DIANA ukwet mivu 80 ni kusut ni wamen mar nakash mu mivu yikemp yasutina ey. Nfumwend wading uyedina mayej makata kumukwat muntu ku wong matazukinau anch Alzheimer, ni wading ku chikumbu cha kwoken wafa. Anend aad amakundj niyau afa, ni amwinend wading ni kanser ku diyel. Pakwez akadivar nau anambaz pamumanangau Diana ku yikumangan ap mu mudimu wa kulejan, amumanang ukwet musangar chisu chawonsu.

John wading kalam wa munyingumuku mu mivu 43 ni kusut. Wading ukatin nakash chisend chend ni kadingap katongina kuchilik. Pakwez, wafanyina kwimik mudimu wend wa munyingumuku mulong wa kumulam mwanamakwend wading uyedina. Chisu chamumanau John kudi akadivar nau anambaz ading amwija ku chitentam, amana anch kaswimpap ap pakemp. Wading udandamedin kwikal ni musangar wend.

Yom ik yasala anch Diana ni John ikala ni musangar? Mutapu ik ukutwishay muntu umena mar kwikal ni musangar? Mutapu ik ukutwishay muntu kwikal ni musangar anch kwashiken chom chikutwisha kusal anch alikap chisend chikatinay nakash? Bibil utwinkishin chakul. Ulondin anch: ‘Mwin kutentam ukusanger mudiay Yehova.’ (Kuseng 64:10) Tukutwish kutesh nawamp uyakin winou anch twijik chom chikutwisha kutwinkish musangar wakin ni chikutwisha kulik kutwinkish musangar wakin.

Kudi yom yimwing yikutwisha kamu kulet musangar chisu chawonsu. Chilakej, tong piur pa antu atijadina akatijadina nakash. Ap tong piur pa muntu ukata kwikal nvaj ap muntu ukata kwikal ni chisend chisu mu mudimu wa Yehova. Yom yiney yikat kulet musangar mulong yidi yipan yidiokila kudi Yehova. Watwinkisha uruw, mutapu wa kuval an, ni mudimu wa kusal mu dirijek diend.​—Disambishil 2:18, 22; Kuseng 127:3; 1 Timote 3:1.

Pakwez, yom yimwing yikata kulet musangar yikutwish kwikal ya chisu chikemp. Cha ushon, mbay wa uruw ukutwish kutombuk ap kufa. (Ezekiel 24:18; Ozey 3:1) An akutwish kuyibwambwil anvajau ni Nzamb, ni pamwing ap akutwish kuyopat mu chikumangen. Chilakej, an amakundj a Samwel kamusadinangap Yehova mu mutapu ukatinay ni David wikala ni milong  yivud mu dijuku diend mulong wasala chitil ni Batisheba. (1 Samwel 8:1-3; 2 Samwel 12:11) Anch yom mudi yiney yashiken yikatap kulet musangar pakwez yikat kulet ushon ni kusansan.

Chilik chimwing, yisu yimwing tukutwishap kudandamen nich chisend chetu mu mudimu wa Yehova mulong wa mayej ap mulong wa kulam dijuku dietu, ap mulong kudi kuswimp kanang mu dirijek. Antu avud alika yisend yau alondin anch aburedin musangar wadingau nich mulong wa yisend yiney.

Tukutwish kuman kamu patok anch musangar ukata kudiokal ku yom mudi yiney ukulabangap kwau. Chawiy, ov, kudi mutapu wa musangar ukutwisha kudandamen chikalap nchik yakamish yikutwisha kushiken mu mwom? Mwaning, ufanyidin kwikalaku, mulong Samwel, David, ni antu akwau kashadishap musangar wau parishau ni milong.

Yesu wading wij chirumburikina chakin kamu musangar. Kurutu eza pa divu, Bibil utulejin anch Yesu ‘wasangarang kurutu kwa Yehova machuku mawonsu.’ (Jinswir 8:30) Chawiy, chisu chezay pa divu, yisu yimwing warisha ni yakamish yikash. Pakwez, wading ni musangar mu kusal rusot ra Tatukwend. (Yohan 4:34) Chading nchik piur pa kusansan kukash kwadingay nich kurutu afa? Tutangin anch: ‘Mulong wa musangar watekau kurutu kwend, ndiy wajijamana pa mutond wa mar.’ (Hebereu 12:2) Chawiy tukutwish kwilej yom yivud kusutil yom yaad yalonday Yesu piur pa musangar wakin.

Chakusambish, in kwilej 70 achirika kudi Yesu papwishau mudimu wa kulejan. Ading ni musangar nakash mulong wa yom yawonsu yasalau, pamwing kand ni kwopat ayilembil. Pakwez Yesu wayileja anch: “Kangal wasangarany mulong ayilembil akuziyidilany, pakwez sangarany mulong majin men amafundil kal mwiur.” (Luka 10:1-9, 17, 20) Mwaning, kwitapin dilau dia Yehova kudi kwa usey nakash ni kukat kulet musangar ujim nakash kusutamu kwau chisend kampand cha pakampwil.

Cha kaad, chisu chading chifundishinay Yesu chisak cha antu, mband umwing mwin Yuda washimwoka nakash mulong wa mutapu wend wa kufundish ni walonda anch makwend wa Yesu ufanyidin kwikal ni musangar nakash wa kwikal ni mwan mudi winou. Pakwez  Yesu wamwakula anch: “Chakin kamu, pakwez ayuk kwau antu akata kutesh dizu dia Nzamb ni kudisadil!” (Luka 11:27, 28) Kwibaz mulong wa anetu kukutwish kutuletin musangar. Pakwez yom yikata kulet musangar ukata kudandamen kudi kumuziyin Yehova ni kwikal mu urund uwamp ni ndiy.

Tukat kwov musangar nakash anch twiyov anch Yehova usanger mulong wetwetu. Ap anch yakamish yikuletangap musangar, pakwez yikutwishap kusal anch tushadish yovil yiney ya musangar. Kupwa, anch twadandamen kwikal ashinshamena chisu cha yakamish, musangar wetu ukat kwikal ukurukina nakash. (Rom 5:3-5) Chikwau kand, Yehova ukat kupan spiritu wend kudi antu amuchingejidina ni musangar udi chikunku cha dibuj dia spiritu. (Galatia 5:22) Chinech chitukwashin kutesh mulong wak ulondinay Kuseng 64:10 anch: ‘Mwin kutentam ukusanger mudiay Yehova.’

Chinech chimekeshin kand patok mulong wak wafanyinay Diana ni John kudandamen kwikal ni musangar ap anch arisha ni yakamish yikash. Diana ulondin anch: “Nachinina kudiay Yehova mudi mukatay mwan kuchinin kudiay nvaj wend.” Ulondin kand anch: “Niyova kand anch Nzamb winyukishin mu kwingikish usu wa kudandamen kulejan chisu chawonsu nich musangar.” Yom ik yamukwasha John kudandamen kwikal ni musangar ni kwikal ukwatikena mu mudimu wa kulejan kupwa kwa kulikap chisend chend? Ulondin anch: “Kudiosh mu muvu wa 1998 panginkishau chisend cha kufundish ku Shikol ya Diyiy dia Mudimu, nasala nakash dilejan dia muntu panrend kusutamu pasak.” Urumburil anch kuswimp kwafanyinay ndiy ni mukajend kusal, kwaswapala mulong ading ni musangar wa kuwanyish chisend chawonsu chayinkishangau kudi Yehova. Ulondin kand anch: “Twasalang mwamu pakad kwinan.”

Antu akwau avud amen kal anch yom yilondinau mu Kuseng 64:10 yidi yakin. Shinshikin chilakej cha ambay a uruw asadina ku Betel wa ku États-Unis mivu 30 ni kusut. Kupwa ayituma mudi ayibol a pakampwil. Alondin anch: “Anch twashadish chom tukatin, tukat kwov ushon mulong ushon udi chivadik,” pakwez ulondin kand anch: “Ukutwishap kwov ushon chikupu ni chikupu.” Chisu chasambishau kusal chisend chau chisu, asambisha kulejan pamwing ni chikumangen. Alondin kand anch: “Twalembilang piur pa yom yimwing ya usey nakash. Chisu twamanang malembil metu akat kumakul chatukasikeshang nakash ni kutuletin musangar. Chisu chikemp kupwa kwa kushik mu chikumangen, antu akwau mu chikumangen asambisha mudimu wa uchibol, ni chiyukish twatambula chading anch in kwilej Bibil aad aya kurutu.”

Chakin kamu, chiswapelingap kwikal ni musangar chisu chawonsu. Kukutwish kwikal yisu tukutwisha kwov ushon. Pakwez Yehova utukasikeshin nich mazu madia mu Kuseng 64:10. Ap chisu tuziyina, tukutwish kwikal nich kashinsh anch ang twashal ashinshamena chikalap nchik yom yitushikedina ‘tukusanger mudiay Yehova.’ Tukutwish kand kuchingejin chisu chikuwanyina kushilamu kwa Yehova kwa “mangand masu ni maur masu.” Kupwa muntu mwawonsu ukwikal uwanyidina ni “[ukusangar] ni kuzangijal chikupu” mulong wa yom yawonsu yikusalay Yehova.​—Isay 65:17, 18.

Tongin mutapu ukwikala yom yiney. Tukwikal ni ukash wa mujimbu uwanyidina ni kulank nich usu dichuku diawonsu. Chikalap nchik yom yasadika pakur yatwovisha ushon, yom yiney yikutuletinap kand kusansan. Yehova utwinkishin kashinsh anch “yom yawonsu ya pakur [tukez] kayivuramen.” Tukuyak akatish netu afila kal ni tukwiyov mudi mwiyovau anvaj afisha mwan wa mivu 12 wavumbulau kudi Yesu. Bibil ulondin anch: ‘Pawiy pinipa kamu awiy asangara chipandikena.’ (Marko 5:42) Pa chisu chinicha, muntu mwawonsu udia pa divu ukwikal utentamina ni ‘ukusanger mudiay Yehova’ chikupu ni chikupu.