Cha ushon, pinawanyisha mivu piswimp dikum ni yisatu, urund wam ni Yehova wasambisha kuziy. Ambay nam a ku shikol ading ameken mud akwet want ipau nakash, ni niyam nakata kwikal mud awiy. Nasambisha kwiyov anch mbil jinginkishinau anvaj ni mashakamin ma win Kristu yinlimidin nakash, ni nasambisha kand kuman anch kumwifukwil Yehova ud mudimu ukash nakash. Ap anch nading nitiyijin anch Yehova udiaku, pakwez nadingap niyovila kwikal nend piswimp.

Mudimu wam wa kulejan wikala kwau chad wa usweral. Nayangang mu kulejan pakad kwirijek, chawiy, chasambisha kwinkasiken kusambish ap kudandamen mambamb ni muntu. Mud chibudikin, nashadisha musangar mu mudimu wa kulejan ni natanangap yibudikin yiwamp, ni chinech chanshikija chad ku kukis nakash mudimu wa kulejan. Nasambisha kwiyipul anch: ‘Mutapu ik ukutwishay muntu kudandamen kusal mudimu wa mutapu winou rubing ni rubing, ngond ni ngond?’

Pinawanyisha mivu 17, nakata kwikal mwant panram. Chawiy, nakasa mafund mam, nadiokala ku chikumbu ni naya ku Ostrali. Anvaj am ova ushon nakash panadiokala ku chikumbu. Ading iyakamishin,  pakwez ading ni ruchingej anch nikudandamen kumusadin Yehova.

Pinashika mu Ostrali, natalala chad nakash mu spiritu. Nakumanganang pa chipatu. Nata urund nau ayangadim ading kwau mud am, ading kwau akatina kukumangan urel anch abudik uchuku, aya kwau ku bar mulong wa kuja maj ni kuna maar. Pinikata kuvurik chisu chinicha, nikat kujingunin anch nading mwend mu uyakin, mwend mu mangand, pakwez nadingap kamu chakin ni musangar.

Kupwa kwa mivu piswimp yaad, nambaz umwing nasutisha nend chisu chikemp wankwasha pakad kwijik kutongijokin pa mutapu wading mashakamin mam. Nading nishich pamwing nau anambaz ajich atan, ni twamutazuka kalam wa munyingumuku ni mukajend Tamara, chakwel tushakam nau ku chikumbu mu rubing rimwing. Pading pakwatikenay nfumwend ni milong ya chikumangen, Tamara wasutishang netu chisu pamwing ni watusipishang nakash. Chankatisha nakash. Wading muntu ubangidina akwau nakash, ni chading chiswapel kwambamb nend. Chanshimokisha nakash pakuman anch muntu uswila mu spiritu mwamu ud kand mwin maswimbu nakash.

Tamara wading uzangurokin nakash. Watukwasha kukat uyakin ni kukat mudimu wa kulejan. Wading ni musangar mulong wading umusadidin Yehova ni muchim wend wawonsu, pakwez am anch nital nadingap ni musangar mulong namusadinangap Yehova ni muchim wam wawonsu. Mwikadil wend uwamp ni musangar wakin wadingay nich yikala ni usu nakash pa mwom wam. Chilakej chend chanvurisha uyakin wa usey nakash udia mu verse ulondina anch: Yehova ukatin anch antu awonsu amusadin “nich musangar” kupwa “nich miminy!”​—Kus. 100:2.

Nading nikatin kwikal ni musangar mud wadingay nich Tamara, pakwez mulong wa kwikal ni musangar winou chading chingitin kuswimp kujim nakash. Changita chisu chilemp, pakwez pakemp pakemp, nasambisha kuswimp. Nasambisha kwirijek mulong wa mudimu wa kulejan, ni nasambisha kusal uchibol nkwash chisu ni chisu. Kusal mwamu kwankwasha kukepish wom nading nich ni kupan uman nich kashinsh. Pinasambisha kusadin nakash  Bibil mu mudimu wa kulejan, nakata nakash mudimu wa kulejan. Kupwa kwa chisu chikemp, nasambisha kusal mud chibol nkwash ngond ni ngond.

Nasambisha kuta urund ni antu akweta mivu kushalijan ading amusadidina Yehova ni muchim wawonsu ni ading akweta musangar mu mudimu wend. Chilakej chau chiwamp chankwasha kusambish kushinshikin pa yom yidia ya usey nakash mu mwom wam, ni nasambisha kutang Bibil dichuku diawonsu. Nasambisha kusanger nakash mudimu wa kulejan ni kupwa nasambisha kusal mud chibol wa rawonsu. Kinak kawiy kapamp kakusambish kupwa kwa mivu yivud kanova kand musangar ni kwiyov nawamp mu chikumangen.

Kupwa kwa muvu umwing, namanijana ni Alex, mukadivar umwing muwamp, wading umukatina nakash Yehova ni wading ukatina mudimu wa kulejan. Wading nkwash a mudimu ni wading kand wasadin kal mivu musamban mu mudimu wa uchibol. Chisu chimwing, Alex wakwasha kand kwi ndond kwading maswir ma in kulejan mu Malawi. Kwinikwa, watanijana ni amishoner amushila chilakej chiwamp ni amukasikesha kudandamen kutek mijikit ya Want pa ndond yakusambish mu mwom wend.

Natijana ni Alex mu muvu wa 2003, ni kudiosh kamu chisu chinicha, tud mu mudimu wa chisu chawonsu. Twilejin kal malejan mavud ma usey nakash, ni Yehova watuyukishin kal mu mitapu yivud yitwakad kutwish kuchind.

Mu muvu wa 2009, atutazuka kusal mud amishoner mwi ngand ya Timor-Leste, yidia pakach pa matung ma mu Indonezi. Chatushimokisha, chatusangaresha, pakwez chatwovisha kand wom. Kupwa kwa angond atan, twashika mu Dili, musumb ujim wa ngand yiney.

Mashakamin ma mwi ngand yiney mading mashalijadin nakash ni kwi ndond twadiokala. Chatwita kwijidin mashakamin ni yaku ya kwinikwa, kwijidin yakudia, ni kwilej dizu disu. Mu mudimu wa kulejan, twayitanang antu ading atuzwendj nakash, akad kwilej, ni ading azengodinau. Ni twamana  antu avud ading amena mar mulong wa njit ni chisum. *

Chading chisangareshin nakash kusal mudimu wa kulejan! Chilakej, dichuku dimwing namutana mwan mband umwing wading ni ushon nakash, wading ni mivu 13, dijin diend Maria. * Makwend wading wafil kal kwasut kal mivu yikemp, ni wamumanang tatukwend pachipatu. Mud mutapu udingau an avud a chimbu chend, Maria kadingap kija yom yifanyidinay kusal mu mwom wend. Nivurikin chisu chimwing pasambishay kudil pading panrumburidinay mutapu wading wiyovilay. Pakwez, nateshap yom yading yimrumburidinay mulong nadingap nija kulond nawamp dizu diend. Namulembila Yehova chakwel ankwash kumukasikesh, kupwa nasambisha kumutangin maverse mawamp makutwisha kumwongoj. Kupwa kwa mivu yikemp, namana mutapu uyakin waswimpa mwikadil wa Maria, mutapu wend wa kudjal, ni mwom wend wawonsu. Amubatisha, ni katat ukat kutakel malejan mend ma Bibil. Nlel Maria ukwet dijuku dijim dia mu spiritu ni wiyovil anch amukatin.

Yehova uyukishin mudimu wa kulejan mwi ngand ya Timor-Leste. Ap anch in kulejan avud ayibatishin mu mivu dikum yasuta kal ey, avud asadin mud ayibol, ankwash a mudimu, ap mud amakurump. Akwau akat kusal mudimu wa kukarumun ku biro wa kukarumwin, mulong wa kukwash kubudish yakudia ya mu spiritu mu mazu ma kwol kwau. Chikat kwinsangaresh nakash anch nayiman mutapu uwanginau ku yikumangan, mutapu umwemwetinau ni mutapu ukudinau mu spiritu.

Mashakamin twading nich mwi ngand ya Timor-Leste mading mashalijadin nakash ni matwading nich mu Ostrali, pakwez nadingap nitongidina anch nikwikal ni mwom usangareshina mwamu. Yisu yimwing twasalang weny ni kabis kakemp mwading antu ashinyijadina, mwading ansh aumin, ni yifudish ya yishash ya yakudia yalandangau antu pasok. Machuku mamwing, twatakelang dilejan dia Bibil mu kachikumbu mwading marungul nakash, mwakad sima, ni mwading anzol akat kwendangan. Pakwez, chikalap nchik yikokujol yiney, yisu yivud nikat kuvurik anch, ‘chading chisu chiwamp nakash!’

Anch navurik chisu nading mwanikanch, nikat kuyijikitish nakash anvajam, mulong asala usu wa kwinfundish piur pa Yehova ni ankwasha ap anch ku wanikanch wam nadingap ni urund uwamp ni Yehova. Jinswir 22:6 wawanyidin mu mwom wam. Tatuku ni Maku akwet musangar nakash mulong wamam ni Alex, akwet musangar pakuman mutapu utusadidinau kud Yehova. Kudiosh mu muvu wa 2016 tusadin mu mudimu wa munyingumuku mu teritwar udia mwinshin mwa mutiy wa Ostralazi.

Nikat kushimok nakash anch naman mutapu nashikena kand ku kusanger mudimu wa kulejan. Katat nikatin mudimu wa kulejan! Nashikedin ku kujingunin anch chikalap nchik yom yishikedina mu mwom wetu, musangar wakin udiokil ching ku kumusadin Nzamb ni muchim wawonsu. Chakin kamu, mivu 18 nasutisha kal mu kumusadin Yehova pamwing ni Alex, yad mivu yimwing yisangareshina nakash mu mwom wam. Katat novil chad kurumburik kwa uyakin wa mazu malonday David kud Yehova anch: “Awiy akata kwikangil mu Ey asangar kwau; akez katoy ni musangar chikupu. . . . Ni awonsu akatila dijin diey ikala ni musangar kudi Ey.”​—Kus. 5:11, TMK.