Navadika mu muvu wa 1935 mu musumb wa Darlaston mu Pays Noir, ndond yidia mu Angleter yapilau mwamu chisu chizula mwiur mish yadiokala ku ma sosiyete mading masadina yikung ni ku yom yikwau kand. Pinading ni mivu yinying, anvajam asambisha kwilej Bibil nau Atuman a Yehova. Nikala nich kashinsh ka uyakin pinading nichid mwanikanch, ni ambatisha mu muvu wa 1952 pinading ni mivu 16.

Chisu chawiy chimwing, nasambisha kwilej kusal mudimu ku sosiyete mujim nakash wasalang yamu ya mudimu ni yikung ya ma motak. Nasambisha kwiyijidish mulong wa kwikal sekreter wa sosiyete, mudimu nading nikatina nakash.

Changita kukwat mupak wa usey chisu chanlejay kalam wa munyingumuku anch nisambish kutakel Dilejan dia Buku mu chikumangen chetu cha Willenhall. Pakwez chankasikena nakash. Pa chisu chinicha, nakumanganang mu yikumangen yaad. Mukach mwa rubing, nakumangenang mu chikumangen chading piswimp ni kwi ndond nasadinang mudimu mu musumb wa Bromsgrove pa chintamp cha akilometre 32 ni kwol kwetu. Ni kwinsudiel kwa rubing pinachirikang kwa anvajam, nakumangenang mu chikumangen chidia mu Willenhall.

Mulong nading nikatin kukwash dirijek dia Yehova, nitiya yom yanlejau kud kalam wa munyingumuku, ap anch chinech chading chingitin kwimik mudimu nasalang nading nikatina nakash. Mulong namulikidila Yehova kutakel mwom wam, chinech chanletina musangar nakash, ni nikatap kwinan ap pakemp mulong wa chom chinech.

Pinakumangenang mu Chikumangen cha mu Bromsgrove, natanijana ni nambaz wa ufun dijin diend Anne. Wading wipanin mu kumusadin Yehova nakash. Twatijana nend mu muvu wa 1957, ni twikala ni dilau dia kumusadin Yehova pamwing mud ayibol a rawonsu, ayibol a pakampwil, mu mudimu wa kwendangan, ni ku Betel. Anne wanletidin musangar nakash mu mwom wam wawonsu.

Mu muvu wa 1966, twikala ni musangar nakash wa kwilej kalas ka 42 ka shikol ya Galad. Kupwa atutuma  kusadin mu Malawi, ngand ya mu Afrik mudia antu ijikena nakash mulong wa mwikadil wau wa kwak angendj kwa chirungul ni chisambu. Twatonginap anch tukutwishap kushakam chisu chilemp mwi ngand yiney.

Twashika mu Malawi dichuku dia ngond dia 1 Ngond wa 2, 1967. Ngond wa kusambish twasutisha chisu chivud mu kwilej dizu, ni kupwa twasambisha mudimu wa distrik. Twendishang ka motak katonginangau antu amwing anch kakutwish kwendin pa ndond yawonsu, ap mu mem. Pakwez chinech chadingap chakin. Twatwishang kwetu kwendin ching mwi ndond mudia mem makemp. Yisu yimwing twashakamang mu tutubund twa kumit ni mavu, ni pa chisu cha ruval twatekang bash piur mulong wa kukangesh kudja. Wading mutapu ukash twasambisha mudimu wetu wa umishoner, pakwez twading tukatin chisend chetu!

Mwi Ngond wa 4, najingunina anch twadingap kulemp ni kutupompat kud guvernema. Nova ku radio diskur dia mwant wa ngand ya Malawi, Dr. Hastings Banda. Walonda anch Atuman a Yehova kadingap kulambul yitad, ni anch ading aletin kanrumbangesh mu yom ya politik. Chakin kamu, kufund kwinoku kwading kwa makasu. Twading twij anch yawonsu yiney yading kwau mulong twadingap twiyandjikina mu milong ya chipolitik, ni twading tulikin kuland kart mulong wa kwikal mu yisak ya politik.

Kusambish mwi Ngond wa 9, twatanga mu majurnal anch mwant wa Ngand wading uyedin akadivar anch aletishin kanrumbangesh kwi ndond kwawonsu. Walejana mu chikumangan chau cha politik anch guvernema ukusal swaswa mulong wa kupan mbil ja kukangesh mijikit ya Atuman a Yehova. Kukangesh kwinoku kwasambisha pa dichuku dia 20 Ngond wa 10, 1967. Kupwa kwa chisu chikemp,  ampurij ni antakel akata kushinshikin milong ya antu adiokila mu jingand jindj aya ku biro wa mutiy mulong wa kufung chis ni kuyopat amishoner mwi ngand.

Kupwa kwa kututek mu rukan mu machuku masatu, atutwala mu Moritani, ngand yading mwinshin mwa Grande-Bretagne. Pakwez antakel a mu Moritani katwitiyijap kushakam mwinimwa mud amishoner. Chawiy atutuma mu Rhodesie (utazukinau katat anch Zimbabwe). Pitwashika kwinikwa, twaya kwa ntakel wa chisum ukata kushinshikin milong ya antu adiokila mu jingand jindj ni katwitiyijap kwandam, walonda anch: “Akulikinany kushakam mu Malawi. Akulikinany kand kushakam mu Moritani. Kunoku kwawiy wamananya kal anch kuwanyidina kwez.” Anne wasambisha Kudil. Chamekana anch kwikil muntu wading utukatina! Pa chisu chinicha, nakata kwam kulikap chisend cham ni kuchirik mu Angleter. Kwinsudien, antakel akata kushinshikin milong ya antu adiokila mu jingand jindj atwitiya kushakam uchuku wa kabuj ku biro wa mutiy, ni atuleja anch tufanyidin kuya ku biro wau mujim anch kwacha. Twading twaziyang kal, pakwez twadandamena kutek milong mu makas ma Yehova. Urel wa dichuku dialondulaku, pakad kuchingejin atwitiya kushakam mud angendj mu Zimbabwe. Nikezap kavuramen mutapu niyova dichuku dinidia​—nikala nich kashinsh anch Yehova utakedil njil yetu.

Ku biro wa mutiy wa mu Zimbabwe, anleja kusadin ku Departema wa Mudimu, wading utadina midimu ya mu Malawi ni mu Mozambik. Ading ayizengodin nakash akadivar a mu Malawi. Mu chisend cham, nading kand ni mudimu wa kukarumun marapor matumangau kud atulam a minyingumuku a mu Malawi. Dichuku dimwing pinading nikat kusal mudimu urel nakash, nadila pinatanga piur pa kuzengok kukash kwading kurishinau nich akadivar ni anambaz netu. a Pakwez ku mutambu ukwau, kushinshaman, ritiy, ni kujijaman kwau yampukuna nakash.​—2 Kor. 6:4, 5.

Twasala yawonsu tukutwisha mulong wa kupan yakudia ya mu spiritu kud akadivar ashala mu Malawi ni kud akadivar achinina mu Mozambik mulong wa kwiyep chisum. Chisak chakarumunang dizu dia Chichewa, dizu dilondiningau nakash mu Malawi, achitwala mu chir chijim cha mukadivar mu Zimbabwe. Mukadivar winou wayitungina yikumbu ni biro wa kukarumwin. Kwinikwa adandamena ni mudimu wau wa usey wa kukarumun mikand yimedina pa Bibil.

Twarijeka chakwel atulam a munyingumuku a mu Malawi akumanganang ku chitentam cha distrik cha muvu ni muvu mu Zimbabwe. Pashikangau kwinikwa, ayinkishang ma plan ma madiskur ma chitentam. Pachirikangau mu Malawi, asalang usu wa kuyilej akadivar malejan ma chitentam. Muvu umwing padingau mu Zimbabwe, twarijeka Shikol ya Mudimu wa Want mulong wa kuyikasikesh atulam a munyingumuku inay ading atakamena.

Mwi Ngond wa 2, 1975, nasala weny mulong wa kuya kuyital Atuman a mu Malawi achinina mu kompony wa angendj mu Mozambik. Akadivar inay ading alondwil umutakel wawonsu usu wading udiokila ku dirijek dia Yehova, kuwejaku ditenchik dia kwikal ni chisak cha amakurump. Amakurump a chikumangen asu atenchika mijikit yivud ya mu spiritu, mud kusal madiskur ma antu awonsu, kushinshikin mufund wa pichuku, ni Chinong cha Kalam, ni ap kand kusal yitentam. Atenchika yom mu kompony mud ku chitentam, kwading madepartema mulong wa kwinangish ndond, kupan yakudia, ni kuking antu ni yom. Akadivar inay ashinshamena asala yom yivud nakash kusutin ukwash wa Yehova, ni kupwa kwa kuyendin, ankasikesha chipandakena.

Piswimp mu muvu wa 1979, biro wa mutiy wa Zambi wasambisha kutakel mijikit ya mu Malawi. Pakwez yisu yivud nadandamena kuyivurik akadivar a mu Malawi, ni nalembilang mulong wa awiy, ni antu akwau avud asalang mwamu. Tupamp tuvud pinading nisadina mu Komite wa Mutiy wa mu Zimbabwe, natanijanang ni atutum adiokalang ku biro mujim wa pa mangand mawonsu, pamwing ni akadivar ading ni yisend mu Malawi, mu Afrik wa Kurul, ni mu Zambi. Chisu ni chisu twisambinang chipul  ech: “Yom ik yikwau tukutwisha kuyisadin akadivar netu a mu Malawi?”

Mu kusut kwa chisu, kuzengol kwakepa. Akadivar achina asambisha chad kuchirik mu Malawi, ni ashala ading akat kusutaku chad rinkind. Mu jingand ja piswimp, ayitiyija Atuman a Yehova kulejan ni kukumangan, ni adiosha mbil jayitekinau mulong wa kukangesh mijikit yau. Kushik mu muvu wa 1991, ngand ya Mozambik niyau yasala mwamu. Pakwez twiyipula anch: ‘Chisu ik chikwikalau Atuman a Yehova a mu Malawi ni want ipau?’

Milong ya politik mu Malawi yaswimpa, ni mu muvu wa 1993, guvernema wayitiyija Atuman a Yehova kuchirikin mijikit yau. Chisu chikemp kupwa kwa yiney, nading nikat kwambamb ni mishoner umwing wangipula anch: “Ov, ukuchirik kand mu Malawi?” Pa chisu chinicha nading ni mivu 59, chawiy nakula anch: “Bwat, oku mivu yavul kal!” Pakwez, pa dichuku diawiy dimwing, twatambula uruu udiokila ku Chisak Chitakedila utulejina kuya mu Malawi.

Twading tukatin nakash kusadin mu Zimbabwe, chawiy, chatukasikena kukwat mupak. Mu Zimbabwe twading tukwet musangar ni twading nau arund awamp avud. Chisak Chitakedila chatuleja anch tukutwish kwetu kushal mu Zimbabwe anch tukatin. Chawiy chafanyina kutuswapel kukwat mupak ni kushal mu Zimbabwe. Pakwez, nivurikin mutapu nasambisha kutong piur pa mutapu Aburaham ni Sara washau chikumbu chau chiwamp ap anch adingap nchik amapal, mulong wa kuziyin ku umutakel wa Yehova.​—Dis. 12:1-5.

Twakwata mupak wa kulondul umutakel wa dirijek dia Yehova, ni twachirika mu Malawi pa dichuku dia 1 Ngond wa 2, 1995, kupwa kwa mivu 28 kudiosh twashika mu Malawi kapamp ka kusambish. Twasala Komite wa Mutiy, ni twadingamu kwetu akadivar asatu, chawiy twakwatikana nakash mulong wa kutenchik mijikit ya Atuman a Yehova.

Musangar mud ik wa kuman mutapu uyila uvud kurutu kusutin ukwash wa Yehova! Uvud wa in kulejan wavula pakad kulab, mulong mu muvu wa 1993 kwading in kulejan 30 000, pakwez kushik mu muvu wa 1998, uvud winou washika 42 000. b Chisak chitakedila chitiya kutung biro wa mutiy musu mulong wa kubangin maswir ma uvud winou uyila kurutu. Twalanda ma hectare 12 mu musumb wa Lilongwe, antonda mulong wa kusadin mu komite wa kutung.

 Mukadivar Guy Pierce wading usadidina mu Chisak Chitakedila wasala diskur dia kupan yikumbu yiney yisu kud Yehova mwi Ngond wa 5, 2001. Atuman a Yehova tunan twad ni kusut akumangana, avud pakach pau ading ayibatishin kal pasut kal mivu 40 ni kusut. Akadivar ni anambaz inay ashinshamena ajijamena kuzengol kukash mu mivu yivud pa chisu chakangeshau midimu yetu. Ading atuzwendj nakash ku mujimbu, pakwez ampich nakash mu spiritu. Ni ikala ni musangar wa kuya kutal Betel wau musu. Pading pendangenau mu Betel, ading akat kuwang miminy ya Want kukwatijan ni mutapu uwanginingau mu Afrik, ni yawapisha nakash chinship chinech ni kwimpukun ku muchim mu mutapu nakad kal kumanangap kand. Yom yiney yamekesha anch Yehova ukat kuyiyukish nakash antu akata kujijamen yoziu nich kushinshaman.

Kupwa kwa kupwish kutung mutiy, nasangara nakash panginkishau chisend cha kupan kud Yehova Yot ya Want. Yikumangen ya mu Malawi yatanyinamu nakash mu program wa dirijek wa kutung Yot ya Want mau mau mu jingand ja uzwendj. Kwinsambishin, yikumangen yimwing yakumangenang mu yitand ya mitond. Ayibwikang piur nich yises ya maleny, ni atungang yitwamu yilemp ya mavu. Katat akadivar akat kwipan nich mushiku mu kubul matafad ni kumosh mulong wa kutung nich jindond jiwamp ja kukumangen. Pakwez ni katat achikatin kwau kusadin yitwamu yilemp ya antu avud mu Yot ya Want pa ndond pa kusadin yitwamu ya muntu umwing, mulong ap anch pawanyinang kal antu, akutwish kuwejap muntu mukwau weza kal!

Nova kand musangar nakash pa kuman mutapu Yehova wayikwashay antu kupam mu spiritu. Chom cha pa kampwil champukuna nakash kud akadivar ansand a mu Afrik chading kwipan kwau kwa kwikatin mulong wa kukwash midimu yasadikang, ni ileja pakad kulab yom yivud kusutin kufumb kwa dirijek dia Yehova ni mu kusal mudimu. Awanyisha yisend yivud ku Betel ni mu yikumangen. Yikumangen ayikasikeshang kand kud atulam a munyingumuku asu atondangau, avud pakach pau ading ni amband. Ambay a uruw inay atondang kwipan mu kumusadin Yehova chisu chawonsu kusutin kulik kuval, ap anch kusal mwamu kutanijadinap ni rusot ra yishankur ap majuku mau.

Kupwa kwa kusal mivu 52 mu Afrik, narisha ni mayej. Chisak Chitakedila chitiyija chitongijok cha Komite wa Mutiy cha kututum mu Grand-Bretagne. Chatwovisha nayimp kusha chisend twading tukatina nakash, pakwez dijuku dia Bethel dia mu Grande-Bretagne ditubangidin patudia katat amapal.

Nikwet kashinsh anch kumulikidil Yehova kutakel mwom wam wading mupak wa kusambish kuwap mu mwom wam wawonsu. Anch nachingejina ronganyin ram amwinam, kwikil wija kwi ndond kwafanyina kwinshikij mudimu wam wa ku mujimb nalikap. Yehova wading wij kal yom nading niswirikedina mulong wa ‘kutenchik jinjil jam.’ (Jnsw. 3:5, 6) Panading nsand, nading nikatin nakash kwilej yom yivud piur pa mutapu usadikining mudimu ku sosiyete mujim. Pakwez dirijek diawonsu dia Yehova dianginkisha mudimu wa mu spiritu wanletina musangar chipandakena. Kud am, kumusadin Yehova kwading ni kudandamedin kwikal kwa usey nakash mu mwom wam!