Năștisailem ando Ciudad Obregón, ando nordo le Mexicosco. Somas o panji-to anda le enia șiave. Beșlemas avri anda o foro, cai mânre dades sas-les iech ferma țâni. Placialas ame i viața de othar, hai amari familia sas fericime hai chidini. Tha cana sas-ma numai panji bărș, amari ferma sas distrugime de iech uragano hai trebuisardea te muchisaoas ame ande aver foro.

 Mânro dad începosardea te cherel but love, tha începosardea vi te pel pimos, hai cadaia cărdea but nasul amara familiache. Me hai dui anda mânre mai bare phral începosardeam te peas țigări; cioremas țigări mânre dadestar. Cana sas-ma numai șov bărș, machilem i iechto data. Pa hanțî timpo pala codoia, mânri dei hai mânro dad mechle-pe, hai me pilem pimos hai țigări vi mai but.

 Mânri dei muchisaili avere murșăia hai lea vi amen laia. Codo murș ci delas-la love, hai ame ci daisardeam te traisaras anda codola cai cărelas-le voi. Cadea că me hai mânre phral cărdeam buchi sea felo, tha traisardeam de pe-ch ghies pe ocoaver. Me choslemas pantofi hai bichinoas manro, ziarea, guma hai aver buchia. Mai but, rodemas hamasco andel tomberoanea catar le chărea le manușenghe barvale.

 Cana sas-ma deș bărș, iech manuș phendea manghe te cherav buchi leia cai i groapa de gunoi anda o foro. Somas de acord, cadea că mechlem i școala hai tilardem chăral. Delas-ma mai hanțî de iech dolaro pe ghieseste hai delas-ma hamasco andai groapa de gunoi. Le manuș de pașa mande denas duma urâto hai sas-le iech viața imoralo. But anda lende lenas droguri hai penas pimos. Codol bărșa sas le mai urâto anda mânri viața: rovlem ande fiesavi riat hai izdroas daratar. Pentru că traisaroas ando ciorâmos hai nas-ma școala, sas manghe foarte lajiav. Beșlem ca i groapa de gunoi cam trin bărș, pala codoia muchisailem ande-ch aver stato anda o Mexico. Coce cărdem buchi po câmpo: chidemas lulughia, bumbaco, trestia zahăroschi hai cartofi.

 Ștar bărș mai târzio risailem ando Ciudad Obregón. Iech anda mânre bibea, savi sas drabarni, dea-ma iech camera ande laco chăr. Oce începosarde te aven-ma sune urâto hai cărdilem cadichi de depresivo, că gândisailem te lav mânri viața. Ande iech riat rughisailem le Devlesche hai phendem lesche: „Devla, dacă existis, mech-ma te prinjianav-tu hai va avela te slujiv tuche sea i viața. Cana si iech religia ciaci, camav te prinjianav-la”.

 Sea o timpo placiaia-ma te așunav pa o Del. Cana somas țâno, gălem ande mai but changherea, tha de fiesavi data ci arachlem vareso lașio. Delas-pe duma foarte hanțî andai Biblia hai niciech religia ci ajutisardea-ma te prinjianav le Devles. Ande unele changherea sas mai importanto le love hai ande aver le manușen othar sas-le iech viața imoralo.

 Cana sas-ma 19 bărș, iech anda mânre cumnați phendea manghe că le Martori le Iehovasche sicade lesche so phenel i Biblia anda le icoanea andi închinarea. Citisardea manghe o Exodo 20:4, 5, cai phenel-pe te na cheras amenghe chipuri cioplite. Ando verseto 5 phenel-pe: „Te na banghios angla lende hai nici te meches-tu athado lendar, pentru că me, o Iehova, chio Del, som iech Del savo manghel devoțiunea anda sasto ilo”. Anda codoia mânro cumnato pușlea-ma: „Dacă o Del folosilas-pe catar le imagini caște cherel miracolea sau dacă camelas te folosisaras-le andi închinarea, atunci sostar interzicil-le?”. Cadaia cărdea-ma te gândima. Pala codoia, mai dem duma leia chichivar anda subiectea biblico. Placianas-ma cadichi de but cadal discuții, că ci demas mânri sama sar nachel o timpo.

 Mai târzio, mânro cumnato îngărdea-ma ca iech întrunirea le Martorenghi le Iehovasche. Cadea vroiși ci mai dichlemas hai ci mai așundemas ande aver than. Chiar vi le tărnen sas-le părți ando programo hai denas duma cursivo! Phendem manghe: „Ce sicaimos șucar primin le manușa cace!”. Chiar dacă sas-ma o bal lungo hai somas melalo, le Martori primisarde-ma anda sea lengo ilo. Iech familia chiar achardea-ma te hav lența palai întrunirea!

 Pala o studio bazome pi Biblia încărdo le Martorența le Iehovasche arăzlem te jianav că o Iehova si iech Del iubitorii cai duchal-les amendar hai anda leste ci contil sar barileam, cana si ame love sau nici, ce rasa sam sau cana si ame școala sau nici. Vo silo ciaces imparțialo. (Faptele 10:34, 35) Ji la urmă, arăzlem te prinjianav le Devles! Ci mai simțosarde-ma nefericime hai ci mai somas nango andral.

 Mânri viața cărdili but mai lași. Mechlem le țigări hai o pimos hai ci mai dem duma urâto. I holi cai sas ande mande încă de cana somas țâno ci mai cărdea pharo mânro ilo, hai le sune urâto nachle le timpoia. Acana ci mai pachiav că nai-ma valoarea hai nachlem pa o fapto că nai-ma școala.

 Sima iech șucar rromni, cai iubil le Iehovas hai voi si manghe iech sprijino. Acana slujiv sar supraveghetorii itineranto hai jiav andel congregații le Martorenghe le Iehovasche caște zuriarav-le hai te phenav ciacimata biblico mânre phralenghe de credință. Datorime le sicaimasche foarte lașio cai dea-les amenghe o Del, hai vi i mângâierea cai primisardem-la andai Biblia, manai manghe lajiav mandar.