Kwinsudien panikala chibol mwom wam waswimpa mu mutapu nakad kutongin. (Efes 3:20) Pakwez pamwing ap ukutwish kwiyipul mutapu yom yiney yanshikena. El nikuleja mutapu wasambisha yom yiney.

Navadikina mu Allemagne, mu musumb wa Berlin, angond akemp kupwa kwa Njit ja Kaad ja pa Mangand Mawonsu kusambish mu muvu wa 1939. Chisu chasambisha njit jinej kupwa mu muvu wa 1945, ma avion ma njit masambisha kudjibul mabomb mu musumb wa Berlin. Kupwa kwa kubarik bomb umwing, yikumbu yivud yading mu mukal twading tushicha yatema, pakwez etu twachinina mwi ndond ya kwichidijin ku mabomb. Mulong wa kwipandish, twachinina ku ul utazukinau anch Erfurt, ul wavadikinay maku.

Maku wakimbang nakash uyakin. Chawiy watanga mikand ya afilozof ni watambitamba mu marelijon kushalijan pakwez katanap uyakin. Piswimp mu muvu wa 1948, Atuman a Yehova aad akokala kwol kwetu. Maku wayaka ni wasambisha kuyipul yipul yivud. Kupwa kwa aminit akemp, maku wanleja am ni mwancham mband anch “natan kal uyakin!” Pakad kulab am, mwancham ni maku twasambisha kuya ku yikumangan mu ul wa Erfurt.

Mu muvu wa 1950 twachirika ku musumb wa Berlin, kwawiy twasambisha kukumangan mu Chikumangen cha Berlin-Kreuzberg. Kupwa twashemunikina mu Chikumangen chikwau cha Berlin-Tempelhof. Pakad kulab, maku watambula dibatish, pakwez am nading nidjidjekin. Mulong wak?

Chading chikasiken kuya kurutu mu spiritu mulong nading mwin usany nakash. Ap anch nayangang mu mudimu wa kulejan, nasala mivu yaad pakad kufungul kan kam mulong wa kupan uman. Yom yaswimpa panasambisha kusutish chisu nau akadivar ni anambaz ading amekeshina kutakaman ni kwipan kwau kudi Yehova. Amwing pakach pau ashala ashinshamena payitekau mu kompony wa mar wa Nazi ni mwi nkan ja Kwingangel kwa Allemagne. Akwau atwalang ku ujindj mikand yetu  Kwingangel kwa Allemagne ap anch kusal mwamu kwafanyina kuyishikij ku kuyikwat ni kuyitek mu jinkan. Yilikej yau yansangaresha nakash. Chawiy natonga anch ang akadivar inay ateka mwom yau mu ubaj mulong wa Yehova ni akadivar nau, komb niyam nifanyidin kusal usu wa kupandikan usany.

Nasambisha kupandikan usany chisu nipana mu kampany wa pakampwil wasadika mu muvu wa 1955. Mu mukand wading mu Informateur, * Mukadivar Nathan Knorr walejana anch kampany winiwa wading kampany mujim nakash wakadingau kal kutenchik kand mu dirijek dietu. Walonda anch ang in kulejan awonsu ipana mu kampany winou, “wafanyina kwikal ngond umwing upandikena kuwap mu mudimu wa kulejan.” Winou wading uyakin mud ik! Pakad kulab kupwa kwa kampany winou, nipana kudi Yehova mu muvu wa 1956, chawiy am, tatuku ni mpanyam twatambula dibatish. Pakwez kupwa kwa machuku makemp, nakwata mupak ukwau wa usey nakash.

Mu mivu yivud, nading nij kamu anch mudimu wa uchibol udi mudimu uwamp nifanyidina kusal, pakwez nadandamena kutong anch nikez kausalang kwam kurutu. Chakusambish, nakwata mupak wa kwilej mutapu wa kusambish kuland yom mu Berlin ni kuya kuyilandish mu jingand jikwau. Kupwa, nakata kusal bil mudimu wam winou mulong wa kuwijik nawamp kurutu kwa kusambish mudimu wam wa uchibol. Chawiy, mu muvu wa 1961, nitiya kusal mudimu ku chau chading mu Hamburg, musumb ujim wa mu Allemagne. Mulong nakata nakash mudimu wam winou, chawiy natonga kand anch mudimu wa uchibol nikez kausal mu machuku ma kurutu. Yom ik nafanyina kusal?

Nimujikitishin nakash Yehova mulong wasadina akadivar a rukat chakwel ankwasha kutek pa ndond ya kusambish mudimu wa Yehova. Arund nam avud ading asambishin kal mudimu wa uchibol ni anshila chilakej chiwamp. Chikwau kand, Mukadivar Erich Mundt wading mu kompony wa mar mu mivu ya kwinyim wankasikesha kumuchingejin Yehova. Walonda anch chisu chadingau mu kompony wa mar, akadivar awonsu ichingejina ayinau ashikena ku kuziy. Pakwez awonsu amuchingejina Yehova ashala ashinshamen ni awiy asambisha kukwash dirijek dia Yehova.

Chikwau kand, Mukadivar Martin Poetzinger, wasadina mu Chisak Chitakedila wadandamena kuyikasikesh akadivar palonday anch: “Kutakaman wawiy mwikadil wa usey nakash ufanyidinanya kwikal nich!” Kupwa kwa kutongijokin pa mazu minam, nimika mudimu wam wa ku mujimbu ni nasambisha kusal uchibol mwi Ngond wa 6, 1963. Winou wading mupak uwamp nakash nakwata! Kupwa kwa angond aad, kurutu nisambisha kukimb mudimu usu, nikala chibol wa pakampwil. Kupwa kwa mivu yikemp, yiyukish yanginkishay Yehova yasutamu yom yawonsu nading nichingejina. Antazuka ku kalas ka 44 ku Shikol ya Gilead.

Dilejan dimwing pakach pa malejan ma usey nakash nileja pakampwil kudi Mukadivar Nathan Knorr ni Lyman Swingle diading anch: “Kangal waswakal kulik chisend chey.” Atukasikesha nakash kulam yisend yetu ap anch chadingap chiswapela kusal mwamu. Mukadivar Knorr walonda anch: “Ukushinshikin pa yom ik? Ov, ukushinshikin pa kafunfut, pa malau, pa uzwendj? Anch ukushinshikin pa mitond, pa yisalamb ni pa yifu yikweta musangar? Ilejany kuyikat antu!” Dichuku dimwing, pading parumburilay Mukadivar Swingle mulong wak akadivar amwing akat kulik swa yisend yau, ushon wamukwata nakash ni wasambisha kudil. Wimika diskur djat ni paninetay. Wampukuna nakash ku muchim chawiy nakwata mupak anch nikutwishap kumunenganesh Kristu ap akadivar nend ashinshamena.​—Mat. 25:40.

Chisu chatulejau ndond yikuyay muntu ni muntu, akadivar asatu a ku Betel ayipula akadivar amwing pamwing ni yamam ndond yatutumau kal. Asambisha kubaz ndond jayilejau kudi akadivar, kupwa am nalonda anch: “Congo (Kinshasa).” Ikuchika kupwa alonda anch: “Oh, Congo! El Yehova ikal ney!” Mu machuku minima, twading tutambwil nsangu kudiokal mu Congo (Kinshasa) anch mwading njit nakash ni antu ading ajipijadin nakash. Pakwez navurika malejan nileja ku Shikol ya Gilead. Machuku makemp kupwa kwa kupwish shikol mwi Ngond  wa 9, 1967, am, Heinrich Dehnbostel ni Claude Lindsay twasinika mulong wa kuya mu Kinshasa musumb ujim wa Congo.

Kupwa kwa kushik mu Kinshasa, twileja dizu dia Français mu angond asatu. Kupwa twaya ku Lubumbashi, watazukangau pa chisu chinicha anch Elisabethville, ku mwimbu ni ngand ya Zambie kurul kwa Congo. Twashakama mu chikumbu cha amishoner mukach mwa musumb.

Kurutu tushika mu Lubumbashi, chikunku chijim cha musumb winou chading kand kal chiteshangap rusangu ruwamp, twasangara nakash kwikal akusambish kulejan uyakin kudi antu avud. Pakad kulab, twikala ni malejan ma Bibil mavud ni twatwishap kwilej nau antu awonsu. Twapana kand uman kudi amakurump a ampurij ading asadina mu guvernema. Antu avud ading alimishin nakash Dizu dia Nzamb ni mudimu wetu wa kulejan. Antu avud alondang Swahili, chawiy am ni Claude Lindsay twileja dizu dined. Kupwa atutuma mu chikumangen cha Swahili.

Ap anch twasangera yom yivud yipandikena kuwap, twarisha kand ni milong. Yisu yivud amasalay in kuleu maar ap ampurij in chisum atufundang mulong wa yom yitwakad kusal. Dichuku dimwing chisak cha ampurij ni mat mau eza chisu twading tukumangena ku chikumbu cha amishoner ni amakundj awonsu atukwata atutwal ku rukan ni atushichika pansh djat ni putulikishawaku pa muten wa dikum wa urel (22 heures).

Mu muvu wa 1969, antuma mu mudimu wa munyingumuku. Chisu nikala kalam wa munyingumuku, nendanganang yisu yivud maweny malemp mu  jinjil ja malau ni jijikina masuk. Mu ul umwing, nzol ni twanend alala mwinshin mwa ulal uchuku. Nikez kavuramenap mutapu masok ma nzol winou manlangwisha pa tul ap anch kwading kuchijadin. Nikat kuvurik mutapu twashakamang ku dijuku dia kasu uchuku pamwing nau akadivar oku twisamb lel piur pa uyakin.

Mulong umwing ujim nakash pakach pa milong twarisha nich wading anch antu amwing pakach petu ading afil mu kan anch adi Atuman a Yehova pakwez ading mu chisak cha Kitawala. * Amwing pakach pau ashikena ku kutambul dibatish ni ikala kand amakurump a yikumangen. Avud pakach pa antu inay ading mudi ‘mayal majingamina’ mu chikumangen, katwishap kuyipumbul akadivar nau anambaz ashinshamena. (Jud 12) Yehova wayidiosha antu inay awonsu mu chikumangen. Kupwa, antu akwau avud andama mu uyakin.

Mu muvu wa 1971, antuma ku biro wa mutiy ku Kinshasa, kwinikwa nading nisadin midimu kushalijan mudi, kufund ni kutum mikand, kutakel milong ya mabuku, ni milong yikwau ya yikumangen. Ku Betel nileja mutapu wa kutenchik mudimu mwi ngand yijim nich nfalang jikemp. Yisu yimwing, mikand yetu yasalang angond avud mwi njil kurutu yishika mu yikumangen. Mikand yimwing ayisendang ku avion, kupwa mu maat majim ni yasalang mbing jivud pa mem. Chawiy mudimu wadandamena kusadik chikalap nchik yikokujol yiney ap yikwau kand.

Nashimoka nakash mutapu warijekangau akadivar chitentam chijim nich nfalang jikemp. Atungang chimet nich mabuch, asadinang masuk mulong wa kusal nich chipang ni asalang jinkat ja masuk mulong wa kushakamap. Abarilang midid kwikal nkangal mulong wa kusal yises ya kusal nich yitand ni matebur. Mulong wa kuburen misumad, asongang mbwambu ja nkil mulong wa kupamp nich. Nasangara nakash pa kuman yitongijok yawonsu yiwamp yasadinau akadivar ni anambaz inay mulong wa kutenchik chitentam ap anch am natwishap kusal yom yiney. Nayikata nakash akadivar inay. Nikat kuyitong nakash akadivar inay kudiosh twaurika nau mulong wa kuya mu chisend chisu!

Mu muvu wa 1974, antuma ku biro wa mutiy ku Nairobi mwi ngand ya Kenya. Twading ni yom yivud ya kusal, mulong mutiy wa Kenya wawiy watakelang mudimu wa kulejan mu jingand dikum jading piswimp, ni mu jingand jimwing ading akangeshin midimu yetu. Tupamp tuvud antuma kwendin jingand jinej, pakampwil mwi ngand ya Éthiopie, kwinikwa akadivar ading ayizengodin nakash ni ading arishin ni yoziu yikash. Avud pakach pau ayisadinang nayimp, yisu yimwing ayitekang mu jinkan; akwau ayijipang. Pakwez ajijamana nich kushinshaman mulong ading ni urund uwamp ni Yehova ni kudi umwing ni mukwau.

Mu muvu wa 1980, nasangara nakash chisu twatijana ni Gail Matheson wa mwi ngand ya Canada. Gail ni yamam twading mu kalas kamwing ku Shikol ya Gilead. Twafundijadinang nend mikand. Gail wading mishoner mwi ngand ya Bolivie. Kupwa kwa mivu 12, twatanijana kand mu New York. Kupwa kwa machuku makemp, twatijadina mwi ngand ya Kenya. Nikat kumujikitish nakash Gail mulong chisu chawonsu ukat kwimburij mutapu wa kutong wa Yehova ni ukat kusangerang yom yikwetay. Udandamedin kwinkwash mu mutapu wa pakampwil ni udi mbay nam wa rukat.

Mu muvu wa 1986, am ni Gail atutuma mu mudimu wa munyingumuku oku nikat kusadin kand ku Biro wa Mutiy. Mu mudimu wa munyingumuku winou twading tufanyidin kand kusadin mu jingand jivud jading mwinshin mwa umutakel wa biro wa mutiy wa Kenya.

Nikat kuvurik mutapu twatenchika chitentam mu muvu wa 1992 mwi ngand ya Asmara (yitazukinau katat anch Érithrée) pa chisu chinacha, mudimu wetu wading kandikal aukangesh mwi ngand yiney. Cha ushon, twatana kusu chikumbu chimwing chading chikisina pol ni chading chikisina nakash mukach. Pakwez dichuku dia chitentam, nashimoka nakash pa kuman mutapu wachirijekau nawamp  nakash kudi akadivar chakwel chikal ndond yiwamp ya kumwifukwil Yehova. Majuku mavud maleta marido mulong wa kubwik ndond jading jikisina. Twasangera nakash chitentam chiwamp ni chisangareshina kwakumangana antu 1 279.

Mudimu wa munyingumuku wading uwamp nakash mulong rubing ni rubing twaswimpang yikumbu ya kushakam. Chisu chimwing twashakama mu chikumbu chiwamp chading chitungidinau piswimp ni karung; chisu chikwau, twashakama mu kachikumbu katungau ni malat ni musalany wading pa ametre 100. Pakwez chikalap nchik kushalijan kwa ndond twasadina, yom tuvurikining nakash madi machuku twading tukwatikena nich mudimu wa kulejan pamwing nau in kulejan ni ayibol akweta mushiku. Chisu chatushemuninau, twasha arund twading tukatina ni twayitongang nakash.

Kusambish muvu wa 1987 kushik mu muvu 1992, mudimu wetu awitiya mu jingand jivud jading mwinshin mwa umutakel wa mutiy wa Kenya. Mudi chibudikin, asambisha kutek mitiy ni ma biro mu jingand kushalijan. Mu muvu wa 1993, atutuma kusadin ku biro wa mu Addis-Abeba, mwi ngand ya Éthiopie, mwatwasalang mudimu wetu ku ujindj mu mivu yivud, pakwez awitiya chadi kudi mburamatad.

Yehova wayukisha mudimu wetu mu Éthiopie. Akadivar nau anambaz avud asambisha kusal uchibol. Kusambish kamu mu muvu wa 2012, muvu ni muvu in kulejan 20 pa chitot akat kusal mudi ayibol a rawonsu. Kupwa tulas twa chiteokras twapanin kufumb kwa usey ni atungin Yot ya Want piswimp 120. Mu muvu wa 2004 dijuku dia Betel diashemunikidin mu yikumbu yisu yatunginau ni kutung kwa Chot cha Chitentam udi uman umekeshina anch Yehova watuyukishin.

Mu kusut kwa mivu, am ni Gail twasangera urund wa piswimp nau akadivar ni anambaz a mu Éthiopie. Chisambu ni kudimuk kwau kwatubachika kuyikat nakash. Machuku masutina am twarishin nakash ni mayej ni chinech chasadin anch atutuma ku mutiy wa Europe Central. Kwawiy kwinikwa kutulaminau nich rukat, pakwez tudandamedin kuyivurik arund netu twadia nau ku Éthiopie.

Twamana mutapu wapamishay Yehova mudimu wend. (1 Kor. 3:6, 9) Chilakej, pinasambisha kupan uman kudi antu a mu Rwanda ezang kukimb kwivre mu Congo, kwikil in kulejan ading apanina kal uman mu Rwanda. Nlel kudi akadivar ni anambaz 30 000 ni kusut mwi ngand yiney. Mu muvu wa 1967, mu Congo (Kinshasa) mwading in kulejan piswimp 6 000. Katat mudi in kulejan piswimp 230 000, ni antu miliyon umwing ni kusut akumangen ku Chivurikish mu muvu wa 2018. Mu jingand jawonsu jading jitakedinau kudi mutiy wa Kenya, uvud wa in kulejan wayil kurutu ni wikadin wa antu 100 000 ni kusut.

Mu mivu 50 yasutina ey, Yehova wasadidin akadivar kushalijan mulong wa kwinkwash kusambish mudimu wa chisu chawonsu. Ap anch nidandamedin kurish ni usany, nileja kumuchingejin Yehova nakash. Yom namana mu Afrik yankwasha kukudish mwikadil wa kushimpish muchim ni kusanger yom nikweta. Am ni mukajam Gail twasangerang akadivar nau anambaz atwakang mu mutapu uwamp, ajijamenang yakamish ni amuchingejinang Yehova. Nimujikitishin nakash Yehova mulong wa ranaken rend ripandikena. Yiyukish yend yasutamu yom yin yawonsu nading nichingejina.​—Kus. 37:4.