Co începuto le bărșengo 1940, mânre dada studiisarde i Biblia le Martorența le Iehovasche, tha, o studio așilea po than. Cu sea cadala, mânri dei primisarelas mai dur le revistea O Turno de veghe hai Ușten!. Ando bărș 1950, me hai mânri familia samas acharde ca o congreso internaționalo încărdo ando foro New York, hai vi găleam.

Țâra timpo pala codo congreso, o phral Lawrence Jeffries astardea te avel amende. Vo camelas anda sea o ilo te ajutil-ma. Mai anglal pachiaiem că le Martori le Iehovasche ci cherenas mișto că ci șionas-pe andi politica hai că ci jianas andi armata. Gândisardem-ma că dacă niciech americano ci camelas te jial co războio, le dușmani daștinas zurales ușoro te len amaro them. Pherdo răbdarea, o phral Jeffries pușlea-ma: „So pachias că avelas te cherel o Iehova dacă sea le americani avenas te slujin lesche, hai le dușmani avenas contra lenghe?”. Lesco răspunso cadale pușimaste, hai vi averende, ajutisardea-ma te hachiarav că ci sas-man ciacimos. Cadaia cărdea-ma te camav te prinjianav mai but andai Biblia.

Beșlemas but ore te citisarav le numerea mai purane le revistenghe O Turno de veghe hai Ușten!, cai mânri dei îngărdea-le andi pivnița. Pala iech timpo, arăslem te pachiav că cado sas o ciacimos, cadea camlem te astarav o studio biblico le phraleia Jeffries hai astardem vi te jiav ande fiesavo curco ca le întruniri. O ciacimos arăslea ande mânro ilo hai astardem te dav duma vi averența anda i vestea lași. Cana hachiardem că „o baro ghies le Iehovasco [sas] pașă”, mânre obiectivea parude-pe. (Țef. 1:14) Încaladem cu sea anda mânri goghi o gândo te jiav ca i facultatea hai alosardem te sicav averen le ciacimata andai Biblia.

Ande 13 iunia 1956, terminisardem o liceo, hai pala trin ghiesa boldem-ma ca iech congreso de circumscripția.  Atunci, nici na nachelas prin mânri goghi chichi de but miștimata ajucărenas-ma anda codoia că alosardem te sichioav hai te sicav averen anda o Iehova.

Pala șiov șiona catar o bolimos, astardem te cherav o pionierato regularo. Ando Ministero anda o Regato anda decembria 1956, sas o articolo „Daștis te slujis cai si mai but nevoia phralendar?”. „Sostar na?”, phendem manghe. Camlem te dav iech vast caște ajutiv ande iech than cai sas mai țâra phrala. (Mat. 24:14)

Gălem ando Edgefield (Carolina de Sud). Andi congregația de othar sas 2 phrala hai dui pheia, hai manța, panji. Încărdemas le întruniri andi camera de anglal anda o chăr ieche phralesco. Cărdemas but andi predicarea hai încărdemas but teme andi congregația. Ande fiesavo șion cărdemas 100 ore andi predicarea. Chichi cărdiomas mai but anda o Iehova, cadichi mai but buchia sichilemas anda leste.

Studiisardem i Biblia iecha jiuvlea cai sas-la iech firma anda o phrahimos ando Johnston, iech foro cai sas ca chichiva kilometri catar Edgefield. Pherdi lașimos voi dea-man iech buchi cu jumătate de normă, saveatar sas-man iech bari nevoia. Chiar mechlea amen te încăras le întruniri ande iech țâni clădirea.

O Jolly Jeffries, o șiavo le phralesco casa studiisardem, avilea anda Brooklyn (New York) ande Edgefield, hai cărdeam pionerato ande iech than. Beșleam ande iech țâni rulota, cai dea-la amenghe iech phral.

Ando sudo, i buchi ci sas mișto pochindi. Primisardemas numai dui, trin dolarea pe iech ghies. Iechdata, le palutne lovența cai sas man, chindem manghe haben catar iech magazino. Ando timpo so gălemas avri, iech murș pușlea-ma: ”Cames te cheres buchi mande? Dav-tu iech dolaro pi ora”. Cărdem buchi trin ghiesa ca cado manuș. Dea man i buchi te cherav ujimos pe iech șantierii. Dichilea-pe claro că o Iehova ajutilas-ma te așiav ando Edgefield. Ando bărș 1958, daisardem te jiav ca o congreso internaționalo anda o foro New York.

O duito ghies co congreso, prinjiandem iecha pheia deosebime, i Ruby Wadlington, cai slujilas sar pioniera regularo ando Gallatin (Tennessee). Anda codoia că le dui camleamas te arăsas misionari, găleam ca i întrunirea anda codola cai camenas te jian ca i Școala Galaad. Pala codoia, mai încărdeam o phanglimos prin lila. Iechdata, somas achardo te încărav iech cuvântarea ando Gallatin. Atunci pușlem-la dacă camelas te avel mânri rromni. Muchisardem-ma andi congregația cai sas i Ruby hai leam-ame ando bărș 1959.

Cana sas man 23 bărșa, somas numime serv de congregație (aghies, coordonatoro le corposco le phurengo) ando Gallatin. Sas i iechto congregația vizitime catar o phral Charles Thompson sar supraveghetoro de circumscripția. Chiar cana sas-les but  experiența, pușlea-ma save sas le necesități la congregațiache hai sar line sama latar aver supraveghetori de circumscripția. Sichilem lestar că si goghiaver te șios pușimata hai te prinjianes mișto le buchia angla so te les iech decizia.

Ando mai 1964, somas achardo ca i Școala anda o Servicio le Regatosco, încărdi ando South Lansing (New York). Iech sasto șion, le instructori cărde-ma te camav anda sea o ilo te sichioav mai but anda o Iehova hai te cărdioav iech manuș mai zuralo ando pachiamos.

Andi ianuaria 1965, samas acharde te astaras i lucrarea de circumscripție. I circumscripția cai sas amenghe dini pachiarelas iech than zurales baro: anda Knoxville (Tennessee) ji pașă catar o Richmond (Virginia). Trebulas te jias andel congregații anda Carolina de Nord, Kentucky hai Virginia de Vest. Slujisardem numai andel congregații cai sas phrala cale anda codoia că sas segregația rasialo ando sudo Statelor Unite, hai le cale ci daștinas te aven ande iech than le parnența. Le phrala sas-le ciore, cadea că sichileam te das anda so sas amen vi codolen cai sas-len nevoia. Iech phral cai slujisardea but timpo sar supraveghetoro de circumscripția sicadea-ma vareso zurales importanto: „Av iech phral! Na phirav-tu sar iech șefo. Va daștia te ajutis averen numai cana va dichena-tu sar lengo phral”.

Cana găleam andi vizita ande iech congregația cai sas țâra phrala, i Ruby astardea te studiil i Biblia iecha tărnea jiuvlea cai sas-la iech țâni șeiorri de iech bărș. Cana ci daștilas te jial chonic late, i Ruby studiilas lasa prin lila. Ca i vizita cai avilea, i jiuvli avilea ca sea le întruniri. Voi studiisardea mai dur duie pheianța pionero specialo cai primisarde repartiția ande codoi congregația. Na pala but timpo, i juvli boldea-pe. Ando bărș 1995, cam pala 30 bărșa, cana samas co Betelo anda Patterson, iech tărni phei avilea ca i Ruby. Sas chiar i șei codola jiuvleachi cai studiisardea mânra rromniasa. Voi hai laco rrom sas-le ca i 100-to clasa catar i Școala Galaad.

Amari duito repartiția andi lucrarea de circumscripția sas i partea centralo anda o stato Florida. Sas amen nevoia catar iech mașina, cadea că chindeam iech hai ci pochindeam but pe late. Tha, chiar ando iechto curco rimosardea-pe i pompa le paieschi hai ci sas amen love te lașiaras-la. Dem iech telefono le phrales cai jianglemas că daștil te ajutil-ame. Vo bișaldea ieche manușes cai cherelas leste buchi te cherel amari mașina hai ci lea amendar love. O phral phendea: „Ci trebul te den man chanci”. Mai but, chiar vo dea amen sar cadouo love. Ande cadai situația dichleam încă iech data sar lel sama o Iehova pe pesche slujitori. Ande sa codo timpo, sas andino ande amari goghi te das vi amen averen anda so si amen.

De fiesavi data cana găleamas ande iech congregația, beșleam ca amare phrala, hai cadaia ajutisardea-ame te cheras amenghe lașe amalimata. Ande iech ghies, mechlem andi mașina de scris o raporto andai congregația, cai astardemas te scriiv-les. Pi riat, cana avilem parpale, dem mânri sama că o șiavorro de trin bărș le phralengo cai beșleamas, „ajutisardea-ma” te terminiv o raporto. But bărșa pala codoia, de fiesavi data cana dichleam amen, andem lesche amintea anda cadaia.

Ando bărș 1971, primisardem iech lil ande savo sas manghe phendo că avelas te slujiv sar supraveghetoro de district ando foro New York. Ci avelas amenghe te pachias! Cana găleam code, man sas-ma 34 bărșa. Le phrala primisarde-ame anda sea o ilo – somas lengo dintuno supraveghetoro de district calo!

Sar supraveghetoro de district, sas man o privilegio te sicav averen anda o Iehova co sfârșito fiesave curchesco, ca le congresea de circumscripția. Bute supraveghetoren de circumscripția sas-len mai but experiența sar man. Iech anda lende încărdea manghe i cuvântarea anda o bolimos. Iech aver, o Theodore Jaracz, arăslea mai târzio te avel iech jeno anda o Corpo de Guvernare. Sa cadea, cărdem buchi ande iech than bute phralența catar o Betelo anda Brooklyn, cai sas-len but experiența. Savore cărde-ma te simțosarav-ma mișto pașa lende hai som lenghe zurales recunoscătorii anda cadaia. Dichlem mânre iachența i iubirea cadale păstorenghe, cai bazonas-pe po Cuvânto le Devlesco hai pherde pachiamos hai loialitatea încărenas ca i organizația. Anda codoia că sicade umilința, ci sas manghe pharo  te cherav mânri buchi sar supraveghetoro de district.

Ando bărș 1974, o Corpo de Guvernare numisardea andi lucrarea de district iech aver grupo de supraveghetori de circumscripția, hai me gălem parpale andi circumscripția. De cadai data, amari repartiția sas andi Carolina de Sud. Somas zurales bucurime că le congregații hai circumscripții, ci mai trebunas hulade pala i rasa. Vi le phrala bucurisarde-pe but.

Co sfârșito le bărșesco 1976, sas manghe dini i repartiția ande iech circumscripția anda o stato Georgia, mașcar le forurea Atlanta hai Columbus. Vi acana anav ande mânri goghi că încărdem iech cuvântarea anda o prahimos, co panji șiavorre cale cai mule pala so lengo chăr sas dino iag catar niște manușa nasul. Lenghi dei sas zurales thabardi hai sas-li ando spitalo. Le phrala hai le pheia, vi cale, hai vi parne, jianas sea o timpo co spitalo caște zuriaren laco ilo. Barilea mânro ilo cana dichlem lenghi bari iubirea! Cana le slujitori le Iehovasche sicaven cadea penghi compasiunea, chiar vi părdal le mai bare pharimata daștil te nachel-pe mai ușoro.

Ando bărș 1977, samas acharde co Betelo anda Brooklyn caște cheras buchi chichiva șiona ca iech proiecto. Cana sas pașă te avel gata i buchi anda savi samas acharde, dui jene anda o Corpo de Guvernare dine duma manța hai pușle-ma dacă camas te slujisaras anda mai but timpo co Betelo. Vi me, hai vi i Ruby camleam te cheras cadaia.

Anda 24 bărșa, cărdem buchi co Departamento anda o servicio, cai, butivar, le phrala trebun te rezolvin phare problemea. Ando timpo, o Corpo de Guvernare dea but îndrumări bazome pe le principii andai Biblia. Cadal îndrumări sas-le lașe caște daisaras te das răspunso ca le pușimata hai, ande sa codo timpo, șiute i baza anda o sicaimos le supraveghetorengo de circumscripția, anda le phure hai anda le pioneri. Cadea că, but phrala barile spiritualo, hai i organizația le Iehovaschi sas-li zuriardi.

Anda o 1995 ji ande 2018, gălem ca mai but filiale sar reprezentanto catar o sedio mondialo, prinjiando mai anglal sar supraveghetoro de zonă. Încărdem întruniri anda le comitetea de filială, anda le beteliștii hai anda le misionari caște zuriarav-le hai te dav-le răspunso ca chichiva pușimata cai sas-le. Vi me vi i Ruby samas zuriarde cana dichleam că le phrala ci mechen-pe. Ando bărș 2000, cana găleam ca i filiala anda Rwanda, samas zuriarde catar le experiențea cai sas le phralen cana sas o genocido anda 1994. Chiar cana bute jenenghe mulea varecon drago, von ci hasarde pengo pachiamos, speranța hai nici bucuria.

Aghies, si amen mai but sar 80 bărșa. De 20 bărșa slujisarav ando Comiteto la filialaco andal Statele Unite. Chiar cana ci cărdem iech facultatea, primisardem o mai lașio sicaimos, catar o Iehova hai leschi organizația. Cado sicaimos ajutisardea-ma te sicavav averen le ciacimata andai Biblia, cai daștin te anen lenghe miștimata veșnico. (2 Cor. 3:5; 2 Tim. 2:2) Dichlem sar o ciacimos andai Biblia parudea i viața le manușenghi, cărdea-la mai șucar hai ajutisardea-le te aven ciace amala lenghe Devleia. (Iac. 4:8) Ori chichivar daisaras, me hai i Ruby zuriaras le phralen te dichen cuci o privilegio cai si amen te sichioas anda o Iehova hai te das duma averența anda le ciacimata biblico. Cado si o mai baro privilegio cai daștil te avel ieche slujitores le Iehovasco!