia ci del o răspunso. Si cado iech ajucărimos ciacio? Ando iechto secolo, o Pavel zuriardea pesche phralen ‘te roden mișto sea le buchia’, tha dea peschi sama că ci hachiarelas sea. (1 Tes. 5:21) O Pavel phendea: „Si amen iech prinjianimos pe dipaș”. Hai mai phendea: „Ci dichas cadea de mișto sar ande iech oglinda anda sastr”. (1 Cor. 13:9, 12) O Pavel ci hachiarelas sea, hai nici amen. Cu sea cadala, vo hachiardea ande bareste o scopo le Devlesco. Les arăsălas-les chichi jianelas caște daștil te pachial zurales că sas-les o ciacimos!

4. Sar daisaras te zuriaras amaro pachiamos că arachleam o ciacimos hai so buchia va avela te dichas anda le ciace creștini?

⁴ Iech modo prin savo daisaras te zuriaras amaro pachiamos că arachleam o ciacimos si te las-ame pala o modelo cai mechlea-les o Isus ande soste priveal i închinarea hai o modo ande savo anen închininarea le Martori le Iehovasche de aghies. Mai dur, va avela te dichas că le ciaces creștini: 1) ci cheren idolatria, 2) sicaven pachiv caring o anav le Iehovasco, 3) iubin o ciacimos hai 4) silen iech iubirea ciaci iech caring aver.

5. So sichioas catar o Isus anda o felo sar te anas închinarea le Devlesche hai sar daisaras te cheras so sicadea-ame vo?

⁵ Anda codoia că iubisardea zurales le Iehovas, o Isus andea închinarea numai lesche cadichi ando cerii, hai vi pi phuv. (Luca 4:8) Vi pesche discipolen sicadea-le te închinin-pe numai le Iehovasche. Nici vo, nici lesche discipoli, ci folosisarde vroiechdata imagini andi închinarea. Anda codoia că o Del silo Spirito,  niciech buchi cărdi le vastendar le manușenghe ci daștil te sicavel i gloria le Iehovaschi. (Is. 46:5) Tha si mișto te cheras amenghe imagini anda chichiva cadea numime sfinți hai te rughisaras-ame lende? Andi duito anda le deș porunci, o Iehova phendea: „Te na cheres tuche Devla andal cașta hai anda aver vareso sau iech chipo anda iech buchi cai si opre, ando cerii, sau tele pi phuv . . . Te na des cianga angla lende”. (Ex. 20:4, 5) Anda codola cai camen te anen închinarea le Devlesche, cadea sar camel vo, cadal cuvintea sile zurales claro.

6. Pala so modelo len-pe le Martori le Iehovasche ande soste priveal i închinarea?

⁶ I istoria laico phenel că le iechto creștini anenas închinarea numai le Devlesche. Sar exemplo, iech lucrarea istorico phenel că le iechto creștini „dichenas zurales jiungalo” chiar vi numai o gândo te aven-le imagini ande lenghe thana cai anenas închinarea. (History of the Christian Church) Aghies, le Martori le Iehovasche len-pe pala o exemplo mechlo catar le creștini anda o iechto secolo. Amen ci rughisaras-ame ca le imagini anda chichiva cadea numime sfinți sau îngeri hai nici chiar le Isusosche. Sa cadea, ci anas închinarea ca le simboluri naționalo. Oriso va avela, sam hotărâme te respectisaras le cuvintea le Isusosche: „Le Iehovasche, che Devlesche te închinis-tu”. (Mat. 4:10)

7. Save si le buchia cai sicaven că le Martori le Iehovasche sile diferime catar aver religii?

⁷ Aghies but manușa len-pe pala le conducători religioși cai von pachian că sile lașe. Von dichen-le cadea de cuci că arăsăn te cheren idolatria anda lende. Pheren lenghe cangherea, chinen lenghe lila, den lenghe love caște ajutin-le ande le buchia cai cheren-le. Fiesavi buchi cai cadal conducători phenen-la anda cadala si legea. Daștil-pe că von ci avenas cadea de bucurime nici dacă avelas o Isus pi phuv. Tha le închinătoren ciace ci silen clase rașaienghe. Vi cana respectisaras codolen cai si angla amende, amen las-ame pala le cuvintea cai o Isus phendea-le amenghe claro: „Tumen savore san phrala”. (Mat. 23:8-10) Amen ci cheras idolatria andal manușa – conducători religioși sau politici – hai nici ci ajutisaras-le andel buchia cai von cheren-le. Mai but, amen ci hamisaras-ame ande so cheren von hai așias dur catar i lumea. Cadea amen sam diferime catar but religii cai pachian că sile creștino. (Ioan 18:36)

8. Cathar jianas că o Iehova camel ca lesco anav te avel glorifichime hai prinjiando catar le saste manușa?

⁸ Ande iech ocazia, o Isus rughisardea-pe: „Dade, glorifichisar chio anav!”. Chiar o Iehova dea răspunso ca o glaso sar de tunet hai promitisardea că va avela te glorifichil pesco anav. (Ioan 12:28) Ande lesco servicio pi phuv, o Isus glorifichisardea o anav le Iehovasco. (Ioan 17:26) Cadea că, si normalo ca le creștini ciace te den-pe bare cana folosisaren o anav le Iehovasco hai te phenen-les vi averenghe.

9. Sar sicade le creștini anda o iechto secolo că dine pachiv le anaves le Devlesco?

⁹ Ando iechto secolo, țâra timpoia pala so cărdea-pe i congregația creștino, o Iehova, „ortosardea pesco dichimos caring le națiuni caște încalavel anda lende iech poporo anda pesco anav”. (Fap. 15:14) Le creștini anda o iechto secolo pachianas că sas iech bari pachiv te folosisaren o anav le Devlesco hai denas duma vi averența  anda leste. Von dine le anaves le Devlesco iech than importanto hai folosisarde-les cadichi andi predicarea hai vi ande lenghe scrieri. * Von sicade că sile ‘iech poporo anda o anav le Devlesco’. (Fap. 2:14, 21)

10. So sicavel amenghe că le Martori le Iehovasche sile iech poporo anda lesco anav?

¹⁰ Sile le Martori le Iehovasche iech poporo anda lesco anav? Te dichas le dovezi. Aghies, but conducători religioși cărde sea so daisarde caște garaven că le Devles siles iech anav. Von încalade-les anda lenghe traduceri hai, ande chichiva cazuri, ci mechle ca vo te avel folosime ande lenghe changherea. * Con daștilas te na phenel că le Martori le Iehovasche sile le corcore cai sicaven o respecto hai i pachiv cai trebul caring o anav le Iehovasco? Nici iech aver grupo religioso ci del cadea de but peschi zor caște del duma chichi mai bute manușența anda o anav le Devlesco. Cadea că amen cheras sea so daisaras caște traisaras pala o anav cai phiravas-les, codo te avas Martori le Iehovasche. (Is. 43:10-12) Sa cadea, cărdeam mai but sar 240 milioanea exemplarea anda i Biblia – Traducerea lumii noi, cai folosil o anav le Devlesco andel thana ande save aver traducători la  Bibliache ci șiute-les. Mai but, amare publicații biblico tipărime ande mai but sar 1 000 șiba, folosisaren o anav le Devlesco.

11. Sar sicade le creștini anda o iechto secolo că iubisaren o ciacimos?

¹¹ O Isus iubisardea o ciacimos, adică o ciacimos anda o Iehova hai anda Lesche scopuri. Vo traisardea cu sea pala cado ciacimos hai sicadea-les vi averenghe. (Ioan 18:37) Vi le continuatori le Isusosche iubisarde zurales but o ciacimos. (Ioan 4:23, 24) O apostolo Petru chiar numisardea o creștinismo „o drom le ciacimasco”. (2 Pet. 2:2) Anda codoia că sas-len iech iubirea zurali anda o ciacimos, le iechto creștini ci camle te așunen le idei hai le tradiții religioso neciace, sar avelas le buchia cai pachianas-le le manușa hai cai ci sas-le pala o ciacimos. (Col. 2:8) Sa cadea, le creștini ciace de aghies ‘phiren mai dur ando ciacimos’ hai lengo phiraimos hai le buchia ande save pachian sile bazome po Cuvânto le Iehovasco. (3 Ioan 3, 4)

12. So cherel o Corpo de Guvernare cana del peschi sama că trebul iech nevo hachiarimos ande soste priveal iech sicaimos hai sostar?

¹² Le slujitori le Devlesche de aghies ci pachian că silen o hachiarimos perfecto sau completo le ciacimasco. Po iechdata, von cărde greșeli ando hachiarimos sau organizatorico. Tha, i Biblia sicavel claro că o prinjianimos exacto bariol cadea sar nachel o timpo. (Col. 1:9, 10) O Iehova sicavel pesco ciacimos țâra po țâra hai amen trebul te ajucăras pherde răbdarea ca i lumina spiritualo te cărdiol mai strălucitorii. (Prov. 4:18) Cana o Corpo de Guvernare del peschi sama că iech anumime ciacimos trebul hachiardo ande iech modo diferime, cado ci încărel-pe parpale te cherel le paruimata cai trebun. But religii cadea phende creștino cheren chichiva paruimata caște aven cuci anda le manușa cai pachian-pe ande lende hai te încăren o paso cadala lumeaia. Na sar von, le paruimata cai cherel-le i organizația le Devleschi sile cărde te ajutin-ame te pașioas le Devlestar hai te las-ame chichi mai but pala o exemplo mechlo le Isusostar ande soste priveal i închinarea. (Iac. 4:4) Amen ci cheras paruimata anda codoia că le manușa andai lumea parude o modo sar hachiaren le buchia sau pala le ajucărimata le manușenghe, tha anda codoia că hachiaras mai mișto i Biblia. Amen iubisaras o ciacimos! (1 Tes. 2:3, 4)

13. Savi si i mai bari calitatea le ciace creștinenghi hai sar sicaven-la le Martori le Iehovasche?

¹³ I mai bari calitatea le creștinenghi anda o iechto secolo sas i iubirea. O Isus phendea: „Prin cadaia va jianena sea că san mânre discipoli: cana si iubirea mașcar tumende”. (Ioan 13:34, 35) Aghies, mașcar le Martori le Iehovasche anda sea i lumea si iech bari iubirea hai iech phanglimos chidino. Na cadea sar sea le coaver organizații, amen nachleam părdal le bariere naționalo, rasialo, hai socialo. I iubirea ciaci mașcar amende dichiol-pe ca amare întruniri hai amare congresea. Sea cadal dovezi zuriaren amaro pachiamos că o modo ande savo anas închinarea si aprobime le Iehovastar.

14. Cadea sar phenel-pe ando Coloseni 3:12-14, sar daisaras te sicavas iech iubirea zurales bari iech caring aver?

¹⁴ I Biblia phenel amenghe te avel-ame „iech iubirea zurales bari iech caring  aver”. (1 Pet. 4:8) Iech modo prin savo daisaras te sicavas amari iubirea si codo te iertisaras amare phralen hai te nachas părdal lenghe imperfecțiuni. Sa cadea, folosisaras-ame orisavea ocaziatar caște avas generoși hai ospitalieri savorența andai congregația, chiar vi codolența cai holiardea-ame. (Citisar Coloseni 3:12-14.) O phanglimos la iubireaco cai si mașcar amende sicavel că sam le ciace creștini.

15. Ande so aver moduri las-ame pala o exemplo mechlo catar le creștini anda o iechto secolo ande soste priveal i închinarea?

¹⁵ Amen las-ame pala o exemplo mechlo catar le creștini anda o iechto secolo vi ande aver buchia. Sar exemplo, o modo sar si cărdi amari organizația ameal codolaia cărdi catar le apostoli ando iechto secolo. Vi aghies si supraveghetori itineranți, phure de congregație hai slujitori auxiliari. (Filip. 1:1; Tit 1:5) Cadea sar cadal creștini, amen respectisaras le legi le Iehovasche ande soste priveal i sexualitatea hai i căsătoria, i sfințenia le rateschi hai i excluderea codolenghi cai ci căin-pe. (Fap. 15:28, 29; 1 Cor. 5:11-13; 6:9, 10; Evr. 13:4)

16. So phenen amenghe le cuvintea anda Efeseni 4:4-6?

¹⁶ O Isus phendea că na savore cai phenen că sile lesche discipoli va lena-pe pala leste ciaces. (Mat. 7:21-23) Sa cadea, i Biblia phendea de mai anglal că, andel ghiesa de palal, but manușa va fala-pe „că sile pachiamos ando Del”. (2 Tim. 3:1, 5) Tha, i Biblia phenel claro că „iech corcoro pachiamos”, sau religia, sili aprobime le Devlestar. (Citisar Efeseni 4:4-6.)

17. Con sile codola cai len-pe pala o Cristos aghies hai silen i religia ciaci?

¹⁷ Con si codola cai silen aghies i religia ciaci? Pala soste dichleam o modelo anda i închinarea mechlo catar o Isus hai încărdo catar le dintune creștini, daisaras te phenas bi te încăras-ame parpale că cadala sile le Martori le Iehovasche. So privilegio zurales baro si amen te cheras partea anda o poporo le Devlesco hai te prinjianas o ciacimos anda o Iehova hai anda lesche scopuri! Cadea că, te zuriaras vi mai dur amaro pachiamos că si amen o ciacimos hai te încăras zurales leste!