Sar Martori le Iehovasche, camas te avas creștini cadea sar sicadea-ame o Isus hai sar sas lesche apostoli. Cado articolo sicavel ande so pachias ame.

1.   Del. Ame slujisaras le corcore ciace Devlesche, o Mai Zuralo hai o Creatorii, casco anav si Iehova (Psalmo 83:18; Revelația 4:11). Vo si o Del le Avraamosco, le Moisesco hai le Isusosco (Exodo 3:6; 32:11; Ioan 20:17).

2.   Biblia. Pachias că i Biblia si o Cuvânto inspirime le Devlestar, cai siles iech mesajo andal manușa (Ioan 17:17; 2 Timotei 3:16). Amaro pachiamos bazol-pe pe sea-l 66 lila la Bibliache cai arachen-pe vi ando „Purano Testamento” hai vi ando „Nevo Testamento”. O profesorii Jason BeDuhn phendea că si ciaces cadai buchi cana scriisardea că le Martori le Iehovasche bariarde „pengo pachiamos hai o modo sar phiraven-pe numai pi Biblia, bi te phenen mai de anglal so camenas te arachen ande late”. *

    Chiar cana acceptisaras sea i Biblia, ci sam creștini fundamentaliști. Pachias că ande chichiva thana andai Biblia si folosime iech limbajo figurato sau simbolico hai, anda codoia, codol pasajea ci trebun hachiarde literalo (Revelația 1:1).

3.   Isus. Urmisaras le sicaimata hai o exemplo cai meclea-les amenghe o Isus Cristos hai anas lesche pachiv că vo si amaro Salvatorii o Șiav le Devlesco (Matei 20:28; Fapte 5:31). Anda codoia, sam creștini (Fapte 11:26). Cu sea cadala, sichileam andai Biblia că o Isus ci silo o Del o Mai Zuralo hai că i doctrina andai Treimea nai-li bazome pi Scriptura (Ioan 14:28).

4.   O Regato le Devlesco. Si iech guverno cerisco ciacio, hai nai-lo ando ilo le creștinengo. Vo va paruvela le guvernea le manușenghe hai va pherela o scopo le Devlesco la phuveaia (Daniel 2:44; Matei 6:9, 10). Vo va cherela cadai buchi pa țâra timpo, anda codoia că le profeții biblico sicaven că traisaras andel „ghiesa de palal” (2 Timotei 3:1-5; Matei 24:3-14).

    O Isus si o rege le Regatosco cerisco le Devlesco. Vo începosardea te rail ando 1914 (Revelația 11:15).

5.   Salvarea. I jertfa de răscumpărare dini le Isusostar cherel posibilo te avas salvime anda o păcato hai merimos (Matei 20:28; Fapte 4:12). Ca le manușa te țârden miștimata anda cadai jertfa, na-i destul te sicaven pachiamos ando Isus, tha trebul te paruven penghi viața hai te bolen-pe (Matei 28:19, 20; Ioan 3:16; Fapte 3:19, 20). Sar phiravel-pe iech manuș sicavel dacă lesco pachiamos si jiuvindo (Iacov 2:24, 26). Cu sea cadala, i salvarea ci daștil te avel meritime; voi sili amenghe dini prin o „lașimos nemeritime” le Devlesco (Galateni 2:16, 21).

6.   Cerii. O Iehova Del, o Isus Cristos hai le îngeri fidelo beșen ando than spiritualo (Psalmo 103:19-21; Fapte 7:55). * Iech număro țâno, 144 000 manușa, va avena jiuvindime viațate ando cerii caște rain ande iech than le Isusoia ando Regato (Daniel 7:27; 2 Timotei 2:12; Revelația 5:9, 10; 14:1, 3).

7.   Phuv. O Del cărdea i phuv caște avel o chăr veșnico le manușengo (Psalmo 104:5; 115:16; Eclesiasto 1:4). O Del va anela bare miștimata le manușenghe ascultători, iech sastimos perfecto hai viața veșnico ande iech paradiso pi phuv (Psalmo 37:11, 34).

8.   O nasulimos hai i suferința. Cadala începosarde cana iech andal îngeri le Devlesche răzvrătisardea-pe (Ioan 8:44). Cado îngero, pala i răzvrătirea arăslea te bușiol „Satan” hai „Diavolo”. Vo cărdea le iechto manușen te așen de leschi partea, hai so urmisardea sas foarte nasul anda lenghe șiave. (Geneza 3:1-6; Romani 5:12). Caște rezolvil le probleme moralo cărde le Satanostar, o Del meclea o nasulimos hai i suferința, tha vo ci va mechela te așen cadea le buchia sea o timpo.

9.   Merimos. Le manușa cai meren ci mai existin (Psalmo 146:4; Eclesiasto 9:5, 10). Von ci sile chinuime ande iech iag veșnico.

    O Del va anela pale viațate miliardea manușen prin o jiuvindimos (Fapte 24:15). Cu sea cadala, codola cai pala o jiuvindimos ci camen te sichion le Devlesche norme va avena distrugime anda sea o timpo, bi te mai avele i speranța le jiuvindimaschi (Revelația 20:14, 15).

10.   Familia. Respectisaras i căsătoria, cadea sar o Del mechlea-la catar o începuto, sar iech phanglimos mașcar iech murș hai iech jiuvli. O corcoro motivo ciacio anda o divorțo si i imoralitatea sexualo (Matei 19:4-9). Pachias că le lașe sfaturi andai Biblia daștin te ajutin le familien te aven fericime (Efeseni 5:22–6:1).

11.   Închinarea. Ci închinisaras-ame co trușul hai ca nici iech imaginea (Deuteronomo 4:15-19; 1 Ioan 5:21). Amari închinarea însemnol:

    •   Te rughisaras-ame le Devlesche (Filipeni 4:6).

    •   Te citisaras hai te studiisaras andai Biblia (Psalmo 1:1-3).

    •   Te meditosaras soste sichioas andai Biblia (Psalmo 77:12).

    •   Te jias co întruniri, cai rughisaras-ame, studiisaras i Biblia, ghilabas, sicavas amaro pachiamos hai zuriaras amare phralen hai vi avren (Coloseni 3:16; Evrei 10:23-25).

    •   Te predichisaras ‘vești lașe anda o Regato’ (Matei 24:14).

    •   Te ajutisaras codolen cai sile nevoia (Iacov 2:14-17).

    •   Te vazdas hai te încăras ande condiții lașe le săli le Regatosche hai vi aver clădiri folosime caște bariaras amari lucrarea anda o sicaimos biblico pe sea i phuv (Psalmo 127:1).

    •   Te ajutisaras cana si dezastrea (Fapte 11:27-30).

12.   Amari organizarea. Sam organizâme ande congregații. Fiesavea congregația sila iech corpo phurenghi cai supraveghil-la. Cu sea cadala, le phure ci cheren partea anda iech clasa clericalo hai ci sile pochinde (Matei 10:8; 23:8). Ci mangas zeciuiala, hai amare întrunirende ci chiden-pe love (2 Corinteni 9:7). Sea-l buchia cai cheren-pe ande amari organizația sile susținime prin donații anonime.

     O Corpo de Guvernare, iech grupo țâno creștinengo maturi cai slujil ca amaro sedio mondialo, del îndrumări andal Martori le Iehovasche pa sea i phuv (Matei 24:45).

13.   O phanglimos mașcar amende. Le sicaimata ande save pachias unil-ame pe sea i phuv (1 Corinteni 1:10). Cheras eforturi te na aven mașcar amende diferențe socialo, etnico, rasialo sau de rango (Fapte 10:34, 35; Iacov 2:4). Chiar dacă sam unime, fiesavo si libero te alosarel andel buchia personalo. Fiesavo Martoro lel decizii cadea sar phenel leschi conștiința sicadi andai Biblia (Romani 14:1-4; Evrei 5:14).

14.   Amaro phiraimos. Șioas eforturi te sicavas iubirea ciaci ande sea so cheras (Ioan 13:34, 35). Ci cheras buchia cai na anen pachiv le Devlesche, sar avelas te folosisaras greșime o rat prin transfuzii ratescă (Fapte 15:28, 29; Galateni 5:19-21). Sam manușa pașnici hai ci las partea ca-l războaia (Matei 5:9; Isaia 2:4). Respectisaras o guverno le themesco cai traisaras, hai vi le legi dine cadalestar, chichi timpo ci manghel amendar te uștavas le legi divino (Matei 22:21; Fapte 5:29).

15.   Amare relații avrența. O Isus phendea: „Te iubis che pașardes sar tut”. Vo mai phendea că le creștini „ci cheren partea andai lumea” (Matei 22:39; Ioan 17:16). Anda codoia, das amari zor „te cheras so si mișto caring sea-l manușa”, tha ci șioas ame andi politica hai ci hamisaras-ame avere religiența (Galateni 6:10; 2 Corinteni 6:14). Cu sea cadala, respectisaras avren cana alosaren aver vareso (Romani 14:12).

 Dacă mai situ vi aver pușimata anda so pachian le Martori le Iehovasche, daștis te citisares mai but anda amende pe amaro site-o, te les i legătura iecha anda amare filiale, te jias ca iech întrunirea catar iech sala le Regatoschi sau te des duma ieche Martoreia anda o than cai beșes.