DIAKASATU pamanch machuku ma ngond 24 Ngond wa 1, 2018, dijuku dia Betel dia mu États-Unis ni dia mu Canada diasangara nakash pateshau kwijikish kulondina anch: Mukadivar Kenneth Cook, Jr., amuwejinang kal mu Chisak Chitakedila cha Atuman a Yehova.

Mukadivar Cook wavadikina ni wapamina mu centre-sud wa Pennsylvanie, mu États-Unis. Wileja uyakin kusutil murund nend wa ku shikol padingay piswimp ni kukwat diplom diend ni watambula dibatish machuku ma ngond 7 Ngond wa 6, 1980. Wasambisha mudimu wa chisu chawonsu mudi chibol wa rawonsu machuku ma ngond 1 Ngond wa 9, 1982. Kupwa kwa kusal mudimu wa uchibol mu mivu yaad, amutazuka ku Betel, ni wasambisha mudimu wend ku Betel machuku ma ngond 12 Ngond wa 10, 1984 ku Wallkill mu New York.

Mu mivu 25, Mukadivar Cook wasala midimu kushalijan, ku Departema wa Kuchap Mikand ni ku Biro wa Betel. Watijana ni nambaz Jamie mu muvu wa 1996, niyend wasambisha mudimu wa ku Betel ku Wallkill. Mwi Ngond wa 12, 2009, Mukadivar ni Nambaz Cook ayituma kusadil kwi Ndond ya Malejan ma Watchtower ku Patterson mu New York, ni kwinikwa Mukadivar Cook amuteka kusadil ku Departema wa Kufund ni Kutum Mikand. Mwi Ngond wa 4, 2016, pachirikay ku Wallkill, Mukadivar ni Nambaz Cook ayituma kand ku Brooklyn mu New York. Kupwa kwa angond atan, ayitazuka ku biro mujim wa pa mangand mawonsu ku Warwick mu New York. Mwi Ngond wa 1, 2017, Mukadivar Cook amutonda kwikal nkwash wa Komite wa in Kufund wa Chisak Chitakedila.