1. Sar daisaras te jianas că iech manuș silo demno pachiamasco?

 IECH MANUȘ demno pachiamasco phenel o ciacimos hai del peschi zor te încărel pesche promisiuni. (Ps. 15:4) Le manușa jianen că daștin te pachian-pe ande leste. Savore camas ca amare phrala hai pheia te pachian cadai buchi ande amende hai te avas prinjiande sar manușa demno pachiamasche. So trebul te cheras ca le coaver te daștin te pachian-pe ande amende?

2. Sar daisaras te sicavas că sam demno pachiamasche?

² Ci daisaras te cheras zuralimaia le coaveren te pachian-pe ande amende. Trebul te sicavas le coaverenghe prin amaro phiraimos că sam demno pachiamasche. Phenel-pe că o pachiamos si sar le love: cheren-pe phares, tha hasaren-pe sigo. Amen jianas că daisaras te pachias-ame ando Iehova, anda codoia că vo sicadea amenghe cadaia. O Del ci dea-ame niciechdata motivea te hasaras amaro pachiamos ande leste anda codoia că „sea so cherel . . . si demno pachiamasche”. (Ps. 33:4) Vo camel ca vi amen te las-ame pala leste. (Ef. 5:1) Mai dur, va avela te dichas o exemplo chichiva slujitorenghe le Iehovasche cai line-pe pala lengo Dad cerisco hai sicade că sile demno pachiamasche. Sa cadea, va avela te dichas panji calități cai va ajutina-ame te avas manușa ande save le coaver daștin te pachian-pe.

3, 4. Sar sicadea o Daniel că sas iech manuș demno pachiamasco hai so pușimata avelas mișto te șioas amenghe?

³ O profeto Daniel sas iech manuș demno pachiamasco. Chiar cana sas-lo îngărdo ando phandaimos catar le babilonieni, vo cărdea-pe sigo prinjiando sar iech manuș ande savo le coaver daștinas te pachian-pe. Hai pala so, le ajutoroia le Iehovasco, phendea le regesche babiloniano Nebucadnețar so dichlea andel sune, le coaver astarde te pachian-pe vi mai but ande leste. Iech  data, o Daniel trebuisardea te phenel le regesche iech mesajo pharo, adică iech mesajo crisaco catar o Iehova. Le Danielos trebuisardea-les but tromai te cherel cadaia, anda codoia că o Nebucadnețar sas-lo prinjiando sar iech manuș cai holiarelas-pe sigo. (Dan. 2:12; 4:20-22, 25) Bute bărșența pala codoia, o Daniel sicadea pale că silo demno pachiamasco cana sicadea ciaces so sas scriime pe o perete anda o palato anda Babilono. (Dan. 5:5, 25-29) Pala codoia, o Darius o Medo hai le demnitari catar i bar regalo dichle că ando Daniel „sas iech spirito zuralo”. Von dine penghi sama că „sas-lo demno pachiamasco hai ci cărdea-pe doșalo anda chanci sau anda vroiech buchi nepachivali”. (Dan. 6:3, 4) Chiar vi le conducători păgâni hachiarde că o Daniel, cai sas iech închinătoro le Iehovasco, sas iech manuș ande savo daștinas te pachian-pe.

⁴ Ando timpo so încăras ande amari goghi o exemplo le Danielosco, avelas mișto te șioas amenghe le pușimata: „Sar som prinjiando avreal i congregația? Som prinjiando sar iech manuș cai cherel mișto peschi buchi hai ande savo le coaver daștin te pachian-pe?”. Sostar si importanto te șioas amenghe cadal pușimata? Anda codoia că anas pachiv le Iehovasche cana sicavas că sam demno pachiamasche.

5. Sostar sas prinjiando o Hanania sar iech manuș demno pachiamasco?

⁵ Ando bărș 455 a.a.e, pala so vazdea pale le ziduri le Ierusalimosche, o guvernatoro Neemia rodea murșa demno pachiamasche, save te len sama po foro. Iech anda cadala sas o Hanania, cai sas o șăro catar i Fortăreața. Andi Biblia, anda leste phenel-pe că sas „iech manuș demno pachiamasco [cai] daralas catar o ciacio Del mai  but sar but aver”. (Neem. 7:2) Vo iubilas le Iehovas hai camelas te avel cuci ande lesche iacha, anda codoia cărdea mișto i buchi cai sas lesche dini. Cadal calități ajutin vi amen aghies te avas slujitori le Iehovasche ande save le coaver daștin te pachian-pe.

6. Sar sicadea o Tihic că sas-lo iech amal demno pachiamasco anda o apostolo Pavel?

⁶ Iech aver lașio exemplo anda amende si o Tihic. Vo sas o amal le apostolosco Pavel hai sas iech manuș demno pachiamasco. Vo daisardea te pachial-pe ando Tihic că avelas te ajutil-les hai chiar phendea anda leste că si „iech slujitoro loialo”. (Ef. 6:21, 22) O Pavel pachiaia-pe ande leste na numai te îngărel le lila ca le phrala anda Efes hai Colose, tha vi dea-les i buchi te zuriarel-le. O lașio exemplo cai sicadea-les o Tihic anel amenghe amintea catar le phrala demno pachiamasche hai loialo de aghies cai len sama pe amende caște avas zurale spiritualo. (Col. 4:7-9)

7. Sar sicaven că sile demno pachiamasche le phure hai le slujitori auxiliari anda chi congregația?

⁷ Aghies, le phure de congregație hai le slujitori auxiliari sile manușa demno pachiamasche cai dichen penghi buchi ande iech modo serioso, cadea sar o Daniel, Hanania hai Tihic. Anda amende si zurales cuci sea i buchi cai cheren-la andi congregația. Sar exemplo, cana jias ca i întrunirea anda o mașcar le curchesco, daisaras te avas siguri că sea le teme anda o programo sile dine. Sa cadea, le phure de congregație daștin te pachian-pe andel phrala hai pheia cai primin le teme hai jianen că von va pregătina-le mișto hai va încărena-le. Mai but, amen ci încăras-ame parpale te acharas le manușen casa studiisaras i Biblia ca i întrunirea catar o sfârșito le curchesco, daratar că ci va încărela-pe i cuvântarea publico. Sa cadea, daisaras te pachias că va avela te primisaras le publicații savendar si amen nevoia andi predicarea. Cadal cuci phrala loialo len sama zurales mișto pe amende caște avas zurale spiritualo. Anda codoia, mulțumisaras le Iehovasche anda sea o ilo anda lende! Tha sar daisaras amen te sicavas că sam demno pachiamasche?

8. Cana sicavas intereso caring aver, ca so trebul te avas atento? (Proverbe 11:13)

⁸ Anda codoia că iubisaras anda sea o ilo amare phralen hai pheian, sam ciaces interesime lendar. Cu sea cadala, trebul te sicavas lenghe pachiv hai te na pușias-le buchia cai ci camen te phenen-le amenghe. Andi congregația anda o iechto secolo, chichiva jene ‘denas duma nasul anda aver, șionas-pe ande averenghe buchia hai denas duma anda so ci trebulas te den duma’. (1 Tim. 5:13) Amen siguro ci camas te avas sar von. Tha daștil te întâmplol-pe ca varecon te phenel amenghe iech buchi personalo hai manghel amendar te na phenas-la mai dur. Sar exemplo, iech phei daștilas te del duma amența anda iech nasfalimos cai sila sau anda iech aver pharimos prin savo nachel. Sicavas lache ciaces pachiv cana cheras so manglea amendar hai încăras anda amende so phendea amenghe. * (Citisar Proverbe 11:13.) Mai dur, va avela te dichas vi aver situații ande save trebul te încăras le buchia cai așunas-le anda amende.

9. Sar daștin te sicaven le jene andai familia că sile demno pachiamasche?

⁹ Andi familia. Fiesavo jeno andai familia trebul te del peschi zor ca le buchia personalo te așen andi familia. Sar exemplo, iech phei daștilas te cherel vareso cai cherel lache rromes te asal. Avelas te del vo duma anda cadaia averența hai cadea te cherel-la te avel lache lajiav? Siguro că nici! Vo iubil pesca rromnia hai ci avelas  te cherel niciechdata vareso cai te duchavel-la. (Ef. 5:33) Vi le tărne șiave camen ca le coaver te phiraven-pe pachivales lența. Si zurales importanto ca le dada te încăren conto cadala buchiatar. Anda codoia, von ci trebunas te cheren lajiavestar le șiaven angla aver hai te phenen averenghe so ci cheren mișto. (Col. 3:21) Sa cadea, vi le șiave trebunas te sichion te na den duma anda buchia cai daștinas te anen lajiav pe le coaver jene andai familia. (Deut. 5:16) Cana sea le jene andai familia sile atento te na den duma anda buchia cai încăren catar lenghi familia, lenghi familia cărdiol vi mai zurali.

10. So trebul te cherel iech ciacio amal? (Proverbe 17:17)

¹⁰ Ande amare amalimata. Le mai but jene anda amende simțosaras poiechdata i nevoia te pâtras amaro ilo angla iech amal pașardo. Tha cadaia ci si sea o timpo ușoro. Daștil te avel amenghe pharo te das duma averența anda so si ande amari goghi hai ilo. Cadea că, dacă așunas că amaro amal phendea vi averenghe so phendeam lesche te încărel anda peste, avelas te avas zurales perade. Tha, si amenghe zurales cuci iech jeno cai jianel te încărel anda peste so phendeam lesche. Vo si „iech ciacio amal”. (Citisar Proverbe 17:17.)

11. a) Sar sicaven le phure de congregație hai lenghe rromnia că sile demno pachiamasche? b) So sichioas catar o phuro andai imaginea anda sar încărel anda peste le buchia cai sas lesche phende ca iech vizita de păstorire hai cai, pala codoia, beșel ande iech than pesca familia?

¹¹ Andi congregația. Le phure cai jianen te încăren anda pende le buchia cai sas lenghe phende sile „sar iech garaimos contra i barval” anda lenghe phrala. (Is. 32:2) Amen daiasaras te das duma lența bi te încăras-ame parpale, anda codoia că jianas că von ci va phenena mai dur so phendeam lenghe. Amen ci cheras presiuni pe lende te phenen amenghe le buchia cai trebun te încăren-le anda pende. Sa cadea, anda amende si zurales cuci le rromnia cadale phurenghe, anda codoia că von ci camen te cheren penghe rromen te phenen lenghe buchia personalo anda aver. Mai but, anda lende si ciaces iech baro miștimos că ci jianen sea le buchia personalo anda lenghe phrala hai pheia. I rromni ieche  phureschi de congregație phendea: „Som zurales recunoscătorii anda codoia că mânro rrom ci phenel manghe buchia cai așunel-le ca le vizite de păstorire hai ci del duma manța anda codola cai silen pharimata po plano spiritualo, nici barem ci phenel manghe lengo anav. Cadea, daștiv te phiravav-ma amalicanes savorența andai congregația hai te dav duma lența șucar. Som bucurime că mânro rrom ci șiol pharimata pe mânre dume hai ci del duma manța anda buchia anda save ci daștiv te cherav chanci. Cadea, daștiv te pachiav că atunci cana pâtrav mânro ilo angla mânro rrom hai dav duma leia anda mânre pharimata, me jianav că vo ci va phenela-le mai dur averenghe”. Si ciaces, savore camas te avas prinjiande sar manușa demno pachiamasche. Mai dur, va avela te dichas panji calități cai daștin te ajutin-ame te cheras cadai buchi.

12. Sostar daisaras te phenas că i iubirea cherel-ame te pachias-ame ande le coaver? Den iech exemplo.

¹² I iubirea cherel-ame te pachias-ame ande le coaver. O Isus phendea că le mai bare porunci si te iubis le Iehovas hai che pașardes. (Mat. 22:37-39) I iubirea anda o Iehova zuriarel vi amen te camas te las-ame pala amaro Dad cerisco, cai silo o mai demno pachiamasco. I iubirea ande amare phrala hai pheia cherel-ame te încăras anda amende le buchia cai phenen-le amenghe. Ci camas niciechdata te phenas vareso anda lende cai daștilas te cherel lenghe vroiech nasul sau duch sau te cheras-le lajiavestar. (Ioan 15:12)

13. Sar ajutil-ame i umilința te avas manușa demno pachiamasche?

¹³ I umilința ajutil-ame te avas manușa demno pachiamasche. Iech creștino umilo ci va camela te avel sea o timpo vo o iechto jeno cai phenel le coaverenghe iech buchi cai așundea-la. (Filip. 2:3) Vo ci zumavel te cherel averen te pachian că vo jianel buchia importanto hai garade, cai ci daștil te phenel-le. Sa cadea, i umilința ajutil ieche creștinos te încărel-pe parpale te del mai dur so pachial vo anda anumime buchia cai ci sile sicade andi Biblia sau ande amare publicații.

14. Sar ajutil-ame o discernământo te avas manușa demno pachiamasche?

¹⁴ O discernământo ajutil-ame te jianas cana si o timpo te așias anda o mui hai cana si o timpo te das duma. (Ecl. 3:7) Iech proverbo prinjiando ande but culturi phenel: „I duma si anda rup, o așimos anda o mui si sumnacai”. Aver varesar phendo, si situații cana si mai mișto te na phenas chanci. Ando Proverbe 11:12 arachas iech lașio sfato: „O manuș cai siles ciaces discernământo așel anda o mui”. Te dichas o exemplo ieche phuresco de congregație cai siles but experiența. Butivar, manghel-pe lesco ajutorii caște rezolvin-pe phare problemea cai vazden-pe ande aver congregații. Ita so phenel iech phuro anda leschi congregația: „Silo zurales atento te na phenel buchia anda aver congregații cai trebulas te încărel-le numai anda peste”. Anda codoia că si iech manuș cai siles discernământo, vo arăslea te avel prinjiando ando corpo le phurengo anda savo cherel partea sar iech manuș demno pachiamasco. Von daștin te aven siguro că vo ci va phenela mai dur niciechdata buchia cai trebul te încărel anda peste.

15. Den iech exemplo cai sicavel sar daștin le coaver te pachian-pe ande amende cana phenas o ciacimos.

¹⁵ Iech aver buchi cai daștil te ajutil-ame te avas manușa demno pachiamasche si te phenas o ciacimos. Daisaras te pachias-ame ande iech jeno cai silo sincero anda codoia că jianas că va phenela amenghe sea o timpo o ciacimos. (Ef. 4:25; Evr. 13:18) Te phenas că cames te aves mai lașio ande o modo sar sicaves. Cadea că manghes varecas te așunel chi tema cai sas tuche dini hai te phenel tuche so cheres mișto hai so ci cheres mișto. Cas va avela te manghes te phenel tuche ciaces so pachial? Varecas cai phenel tuche so cames te așunes sau varecas cai phenel tuche  sincero o ciacimos? O răspunso si claro. I Biblia phenel: „Mai mișto iech mustrarea sicadi sar iech iubirea garadi. Le ducha cai cherel-le iech amal sicaven loialitatea”. (Prov. 27:5, 6) Chiar cana mai anglal daștil te avel pharo te așunas so phenel amenghe iech amal sincero, va avela te țârdas miștimata anda mai but timpo.

16. Sar sicavel o verseto anda Proverbe 10:19 că trebul te încăras-ame parpale?

¹⁶ Trebul te încăras-ame parpale ca le coaver te daștin te pachian-pe ande amende. Cadai calitatea del-ame o zuralimos te încăras amaro mui phandado cana avel amenghe te phenas buchia cai trebul te încăras-le numai anda amende. (Citisar Proverbe 10:19.) Daisaras te das amari sama că si pharo te încăras-ame parpale cana folosisaras le rețele de socializare. Dacă ci las sama, disaras te phenas bi te camas buchia cai trebulas te încăras-le anda amende bute jenenghe. Iech data so i informația tiliardea amendar po drom electronico, ci mai si amen niciech controlo opral o modo sar va avela folosime sau o nasul cai daștilas te cherel-les. Trebul te încăras-ame parpale vi cana codola cai așen amenghe contra camen te cheren-ame prin buchia subtilo te phenas informații anda amare phrala hai pheia, hai cadea te șioas-le ando pericolo. Situații sar cadala daștin te aven andel thema cai amari buchi sili așadi, hai le phrala sile interoghime catar i poliția. Ande cadai situația, hai vi ande aver, si goghiaver te las-ame pala o sfato cai phenel ‘te șioas pe amaro mui iech frâo’. (Ps. 39:1) Trebul te avas manușa demno pachiamasche sea o timpo, andi familia, ande amare amalimata, amare phralența hai vi sea le coavere manușența. Caște daisaras te cheras cadaia, trebul te încăras-ame parpale.

17. So daștil te cherel fiesavo anda amende ca andi congregația te daisaras te pachias-ame iech ande aver?

¹⁷ Sam zurales recunoscători le Iehovasche anda codoia că țârdea-ame ande leschi șucar familia, cai arachas phrala demno pachiamasche. Savoren si amen i buchi te cheras ca amare phrala hai pheia te pachian-pe ande amende. Dacă fiesavo anda amende va dela peschi zor te sicavel andi congregația iubirea, umilința hai discernământo, va phenela o ciacimos hai va încărela-pe parpale, le phrala va pachiana-pe iech ande aver. Ca le coaver te daștin te pachian-pe ande amende, trebul te das amari zor sea o timpo te cheras cadaia. Savore camas te las-ame pala amaro Del, o Iehova, hai te sicavas că sam demno pachiamasche.