Ching antu akat kusal mudimu wa kulejan rusangu ruwamp ra Want wa Nzamb ngond ni ngond awiy tukata kuchind mudi Atuman a Yehova. (Mateu 24:14) Mu uvud winou mudi kand antu abatishinau kal mudi Atuman ni akad kal kubatishau awanyishinau yom yitinau mulong wa kulejan.

Bwat. Kadiap nfalang jikutwishay muntu kupan, ap yisend ni midimu yikwetay mu dirijek dietu yikutwisha kusal anch amuchinda kwikal Kaman. (Midimu 8:18-20) Chawiy, twijap majin ma antu akata kupan yipan. Kaman mwawonsu ukat kupan chisu chend, usu wend ni yom yikwetay mulong wa kukwash mudimu usadikina pa mangand mawonsu kukwatijan ni rusot rend ni mashakamin mend.—2 Korint 9:7.

Ngond ni ngond, Atuman akat kupan rapor wau wa mudimu wa kulejan ku yikumangen ya pol pau. Akat kupan rapor winou kwa kwikatin.

Yikumangen yikat kuchind rapor winou ni kutum uvud wawonsu ku biro wa mutiy wa ngand yau. Biro wa mutiy niyend ukat kutum uvud winou ku biro mujim wa pa mangand mawonsu.

Kwinsudiel kwa muvu win wawonsu wa mudimu, b akat kuchind uvud wa Atuman adia mu jingand jawonsu. Akat kubomb uvud winou mulong wa kwijik uvud wa Atuman adia pa mangand mawonsu. Marapor ma jingand akat kumalejan mu chikunku chitazukinau anch « Aux 4 coins du monde » pa internet wetu. Marapor minam makat kutukasikesh mudi mumayikasikesha in Kristu a kusambish.—Midimu 2:41; 4:4; 15:3.

Ap anch tukuyichindangap antu inay pakach pa Atuman, tukat kuyak nich musangar ku yikumangen yetu. Avud pakach pau akumangen kal ku Chivurikish cha rufu ra Kristu chisadikininga muvu wawonsu, chawiy uvud wa antu akumangena ku chinship chinech ukutwish kushalijan ni uvud wa Atuman. Mu muvu wa 2023, antu akumangena ku Chivurikish ading 20 461 767.

Antu akad kukumangan ku yikumangan yetu, akat kutaninamu mu program wa kwilej Bibil pakad kufut nfalang ku yikumbu yau. Mu muvu wa 2023, twatakedil malejan ma Bibil 7 281 212 ngond ni ngond, yisu yimwing kudi antu avud tukata kwilej nau pa chisu chimwing.

Yisu yivud guvernema ukat kuchind antu mu kuyipul antu egliz udiau. Chilakej, biro wa kuchind antu wa États-Unis ulondin anch kukimbijol kwau “kwading kwa kukimb mulong wa kwijik antu ipwilau ading in kwitiyij a mu egliz kanang,” uwejidinaku anch uvud wikalangau nich wading “wimedin pa yitongijok ya muntu amwinend, kadiap pa uman.” Chinyim ni chinech, tukat kuchind anch muntu udi Kaman wa Yehova ching antu akata kuyilej antu akwau rusangu ruwamp ni kupan rapor wa mudimu wau, kulik antu alondina ayinau anch adi Atuman.