1, 2. So întâmplosardea-pe cana dui anda le discipoli le Isusosche jianas po drom caring o Emaus?

 SI 16 NISAN o bărș 33 a.e. Le discipoli le Isusosche sile zurales perade hai darade. Dui anda lende tiliaren anda o Ierusalimo caring o Emaus, iech gav cai sas ca 11 kilometri. Von sile perade anda codoia că o Isus, o manuș pala savo lenas-pe, sas mudardo. Von ajucărenas ca o Mesia te cherel but șucar buchia anda le evrei, tha acana vo silo mulo. Cu sea cadala, so sas-len ando ilo avelas te paruvel-pe bi te ajucăren-pe.

² Iech manuș cai ci prinjianenas-les pașiolas lendar cana jianas po drom caring o Emaus. Le discipoli, perade, astaren te phenen lesche prin so nachlea o Isus. Pala codoia, o murș astardea te phenel lenghe chichiva buchia cai ci avenas te bâstrăn-len niciechdata. „Hai, de catar o Moise hai catar sea le Profeți”, vo astardea te phenel lenghe sostar o Mesia trebulas te nachel prin bare ducha hai te merel. Cana le trin manușa arăsle co Emaus, o manuș cai ci prinjianenas-les sicadea con silo vo ciaces: o Isus, cai sas-lo uștiado andal mule. Daisaras te gândisaras amen chichi de bucurime sas le discipoli cana dichle că o Mesia trailas! (Luca 24:13-35)

3, 4. a) So cărdea o Isus caște ajutil le discipolen hai sar sas-le von pala codoia? b) So va avela te dichas ande cado articolo? (Fapte 1:3)

³ O Isus sicadea-pe mai butivar pesche discipolenghe ande le palutne 40 ghiesa cai așilea pi phuv. (Citisar Fapte 1:3.) Ande codol ghiesa, le discipoli sas-le perade hai darade, tha o Isus pherdea lenghe ile bucuriatar hai ajutisardea-len te phenen hai  te sicaven i vestea lași anda o Regato pherde tromai. a

⁴ Daștil te avel amen but miștimata cana sichioas anda cadal ghiesa andai viața le Isusoschi. Mai dur, va avela te dichas so cărdea o Isus ande cadal ghiesa 1) caște zuriarel pesche discipolen, 2) caște ajutil-len te hachiaren mai mișto o Lil le Devlesco hai 3) caște sicavel-len anda i buchi cai avelas te cheren-la ando viitorii. Va avela te dichas, ande sea cadal buchia, sar daisaras te las amen pala o Isus.

TE ZURIARAS AVEREN

5. Sostar trebunas te aven zuriarde le discipoli le Isusosche?

⁵ Sostar trebunas zuriarde le discipoli le Isusosche? Caște aven le Isusosa, chichiva mașcar lende mechle palal penghe chăra, penghe familii hai le buchia cai cherenas-len caște avel-len love. (Mat. 19:27) Aver sas-le dichle jiungale iachența anda codoia că cărdile discipoli le Isusosche. (Ioan 9:22) Von camenas te mechen palal cadal buchia anda codoia că pachianas ciaces că o Isus sas o Mesia. (Mat. 16:16) Tha, cana o Isus sas-lo mudardo, von sas-le zurales perade anda codoia că ci jianenas so va avela le buchianța cai ajucărenas-len.

6. So cărdea o Isus pala so sas uștiado andal mule?

⁶ O Isus hachiardea că sas normalo anda lesche discipoli te aven perade pala so vo mulea. Hai o Isus jianglea că von ci sas-le perade anda codoia că sas-len iech pachiamos covlo. Cadea că, chiar anda o ghies cana sas-lo jiuvindo, vo astardea te zuriarel pesche amalen. Sar avelas, vo sicadea-pe angla i Maria Magdalena cana voi rovelas pașa o than cai vo sas-lo prahome. (Ioan 20:11, 16) Pala codoia, sicadea-pe le duie discipolenghe anda save deam duma co începuto le articolosco. Sa cadea, sicadea-pe vi le apostolosche Petru. (Luca 24:34) So daisaras te sichioas le Isusostar? Mai dur, va avela te dichas so întâmplosardea-pe i iechto data cana sicadea-pe pala so sas uștiado andal mule.

7. So dichlea o Isus că cherelas i Maria hai so cărdea vo anda late? (Ioan 20:11-16) (Dich vi i imaginea.)

⁷ Citisar Ioan 20:11-16. Ando 16 nisan, de teharin, chichiva jiuvlea cai slujinas anda ilo le  Iehovasche găle ando than cai sas-lo prahome o Isus. (Luca 24:1, 10) Iech anda le jiuvlea sas i Maria Magdalena. Cana i Maria arăslea code, dichlea că ci mai sas chanci ando than cai o Isus sas-lo prahome. I Maria nașlea caring o Petru hai o Ioan, hai pala codoia nașlea lența parpale. Pala so dichle ciaces că o Isus ci mai sas-lo ando than cai sas-lo prahome, o Petru hai o Ioan găle chăre. Tha i Maria așilea cothe hai rovelas. Nici na gândisardea-pe că o Isus dichelas-la. Lesco ilo sas-lo pusado cana dichlea le asfa la Mariache. Cadea că, vo sicadea-pe lache hai cărdea iech țâni buchi, cai zuriardea-la but. Vo dea duma lasa hai dea-la te cherel iech buchi zurales importanto: te phenel lesche phralenghe că vo uștilea andal mule. (Ioan 20:17, 18)

8. Sar daisaras te las amen pala o Isus?

⁸ Sar daisaras te las amen pala o Isus? Daisaras te las amen pala o Isus cana zuriaras amare phralen hai pheian te slujin mai dur le Iehovasche. Sar o Isus, amen trebul te dichas so pharimata si averen hai te das amari zor te hachiaras so si ande lengo ilo hai te zuriaras-len. Te dichas prin so nachlea i Jocelyn pala so lachi phei mulea ande iech pharo accidento. „Somas peradi hai duchadi sea o timpo”, phenel voi. Tha, iech phral hai leschi rromni acharde-la lende chăre hai ajutisarde-la te pâtrel pesco ilo. Von așunde-la atento, phirade-pe lașimasa hai phende lache chichi de drago si voi le Iehovasche. I Jocelyn phenel: „Somas sar ande iech baro brâșând barvaleasa po pai, tha o Iehova bișialdea le phrales hai la pheia caște încalavel man cothar. Von ajutisarde man te camav te slujiv mai dur le Iehovasche”. Vi amen daisaras te zuriaras averen cana mechas-len te phenen so si ande lengo ilo hai cana așunas atento so phenen amenghe von. Cadea, daisaras te zuriaras-len hai te ajutisaras-len te slujin mai dur le Iehovasche. (Rom. 12:15)

TE AJUTISARAS AVEREN TE HACHIAREN O LIL LE DEVLESCO

9. So pharimos sas le discipolen le Isusosche hai sar ajutisardea-len o Isus?

⁹ Le discipoli le Isusosche pachianas ando Lil le Devlesco hai cărde sea so daisarde caște așunen le Iehovastar. (Ioan 17:6) Tha von ci daisarde te hachiaren sostar o Isus sas mudardo sar iech manuș zurales nasul. O Isus jianglea că len sas-len pachiamos hai iubinas but le Iehovas. Tha, von trebunas te hachiaren mai mișto o Lil le Devlesco. (Luca 9:44, 45; Ioan 20:9) Cadea că, vo ajutisardea-len te hachiaren mai mișto so citisarenas ando Lil le Devlesco. Te dichas sar ajutisardea le duie discipolen po drom caring o Emaus.

10. Sar ajutisardea o Isus le discipolen te hachiaren că vo sas, ciaces, o Mesia? (Luca 24:18-27)

¹⁰ Citisar Luca 24:18-27. Trebul te dichas că o Isus ci phendea sigo le duie discipolenghe con sas-lo. Mai anglal, vo pușlea-len chichiva buchia. Sostar? Daștil-pe că vo camlea te phenen lesche so sas-len ando ilo hai andi goghi. Hai von cărde cadaia. Le discipoli phende că von ajucărenas-pe ca o Isus te cherel vareso ca o Ierusalimo te na mai avel tela o zuralimos romano. Pala so von phende sostar daranas, o Isus, prin o Lil le Devlesco, ajutisardea-len te hachiaren sostar întâmplosarde-pe le buchia cai nachle. b Pala codoia, ande codoi riat, vo ajutisardea vi le coaver discipolen te hachiaren cadal ciacimata. (Luca 24:33-48) So daisaras te sichioas lestar?

11, 12. a) So sichioas anda sar sicadea o Isus le ciacimata biblico? (Dich vi le imagini.) b) Sar ajutisardea le Norteys o phral casa sichiolas andai Biblia?

¹¹ Sar daisaras te las amen pala o Isus? Mai anglal, cana sichioas varecasa andai Biblia, si importanto te șioas lașe pușimata cai ajutin  amen te dichas so si ande lengo ilo hai goghi. (Prov. 20:5) Pala so hachiaras so si ande lengo ilo daisaras te sicavas lenghe sar te arachen versete cai si lașe ande lenghi situația. Te așavas amen cana avel amenghe te phenas lenghe so te cheren. Mai mișto, te ajutisaras-len te gândin pala i Biblia hai te hachiaren sar daștin te cheren so sichion anda o Lil le Devlesco. Te dichas prin so nachlea iech phral andai Ghana cai bușiol Nortey.

¹² O Nortey astardea te sichiol andai Biblia cana sas-les 16 bărșa. Pala iech țâra timpo, leschi familia astardea te așel lesche contra. So ajutisardea-les te sichiol mai dur? O phral casa studiilas dea duma lesa anda o Matei, o capitolo 10 hai sicadea lesche că le ciace creștini va avena persecutime. O Nortey phenel: „Cadea că, cana astarde te persecutin man, jianglem că arachlem o ciacimos”. Mai but, o phral casa sichiolas sicadea lesche vi o Matei 10:16 hai ajutisardea-les te hachiarel că trebul te avel goghiaver hai te sicavel pachiv cana sicavel pesca familiache ande soste pachial. Pala o bolimos, o Nortey camlea te astarel o pionierato, chiar cana lesco dad ajucărelas-pe ca o Nortey te jial ca iech facultatea. O phral casa sichiolas o Nortey ci phendea lesche nici acana so te cherel. Tha vo șiutea lesche chichiva pușimata hai ajutisardea-les te gândil pala o Lil le Devlesco. So cărdea o Nortey? Vo astardea o servicio cu timp integral. Tha cadaia ci ciailea lesche dades hai vo dea-les avri anda o chăr. Falea nasul le phrales Nortey anda so cărdea? Vo phenel: „Jianav ciaces că cărdem so si mișto”. Cana ajutisaras averen te gândin pala o Lil le Devlesco, ajutisaras-len te arăsăn creștini zurale ando pachiamos. (Ef. 3:16-19)

TE AJUTISARAS LE PHRALEN TE ARĂSĂN ‘MANUȘA SAR DARURI’

13. So cărdea o Isus caște jianel ciaces că i predicarea va avela cărdi vi mai dur pala so gălea co cerii? (Efeseni 4:8)

¹³ Cana sas-lo pi phuv, o Isus cărdea perfecto sea so phendea lesco Dad te cherel. (Ioan 17:4) Tha o Isus ci phendea niciechdata: „Dacă cames ca iech buchi te avel cărdi mișto, trebul te cheres-la tu”. Anda codoia, ande le trin bărșa hai dipaș cana predichisardea pi phuv, vo sicadea vi averen sar te cheren cadai buchi. O Isus pachiaia-pe ande pesche discipoli. Vo dea-len i buchi te predichin hai te sicaven averen i vestea lași, hai vi te len sama pe le manușa cuci le Iehovasche. Chichiva anda cadal discipoli,  cai cărde iech buchi importanto, daștil-pe că sas-len mașcar 20 hai 30 bărșa. (Citisar Efeseni 4:8.) Cadal murșa cărde phares buchi anda o Isus hai așile pașa leste anda sea o ilo. Tha sar sicadea-len o Isus ande le palutne 40 ghiesa cana sas-lo pi phuv te aven ‘manușa sar daruri’?

14. So cărdea o Isus caște sicavel pesche discipolen andel palutne 40 ghiesa cana sas-lo pi phuv? (Dich vi i imaginea.)

¹⁴ O Isus dea pesche discipolenghe sfaturi cai von trebunas te așunen-len. Vo sas-lo pherdo lașimos cana cărdea cadaia. Sar exemplo, vo dichlea că chichiva anda le discipoli ci pachianas ciaces că vo mulea hai uștilea andal mule. Cadea că, vo dea-len sfaturi caște ajutil-len te hachiaren o ciacimos. (Luca 24:25-27; Ioan 20:27) Sa cadea, vo phendea lenghe te len sama mai but le manușendar le Iehovasche sar te cheren love. (Ioan 21:15) Hai vo andea lenghe amintea te na gândin-pe prea but ca so sas averenghe dino te cheren andi buchi le Iehovaschi. (Ioan 21:20-22) Sa cadea, vo ortosardea-len ande chichiva buchia cai ci jianenas-len mișto anda o Regato hai ajutisardea-len te phenen mai but i vestea lași. (Fap. 1:6-8) So daștin le phure te sichion le Isusostar?

15, 16. a) Sar daștin le phure te len-pe pala o Isus? b) Sar țârdea o Patrick miștimata anda o sfato?

¹⁵ Sar daștin le phure te len-pe pala o Isus? Von trebun te sicaven le phralen hai te ajutin, chiar vi codolen mai tărne, te cheren mai but buchia andi congregația. c Le phure trebun te hachiaren că cadal phrala trebun te sichion but buchia hai trebun te aven pherde iubirea cana sicaven le phralen mai tărne. Cadea, le phrala tărne va sichiona te aven umili, te cheren mișto penghi buchi hai te camen te ajutin averen. (1 Tim. 3:1; 2 Tim. 2:2; 1 Pet. 5:5)

¹⁶ Te dichas so miștimata sas le Patrickos anda le sfaturi cai primisardea-len. Cana sas-lo tărno, o Patrick, poiechdata, duchavelas le coaveren prin so phenelas, hai phiravelas-pe  bilașimasco chiar vi le pheianța. Iech phuro dichlea lesche covlimata hai, pherdo lașimos, phendea lesche că trebul te cherel paruimata. „Som cadea de voime că o phuro dea man sfaturi hai sicadea manghe so trebul te paruvav mande. Butivar, somas perado cana dichlem că aver phrala primisarde le privilegii cai me camlem-len. Tha, so phendea manghe o phuro ajutisardea man te dichav că trebul te sicavav mai but umilința hai iubirea sar te camav iech baro than andi congregația”. Pala so cărdea cadal paruimata, o Patrick sas-lo numime phuro cana sas-les 23 bărșa. (Prov. 27:9)

17. Sar sicadea o Isus că pachialas-pe ande pesche discipoli?

¹⁷ O Isus dea pesche discipolen na numai i buchi te predichin, tha vi te sicaven averen. (Dich i nota de studiu anda o Matei 28:20.) Daștil-pe că le discipoli gândisarde-pe că cadai buchi si prea phari anda lende. Cu sea cadala, o Isus jianglea că von daștin te cheren-la. Vo pachiaia-pe cadea de but ande lende că phendea lenghe: „Cadea sar o Dad bișialdea man, cadea bișialav vi me tumen”. (Ioan 20:21)

18. Sar daștin le phure te len-pe pala o Isus?

¹⁸ Sar daștin le phure te len-pe pala o Isus? Le phure goghiaver sicaven averen cana den-len te cheren chichiva buchia andi congregația. (Filip. 2:19-22) Sar exemplo, le phure daștin te manghen le tărnen te ajutin-len cana cherel-pe ujimos sau cana cherel-pe buchi ca i sala le Regatoschi. Cana le phure den iech buchi le phralenghe, trebun te sicaven-len sar cherel-pe hai, pala codoia, te pachian-pe ande lende că va cherena-la mișto. Iech nevo phuro cai bușiol Matthew mulțumil anda ilo le phurenghe cai sicade-les te cherel mai but buchia andi congregația hai că sicade pachiamos ande leste. Vo phenel: „Cana cărdem greșeli, von ajutisarde man te dichav so daștiv te sichioav anda lende hai so paruimata trebulas te cherav”. d

19. So camas te cheras anda sea o ilo?

¹⁹ Andel palutne 40 ghiesa chichi așilea pi phuv, o Isus zuriardea hai sicadea averen. Te camas vi amen anda sea o ilo te las amen sea mai mișto pala lesco exemplo! (1 Pet. 2:21) Vo va ajutila amen te cheras cadaia. Ji la urmă, vo phendea amenghe: „Me som tumența ande sea le ghiesa ji co phandaimos le sistemosco”. (Mat. 28:20)