Navadika machuku ma ngond 19 Ngond wa 5, muvu wa 1940 mu musumb wa Amioûn mu Liban. Kupwa kwa mivu yikemp, dijuku dietu diabukina mu musumb wa Tripoli, kwawiy kwinakwa napamina mu dijuku diading dikweta musangar diading dimwija ni dimukatina Yehova Nzamb. Yam nading kasulansong pakach pa an atan, amband asatu ni amakundj aad. Kwikal ni nfalang chadingap chom cha usey nakash kud avanjam. Yom ya usey nakash mu dijuku dietu yading kwilej Bibil, kukumangan ni kuyikwash antu akwau kumwijik Nzamb.

Mu chikumangen chetu mwading in Kristu avud azizidilau many. Pakach pau pading Michel Aboud, watakelang chikumangan twatazukang anch dilejan dia buku. Mukadivar winou wileja uyakin mu New York ni ndiy wandjika uyakin mu Liban kwinsambishin kwa mivu ya 1920. Pakampwil nikat kuvurik mutapu wayilimishangay ni wayikwashangay anambaz aad apwisha Shikol ya Galad, nambaz Anne ni Gwen Beavor. Ading arund netu awamp. Kupwa kwa mivu yivud, nasangara nakash panatanijana kand ni Anne mu États-Unis. Kupwa kwa chisu chikemp, natanijana kand ni Gwen wading watijadina kal ni Wilfred Gooch ni ading asadidin ku Betel wa mu Londres, mu Angleter.

Chisu nading mwanikanch, kwading Atuman akemp mu Liban. Pakwez twalejana nich mushiku nakash uyakin wa Bibil. Twasala mwamu chikalap nchik kutupompat kud antakel a chirelijon. Nidandamedin kuvurik nawamp yom yimwing yatushikena.

Dichuku dimwing, am ni mpanyam Sana twading tukat kulejan uruu wa Bibil ku chikumbu chimwing chading cha etaj. Mwimpel umwing washirika kwadingay, wez ku kapalakany twading tulejena. Chimeken anch kud muntu wamutazuka. Mwimpel winou wasambisha kumusaal mpanyam. Wajimana nakash ni wamubachikina Sana mu ma eskaliye, ni Sana wijipa. Muntu umwing wayitazuka ampurij, eza mulong wa kwikal nich kashinsh anch kud muntu wamukamuninang Sana. Amukwata mwimpel winou aya nend ku biro wa ampurij. Kushik kwinakwa, amukwata ni ut wend. Mukurump wa ampurij wamwipula anch: “Ov, ey ud bil nany? Mukurump wa chisak cha relijon anch mukurump wa chisak cha ampopol?”

Yom yikwau yinivurikina nawamp yid yom yashikena chisu chikumangen chetu chafutina motak mulong wa kututwal kulejan ku musumb wading kulemp. Twading tusutishin chisu chiwamp nakash kushik ni pateshay mwimpel umwing yom twading tusadina ni kukumangej chisak cha antu mulong wa kuturishikish. Aturishikisha ni kutwas mayal ni amubuza tatuku mutu. Nivurikin mutapu chifu chend chasunza ni mash. Achirika pamwing ni maku kwi ndond twasha motak, ni twayilondula nich ushon nakash. Pakwez nikezap ap pakemp kuvuramen yom yalonday maku pading pamukusodinay tatuku mash anch: “Yehova, yilikishina amboku. Kijap kwau yom yisadinau.”

Kapamp kakwau, twaya kuyital anamakwetu mu musumb wa chivadik. Kwinakwa, ku chikumbu cha ngak, twatanaku ntakel umwing wa chirelijon wading ukweta ntumb nakash, wading Evek. Mukurump wa relijon winawa wading wij anch anvajam ad Atuman a Yehova. Ap anch nading kwam ni mivu musamban, wapakisha kwingovish wom ni wangipula anch: “Mulong wak kand kal akubatish?” Namwakula anch: Nichid kal mwanikanch ni mulong wa kwimbatish, nifanyidin kwilej yom yivud piur pa Bibil ni kwikal ni ritiy rikash. Kasangerap chakul cham ni wamuleja ngak anch nikwetap kalimish.

Pakwez yishiken yiyimp mud yiney yading kwau yikemp. Antu avud a mu Liban ading antu awamp ni in kwakan. Chawiy, twatwisha kwambamb ni antu avud piur pa Bibil ni kutakel kand malejan ma Bibil mavud.

Panading nichidia ku shikol, kwading mukadivar umwing nsand wadiokala mu Venezuela, weza mulong wa kwendangan mu Liban. Wakumanganang mu chikumangen chetu ni wata urund ni mpanyam dijin diend Wafa. Kupwa atijana ni aya kushakam mu Venezuela. Mu mikand yafundangay, Wafa wasala usu wa kumukasikesh tatuku chakwel dijuku dietu dibukin mu Venezuela.  Wasala mwamu mulong wading ukatin kwikal netu pamwing. Disudien twamutesha ni twabuka!

Twaya mu Venezuela mu muvu wa 1953 ni twashakama mu musumb wa Caracas, piswimp ni chipang cha prezidan. Mulong nading nichid mwanikanch, nading nikatin nakash kumuman prezidan pasutinay mu motak wend uwamp. Pakwez chading chiyikasikedin anvajam kwijidin ngand yisu, dizu disu, yaku yisu, yakudia yisu ni yirung yisu. Pakwez pelau lel anch “asambish kwijidin mashakamin” ma ngand yiney, kwashikena chom chimwing cha ushon nakash.

Tatuku wayela. Twashimwoka nakash, mulong wading muntu mukash, wakad kuyelolang. Kupwa amukwata kanser ku pancréas ni amubarila. Cha ushon, wafa kupwa kwa rubing rimwing.

Nikutwishap kurumburil mutapu twiyova mulong wa chishiken chinech. Nading kwam nichikwet mivu 13. Yatusala nayimp nakash ni twiyova anch tukezap kand kwikal ni musangar. Rufu ra tatuku ramubindisha maku nakash. Pakwez twashikena kuman anch mwawiy kwau mutapu muyiding. Ni Yehova watukwasha kujijaman. Pinawanyisha mivu 16, napwisha shikol mu musumb wa Caracas ni nading nikatin nakash kukwash dijuku diam.

Pa chisu chinacha, mpanyam Sana watijana ni Rubén Araujo, wileja ku Shikol ya Galad kupwa wachirik mu Venezuela. Akwata mupak wa kuya kushakam mu New York. Dijuku diam diakwata mupak anch nifanyidin kwilej ku iniversite, chawiy naya kwilejin ku New York, mulong kwinakwa nafanyina kushakam kwa mpanyam. Mpanyam ni nfumwend ankwasha nakash kukul mu spiritu. Chikwau kand, kwading akadivar avud aswila mu spiritu mu chikumangen chetu chading mu Brooklyn cha dizu dia Espanyol. Nasangara nakash pa kwijikijan ni akadivar aad, mukadivar Milton Henschel ni mukadivar Frederick Franz. Awonsu ading asadidin ku Betel wa mu Brooklyn.

Pinashika piswimp ni kupwish muvu wa kusambish ku iniversite, nasambisha kutongijokin nakash piur pa mutapu nading nisadidina mwom wam. Natanga ni kutongijokin nakash pa mitu ya mulong yading mu Chinong cha Kalam yading yisambidina piur pa in Kristu itekina mipak ya kumusadin Yehova. Namana musangar wadingau nich ayibol ni antu ading asadina ku Betel ading mu chikumangen chetu, ni niyam nakata anch nikal mud awiy. Pakwez nading kand kal ambatish. Kupwa kwa chisu chikemp, namana anch chid cha usey kupan mwom wam kud Yehova. Chawiy nakwata mupak winou, kupwa ambatisha machuku ma ngond 30 Ngond wa 3 muvu wa 1957.

Kupwa kwa kwimbatish, nasambisha kutongijokin pa mupak nading nikatina nakash wa kwikal chibol. Nading nikatin kamu nakash uchibol. Pakwez chafanyina kwinkasiken kusal mwamu, mulong nafanyinap kutwish kwilej ku iniversite pa chisu chawiy chimwing nikat kusal kand uchibol. Twafundijadina nakash mikand ni dijuku diam mulong wa kuyilej mupak wam wa kwimik kwilej ku iniversite ni kuchirik mu Venezuela mulong wa kwikal chibol.

 Nachirika mu musumb wa Caracas mwi Ngond wa 6 muvu wa 1957. Pakwez natana anch mashakamin ma dijuku diam madingap mawamp. Chading chitin kwikalap muntu mukwau mu dijuku ukutwisha kuman mudimu wa nfalang mulong wa kukwash dijuku. Mutapu ik nafanyina kuyikwash? Namana mudimu ku bank, pakwez nading nikatin nakash uchibol. Wawiy winou mupak nachirikina mwi ngand ya Venezuela. Chawiy nakwata mupak wa kusal yom yawonsu yaad kapamp kamwing. Mu mivu yivud, nasalang ku bank chisu chawonsu oku nikat kusal kand uchibol. Ap anch nading nikwataken nakash, pakwez nading kand ni musangar nakash!

Nasangara kand nakash chisu natanijana ni kwatijan ni Sylvia, nambaz muwamp wa mu Alemany wading umukatina nakash Yehova. Wabukina mu Venezuela pamwing nau anvajend. Kupwa twavala an aad, mwan ikundj ndiy Michel (Mike) ni mband ndiy Samira. Nasambisha kand kumulam maku, weza mulong wa kushakam netu pamwing. Ap anch changita kwimik uchibol mulong wa kulam dijuku diam, pakwez nadandamena kulam mushiku wam mu mudimu wa kulejan. Am ni Sylvia twasalolang uchibol nkwash pa chisu cha konje.

Yom nisambinang kwisambishil yasadika chisu chadingau anam achid ku shikol. Nikutwish kulond patok anch nading ni mashakamin ma wimpich. Ni antu akwau twading tusadina nau ku bank ading anlimishin nakash. Pakwez nading nikatin kwinman cha kusambish mud kashalapol wa Yehova. Nadandamena kutongijokin pa yom nikutwisha kusal chakwel antu anmana mutapu winou. Chawiy nashakama pamwing ni mukajam mulong wa kwisambin piur pa milong ya nfalang. Anch nakwata mupak wa kwimik kusal ku bank, afanyina kwingikish nfalang jivud mud difut diam dia nsudiel. Mulong twadingap ni yikal, twatonga anch ang twapipej mashakamin metu, tukutwish kwikal ni nfalang jivud jikutwisha kutukwash kudandamen kuwanyish maswir mu chisu chilemp.

Chadingap chiswapela pa kukwat mupak winou. Pakwez mukajam mukatish ni maku annunga chikas. Chawiy namanirila kand mutapu wa kwikal chibol. Nasangara nakash. Nading nikimbin kusambish uchibol, pakwez kupwa kwa chisu chikemp, twatambula rusangu twading twakad kuchingejin.

Dichuku dimwing dokter wamuleja mukajam Sylvia anch ukwet madikaj. Rusangu riner ratukashimwisha etu awonsu. Twasangara nakash, pakwez natongijokina kand pa mupak wam wa kwikal chibol. Ov, nafanyina kand kutwish kwikal  chibol? Pakad kulab, twasambisha kwirijek mulong wa kumwak mwan ukuvadika.

Pakwez nading nidandamedin kwiyipul anch nikutwish kwikal chibol. Kupwa kwa kwisambin piur pa mipak yetu, twakwata mupak anch nikutwish kwikal chibol. Mwanetu ikundj Gabriel wavadika mwi Ngond wa 4 muvu wa 1985. Chawiy nalikap mudimu wa ku bank, ni nasambisha kand kusal mud chibol wa rawonsu mwi Ngond wa 6 muvu wa 1985. Kupwa nikala ni dilau dia kusal mu Komite wa Mutiy. Pakwez biro wa mutiy kadingap mu musumb wa Caracas. Chawiy chading chingitin kwend chintampu cha akilometre piswimp 80, machuku maad ap masatu pa rubing.

Biro wa mutiy wading mu musumb wa La Victoria, chawiy twakwata mupak mu dijuku wa kubukin mu musumb winou mulong wa kwikal piswimp ni Betel. Winou wading mupak ujim nakash mu dijuku dietu. Nikat kuyisanger ni kuyijikitish nakash antu a mu dijuku diam. Ankwasha nakash. Mpanyam Baha witiya kumulam maku. Mike wading waten kal, pakwez Samira ni Gabriel ading achid kal ku chikumbu. Chawiy kubukin mu musumb wa La Victoria kwayita kusha arund nau mu Caracas. Chikwau kand, mulong mukatish nam Sylvia wading wijidin kal musumb ujim, chading chimwitin kwijidin ka musumb kakemp. Ni chading chitwitin etu awonsu kwijidin kushakam mu kachikumbu kakemp. Chakin kamu, chading chitin kwipan nakash mulong wa kubukin mu musumb wa La Victoria.

Pakwez yom yaswimpa kand. Mwanetu Gabriel watana, ni Samira watwisha kwishakamin amwinend. Kupwa am ni Sylvia atutazuka ku Betel mu muvu wa 2007, ni kwawiy tudia djat ni nlel. Mike mwanetu wa kusambish usadin mud mukurump ni ukat kusal kand uchibol pamwing ni mukajend Monica. Gabriel niyend ud mukurump ni ushich mu Itali pamwing ni mukajend Ambra. Samira usadin mud chibol, pakwez ukat kukwash kand mud mwin kwisotil ku Betel.

Chakin kamu, nakwatin kal mipak yivud ni yijim nakash mu mwom wam. Pakwez ninaninap mulong wa mipak yiney. Anch kwading mutapu wa kwinchirish ku usand, nafanyinang kand kukwat mipak yawiy yimwing. Nikat kujikitish nakash mulong wa yom yawonsu natwishina kusal mu mudimu wa Yehova. Mu mivu yiney yawonsu, nashikedin kuman mutapu chidia cha usey kulam urund uwamp ni Yehova. Ukutwish kutwinkish chisambu “chisutila ronganyin ra antu” ap anch mupak tukimbina kukwat ud ujim ap ukemp. (Fil. 4:6, 7) Am ni Sylvia tusangaredin nakash mudimu wetu ku Betel. Ni tumen anch mipak yetu ayiyukishin, mulong twamutekang Yehova pa ndond ya kusambish.