1. Mutapu ik ukutwisha kumurumburil muntu ukweta riy?

ANCH twatongijokin piur pa chidiay muntu ukweta riy, tukutwish kutong anch ud muntu muwamp, mwin kubangin, ukweta ranaken, ni mwin kupan. Tukutwish kand kuvurik rusang ralejanay Yesu piur pa mwin Samaria muwamp. Muntu wadinga wa muchid ukwau “wamwovila riy” mwin Yuda wabulau kud ampopol ni kumwiy yom. Mwin Samaria “wamwovila riy nakash” mulong wa yitat yamupusolau ni wamusenda nich rukat. (Luka 10:29-37) Chishimu chinech chimekeshin mwikadil upandikena kuwap wa Nzamb​—riy. Mwikadil winou ud chikunku cha rukat ra Nzamb ni ukat kutumekeshinau pichuku pichuku mu mitapu kushalijan.

2. Mutapu ik ukwau ukutwishay muntu kumekesh riy?

² Kud mutapu ukwau ukutwishay muntu kumekesh riy. Muntu ukweta riy ukutwish kukwat mupak wa kulik kumupup muntu wading uwanyidina kupup. Pa mulong winou, Yehova ukat kutumekeshin kamu riy nakash. Nfund a kuseng walonda anch “[kakutusadinangap] mudi mudia yitil yetu.” (Kus. 103:10) Pakwez yisu yikwau, Yehova ukutwish kamu kumupup nakash muntu wasalang chitil.

3. Yipul ik tukushinshikina?

³ Mu mutu wa mulong winou, tukwisambin yipul yisatu: Mulong wak ukatay Yehova kumekesh riy? Ov, kud kwovijan pakach pa kumupup kamu muntu nakash ni riy? Ni yom ik yikutwisha kutukwash kumekesh riy? El tumanany yakul ya Dizu dia Nzamb ku yipul yiney.

4. Mulong wak Yehova ukat kumekesh riy?

⁴ Yehova ukatining kwikal mwin riy. Kambuy Paul amupepila chakwel afunda anch Nzamb ud ‘mwin riy ripandakena.’ Pinap Paul warumburila anch Nzamb ud mwin riy mulong wapana ruchingej ra kushakam mwiur kud antu akad kuwanyin, atushalapol  end azizidilau many. (Efes 2:4-7) Pakwez Yehova kakatap kumekesh riy ching kusu kud atushalapol end azizidilau many. Nfund a kuseng David wafunda anch: “[Yehova] ukat kumekesh kuwap kwend kudi antu awonsu. Ndiy ukat kuyovil yitang yend yawonsu riy.” (Kus. 145:9) Mulong Yehova uyikatin antu, ukat kuyimekeshin riy chisu chawonsu anch ukwet mayingishin ma kusal mwamu.

5. Mutapu ik wilejay Yesu piur pa riy ra Nzamb?

⁵ Yesu ndiy muntu wija nawamp nakash mutapu ukatinay Yehova kumekesh riy. Tatuku ni Mwan ashakama pamwing mwiur mu mivu yivud nakash kurutu Yesu avadik pansh. (Jnsw. 8:30, 31) Tupamp tuvud, Yesu wamanang mutapu wamekeshangay Tatukwend riy kud antu akayitil. (Kus. 78:37-42) Mu mafundish mend, Yesu wisambina yisu yivud piur pa mwikadil winou uwamp wa Tatukwend.

6. Mutapu ik watukwashay Yesu kwijik riy ra Tatukwend?

⁶ Mud mwalejanangau mu mutu wa mulong wasambelang, Yesu wasadina chishimu cha mwan washadika mulong wa kutukwash kwijik mutapu ukatinay Yehova kumekesh riy. Mwan wadiokala kwol kwau, ni “washesha nfalang jend ku yom yiyimp.” (Luka 15:13) Kupwa kwa kukarumuk ku mwom wend wijondila, wikepisha ni kuchirik kwol kwau. Mutapu ik wasalay tatukwend? Chamwitap mwan winou kuchingel chisu chilemp chakwel amujingunin. Yesu walonda anch: “Pachadingay [mwan] kulemp ni kwol kwau, tatukwend wamumana, wamwovila riy nakash. Ndiy waya mau, wamubwikat mwanend, wamulangwisha nich kususu ku kan.” Tatuku kamukwatishap mwanend usany. Pakwez wamwovila mwanend riy ni kumulikishin, ni wamwaka pachirikay mu dijuku. Mwan washadika warumbuka nakash, pakwez mulong wakarumuka, tatukwend wamulikishina. Mu chishimu chinech, tatuku winou wamekesha riy umumekeshin Yehova. Mu mafundish mend, Yesu wamekesha anch Tatukwend ukatining kuyilikishin antu akarumukina kamu chakin.​—Luka 15:17-24.

7. Mutapu ukatay Yehova kumekesh riy umekeshin mutapu ik anch ukwet manangu nakash?

⁷ Yehova umekeshining riy mulong ukwet manangu nakash. Chisu chawonsu Yehova ukat kukwat mipak yidia yiwamp mulong wa yitang yend. Chawiy chilondinay Bibil anch “manangu madiokila mwiur . . . mizwil nich riy ni yisalijok yiwamp.” (Jak. 3:17) Mud nvaj ukweta rukat, Yehova wijing anch anend akutwish kutaninamu mu riy rend. (Kus. 103:13; Isay 49:15) Mulong Yehova ukat kumekesh riy, antu end akwet ruchingej ra machuku ma kurutu chikalap nchik kuburen kuwanyin kwau. Chawiy, mulong Yehova ukwet manangu nakash, chisu chawonsu ukat  kumekesh riy anch waman anch ukwet mayingishin ma kusal mwamu. Pakwez kud kand yisu yikatay Yehova kulik kumekesh riy rend. Nich manangu, kakatap kumekesh riy rend anch waman anch kusal mwamu kukutwish kumushikij muntu kudandamen mu uyimp wend.

8. Chitin kusal ik yisu yimwing, ni mulong wak?

⁸ Tong bil anch kashalapol wa Nzamb wakwat mupak kwa kwikatin mulong wa kwiyandjik mwi njil ya chitil. Yom ik yifanyidina kumusal? Yehova wamupepila kambuy Paul kufund anch “kangal wovijanany nend muntu” winou. (1 Kor. 5:11) Muntu usadina uyimp pakad kukarumuk akat kumwopat mu chikumangen. Kusal mwamu kud kwa usey nakash mulong wa kuchidij akadivar nau anambaz ashinshamena ni kumekesh anch jinjil ja Nzamb jid jitumbila. Pakwez, chikutwish kuyikasiken antu amwing kuman anch kumwopat muntu mu chikumangen ud uman wa riy ra Nzamb. Ov, chid kamu chakin? El tumanany.

9-10. Kukwatijan ni Hebereu 12:5, 6, mulong wak kumwopat muntu kumekeshin riy? Let chilakej.

⁹ Anch twatesh chijikish ku chikumangan cha win Kristu anch muntu twija ni tukatina “kadiap kand Kaman wa Yehova,” tukat kunenganan nakash. Tukutwish kwiyipul anch chading kamu cha usey kumwopat muntu winou tukatina. Ov, kumwopat muntu kumekeshin kamu chakin riy? Mwaning. Kulik kumupup muntu usadina yom yiwanyidina kumupup chidiap cha manangu, kudiap kumekesh riy ap rukat. (Jnsw. 13:24) Ov, kumwopat muntu kukutwish kumukwash kukarumuk ni kuswimp mwikadil wend? Mwaning, kukutwish. Antu avud awila mu chitil chijim ajingunina anch kuyopat kwading kwa usey mulong wa kuyikwash kujingunin kujimb kwa uyimp wasalau, mulong wa kukarumuk ni kuswimp mwikadil wau, ni kumuchirikin kand Yehova.​—Tang Hebereu 12:5, 6.

¹⁰ Shinshikin chilakej ech. Kafung umwing wajingunin kal anch mukoku wend umwing uyedin. Wij anch chakwel anch mukoku winou ayerik, chitin kumwauril nau amikoku akwau. Chawiy, amikoku yid yitang yikatining kushakam mu chisak, ni mukoku ukat kuwayiway anch amwauril nau akwau. Ov, chinech chimekeshin anch kafung ud muyimp anch wakwat mupak wa kumwauril mukoku nau akwau chakwel ayerika? Bwat kamu. Wij anch ang wamulik mukoku uyedina kushakam pamwing ni akwau, ukuyisamburishin mayej. Anch amwauril mukoku uyedina, kafung ukuchidij chisak cha amikoku akwau.​—Ilakej ni In Levi 13:3, 4.

11. (a) Mu mutapu ik tukutwisha kumufanikesh muntu wopatinau ni mukoku uyedina? (b) Yom ik yifanyidinay kusal muntu wopatinau kal ni ukwash ik ukutwishay kutambul?

¹¹ Tukutwish kumufanakesh mwin Kristu wopatinau ni mukoku uyedina. Niyend uyedin mayej ma mu spiritu. (Jak. 5:14) Tukutwish kufanakesh mayej ma mu spiritu nich mayej makata kusamburok nakash. Chawiy, chid cha usey yisu yimwing kumwauril muntu uyedina mu spiritu ni chikumangen. Dipup dined ud uman wa rukat ra Yehova pantaliken ni antu ashinshamena adia mu diyind Diend, ni kusal mwamu kukutwish kumukwash muntu warumbukina kukarumuk. Muntu wopatinau ukutwish kwend kukumangan ku yikumangan mulong wa kukasikesh kand ritiy rend. Ukutwish kand kwend kutambul mikand yend ya kwilej ni kutal program wa JW Télédiffusion. Ni amakurump akutwish kushinshikin mutapu uyilay kurutu mu spiritu, akutwish kumwinkishang yiyul chisu ni chisu mulong wa kumukwash kurijek urund wend ni Yehova chakwel amuchirish kand mu chikumangen mud Kaman wa Yehova. *

12. Chom ik chimwing cha rukat ni chimekeshina riy chikutwishau amakurump kusal kud muntu wasadina chitil wakad kukarumuk?

 ¹² Chid cha usey kuvurik anch in kusal yitil akad kukarumuk akat kuyopat mu chikumangen. Amakurump ij anch chiyitin kutong nakash kurutu kwa kukwat mupak wa kumwopat muntu. Ij anch Yehova ukat kupupan ‘mu chilik chiwanyidina.’ (Jer. 30:11) Amakurump ayikatin akadivar ni anambaz nau, ni kakutwishap kusal chom ap chimwing chikutwisha kuyipish urund wau ni Yehova. Yisu yimwing, yom yimekeshina rukat ni riy tufanyidina kusal yid kumwopat muntu wasalang chitil mu chikumangen mu chisu kanang.

13. Mulong wak chading cha usey kumwopat mwin Kristu umwing wading mu chikumangen cha Korint?

¹³ Shinshikin yom yasalay kambuy Paul piur pa muntu wasala chitil walika kukarumuk mu mivu chitot ya kusambish. Mwin Kristu umwing wa mu Korint wasala masandj ni mband wa tatukwend. Chid cha runeng nakash! Paul wading wij anch mu Isarel wa pasak, Yehova walejana anch: “Anch muntu walal ni mband wa tatukwend, ndiy wijik kal winzikis wa tatukwend. Awonsu aad afanyidin kuyijip.” (Lev. 20:11) Pakwez, Paul kafanyinap kuchilej chikumangen kumujip mwan winou. Wayileja in Korint anch chifanyidin kumwopat. Mwikadil wa mwan winou wading wasambish kal kwikal ni chibachikin chiyimp pad antu akwau mu chikumangen, mulong antu amwing amana anch chadingap kwau chitil chikash!​—1 Kor. 5:1, 2, 13.

14. Mutapu ik wamekeshay Paul riy piur pa nsand wopatau mu chikumangen mu Korint, ni mulong wak wasalay mwamu? (2 Korint 2:5-8, 11)

¹⁴ Mu kusut kwa chisu, Paul watesha anch mwan winou waswimpin kamu. Mukayitil winou wakarumuka kamu chakin! Ap anch mwan winou wasaadikisha chikumangen, Paul wayileja amakurump anch kakatinap ‘kwikal mwin chisum nakash.’ Wayileja anch chifanyidin “kumulikishin ni kumwongoj.” Shinshikin mulong wak Paul walonda anch afanyidin kusal mwamu: “Chakwel kangal wov ushon nakash.” Paul wamwovila mwan winou wakarumuka riy. Kambuy kakatap anch ushon umupandaken ikundj winou mulong wa yom yasalay mu chilik cha kumuziyish kukimb dilikishin.​—Tang 2 Korint 2:5-8, 11.

15. Mutapu ik ukutwishau amakurump kupupan pakad maswimbu pakwez oku akat kumekesh kand riy?

¹⁵ Mulong amwimburijin Yehova, amakurump akatining niyau kumekesh riy. Akat kupupan pakad maswimbu anch chid cha usey kusal mwamu, pakwez akat kumekesh kand riy anch kud  mayingishin ma kusal mwamu. Anch amakurump alik kumupup ap pakemp muntu wasalang yom yiyimp, kwinoku kudiap kumekesh riy, kud kukasikesh uyimp. Ov, ching kwau kusu amakurump awiy afanyidina kumekesh riy?

16. Kukwatijan ni Jinswir 21:13, yom ik yikusalay Yehova kud antu akad kwovilan riy?

¹⁶ In Kristu awonsu akat kusal usu wa kwimburij riy ra Yehova. Mulong wak? Diyingishin did anch Yehova kakutwishap kuyitesh antu alikining kuyovil akwau riy. (Tang Jinswir 21:13.) Nany wa pakach petu ukatina anch Yehova alik kutesh malembil mend? Chawiy tufanyidin kusal usu wa kwipuk kukudish muchim wakad riy. Pa ndond pa kujik matu metu mulong wa kulik kumutesh mbay netu mwin Kristu udia mu mar, tufanyidin kusal usu wa kutesh “kudil kwa kazwendj.” Chilik chimwing, tukat kusal usu wa kusadin chiyul ech: “Muntu mwawonsu wakad kuyovil antu akwau riy, Nzamb ukez kumurumburish niyend wakad kumwovil riy.” (Jak. 2:13) Anch twavurik nich kwikepish anch tukwet kuswir kwa kutwovil riy, niyetu tukukat kwovilan riy. Tufanyidin kumekesh riy anch amuchirish mu chikumangen muntu wasala chitil chad wakarumuk.

17. Mutapu ik wamekeshay Mwant David muchim wa riy?

¹⁷ Yilakej yidia mu Bibil yikutwish kutukwash kumekesh riy ni kwipuk kwikal in chisum pantaliken ni antu akwau. Shinshikin chilakej cha Mwant David. Wamekesha tupamp tuvud muchim wa riy. Ap anch Saul wading ukimbin kumujip, David wamwovila riy mwant winou wazizilau many kud Nzamb, ni kapakishap kufundakesh ap pakemp.​—1 Sam. 24:9-12, 18, 19.

18-19. Tupamp ik twaad twaburenay David kumekesh riy?

¹⁸ Pakwez, David kamekeshap riy chisu chawonsu. Chilakej, David wasula ku muchim ni wakwata mupak wa kumujip Nabal ikundj wading uchinchikina muchim, ni antu awonsu ading mu chikumbu chend, chisu chamuburenay David kalimish ni kulik kumwinkish yakudia pamwing ni amakundj adingay nend. Chaying Abigayil mband a Nabal wadinga mband muwamp ni ushimpishina muchim, wapana pakad kulab yakudia kud David, ni David walika kwichil mash.​—1 Sam. 25:9-22, 32-35.

¹⁹ Kapamp kakwau, muprofet Natan wamuleja David piur pa muntu mpich wiya mukoku wa mutej nend kazwendj. David wakula nich ujim anch: “Mudi mudiay [Yehova] mwom, muntu wasadila chom chinech ufanyidin kufa!” (2 Sam. 12:1-6) David wading wij Chijil cha Moses. Muntu anch wiy mukoku, wading ufanyidin kuchirish amikoku anying kud muntu wiyangay. (Kub. 22:1) Ov, chading chitin kumujip muntu? Dined diading dirumburish dia chisum. Chid chakin anch Natan wasadina chilakej chinech mulong wa kumukwash David kwijik anch wasala chisal chiyimp nakash cha chisum! Ni Yehova wamekesha anch wading umwovidin David riy nakash kusutamu mutapu wasotay David kumusal muntu wiya mukoku wa mu chilakej cha Natan!​—2 Sam. 12:7-13.

20. Yom ik tukutwisha kwilejin ku chilakej cha David?

 ²⁰ Ijik anch chisu chajimanay David nakash, wakwata mupak anch Nabal ni antu awonsu a kwol kwend chifanyidin kuyijip. Kupwa, David walonda kand anch ikundj mpich wa mu chilakej cha Natan chading chifanyidin kumujip mulong wa yom yasalay. Kapamp kinak ka kaad, tukutwish kwiyipul anch mulong wak ikundj mwin ranaken winou washikena ku kurumburish kwa chisum mwamu. Shinshikin mutapu wasadika yom. Pa chisu chinicha, David wading ni kom kamufishina nich. Anch muntu wayirumburish akwau kwa chisum, chimekeshin anch kakweta urund uwamp ni Yehova. Yesu wayibabesha nakash in kwilejend anch: “Kangal wayirumburishany akwen, chad Nzamb kakukurumburishanyap niyen. Mulong Nzamb ukez kukurumburishany mutapu umwing mudi muukat kurumburishanya akwen.” (Mat. 7:1, 2) Chawiy tufanyidin kusal usu wa kwipuk kuyirumburish antu akwau kwa chisum ni twikasikeshany kwikal nich ‘riy ripandakena,’ mud Nzamb wetu.

21-22. Mu mitapu ik yimwing tukutwisha kumekesh riy?

²¹ Kwikal mwin riy kwitin yom yivud kusutamu kwau kwikal ni yovil ya riy. Antu akweta riy akat kusal yom mulong wa kuyikwash antu akwau. Komb el etwawonsu tukimba antu adia mu maswir tukutwisha kukwash, ikala a mu dijuku dietu, a mu chikumangen, ap antu tushicha nau ndond yimwing. Chakin kamu, kud mitapu yivud tukutwisha kuyimekeshin antu riy! Ov, wijaku muntu ukweta kuswir kwa ukwash? Ov, tukutwish kumwinkish yakudia, ap kusal yom yikwau mulong wa kumukwash? Ov, kud mwin Kristu wadia wopatinau kal wachirishinau ukweta kuswir kwa arund awamp in kumukasikesh? Ov, tukutwish kuyilej antu akwau uruu wa rusangu ruwamp ukasikeshina? Yiney yid mitapu yimwing yiwamp nakash ya kumekesh riy kud antu awonsu tutanina.​—Job 29:12, 13; Rom 10:14, 15; Jak. 1:27.

²² Anch tutil muchim ku maswir ma antu akwau, tukuman anch tukwet mitapu yivud ya kuyimekeshin antu atunyingumukinamu riy. Anch twamekesh riy, tukumusangaresh nakash Tatukwetu wa mwiur, Nzamb mwin ‘riy ripandakena’!