Kupwa kwa kumubatish ni kwikal Kaman wa Yehova, nambaz Zarina wadiokala mu Risi mulong wa kuya kushakam mwi ngand yend ya chivadik mu Aziy pa Pakach; wachirika nich mupak wa kuyilil anend amband aad mu ritiy. Mulong kadingap ni nfalang jivud, washakama mu kapalakany kamwing pamwing nau anvajend ni mwanamakwend ni nkwendiend. Anvajend amuleja anch kangal wayifundish anend uyakin wa Bibil. Ayileja kand anend amband anch kangal isamba ni makwau piur pa Bibil.

 Zarina watonga nakash piur pa mutapu wa kuyikwash anend kwilej piur pa Yehova. (Jinswir 1:8) Chawiy wamulembila Yehova nakash ni wamwita umutakel ni manangu. Kupwa Zarina wasala kukwatijan ni malembil mend mu kusambish kwendangan nau anend oku ukat kuyilej piur ya yom yishimwokishena yatangay Nzamb. Kusal mwamu kwayikwasha ayangandim kusambish kwijik yivud piur pa Sakatang.

 Kupwa, Zarina wakimba mutapu ukwau mulong wa kuyikwash anend kwilej yivud. Wasambisha kufund maparagraf ni yipul yawonsu yidia mu buku Chom ik Chakin Kamu Chifundishinay Bibil? * ni wayifundinang pa tuyikunku twa mapaper. Wawejaku kand yom yikwau mulong wa kuyikwash anend kutesh yom nawamp. Kupwa wajindjikang tuyikunku twinetu twa mapaper pamwing ni pensil mu kapalakany ka kowil, mwinshin mwa mashiny ma kututin masun. Anch anend andam mu kapalakany ka kowil, atangang ma paragraf ni afundang niyau yakul yau.

 Kusutil mutapu winou, Zarina wileja mashapitre maad ma buku Chitufundishinay Bibil nau anend kurutu awiy awonsu asatu amana ndond yikwau ya kushakam. Kwinakwa, watwisha chad kuyilil anend nawamp pakad chakamish. Mwi Ngond wa 10 muvu wa 2016, anend awonsu aad ayibatisha, ni asangara nakash mulong makwau wasadina manangu ni kubabal mulong wa kuyidish mu spiritu.