1. Sar folosisardea o Iehova le Petros țâra timpoia angla so te merel?

 O APOSTOLO Petru slujisardea but bărșa loialo le Iehovasche. Vo phirdea le Isusoia, astardea i predicarea mașcar le neevrei hai mai târzio cărdea partea anda o corpo de guvernare. Caring o sfârșito lesca viațaco cana jianelas că ci mai siles but te trail, o Iehova mai dea-les vi aver buchia te cherel. Cam andel bărșa 62-64 a.e., vo scriisardea tela inspirația dui lila: le lila biblico 1 hai 2 Petru. Vo camlea ca cadal lila te ajutin le creștinen pala lesco merimos. (2 Pet. 1:12-15)

2. Sostar avile ca iech lașio timpo le lila scriime catar o Petru?

² O Petru scriisardea pesche lila ande iech timpo zurales pharo anda lesche phrala ando pachiamos. Cadala ‘nachenas prin but zumaimata’. (1 Pet. 1:6) Manușa zurales nasul camenas te anen andi congregația sicaimata hohamne hai iech phiraimos neujo. (2 Pet. 2:1, 2, 14) Mai but, anda le creștini anda Ierusalimo, „o sfârșito sea le buchiango” avelas te avel na pa but timpo – i armata romano avelas te chosel cu sea o foro hai o sistemo iudaico. (1 Pet. 4:7) Daisaras te pachias ciaces, că le lila scriime catar o Petru ajutisarde le creștinen te așen zurale andel zumaimata prin save nachenas hai te pregătin-pe anda le pharimata cai mai trebunas te aven. b

3. Sostar trebulas te dichas atento le lila scriime catar o Petru?

³ Chiar cana o Petru scriisardea cadal lila andal creștini anda o iechto secolo, o Iehova șiutea-le ande Pesco Cuvânto. Cadea vi amen daisaras te țârdas miștimata anda le sfaturi cai si ande lende. (Rom. 15:4) Anda codoia că traisaras ande iech lumea rimosardi cai rodel iech phiraimos neujo, vi amen nachas  prin pharimata cai daștin te zumaven amaro pachiamos. Mai but, pa țâra timpo, va avela te dichas iech necazo but mai baro sar codo cai andea o sfârșito le sistemosco iudaico. Ande le dui lila scriime catar o Petru, arachas sfaturi savendar încărel amari viața. Cadala va ajutina-ame te avas uștiade ando timpo so ajucăras o ghies le Iehovasco, te nachas părdal i dar le manușendar hai te bariaras iech iubirea zurali iech anda aver. Sa cadea, von va ajutina le phuren te len sama pherde iubirea catar le bacrea le Devlesche.

4. Cadea sar sicavel-pe ando 2 Petru 3:3, 4, so daștil te zumavel amaro pachiamos?

⁴ But manușa de aghies ci pachian andel profeții andai Biblia. Codola cai așen amenghe contra asan amendar anda codoia că ajucăras de but bărșa o sfârșito, hai cado ci avilea încă. Si manușa cai phenen că ci va avela niciechdata. (Citisar 2 Petru 3:3, 4.) Cana așunas cadal buchia catar iech manuș casa das duma andi predicarea, catar iech colego catar i buchi sau catar iech jeno anda amari familia, amaro pachiamos daștil te avel zumado. So daștil te ajutil-ame? Le sfaturi cai dea-le o Petru le creștinenghe anda o iechto secolo.

5. So va ajutil-ame te ajucăras pherde răbdarea o sfârșito? (2 Petru 3:8, 9)

⁵ Chichiva manușa daștinas te pachian că o Del ci sighiarel te anel o sfârșito cadale sistemosco nasul. Tha le dumes le Petrosche ajutin-ame te dichas le buchia avere iachența. Vo anel amenghe andi goghi că o Iehova dichel o timpo diferime sar le manușa. (Citisar 2 Petru 3:8, 9.) Anda o Iehova, iech mia bărșa si sar iech ghies. Mai but, vo ajucărel pherdo răbdarea anda codoia că ci camel ca niciech manuș te avel distrugime. Cu sea cadala, cana va arăsăla o timpo alosardo lestar, cado sistemo va avela choslo. So baro privilegio si amen te folosisaras o timpo cai mai așilea caște das duma anda i vestea lași le manușenghe pa sea i phuv!

6. Sar daisaras ‘te încăras jiuvindo ande amari goghi o ghies le Iehovasco’? (2 Petru 3:11, 12)

⁶ O Petru zuriarel-ame ‘te încăras jiuvindo ande amari goghi o ghies le Iehovasco’. (Citisar 2 Petru 3:11, 12.) Sar daisaras te cheras cadai buchi? Dacă beșas hai gândisaras-ame, ande fiesavo ghies ca le miștimata cai va avena amen andi lumea nevi. Gândisar-tu sar va avela te bucuris-tu ando Paradiso catar iech aero ujo, iech lașio haben, cana va avela te des angali codolen cuci cai sas-le uștiade parpale viațate hai cana va avela te ajutis le manușen cai traisarde acana șăla bărșa te hachiaren sar pherdile-pe le profeții andai Biblia. Dacă încăres chi goghi ca cadal buchia va avela te așes uștiado hai te na bâstres ande so ghiesa traisaras. Dacă jianas de mai anglal so va avela ando viitorii, ci va avela te mechas-ame athade catar le sicaitorea neciace. (2 Pet. 3:17)

7. So daștil te cherel amenghe i dar le manușendar?

⁷ Anda codoia că încăras ande amari goghi o ghies le Iehovasco, camas te phenas vi averenghe i vestea lași. Tha, poiechdata va avela amenghe pharo te das duma le manușența. Sostar? Daștil-pe că sam astarde catar i dar le manușendar. Vi o apostolo Petru nachlea prin cadaia. Andi riat cana o Isus sas-lo judechime, le Petrosche sas lesche dar te phenel ca sas iech discipolo le Isusosco hai hohadea mai butivar că ci prinjianel-les. (Mat. 26:69-75) Tha, ando timpo, o apostolo nachlea părdal peschi dar le manușendar, hai cadea vo daisardea te phenel, pherdo pachiamos: „te na daran catar  so daran von, nici te na tulburin tumen!”. (1 Pet. 3:14) Lesche dumes zuriaren-ame te pachias că daisaras te nachas părdal i dar le manușendar.

8. So daștil te ajutil-ame te nachas părdal i dar le manușendar? (1 Petru 3:15)

⁸ So daștil te ajutil-ame te nachas părdal i dar le manușendar? O Petru phendea: „sfințon le Cristosos sar Rai ande tumaro ilo”. (Citisar 1 Petru 3:15.) Cadaia însemnol, te gândisaras-ame că o Isus si amaro Rege hai că siles iech baro zuralimos. Cadea că, dacă si amen emoții sau si amenghe dar te das duma le manușența andai vestea lași, te anas amenghe andi goghi con si amaro Rege. Te așias po than hai te gândisaras-ame sar vo rail ando cerii hai leia sile milionea îngerea. Mai but, te na bâstras că les siles „sea i autoritatea . . . ando cerii hai pi phuv” hai că va avela amența „ande sea le ghiesa ji co phandaimos le sistemosco”. (Mat. 28:18-20) Mai dur, o Petru zuriarel-ame te avas „sea o timpo gata” te das duma averența anda amaro pachiamos. Sar daisaras te cheras cadaia, dacă camas te das duma le manușenta anda o ciacimos ca i buchi, ca i școala sau ande aver than? Te pregătisaras-ame de mai anglal anda sar hai so daisaras te phenas lenghe. Te mangas-ame anda tromai hai te pachias zurales că o Iehova va ajutil-ame te nachas părdal i dar le manușendar. (Fap. 4:29)

9. Sar ci sicadea o Petru iubirea ande iech anumime ocazia? (Dich vi i imaginea.)

⁹ O Petru sichilea te sicavel peschi iubirea. Vo sas-lo code cana o Isus phendea: „Dav tumen iech porunca nevi: Te iubin tumen iech averes; cadea sar me iubisardem tumen, cadea te iubin tumen vi tumen iech averes.” (Ioan 13:34) Cu sea cadala, pala iech timpo, o Petru ci camlea te hal pesche phralența neevrei anda codoia că daralas catar le creștini evrei. O apostolo Pavel sicadea că lesco phiraimos sas sar ieche manușesco ipocrito, cai phenelas iech buchi hai cherelas aver. (Gal. 2:11-14) O Petru hachiardea că ci phiradea-pe mișto hai cărdea paruimata. Ande le dui lila, vo sicadea că ci arăsăl te simțosaras iubirea caring amare phrala hai pheia, trebul vi te sicavas-la.

10. So va ajutil-ame te sicavas „iech afecțiunea phralicani nehohamni”? Explichin. (1 Petru 1:22)

¹⁰ Ande pesco dintuno lil, o Petru phendea că trebul te avel amen „iech afecțiunea phralicani nehohamni”. (Citisar 1 Petru 1:22.) Vo phenel vi so va ajutil-ame te cheras cadai buchi: „i ascultarea anda o ciacimos”. Anda cado ciacimos cherel partea vi o principio andal Fapte 10:34, 35: „o Del nai-lo părtinitorii”. Cadea că, ci daisaras te phenas că așunas le Isusostar dacă iubisaras chichiva phralen anda i congregația, hai le coveren nici. Si ciaces, cadea sar o Isus, vi amen daisaras te avas mai pașarde chichiva phralendar. (Ioan 13:23; 20:2) Tha o Petru anel amenghe andi goghi că si importanto te sicavas iech bari iubirea caring sea amare phrala hai pheia, cadea sar si ande iech familia. (1 Pet. 2:17)

11. So camel te phenel i duma ‘te iubisaras-ame zurales iech averes, anda ilo’?

¹¹ O Petru zuriardea-ame ‘te iubisaras-ame zurales iech averes, anda ilo’. Cade, i duma te iubisaras „zurales” camel te phenel că trebul te iubisaras varecas vi cana si amenghe pharo te sicavas cadaia caring leste. Sar exemplo, cana iech phral sau iech phei duchavel-ame, daștil-pe că avel amenghe te phiravas-ame vi amen nasul lența, na iubireaia. Tha o Petru sichilea catar o Isus că cado phiraimos ci ciaiol le Devles. (Ioan 18:10, 11) Vo scriisardea: „Na pochinen parpale nasulimaia anda nasulimos sau acușimaia anda acușimos, tha pochinen parpale prin iech binecuvântarea”. (1 Pet. 3:9) Cadea că, te mechas ca i iubirea te cherel-ame te avas lașe hai te sicavas pachiv vi caring codola cai duchade-ame.

12. a) So aver vareso ajutil-ame i zurali iubirea te cheras? b) Pala so dichlean o materialo video Te las sama po cuci phanglimos cai si mașcar amende, so phenel tuche chio ilo te cheres?

¹² Ande pesco dintuno lil, o Petru folosil i duma „iubirea zurales bari” cai ameal codolaia de mai opral. Iech iubirea sar cadaia pachiarel „but păcatea”, na numai chichiva. (1 Pet. 4:8) Daștil-pe că o Petru andea pesche andi goghi iech sicaimos anda iertarea cai dea-le lesche o Isus bărșența mai anglal. Atunci o Petru, pachiaia că sas-lo iech manuș lașio anda codoia că phendea că daștilas te iertil pesche phrales „ji 7 var”. Tha, o Isus sicadea-les că i ciaci iertarea însemnol te daștil te iertil „ji 77 var”, aver varesar phendo, sea o timpo. (Mat. 18:21, 22) Cado sicaimos si lașio vi anda amende. Si pharo anda tute te iertis? Dacă da, na av perado. Anda codoia că sile imperfecți, sea le slujitori le Iehovasche nachle prin cadaia. Tha, i mai importanto buchi acana, si te cheres sea so daștis caște iertis che phrales hai te rodes i pacea leia. c

13. Sostar daștil te avel pharo poiechdata le phurenghe te arachen penghe timpo anda i păstorirea?

¹³ Daisaras te pachias ciaces, că o Petru ci bâstărdea le dumes cai phendea-le lesche o Isus pala so sas-lo uștiado andal mule: „Le sama pe mânre bacrorea!”. (Ioan 21:16) Dacă san phuro, cado sfato si vi anda tute. Tha, daștil te avel pharo anda iech phuro te arachel pesche timpo anda cadai buchi importanto. Le phure trebun mai anglal te len sama ca lenghe familien te aven-len sea so trebul lenghe, ca sea le jene andai familia te simțom-pe iubime hai te ajutin-le te pașion le Iehovastar. Sa cadea, von trebun te aven zeloso andi predicarea hai vi te pregătin hai te încăren le teme catar le întruniri hai catar le congresea. Mai but, chichiva anda lende cheren partea anda le comitetea cai încăren o phanglimos le spitalența sau, cheren buchi anda o Departamento localo ande savo vazden-pe hai lașiaren-pe le Săli le Regatosche. Le phuren silen ciaces but buchia te cheren!

14. So daștil te ajutil le phuren te păstorin i turma? (1 Petru 5:1-4)

¹⁴ O Petru zuriardea codolen cai slujinas sar phure, cadea sar vo: „Păstorin i turma le Devleschi”. (Citisar 1 Petru 5:1-4.) Dacă san phuro, jianas că tu iubis ciaces che phralen hai pheian hai că cames te păstoris-le. Tha, daștil-pe că poiechdata si tut cadea de but buchia te cheres sau san cadea de chino, că ci mai arăsăs te cheres cadaia. So daștis te cheres? Pâtăr chio ilo angla o Iehova hai de duma leia anda sea che phare gânduri. O apostolo Petru scriisardea: „Dacă varecon slujil, te cherel cadaia, prin o zuralimos cai del-les o Del”. (1 Pet. 4:11) Mai but, na bâstăr că che phrala sau pheia daștin te nachen prin pharimata cai ci va avena lașiarde cu sea numai andi lumea nevi. Tha încăr ande chi goghi că „o mai baro păstoro”, o Isus Cristos, daștil te cherel anda lende so tu ci daștis. Vo va avela pașa lende vi aghies, hai vi andi lumea nevi. Sea so manghel o Del manghel le phurendar si numai te iubin penghe phralen, te păstorin-le hai te aven „exemplea anda i turma”.

15. Sar păstoril iech phuro le bacrean le Devlesche? (Dich vi i imaginea.)

¹⁵ O William, cai slujil de but timpo sar phuro de congregație, hachiarel chichi de importanto si i păstorirea. Cana astardea i  pandemia de COVID-19, vo hai le coaver phure șiute ande penghi goghi te den duma ande fiesavo curco sea le phralența anda lenghi grupa de serviciu. Vo phenel sostar sas cadaia i mai importanto buchi cai trebunas te cheren-la: „But phrala sas-le corcore hai daștinas sigo te mechen-pe perade catar le phare gânduri”. Cana iech phral nachel prin iech pharimos, o William așunel-les atento caște hachiarel so duchavel-les hai so siles nevoia. Pala codoia, vo rodel sicaimata sau materialea video pa amaro site-o caște zuriarel-les. Vo phenel: „Aghies, le phralen silen mai but nevoia sar oricana te aven păstorime. Amen das amari zor te ajutisaras le manușen te prinjianen le Iehovas. Tha, trebulas te das amari zor sa cadea de but te păstorisaras le bacrean anda leschi turma, caște ajutisaras-le te așen ando ciacimos”.

16. Sar daisaras te folosisaras le sicaimata cai dichleam-le anda le lila scriime catar o Petru?

¹⁶ Ande cado articolo, dichleam, numai chichiva sicaimata anda le dui lila scriime catar o Petru tela inspirația. Daștil-pe că vi tu dean chi sama că trebul te lașiares anumime buchia. Sar exemplo, ciaiolas-tu te gândis-tu mai butivar ca le miștimata cai va avena tut andi lumea nevi? Șiutean tuche andi goghi te des duma anda i vestea lași, ca i buchi, ca i școala sau ande aver than? Gândisardean-tu sar daștis te sicaves iech iubirea zurali caring amare phrala hai pheia? Phure, san hotărâme te păstorin i turma le Iehovaschi anda sea o ilo? Cana des chi zor te diches sincero sar san, daștis te araches chichiva buchia cai trebul te lașiares-le. Tha na av perado! „O Rai silo lașio” hai va ajutila-tu te cheres le paruimata cai cames-le. (1 Pet. 2:3) O Petru zuriarel-ame: „[O Del] va avela te îngărel sfârșitoste tumari formarea. Vo va cherela tumen fermi, va zuriarela tumen, va ajutila tumen te na peren”. (1 Pet. 5:10)

17. Dacă așias zurales hai mechas-ame sicade le Iehovastar so miștimata va avena amen?

¹⁷ Mai anglal, o Petru pachialas că ci meritil te beșel pașa o Șiav le Devlesco. (Luca 5:8) Tha, le ajutoroia pherdo iubirea catar o Iehova hai o Isus, o Petru ci mechlea-pe hai gălea mai dur pala o Cristos. Cadea, o Iehova mechlea le Petros te jial andre „ando Regato veșnico amare Raiesco hai Salvatoresco, o Isus Cristos”. (2 Pet. 1:11) So șucar pochinimos! Dacă, cadea sar o Petru va avela te așes zuralo ando pachiamos hai va avela te meches le Iehovas te sfârșil chi formarea, vi tu va avela te primis o pochinimos anda i viața veșnico. Va avela te ‘arăsăs ca o miștimos cai anel-les chio pachiamos, chi salvarea’. (1 Pet. 1:9)