1. So speranța dea-ame o Iehova?

 O IEHOVA dea-ame i șucar speranța anda iech viața veșnico. Chichiva jene sperin te train ando cerii, sar creaturi spiritualo cai ci mai daștin te meren. (1 Cor. 15:50, 53) Tha le mai but jene sperin te train veșnico pi phuv, fericime hai perfecto sasteveste. (Rev. 21:3, 4) Oriso avelas te ajucăras, i viața veșnico ando cerii sau pi phuv, amari speranța si zurales cuci anda amende.

2. So si i speranța?

² Andi Biblia, o cuvânto „speranța” daștil te însemnol „te ajucăras te pherel-pe iech buchi lași”. Amari speranța si ciaci anda codoia că avel catar o Iehova. (Rom. 15:13) Amen jianas so promisiuni cărdea amenghe vo hai jianas vi că vo încărel sea o timpo pesco cuvânto. (Num. 23:19) Daisaras te pachias ciaces că o Iehova camel hai siles vi o zuralimos te pherel sea so phendea că va cherela. Cadea că, amari speranța ci si iech paramici anda amaro șăro, voi si ciaci hai avel anda so pachias.

3. So va dichaia ande cado articolo? (Psalmo 27:14)

³ Amaro Dad andal ceruri iubil-ame hai camel ca amen te pachias-ame ande leste. (Citisar Psalmo 27:14.) Cana amari speranța ando Iehova sili zurali, daisaras te nachas părdal le zumaimata pherde bucuria hai tromai. Mai dur, va avela te dichas sar si i speranța sar iech ancora hai iech coifo. Pala codoia va avela te dichas sar daisaras te zuriaras amari speranța.

4. Sar si i speranța sar iech ancora? (Evrei 6:19)

⁴ Ande pesco lil caring le evrei, o apostolo Pavel phendea că amari speranța si sar iech ancora. (Citisar Evrei 6:19.) Anda codoia că vo sas-lo butivar pi marea ande pesche călătorii,  o Pavel jianelas că i ancora sas-li folosime caște na mechel ca i corabia te jial anda iech than ande aver. Ande iech anda cadal călătorii, cana astardea iech bari barval, o Pavel dichlea sar le marinari șiudenas le ancore ando pai ca i barca te na jial caring le stânci. (Fap. 27:29, 39-41) Cadea sar iech ancora, i speranța încărel-ame pașa o Iehova hai ci mechel-ame te duriaras-ame lestar cana ande amari viața aven pharimata. I speranța ajutil-ame te nachas părdal le zumaimata anda cadai lumea cali hai zuriarel amaro pachiamos că va avena timpuri mai lașe. Tha, te anas amenghe andi goghi că o Isus phendea că va avela te avas persecutime. (Ioan 15:20) Cadea că, dacă va avela te încăras amari goghi ca amaro pochinimos cai promitisardea-les amenghe o Iehova, va avela te așias zurale pe amaro drom creștino.

5. Sar ajutisardea i speranța le Isusos cana sas-lo angla o merimos?

⁵ Te gândisaras-ame sar ajutisardea i speranța le Isusos te așel loialo, chiar cana ajucărelas-les iech pharo merimos. Ca i Penticosta anda 33 a.e., o apostolo Petru phendea anda iech profeția anda o lil Psalmi, cai sicavel chichi de calmo hai pherdo pachiamos sas-lo o Isus angla o merimos: „Me va avela te beșav andi speranța, anda codoia că ci va avela te meches-ma ando Mormânto, nici na avela te meches ca codo cai si tuche loialo te dichel o cărnimos. . . . Va avela te pheres-ma catar iech bari bucuria angla tute”. (Fap. 2:25-28; Ps. 16:8-11) Cadea că, le Isusos sas-les iech speranța zurali că o Del va uștiavela-les andal mule hai că va avela-les pale i bucuria te avel pașa pesco Dad andel ceruri. (Evr. 12:2, 3)

6. So phendea iech phral anda i speranța?

⁶ I speranța ajutisardea bute phralen hai pheian te na mechen-pe andel pharimata. Iech anda lende si o Leonard Chinn, iech phral loialo cai trail andi Anglia. Ando Iechto Războio Mondialo, vo sas-lo phandado anda codoia că ci camlea te jial andi armata. Dui șiona vo sas-lo încărdo ando regimo de izolare, hai pala codoia sas-lo șiuto te cherel iech phari buchi. Mai târzio, vo scriisardea: „Sea le buchia prin save nachlem, cărde-ma te hachiarav chichi de but ajutil-ame i speranța te na mechas-ame cana nachas prin pharimata. O exemplo le Isusosco, le apostolengo hai le profețengo, hai vi le șucar promisiuni andai Biblia den-ame but speranța hai zuriaren-ame te jias angle”. I speranța sas iech ancora anda o Leonard hai daștil te avel sa cadea vi anda amende.

7. Sostar si amari speranța mai zurali pala so nachas prin zumaimata? (Romani 5:3-5; Iacov 1:12)

⁷ Pala so nachas prin iech zumaimos, amari speranța zuriarel-pe anda codoia că dichleam o vast le Iehovasco cai sas-lo pașa amende hai hachiardeam chichi de cuci sam ande lesche iacha. (Citisar Romani 5:3-5; Iacov 1:12.) Cadea, pala fiesavo zumaimos, si amen iech speranța mai zurali sar atunci cana așundeam i vestea lași. O Satan camel ca le pharimata te cheren-ame te peras, tha, le Iehovaia pașa amende, daisaras te nachas părdal lende.

8. Sar si i speranța sar iech coifo? (1 Tesaloniceni 5:8)

⁸ Andi Biblia, sicavel-pe că i speranța daștil te avel vi sar iech coifo. (Citisar 1 Tesaloniceni 5:8.) O coifo cherelas partea anda i armura ieche soldatoschi, hai cado ferilas lesco șăro cana le dușmani denas-les dab. Ande amaro marimos spiritualo, trebul te ferisaras amari goghi catar le atacuri le Satanosche. Vo folosisarel-pe catar but buchia caște zumavel-ame hai te athavel amari goghi. Cadea sar o coifo ferilas o șăro le soldatosco, sa cadea i speranța feril amari goghi, caște așias loialo pașa o Iehova.

9. So si le manușența cai nai-le niciech speranța?

⁹ I speranța cai si amen te traisaras veșnico va ajutila-ame te sicavas goghiaverimos hai te alosaras  mișto so te cheras amara viața acana. Dacă amari speranța ci mai si cadea de zurali hai mechas ca amari goghi te așel ca le buchia la masesche, daisaras te bâstras amari speranța anda i viața veșnico. Cadea arăsle chichiva creștini anda o Corinto purano. Von hasarde pengo pachiamos ando jiuvindimos, iech promisiunea importanto cai cărdea-la o Del. (1 Cor. 15:12) O Pavel phendea că le manușen cai nai-le i speranța ande iech viața ando viitorii train numai anda aghies. (1 Cor. 15:32) But manușa cai ci pachian andel promisiuni le Devlesche train anda lenghe plăceri, hai roden te cheren penghi viața chichi mai lași acana. Tha amen ajucăras pherde pachiamos o viitorii cai promitisardea-les amenghe o Iehova. Amari speranța si sar iech coifo cai feril amari goghi hai ci mechel-ame te rodas iech viața bazome pe le camnimata le ilesche, cai daștilas te rimosarel amaro amalimos le Iehovaia. (1 Cor. 15:33, 34)

10. Sar daștil te feril-ame i speranța catar le gânduri nelașe?

¹⁰ O coifo la speranțaco feril amari goghi vi catar o gândo că sea so cheras caște avas cuci andel iacha le Iehovacshe si de ivea. Sar exemplo, chichiva daștinas te phenen penghe: „Ci dichav-ma mașcar codola cai va traina veșnico. Ci som destul de lașio. Ci va avela te avav niciechdata cadea sar ajucărel-pe o Del”. Te na bâstras că o Elifaz, iech andal amala neciace le Iovosche, gândisardea sa cadea. Vo phendea: „So si o manuș cai merel, caște avel ujo?”. Pala codoia, anda o Del phendea: „Ita! Vo ci pachial-pe ande pesche sfinți hai nici chiar le ceruri ci sile uje ande lesche iacha”. (Iov 15:14, 15) So bare hohaimata! Te na bâstras că o Satan si codo cai gândil cadea. Vo jianel că, dacă va avela te pheres chi goghi cadale buchianța, va astareia te hasares chi speranța. Cadea că, șiude tutar sigo cadal hohaimata hai încăr chi goghi ca le șucar promisiuni le Iehovasche. Na mech niciechdata ca i îndoiala te covliarel chio pachiamos că vo camel te trais veșnico hai că silo pașa tute te ajutil-tu te arăsăs code. (1 Tim. 2:3, 4)

11. Sostar trebul te ajucăras pherde răbdarea ca amari speranța te pherel-pe?

¹¹ Poiechdata daștil te avel pharo te încăras zurali amari speranța. Ando timpo so ajucăras ca o Del te pherel pesche promisiuni, daisaras te hasaras amari răbdarea. Cu sea cadala, te anas ande amari goghi că o Iehova silo veșnico, hai vo dichel o timpo diferime amendar. (2 Pet. 3:8, 9) Vo va cherela so promitisardea ando mai lașio modo, tha daștil-pe că na atunci cana ajucăras-ame amen. So daștil te ajutil-ame te încăras amari speranța zurali, ando timpo so ajucăras ca o Del te pherel pesche promisiuni? (Iac. 5:7, 8)

12. Cadea sar sicavel-pe ando Evrei 11:1, 6, so phanglimos si mașcar i speranța hai o pachiamos?

¹² Caște încăras amari speranța zurali, trebul te așias pașa o Iehova, Codo cai dea-ame cadai speranța. Andi Biblia, i speranța sili chidines phangli catar o pachiamos că o Iehova existil hai că vo silo „o pochinitorii codolengo cai roden-les anda sasto ilo”. (Citisar Evrei 11:1, 6.) Chichi mai ciacio silo o Iehova anda amende, cadichi mai but va bariola vi amaro pachiamos ande leste că vo va pherela sea so phendea că va cherela. Te dichas mai dur chichiva pași cai daisaras te cheras-le caște zuriaras amaro amalimos le Iehovaia hai, cadea vi amari speranța.

13. Sar daisaras te pașioas le Devlestar?

¹³ Te mangas-ame le Iehovasche hai te citisaras lesco Cuvânto. Chiar cana amen ci daisaras te dichas le Iehovas, daisaras te pașioas lestar. Daisaras te das duma leia ando manglimos hai daisaras te pachias anda sea o ilo că vo așunel-ame. (Ier. 29:11, 12) Amen daisaras te așunas-les cana citisaras lesco Cuvânto hai gândisaras-ame ca so citisardeam. Cana citisaras  anda o modo sar o Iehova lea sama pe codola cai sas lesche loialo andel puraimata, amari speranța zuriarel-pe vi mai but. Sea so sas scriime ando Cuvânto le Devlesco „sas scriime anda amari instruirea, ca prin amari perseverența hai prin i mângâierea andal Scripturi te avel-ame speranța”. (Rom. 15:4)

14. Sostar trebulas te gândisaras-ame co modo sar o Iehova încărdea pesche promisiuni andel puraimata?

¹⁴ Te gândisaras-ame co modo sar o Iehova încărdea pesche promisiuni. Sar exemplo, te gândisaras-ame ca so cărdea o Del anda o Avraam hai i Sara. Von arăsle cadea de phure că ci mai daștilas te aven-le șiave. Tha, o Del promitisardea lenghe că va dela-le iech șiavorro. (Gen. 18:10) So cărdea o Avraam cana așundea cadaia? I Biblia phenel: „Les sas-les pachiamos că va avela o dad bute națiunengo”. (Rom. 4:18) Chiar cana o Avraam ci jianglea sar avelas te pherel-pe cadai promisiunea, vo pachiaia anda sea o ilo că o Iehova daștilas te pherel-la. Hai cado manuș pherdo pachiamos ci ajucărdea de ivea. (Rom. 4:19-21) Cadal relatări sicaven amenghe că amen daisaras te pachias-ame sea o timpo ando Iehova că vo va pherela pesche promisiuni, vi andel situații cana ande amare iacha fanas-pe că ci daștin te aven cărde.

15. Sostar trebul te gândisaras-ame ca so cărdea o Iehova anda amende?

¹⁵ Te gândisaras-ame ca so cărdea o Iehova anda amende ji acana. Gândisar-tu sar pherdile-pe deja ande chio miștimos chichiva promisiuni anda o Cuvânto le Devlesco. Sar exemplo, o Isus promitisardea că chio Dad andal ceruri va lela sama te avel-tu sea so trebul-tu caște trais. (Mat. 6:32, 33) Sa cadea, vo promitisardea că o Iehova va dela-tu spirito sfânto de fiesavi data cana va avela te manghes les. (Luca 11:13) O Iehova încărdea cadal promisiuni. Daștil-pe că aven tuche andi goghi vi aver promisiuni cai vo pherel-le ande  chio miștimos, sar avelas codoia te iertil-tu, te anel tuche mângâierea hai te del-tu haben spiritualo caște avel-tu iech pachiamos zuralo. (Mat. 6:14; 24:45; 2 Cor. 1:3) Cana gândis-tu ca so cărdea o Iehova deja anda tute, cadaia zurariel chi speranța că vo va pherela pesche promisiuni vi ando viitorii.

16. Sostar si i speranța iech cuci daro?

¹⁶ Amari speranța andi viața veșnico si iech daro zurales cuci le Iehovastar. Pherde pachiamos abia ajucăras cado șucar viitorii! Amari speranța si sar iech ancora, cai ajutil-ame te așias zurale angla le pharimata, le persecuții hai chiar angla o merimos. Voi si vi sar iech coifo, cai feril amari goghi catar le sicaimata neciace hai ajutil-ame te cheras so si mișto. Amari speranța bazome pi Biblia anel amen mai pașă amare Devlestar, Iehova, hai sicavel leschi bari iubirea cai siles caring amende. Cana încăras amari speranța zurali hai jiuvindi va avena amen but miștimata.

17. Sostar daisaras te bucurisaras-ame andi speranța?

¹⁷ Ande pesco lil caring le romani, o apostolo Pavel zuriardea-ame: „Bucurin-tume andi speranța”. (Rom. 12:12) O Pavel daștilas te bucuril-pe anda codoia că vo pachialas ciaces că va primila viața veșnico ando cerii dacă așelas loialo. Vi amen daisaras te bucurisaras-ame anda codoia că jianas că o Iehova va pherela pesche promisiuni. Cadea sar scriisardea o psalmisto, „fericime si o manuș . . . saveschi speranța si ando Iehova, lesco Del, . . . Codo cai așel sea o timpo fidelo”. (Ps. 146:5, 6)