Winston, tuleja mutapu wamukimba Nzamb.

Napamina mu dijuku diakad kukat yom ya relijon mu ferm umwing udia mu musumb wa Queensland mwi ngand ya Australie. Mulong twading tushich kuns, nasutishangap chisu chivud nau antu akwau, ching kusu nau antu a mu dijuku dietu. Pinawanyisha mivu piswimp 12, nasambisha kumukimb Nzamb. Namulembilang, namwitang chakwel ankwash kwijik uyakin piur pend. Nadiokala ku ferm ni namana mudimu mu musumb wa Adélaïde, kwindum kwa Australie. Pinawanyisha mivu 21, natanijana ni changadim Pam pinaya mu konje mu musumb wa Sydney, ni wanleja piur pa kachisak ka chirelijon ka in Isarel kalondina dizu dia Inglish, chisak chitiyijina anch antu alondina dizu dia Inglish adiokal ku michid ya Isarel yilondinau anch yashadika. Chisak chinech chilondining anch michid yiney yidi michid dikum ya want wa kwinkaj yaya mu winkwal mu muvu yitot chinan K.C.C. Chawiy, panachirika ku Adélaïde, twambambina rusangu riner ni mbay nam wa mudimu wading wasambishina kal kwilej Bibil nau Atuman a Yehova. Kupwa kwa kwambamb nend mu asaa akemp kusu piur pa yitiyij ya Atuman, najingunina anch malembil mam nasala pa wanikanch amakula. Nasambisha kwilej uyakin piur pa Sakatang wam ni Want wend! Natana ‘usang wa usey nakash.’—Mat. 13:45, 46.

Pam, niyey wasambisha kukimb usang winou ku wanikanch. Mutapu ik wautana?

Napamina mu dijuku diading dikatina yom ya chirelijon mu musumb wa Coffs Harbour, Nouvelle-Galles du Sud. Anvajam ni angakam itiyijang mafundish ma chisak cha in Isarel alondang dizu dia Inglish. Mwancham ikundj, yayam mband ni yamam pamwing ni asanyetu, twapamina mu yitiyij yilondina anch Nzamb uyitiyin antu adiokala ku angakiril alondang dizu dia Inglish. Pakwez nitiyap yitiyij yiney ni  niyovap kwikal piswimp ni Nzamb. Pinawanyisha mivu 14, naya mu ma relijon mavud mudi mu Anglican, mu Baptiste, ni mu Adventiste du Septième Jour. Pakwez nzal yam ya mu spiritu yadandamena.

Dijuku diam diashemunikina mu musumb wa Sydney, kwawiy natanijana ni Winston wading kwinikwa mu konje. Mudi mwarumburilangay Winston, mambamb metu ma yom ya chirelijon mamubachika kwilej pamwing nau Atuman. Kupwa, mikand yend yantuminangay yading yizwil too ni mifund ya Bibil! Nikutwish kulond patok anch kwinsambishin niyakamisha—yisu yikwau nading kujiman. Pakwez, pakemp pakemp najingunina anch yom yanfundinangay yading yifanyidin kwikal uyakin piur pa Nzamb.

Mu muvu wa 1962, nashemunikina mu Adélaïde mulong wa kwikal piswimp ni Winston. Winston watenchika yom chakwel nishakam pamwing ni dijuku dia Atuman dia—Thomas ni mukajend Janice Sloman—ading amishoner mwi ngand ya Papouasie-Nouvelle-Guinée. Anlama nawamp nakash; nading kusu ni muvu 18, ni dijuku dined dianginka ukwash ujim nakash wa mu spiritu. Chawiy niyam nasambisha kwilej Dizu dia Nzamb, ni pakad kulab nikala ni kashinsh anch natan kal uyakin. Kupwa kwa kwatijan ni Winston, twasambisha mwom upandikena kuwap mu mudimu wa Yehova—chikalap nchik yoziu, mudimu winou watukwasha kuman usey wa usang winou wa usey nakash.

Winston, tuleja piur pa mwom wey wa pakur mu mudimu wa Yehova.

Chisu chikemp kupwa kwa kwatijan ni Pam, Yehova wasambisha kutwazuril ‘yis yijim’ mulong wa yisend ya pakampwil mu mudimu wend. (1 Kor. 16:9) Chis cha kusambish atulejach kudi Mukadivar Jack Porter, wading usadina mudi kalam wa munyingumuku mu kachikumangen ketu kakemp. (Katat udi mbay nam wa mudimu mu Komite wa Mutiy wa mwi ngand ya Australasie.) Jack ni mukajend Roslyn atukasikesha kusal uchibol wa rawonsu—twasangera dilau dined mu mivu yitan. Pinawanyisha mivu 29, am ni Pam atwita kusal mudimu wa munyingumuku mu Îles du Pacifique Sud, wading mwinshin mwa umutakel wa mutiy wa Fidji. Matung minam mading matung ma Samoa américaines, Samoa, Kiribati, Nauru, Nioué, Tokélaou, Tonga, Tuvalu ni Vanuatu.

Pa chirung chinicha, antu amwing a pa matung mavud mading kulemp ading ayikisin Atuman a Yehova, chawiy twafanyina kwikal ababela ni adimukina. (Mat. 10:16) Yikumangen yading yikemp yikemp, ni yimwing yadingap ni mutapu wa kutwinkish ndond ya kulal. Chawiy twayita antu a mu ul anch tukutwish kushakam nau pamwing, ni ading kwau atudimukidin.

Winston, wading ubangidin ni wakata nakash mudimu wa kukarumun. Mulong wak wiyova mwamu?

Pitwasambisha kusadin pa ditung dia Tonga, akadivar ading pinipa ading ni ma trakt ni mabuku makemp mu dizu dia Tonga dia mu Polynésie. Mu mudimu wa kulejan, asadinang buku La vérité qui conduit à la vie éternelle wa dizu dia Inglish. Chawiy ku shikol ya amakurump ya mbing jinying, amakurump a chikumangen asatu ading ijaku Inglish pakemp itiya kukarumun buku La vérité mu dizu dia Tonga. Pam wafundang ku mashiny, ni kupwa twatuma mukand winou ku mutiy wa États-Unis mulong wa kuuchap. Mudimu winou wasenda piswimp mbing chinan. Ap anch mutapu wa kukarumun wadingap kamu uwamp nakash, pakwez mukand winou wayikwasha antu alondanga dizu dia Tonga kwilej uyakin. Am ni Pam tudiap in kukarumun, pakwez mudimu winou twasala wasala anch tukat nakash mudimu winou.

Pam, mashakamin ma pa matung mading mashalijadin nchik ni ma mu Australasie?

Mashakamin mading mashalijadin nakash! Kukwatijan ni ndond yitwading, ku jindond jimwing kwading atum nakash, kwading marungul ni chitosh, antwuzu, mayej ni yisu yimwing twading ni yakudia yikemp. Ku mutambu ukwau, dichuku diawonsu urel, twading ni chisu chiwamp cha kupim mulong twatalang pa karung pitwading mu kachikumbu ketu katazukinau anch fale—didi dijin didiokila mu dizu dia Samoa dimekeshina tutubund twatungangau  mu Polynésie twa masuku ni twakad mbumbu. Uchuku pazazina ngond, twamanang mabu ni ngond wabulang chitokish pa karung. Yisu yiwamp mudi yiney yatukwasha kutongijok ni kulembil, ni yatukwasha kutongijokin pa yom yiwamp pa ndond pa kutongijokin pa yom yiyimp.

Twayikata nakash anikanch, ading akatina kusengan nakash ni akashimuka nakash pa kuman angendj ayindel. Patwaya kutal pa ditung dia Nioué, kan kakundj kamwing kakwatola pa uvuj wading pa makas ma Winston ni kalonda anch: “Nikatin nakash masal mey.” Chakin kamu, mwan winou wading kandikal amanangap makas ma uvuj mwamu ni kadingap kija mutapu wa kuutazuk!

Twova ushon nakash pitwamana mashakamin ma uzwendj madingau nich antu. Ading ni yom yiwamp yiyinyingumukina pakwez ading ni mijimbu yiyimp ni mem ma kuna makemp. Ap mwamu akadivar netu kinanangap kwau mulong wa yakamish yiney. Ading ijidina kal mashakamin minam. Ading ni musangar wa kushakam pamwing ni dijuku diu, kwikal ni ndond ya kwifukwil ni kwikal ni dilau dia kumushiman Yehova. Chilakej chau chatukwasha kushinshikin pa yom ya usey ni kupipej mwom wetu.

Pam, yisu yimwing wavitang mem ni kwisuk yakudia amwiney. Mutapu ik watwisha kusal mwamu?

Nimujikitishin nakash tatuku mulong wanfumba. Wanfundisha yom yivud ya usey nakash mudi kwakish kasu ni kwisukinap, ni mutapu wa kutwish mashakamin ap anch ukwet yom yikemp. Chisu chimwing patwaya mu Kiribati, twashakama mu kachikumbu kakemp ka masuku, kabandinau pansh ni ma corail ni mbumbu ja midid. Mulong wa kwisuk yakudia, napunda kadibuk ka kupepil kasu mu chikumbu, ni nasadinang mis ya coco mulong wa kwakish kasu. Mulong wa kwikal ni mem, nayangang pamwing ni amband a mu ul ku dijiy. Mulong wa kuvit mem, asadinang mutond wa ametre piswimp aad ni akasangaku moj, mudi mubel wa kulau nich. Pakwez pa ndond pa kutekaku dilau, akasaku mbekech. Muntu ni muntu wavitang mem kukwatijan ni chisu chashikangay ni avitang pakad kulab. Kupwa, atekang mbekech mu dijiy ni mwizulang mem. Nading nitongin kwam anch yiswapel—djat ni pawanyina chisu chamam cha kuvit. Napakisha tupamp tuvud, pakwez mbekech wading ukat kupempam kwend! Ansipa nakash, kupwa mband umwing wankwasha. Yisu yivud ankwashang nakash.

En awonsu wading ukatinany chisend chen cha kusadin pa matung. Ov, ukutwish kutulejaku yom yimwing ya pakampwil ya pa matung?

Winston: Chatwitaku kamu chisu mulong wa kwijidin yaku ya ndond jinej. Chilakej, chisu chatuletinangau yakudia kudi akadivar, atwinkang yakudia yawonsu yadingau nich. Kwinsambishin twarisha nakash, twatongangap anch chitin kuyishil niyawiy yom kanang. Chawiy twadiangang yom yawonsu yatukinangu mulong wa kudia! Chakin kamu, patwajingunina uyakin wa yom, twasambisha kuyishil niyau yakudia. Ap anch twadangang yom yawonsu, pakwez akadivar ova kurumburik. Ni ovang musangar nakash pakutuman kupwa kwa angond musamban in awonsu patwayendinang mu mudimu wa munyingumuku. Kudiokal pakur, twading Atuman a kusambish adiokila ngand yikwau endila yikumangen ya pa matung minam.

Kwendil kwetu yikumangen yiney kwapana uman uwamp kudi antu a ndond yiniya. Antu avud mu ul atongang anch relijon wa akadivar inay wasambishina kwend pa ditung dinidia. Chawiy pitwendina akadivar a pa ditung dined, antu a mu ul ajingunina anch komb dined didi dirijek diakin dimubangidina muntu ni muntu ni ashimwoka nakash.

Pam: Pakach pa ndond nivurikina kudi Kiribati, kwading kwau kachikumangen ka akadivar nau anambaz akemp kusu. Mukurump wa chikumangen, Itinikai Matera wasalang usu mulong wa kuwanyish maswir metu. Dichuku dimwing, watuletina diy dimwing kwau. Walonda anch “dienen.” Twad twasadin kal machuku mavud pa kudia diy dia nzol. Chisal chinech chikemp pakwez chimekeshina muchim wa kupan, chapukuna michim yetu.

 Pam, mu kusut kwa mivu, washadisha mwan wafila mwivum. Yom ik yakukwasha kujijaman?

Nimisha mu muvu wa 1973 pitwading mu Pacifique du Sud. Twakwata mupak wa kuchirik ku Australie, kwawiy twafishila mwanetu kupwa kwa angond anying. Winston niyend wova ushon nakash mulong wa rufu ra mwanend. Mu kusut kwa chisu, ushon wasambisha kukep mu muchim wam, pakwez wapwap kamu kapamp kamwing djat ni patwatambula Chinong cha Kalam cha 15 Ngond wa 4, 2009. Mu “Yipul ya in Kutang” ipula anch: “Anch mwan wavadik wafila kal mwivum, ov ukez kusanguk?” Mutu wa mulong winou watukasikesha anch Yehova ukukwat mupak piur pa yom yikusalay ni yisu yawonsu ukat kusal yom yitentamina. Ukupwish mar mawonsu tumena mu mangand minam mulong wamutuma Mwanend mulong wa ‘kushesh midimu ya Satan.’ (1 Yoh. 3:8) Mutu wa mulong winou watukwasha kand kukwat ni usey nakash ‘usang’ wa usey tukweta wa kwikal antu a Yehova! Pakad ruchingej ra Want twafanyinap kutwish kujijaman.

Kupwa kwa kufish mwanetu, twachirikina kand mudimu wa chisu chawonsu. Twasadina ku Betel wa mu Australie mu angond akemp kupwa twaya mu mudimu wa munyingumuku. Mu muvu wa 1981 kupwa kwa kusadin mwi ngand ya Nouvelle-Galles du Sud ni mu musumb wa Sydney mu mivu yinying, atutazuka ku mutiy wa Australie, kukwatijan ni mutapu wautazukangau pa chisu chinicha ni kwawiy tudia kudiokal chisu chinicha.

Winston, yom wamana pa matung matazukinau anch Îles du Pacifique Sud, ov, yikukwashin mu mudimu wey usadina mu Komite wa Mutiy wa Australasie?

Mwaning, yinkwashin mu mitapu yivud. Chakusambish, mutiy wa Australie awita mulong wa kutakel Samoa américaines ni Samoa. Kupwa, mutiy wa Nouvelle-Zélande aubomba ku mutiy wa Australie. Katat, Australie, Samoa américaines ni Samoa, Îles Cook, Nouvelle-Zélande, Nioué, Timor-Leste, Tokélaou ni Tonga, matung minam mawonsu madi mu teritwar wa mutiy wa Australasie—nading ni dilau dia kwendil matung mavud pakach pa matung minam mudi katum wa Betel. Ronganyin naka mu kusal pamwing ni akadivar ni anambaz ashinshamena a pa matung minima rinkwashin nakash mu mudimu wam nisadina ku biro wa mutiy.

Mu wiswimp, nikutwish kulond anch am ni Pam twajingunina kusutin yom twimenap ayinetu anch kadiap kusu kwau ching antu amakurump amukimbining Nzamb. Anikanch niyau akatining ‘usang winou wa usey nakash’—ap anch antu a mu dijuku diau kasadinap mwamu. (2 Ant 5:2, 3; 2 Jsng. 34:1-3) Tukwet kashinsh anch Yehova udi Nzamb wa rukat ukatina anch antu awonsu, ansand ni amakurump atambul mwom wa chikupu!

Pinasambisha am ni Pam kumukimb Nzamb kwasut kal mivu 50 ni kusut, twadingap twija kwafanyina kutushikij kukimb kwinoku. Pakad kwidjidjek, uyakin wa Want udi usang wa usey nakash! Tukwatin mupak wa kudandamena kulam usang winou wa usey nich usu wetu wawonsu!