Madián ni Marcela ading ni mwom uwamp mu musumb wa Medellín mu Kolombi. Madián amufutang nfalang jivud ku mudimu wasalangay, ni chinech chasala anch ikal ni chikumbu chiwamp cha kushakam. Pakwez mulong ading atushalapol a Yehova Nzamb, yom yimwing yayibachika kushinshikin yom yading yitekinau pa ndond ya kusambish mu mwom wau. Arumburil anch: “Mu muvu wa 2006, twakumangan ku chitentam cha pakampwil cha dichuku dimwing chading chilondina anch: ‘Lam Dis Diey Zwang.’ Madiskur mavud matukasikesha kupipej mwom wetu mulong wa kumusadin nakash Yehova. Pitwadiokala ku chitentam, twajingunina anch mwom wetu wading chinyim ni yom twileja. Twading ni chaku cha kuland yom chisu, ap pa chisu tuburedina nfalang, chawiy twikala ni mabaz nakash.”

 Kupwa kwa kutesh kubabesh kwinoku kwa mu spiritu, Madián ni Marcela asambisha kupipej mwom wau. Alondin anch: “Twimika kusadin nfalang jivud nakash. Twabuukina mu kachikumbu kakemp, twalandisha motak wetu, ni twalanda tukutuku.” Chikwau kand, imika kwendangen ku jindond ja kulandishin chakwel kangal ris rayibachik kuland chom. Asambisha kusutish chisu chivud mu kuyifundish amutej nau piur pa Bibil. Ni asambisha kusutish chisu pamwing ni arund ading amusadidina Yehova nich mushiku mud ayibol a pakampwil. *

 Pakad kulab, Madián ni Marcela akwata mupak wa kutanduril mudimu wau ni abuukina mu kachikumangen kading ku makunku mwading maswir ma ukwash. Madián washa mudimu wend mulong wa kubuuk. Mukurump wend wa mudimu kwovap kurumburik piur pa mupak wakwatay wa kusha mudimu uwamp mwamu. chawiy Madián wamutongisha kusutin kumwipul anch: “Ukwet nfalang jivud nakash, pakwez ov, ukwet musangar?” Mukurump wa mudimu walonda anch bwat, mulong wading ni milong yivud nakash yakadiay mutapu wa kupwish. Kupwa Madián wamuleja anch: “Chawiy, yom ya usey nakash mu mwom wa muntu kadiap uvud wa nfalang jitanyinay. Pakwez chid kukimb yom yikutwisha kumuletin chakin musangar. Kuyifundish antu akwau piur pa Nzamb kwinletidin am ni mukajam musangar, ni tukatin kwikal ni musangar nakash mu kusutish chisu chivud nakash mu mudimu winou.”

 Madián ni Marcela akwet katat musangar nakash, mulong kumusadin Nzamb chawiy chom chidia pa ndond ya kusambish mu mwom wau. Mu mivu 13 yasutina ey, akwashin kwi ndond kwadia maswir nakash mu chikumangen chidia kwiyand kwa Kolombi. Katat akwet dilau dia kusal mud ayibol a pakampwil.