1. So cheren but manușa cana așunen o goghiaverimos andai Biblia? (Proverbele 1:20, 21)

 ANDE but thema, pe le droma cai si but manușa, butivar daștin te aven dichle le vestitori le Regatosche cai sile bucurime te den publicații codolenghe cai nachen othar. Lean vi tu partea ca cadai forma de predicare? Dacă da, daștil-pe că avel ande chi goghi i scena anda savi del-pe duma ando lil Proverbe, ande savi o goghiaverimos del cingar po drom hai acharel le manușen te așunen lesche sfaturi. (Citisar Proverbele 1:20, 21.) Andi Biblia hai ande amare publicații si „o ciacio goghiaverimos” – o goghiaverimos le Iehovasco. Cado goghiaverimos si exacto so trebul le manușen caște daștin te astaren te phiren vi von po drom cai îngărel ca i viața veșnico. Anda codoia, amaro ilo pherel-pe bucuriatar cana varecon lel iech anda amare publicații, tha na savore manușa camen cado goghiaverimos. Chichiva anda lende alosaren te na pachian so phenel i Biblia, aver asan amendar, anda codoia că pachian că i Biblia si iech lil purano. Hai aver prasan le norme moralo andai Biblia hai phenen că codola cai încăren-le pachian anda pende că sile mai orta hai den-pe mai bare sar aver. Cu sea cadala, pherdo iubirea, o Iehova acharel mai dur savore manușen te așunen o ciacio goghiaverimos. Sar?

2. Cai arachas o ciacio goghiaverimos, tha so alosaren le mai but manușa te cheren?

² Iech modo prin savo o Iehova cherel ca o ciacio goghiaverimos te așunel-pe si prin lesco Cuvânto, i Biblia. Aghies, cam fiesavo manuș daștil te arăsăl cadale lileste. Sa cadea, prin i binecuvântarea le Iehovaschi, amare publicații bazome pi Biblila sile disponibilo ande mai but sar 1 000 șiba. Codola cai așunen o goghiaverimos, adică citin hai cheren so sichion, arăsăn te aven-le  but miștimata. Cu sea cadala, le mai but manușa alosaren te na așunen o ciacio goghiaverimos. Cana trebun te alosaren so te cheren, așunen mai mișto pala pengo ilo sau len-pe pala le sfaturi avere manușenghe. Chichiva anda lende chiar prasan-ame anda codoia că încăras le norme la Bibliache. Ande cado articolo, va avela te dichas sostar chichiva manușa phiraven-pe cadea. Tha, mai anglal, va avela te dichas sar daștil te avel-ame o goghiaverimos catar o Iehova.

3. So însemnol o ciacio goghiaverimos?

³ O goghiaverimos daștil te însemnol te folosisaras amaro prinjianimos caște las lașe decizii. Cu sea cadala, o ciacio goghiaverimos însemnol mai but. I Biblia phenel: „I dar le Iehovastar si o începuto le goghiaverimasco hai o prinjianimos Codolesco Preasfânto si hachiarimos”. (Prov. 9:10) Cadea că, cana trebul te las iech bari decizia, trebul te las-ame pala „o prinjianimos Codolesco Preasfânto”, adică te rodas te dichas so pachial o Iehova anda codoi buchi. Daisaras te cheras cadaia cana studiisaras i Biblia hai amare publicații biblico. Cadea, sicavas că sam ciaces goghiaver. (Prov. 2:5-7)

4. Sostar si o Iehova o corcoro cai daștil te del-ame ciacio goghiaverimos?

⁴ O Iehova si o corcoro cai daștil te del-ame ciacio goghiaverimos. (Rom. 16:27) Sostar daisaras te phenas cadaia? Iech: anda codoia că vo si o Creatorii hai prinjianel sea-l buchia anda leschi creația. (Ps. 104:24) Dui: sea so cherel vo sicavel goghiaverimos. (Rom. 11:33) Hai trin: lesche sfaturi goghiaver anen miștimata sea o timpo codolenghe cai len-pe pala lende. (Prov. 2:10-12) Caște avel amen iech ciacio goghiaverimos, trebul te hachiaras cadal ciacimata de bază hai te mechas-le te cheren buchi ca amare decizii hai phiraimos.

5. So întâmplol-pe cana le manușa ci pachian că o ciacio goghiaverimos avel catar o Iehova?

⁵ But manușa savența das duma andi predicarea phenen că le buchia cai dichen-le pașa pende andi natura sile zurales șucar cărde. Tha von phenen că ci sas-le cărde le Devlestar, tha avile prin evoluția. Aver jene phenen că pachian ando Del, tha von pachian că le norme la Bibliache sile purane hai alosaren te train penghi viața cadea sar camen von. Tha save si le rezultatea? Si i lumea iech than mai lașio anda codoia că le manușa bazon-pe pe pengo goghiaverimos hai na po goghiaverimos le Devlesco? Arachle von i ciaci fericirea hai silen iech speranța zurali ando viitorii? So dichas aghies pașa amende cherel-ame te pachias o ciacimos cai avel: „Ci si nici goghiaverimos, nici discernământo hai nici sfato cai te așel contra le Iehovasche.” (Prov. 21:30) Cadaia cherel-ame te mangas le Iehovastar vi mai dur te del-ame ciacio goghiaverimos. Tha le mai but manușa ci roden o ciacio goghiaverimos. Sostar?

6. Cadea sar sicavel-pe andel Proverbe 1:22-25, con sile codola cai phandaven penghe cana cana așunen o ciacio goghiaverimos?

⁶ But manușa phandaven penghe cana cana „o ciacio goghiaverimos” del cingar po drom. I Biblia phenel că si trin grupuri manușenghe sar cadala: codola „bi prinjianimasco”, ‘codola cai prasan’ hai le „manușa bi goghiaco”. (Citisar Proverbele 1:22-25.) Mai dur, va avela te dichas mai mișto le trăsături cadale manușenghe cai ci camen te așunen o goghiaverimos cai avel catar o Del hai va avela te hachiaras so daisaras te cheras caște na avas cadea sar von.

7. Sostar alosaren chichiva manușa te așen „bi prinjianimasco”?

⁷ Codola „bi prinjianimasco” si le manușa cai pachian oriso așunen sau mechen-pe sigo athade averendar. (Prov. 14:15, n.s.) Butivar  arachas cadale manușen andi lucrarea de predicare. Te gândisaras-ame, sar exemplo, ca le milioanea manușa cai sile athade catar le conducători politici sau religioși. Chichiva, cana den penghi sama că sas-le hohade catar cadal conducători, ci avel lenghe te pachian. Tha codola anda save del-pe duma andel Proverbe 1:22 alosaren te așen bi prinjianimasco hai len placial-len te aven cadea. (Ier. 5:31) Von train penghi viața cadea sar camen von hai ci camen te jianen so phenel i Biblia caște na aven arachle doșale că ci încăren lache norme. But manușa pachian cadea sar iech jiuvli zurales religioso anda Quebec (Canada). Voi phendea ieche Martoresche: „Dacă amaro rașai athavel-ame, si leschi doș, na amari!”. Si claro că amen ci camas te las-ame pala codola cai camen te așen bi prinjianimasco hai ci așunen o ciacio goghiaverimos! (Prov. 1:32; 27:12)

8. So va ajutila-ame te avas manușa cai silen o prinjianimos anda savo del duma i Biblia?

⁸ I Biblia zuriarel-ame te na așias manușa bi prinjianimasco, tha te arăsas ‘manușa bare ande amaro hachiarimos’. (1 Cor. 14:20) Bariaras amaro goghiaverimos cana cheras ande amari viața cadea sar sichileam andal principii la Bibliache. Țâra po țâra, va avela te dichas sar ajutin-ame cadal principii te na cheras amenghe pharimata hai te las decizii goghiaver. Si zurales importanto te dichas mai butivar chichi de mișto cărdeam cadaia. Sar exemplo, dacă studiisares i Biblia de iech timpo hai jias ca le întruniri, daștis te pușes-tu so așavel-tu te des chi viața le Iehovasche hai te boles-tu. Dacă san boldo, daștis te des chi zor te predichis hai te sicaves i vestea lași mai mișto? Sicaven le buchia cai alosares te cheres-le că meches-tu îngărdo catar le principii biblico? Phiraves-tu șucar averența hai sicaves calități creștino caring lende? Dacă dichas că trebul te cheras chichiva paruimata, te gândisaras-ame ca le buchia cai o Iehova camel te anas-le amenghe amintea hai cai „cheren goghiaver codoles cai nai-les prinjianimos”. (Ps. 19:7)

9. Sar sicaven ‘codola cai prasan’ că ci camen o goghiaverimos cai avel catar o Del?

⁹ O duito grupo manușengo cai ci camen te așunen o goghiaverimos cai avel catar o Del si ‘codola cai prasan’. Poiechdata, arachas cadale manușen andi lucrarea de predicare. Len placial-len te asan averendar. (Ps. 123:4) I Biblia phenel că, andel ghiesa de palal, avenas te aven but manușa cai prasan. (2 Pet. 3:3, 4) Cadea sar le jamutre le Lotosche, chichiva manușa de aghies ci așunen le avertismentea cai aven catar o Del. (Gen. 19:14) But jene asan codolendar cai încăren le principii andai Biblia anda codoia că von ‘phiren pala lenghe camnimata anda buchia bi pachivale’. (Iuda 7, 17, 18) So phenel i Biblia anda cadal manușa cai prasan, potrivin-pe mișto ca le apostați hai avere manușende cai ci camen le Iehovas.

10. Cadea sar phenel-pe ando Psalmo 1:1, so trebul te cheras caște na avas sar codola cai prasan?

¹⁰ So trebul te cheras caște na arăsas cadea sar cadala cai prasan? Iech modo si te na așas pașa codola cai rovaren-pe sea o timpo anda oriso. (Citisar Psalmo 1:1.) Cadaia însemnol te na așunas hai nici te na citisaras chanci catar le apostați. Amen jianas mișto că, dacă ci sam atento, daisaras ușoro te rovaras-ame vi amen hai te astaren te aven-ame îndoieli anda o Iehova hai le îndrumări cai primisaras-le catar leschi organizația. Caște na arăsas ande cadai situația, daisaras te pușias-ame: „Si man o obiceio te phenav vareso nasul cana primisaras îndrumări neve sau aven paruimata ando hachiarimos? Rodav te dichav sea o timpo iech doș andel phrala cai sile angla amende?”. Cana cheras sigo paruimata hai ci mai cheras cadal buchia, o ilo le Iehovasco bariol. (Prov. 3:34, 35)

11. Sar dichen codola „bi goghiaco” le norme moralo le Iehovasche?

 ¹¹ O trinto grupo manușengo cai ci camen o goghiaverimos si codola „bi goghiaco”. Anda lende phenel-pe că sile bi goghiaco anda codoia că ci camen te încăren le norme moralo le Devlesche hai roden mai mișto te train cadea sar pachian von că si mișto. (Prov. 12:15) Cadal manușa ci camen le Iehovas, Codo castar avel o goghiaverimos. (Ps. 53:1) Cana arachas-le andi lucrarea de predicare, butivar von prasan-ame anda codoia că amen încăras le norme la Bibliache. Tha von ci daștin te den-ame iech sfato mai lașio. I Biblia phenel: „O ciacio goghiaverimos ci daștil te arăsăl codoleste dilo; les ci siles chanci te phenel co udar le forosco”. (Prov. 24:7) So phenen codola bi goghiaco ci sicavel ciacio goghiaverimos. Cadea că, hachiaras sostar zuriarel-ame o Iehova ‘te așias dur catar o manuș cai nai-les goghi’. (Prov. 14:7)

12. So trebul te cheras caște na avas sar codola bi goghiaco?

¹² Amen ci sam sar codola cai urân le sfaturi cai aven catar o Del. Mai but, amen sichioas te iubisaras o modo sar gândil o Del hai iubisaras vi sea lesche legi moralo. Cadai iubirea bariol sea mai but cana dichas so miștimata si amen cana încăras cadal norme hai so întâmplol-pe cana ci încărel-pe conto lendar. Das amari sama so but pharimata cheren penghe le manușa anda codoia că sile bi goghiaco hai ci camen le sfaturi goghiaver le Iehovasche. Pala codoia, te gândisaras-ame că amari viața si but mai lași hai șucar anda codoia că așunas le Devlestar. (Ps. 32:8, 10)

13. Oblighil amen o Iehova te încăras lesche sfaturi goghiaver?

¹³ O Iehova camel te del pesco goghiaverimos savorenghe, tha ci oblighil chanicas te lel-les. Cu sea cadala, vo phenel so întâmplol-pe codolența cai alosaren te na așunen catar lesco goghiaverimos: „Cadala va trebuna te suportin sea so va avela pala lengo phiraimos”. (Prov. 1:29-32) Ando timpo, lengo modo viațaco va anela lenghe na numai pharimata hai duch, tha, ji la jurmă, cadaia va anela lenghe vi i distrugerea. Tha codola cai așunen catar le sfaturi goghiaver le Iehovasche hai cheren so phenel-pe ande lende va dichena sar va pherela-pe i promisiunea: „Con așunel mandar va beșela andi siguranța hai ci va darala catar niciech nasulimos”. (Prov. 1:33)

14, 15. So sichioas amen anda le Proverbe 4:23?

¹⁴ Cana încăras le sfaturi goghiaver le Devlesche, de fiesavi data si amen miștimata. Cadea sar dichleam mai anglal, cadal sfaturi daștin te aven arachle ușoro. Sar exemplo, ando lil Proverbe, o Iehova del-ame sfaturi cai sile lașe sea o timpo hai cai cheren amari viața mai șucar. Te dichas ștar exemplea.

¹⁵ Le sama pe chio ilo figurativo. I Biblia phenel: „Le sama pe chio ilo mai but sar oriso, că anda leste înclen le izvoarea la viațache”. (Prov. 4:23) Te gândisaras-ame so trebul te  cheras ca amaro ilo masesco te avel sastevesto. Trebul te has haben sastevesto, te cheras sporto hai te na aven-ame obiceiuri nelașe. Caște ferisaras amaro ilo figurativo, trebul te cheras vareso sar cadaia. Amen trebul te has ande fiesavo ghies anda o Cuvânto le Devlesco, te pregătisaras-ame andal întruniri, te jias lende hai vi te das răspunsuri. Încăras-ame activi spiritualo cana predichisaras ande fiesavo curco. Hai caște na aven-ame obiceiuri nelașe, așias dur catar orisavi buchi cai daștilas te athavel amari goghi, sar avenas le divertismentea imoralo hai le amalimata nasul.

16. Sostar si o sfato anda Proverbe 23:4, 5 cadea de lașio vi aghies?

¹⁶ Av mulțumime soia si tut. I Biblila del cado sfato: „Na chiniar-tu te nașes pala barvalimata. . . . Cana diches caring lende, von ci mai sile, că siguro von cheren penghe phaca sar i acvila hai jian opre caring o cerii”. (Prov. 23:4, 5) Le barvalimata ci sas-le cărde te încăren. Le manușa daștin te hasaren zurales sigo penghe love hai sea so silen. Cu sea cadala, vi le barvale, hai vi le ciore manușa de aghies den sea penghi zor te cheren love. Cadaia cherel-le butivar te phiraven-pe ande iech modo cai rimosarel lengo lașio anav, lenghe amalimata averența hai chiar vi lengo sastimos. (Prov. 28:20; 1 Tim. 6:9, 10) Tha o goghiaverimos ajutil-ame te na gândisaras-ame prea but ca le love. Dacă dichas-len cadea, cadaia va ferila-ame te na arăsas te avas hașvale, hai ajutil-ame te avas mulțumime hai fericime soia si amen. (Ecl. 7:12)

17. Sar daștil te avel vi amen „i șib codolenghi goghiaver”? (Proverbele 12:18)

¹⁷ Gândisar angla so te des duma. Dacă ci las sama sar das duma, daisaras te cheras but nasulimos prin so phenas. I Biblia phenel: „Cana varecon del duma bi te gândil, si sar cana pusavel-tu iech sabia, tha i șib codolenghe goghiaver si sastiarimos”. (Prov. 12:18) Amen daisaras te hachiaras-ame mișto averența cana ci das duma nasul pala lengo dumo anda lenghe greșeli. (Prov. 20:19) Dacă camas ca so phenas te sastiarel averen ando than te duchavel-le, trebul te pheras amaro ilo le prinjianimaia anda o Cuvânto le Devlesco. (Luca 6:45) Cana gândisaras-ame ca so phenel i Biblia, amare dumes va avena iech ‘haing goghiaverimasco’ cai zuriarel le coaveren. (Prov. 18:4)

18. Sar ajutil-ame o principio anda Proverbe 24:6 te avel-ame succeso andi lucrarea de predicare?

 ¹⁸ Le tut pala le îndrumări cai si tuche dine catar i organizația. I Biblia del cado lașio sfato: „Pala iech îndrumarea goghiaver va avela te îngăres chio războio hai prin but sfătuitori avel o succeso”. (Prov. 24:6, n.s.) Te dichas sar ajutil-ame cado principio te cheras mișto amari buchi andai predicarea hai sicaimos. Ando than te cheras cadai buchi cadea sar pachias amen că si mișto, amen das amari zor te încăras conto catar le îndrumări cai si amenghe dine. Ca le întruniri creștino, primisaras „iech îndrumarea goghiaver” catar but ‘sfătuitori’ – phrala hai pheia cai silen experiența, cai încăren teme hai demonstrații bazome pi Biblia. Mai but, i organizația le Iehovaschi del-ame lașe instrumentea – publicații hai materialea video – , cai ajutin le manușen te hachiaren i Biblia. Sichios vi tu te folosisares chichi mai mișto cadal instrumentea?

19. Sar diches o goghiaverimos cai avel catar o Iehova? (Proverbele 3:13-18)

¹⁹ Citisar Proverbele 3:13-18. Sam zurales recunoscători anda codoia că o Iehova dea-ame but lașe sfaturi ande pesco Cuvânto. Cai avileamas bi lengo? Ande cado articolo, dichleam chichiva sfaturi lașe anda o lil Proverbe. Si ciaces, sea i Biblia sili pherdi le goghiaverimaia le Iehovasco. Te das amari zor ca, sea o timpo, te phiravas-ame pala o goghiaverimos cai del-les amenghe o Iehova! Amen ci interesil-ame sar dichel i lumea o goghiaverimos cai avel catar o Del. Amen daisaras te pachias zurales că „codola cai astaren-pe zurales catar o goghiaverimos va phenela-pe lenghe că sile fericime”.