1-2. (a) Mulong wak Harmagedon ridi rusangu ruwamp kudi antu? (b) Yipul ik tukushinshikina mu mutu wa mulong winou?

OV, WATESHINAP kal antu akat kusadin dizu “Harmagedon” mulong wa kumekesh anch jidi njit ja nikleyer ap chinship chikash cha mar chikushesha mangand? Chinyim ni chinech, yom yilondinay Bibil piur pa Harmagedon yimekeshin anch ridi rusangu ruwamp rikutwisha kulet musangar! (Kuj. 1:3) Njit ja Harmagedon jikuyisheshap antu pakwez jikuyipandish kamu! Mutapu ik twija mwamu?

² Bibil umekeshin anch njit ja Harmagedon jikez kuyipandish antu kusutil kushesh winyikel wa antu. Njit jinej jikez kuyipandish kand antu kusutil kuyishesh antu ayimp ni kuyichidij antu atentamina. Jikuyipandish kand antu kusutil kushesh yom yawonsu yiyipishina divu dietu. (Kuj. 11:18) Chakwel tutesha kurumburik kwa yom yiney nawamp, el amboku tushinshikinany yipul yinying ey: Harmagedon chom ik? Yinship ik yikusadika kurutu Harmagedon ashika? Mutapu ik tukutwisha kwikal pakach pa antu akupanda ku Harmagedon? Mutapu ik tukutwisha kushal ashinshamena pitusejina piswimp ni Harmagedon?

3. (a) Dizu “Harmagedon” dirumburikin ik? (b) Kukwatijan ni Kujingunik 16:14, 16, mulong wak tukutwish kulond anch Harmagedon yidiap ndond yakin yidia pa divu?

³ Tang Kujingunik 16:14, 16. Dizu “Harmagedon” adisambidin kapamp kamwing mu Bibil ni dizu dined didiokil ku dizu dia Hebereu dirumburikina anch ‘Mukandu wa Megido.’ (Kuj. 16:16) Megido wading musumb wa Isarel wa pasak. (Jos. 17:11) Pakwez Harmagedon yidiap ndond kampand yidia  pa divu. Mu kulond patok, Harmagedon umekeshin chisu chikukumanganau “ant a mangand mawonsu” mulong wa kurish ni Yehova. (Kuj. 16:14) Pakwez, mu mutu wa mulong winou, tukusadin kand dizu “Harmagedon” mulong wa kumekesh njit jikusadika kapamp kamwing kupwa kwa kuyikumangej ant a pa mangand. Mutapu ik twija anch Harmagedon yidi ndond ya chifanikesh? Chakusambish, kwikiling mukandu utazukinau anch Megido. Cha kaad, musumb wa Megido udi ukemp nakash mulong wa kuyikumangejinamu “ant a mangand mawonsu,” ni amasalay au ni matemb mau ma njit. Cha kasatu, mudi tukumana kurutu oku mu mutu wa mulong winou, njit ja Harmagedon jikusambish chisu chikuyirishikishau antu a Nzamb adia pa mangand mawonsu kudi “ant” a mangand.

4. Mulong wak Yehova ufanakeshin njit jijim ja nsudiel ni Megido?

⁴ Mulong wak Yehova ufanakeshin njit jijim ja nsudiel ni Megido? Megido ni Nkurubuk ya piswimp ni Jizarel jading ndond jarishinangau njit nakash. Yisu yimwing Yehova wayikwasha antu end kuwin njit jivud pa ndond jinej. Chilakej, “ku mem ma Megido,” Nzamb wamukwasha Nkalansambu mwin Isarel Barak kuwin chisak cha amasalay in Kanan atakelau kudi kalal wau Sisera. Barak ni muprofet mband Debora amujikitisha Yehova mulong wa kuwin kwinoku kushimokishena. Awanga anch: “Atutumbu a mwiur arisha njit . . . nend Sisera. Wit wa Kison wayikomba shat.”​—Ank. 5:19-21.

5. Mutapu ik ukushalijana njit ja Harmagedon ni njit jarishay Barak?

⁵ Barak ni Debora apwisha muminy wau nich mazu am: “Mwamu mukat kujiyau akankuny ney awonsu, A! [Yehova], pakwez, arund ney akat kwikal mudi muten muukata kubudik nich usu wau!” (Ank. 5:31) Chilik chimwing kand, akankuny a Nzamb akusheshik kwi njit ja Harmagedon, chad antu amukatina Nzamb akupand. Pakwez, kudi kushalijan kumwing kwa usey pakach pa njit jinej jaad. Ku Harmagedon, antu a Nzamb kakurishap. Kakwikalap ni mat! ‘Usu wau ukwikal wa kushakam zoong ni kumuchingejin’ Yehova ni amasalay end a mwiur.​—Isay 30:15; Kuj. 19:11-15.

6. Yom ik yikutwishay kusadin Yehova mulong wa kuyishesh akankuny end ku Harmagedon?

⁶ Mutapu ik ukezay Nzamb kuyishesh akankuny end ku Harmagedon? Ukez kasadin mitapu kushalijan. Chilakej ukutwish kusadin yom mud kunyikek kwa divu, ruval wa mayal ni milayilay ya nzaj. (Job 38:22, 23; Ezek. 38:19-22) Ukutwish kand kusal anch akankuny end asambisha kujipijan ayinau. (2 Jsng. 20:17, 22, 23) Ni ukutwish kusadin kand angel end chakwel ayijipa antu ayimp. (Isay 37:36) Chikalap nchik yom yikusadinay Nzamb, twij anch ukuyiwin kamu chakin akankuny end awonsu. Ukuyishesh akankuny end awonsu. Ni antu awonsu atentamina akupand​—Jnsw. 3:25, 26.

7-8. (a) Kukwatijan ni 1 Tesalonik 5:1-6, yom ik yakadingawap kal kulond yikulondau anyikel a mangand? (b) Mulong wak makasu minam makwikal ma ubaj?

⁷ Akusambel kulond anch “Chisambu ni [zoong]” kurutu kwa ‘dichuku dia Yehova’ kushik. (Tang 1 Tesalonik 5:1-6.) Kukwatijan ni 1 Tesalonik 5:2, ‘dichuku dia Yehova’ dimekeshin “mar makash.” (Kuj. 7:14) Mutapu ik tukujingunina anch mar makash madi piswimp ni kusambish? Bibil utulejin anch antu akez kalond yom yakadingawap kal kulondang. Kulond kwinoku kukumekesh chijingidij chijim cha nsambishin ya mar makash.

⁸ Kwinoku kukez kikal kulond kwa “chisambu ni [zoong].” Mulong wak antakel a mangand akez kalond mwamu? Ov, antakel a chirelijon akez kabombakan nau? Pamwing ap chikwikal mwamu. Chawiy, mazu minam makez kikal makasu mapepidilau kudi ayilembil. Pakwez makasu minam makez kikal ma ubaj  nakash mulong makuyidimb antu anch ikal kal mu diking kurutu mar makash makadingap kal kushiken mu rusangu ra muntu masambisha. Chakin kamu, “pawiy pinipa kamu kusheshik kukez kuyikashimwish, mudi misong yikata kumukashimwish mband ukweta divumu.” Chikwikal nchik piur pa atushalapol ashinshamena a Yehova? Akez pamwing ap kushimok piur pa kusambish kwa chikashimwish kwa dichuku dia Yehova, pakwez kakezap kwov wom.

9. Ov, Nzamb ukushesh mangand ma Satan kapamp kamwing? Rumburil.

⁹ Yehova kakusheshap mangand ma Satan mawonsu kapamp kamwing mudi mwasalay pa chirung cha Nowa. Pakwez, ukez kashesh mangand ma Satan mu yikunku yaad. Chakusambish, ukushesh Babilon Mujim, charumburik anch ditenchik dia pa mangand mawonsu dia relijon wa makasu. Chakaad, ku Harmagedon, Nzamb ukushesh chikunku chakaad cha mangand ma Satan, kuwejinaku ditenchik dia chipolitik, amasalay ni ditenchik dia milong ya kwisak. El tushinshikinany chikurikina yinship yiney yaad ya usey.

10. Kukwatijan ni Kujingunik 17:1, 6 ni 18:24, mulong wak Yehova ukumushesh Babilon Mujim?

¹⁰ “[Dirumburish] dia mband mwin kusochik nakash.” (Tang Kujingunik 17:1, 6; 18:24.) Babilon mujim wapwishikishin kal kalimish ka dijin dia Nzamb. Ukat kufundish makasu piur pa dijin dia Nzamb. Mudi mband mwin kusochik, relijon wa makasu walikin kal kwikal ushinshamena kudi Yehova kusutil kukwash maguvernema ma antu. Ukat kusadin usu ukwetay mulong wa kuyizengol antu end ni kuyiy nfalang. Ni wajipin kal antu avud nakash kuwejinaku ni atushalapol a Nzamb. (Kuj. 19:2) Mutapu ik ukumusheshau Babilon Mujim kudi Yehova?

11. “Nnam usuz wa [chidiany]” urumburikin ik, ni mutapu ik ukumusadinau kudi Nzamb mulong wa kushesh Babilon Mujim?

¹¹ Yehova ukumushesh “mband mwin kusochik nakash” kusutil “misengu dikum” ya “nnam usuz wa [chidiany].” Nnam wa chidiany winou wa chifanakesh umekeshin Nations unies. Miseng dikum yimekeshin maguvernema makwashina ditenchik dined. Pa chisu chatenchikay kal Nzamb, maguvernema  minam makumurishikish Babilon Mujim. “Akez kumubuu yom yawonsu, amusha kanzikis” kusutil kumutambul mapit mawonsu ni kumekesh uyimp wend patok. (Kuj. 17:3, 16) Kusheshik kwinoku kukez kasadik mau mau nakash​—kukumekan mudi kwasadikang kwau mu dichuku dimwing. Chawiy, awonsu ading amukwashina akez kanenganan nakash pakampwil, mulong wad kwibaz ni kulond anch: “Am nidi mwant mband, niyikedin! Am kinidiap mwadiamufu, chad kinikez kudilap rufu, bwat!”​—Kuj. 18:7, 8.

12. Yehova kakulikidilap anch michid yisal ik, ni mulong wak?

¹² Nzamb kakwitiyap anch michid yiyishesha antu end. Atushalapol a Nzamb akat kwibaz mulong asendin dijin diend ni aziyidin kwi mbil yend ya kudiokal mu Babilon Mujim. (Mid. 15:16, 17; Kuj. 18:4) Asadin kand usu wa kuyikwash antu akwau chakwel adiokal mu Babilon. Chawiy, ap anch atushalapol a Yehova akuyichidij chisu chikusheshau Babilon Mujim, pakwez akwikal ni kuswir kwa ritiy rikash mulong wa kujijamen yom yikusadika kupwa kwa kumushesh Babilon Mujim.

13. (a) Gog udi nany? (b) Kukwatijan ni Ezekiel 38:2, 8, 9, yom ik yikumubachika Gog kuyirishikish antu a Nzamb?

¹³ Kurishikish kwa Gog. (Tang Ezekiel 38:2, 8, 9.) Kupwa kwa kusheshik kwa ditenchik dia relijon wa makasu, antu a Nzamb akwiman dang mudi mutond umwing kusu wapanda kal ku rinkind mukash. Chakin kamu, Satan ukujiman nakash. Mulong wa ujim winou, ukusadin makasu ma ayilembil​—‘mazu mapepidilau matakanena’​—chakwel michid yibombakan pamwing mulong wa kuyirishikish atushalapol a Yehova. (Kuj. 16:13, 14) Kubombakan kwinoku kwa michid akutazukin anch ‘Gog wa ngand ya Magog.’ Chisu chikusambisha michid kuyirishikish antu a Yehova, pawiy pakusambisha njit ja Harmagedon.​—Kuj. 16:16.

14. Yom ik yikezay kajingunin Gog?

¹⁴ Gog ukuchingejin mu “chikas [chend] cha mujimb[u] wa mbij”​—amasalay end akweta usu. (2 Jsng. 32:8) Etu tukumuchingejin Yehova Nzamb wetu​—kusal mwamu kukutwish  kumekan mudi usup kudi michid. Mulong wak? Mulong Babilon Mujim wad ukwet usu, pakwez anzamb end katwishilap kumupandish kudiay “nnam wa [chidiany]” ni ku “miseng” yend! (Kuj. 17:16) Chawiy Gog ukutong anch chikumuswapel kutushesh. “Mudi ruvul mukash wa rinkind usutila mwi ngand,” mwawiy mukuyirishikishay atushalapol a Yehova. (Ezek. 38:16) Pakwez, Gog ukujingunin pakad kulab anch wafa kal mu mupit. Mudi yom yamushikena Farao mu Karung Musuz, Gog ukujingunin anch urishin ni Yehova.​—Kub. 14:1-4; Ezek. 38:3, 4, 18, 21-23.

15. Mutapu ik ukezay Kristu kuwin njit ja Harmagedon?

¹⁵ Kristu pamwing ni amasalay end a mwiur akez kuyichidij antu a Nzamb ni kumushesh Gog ni amasalay end. (Kuj. 19:11, 14, 15) Pakwez, chikwikal nchik piur pa mukankuny mujim wa Yehova, Satan ukudimba michid ni kuyibachik chakwel yiyirishikisha antu a Nzamb kwi njit ja Harmagedon? Yesu ukumukas Satan nau ayilembil end ni ukuyidjibwil mu dibuku diakad musul mu mivu kanan.​—Kuj. 20:1-3.

16. (a) Mutapu ik tukutwisha kumekesh anch ‘tumwij Nzamb’? (b) Mulong wak kumwijik Yehova kukwikal chiyukish pa chisu cha Harmagedon?

¹⁶ Twikala asu mu uyakin ap bwat, chakwel tupanda ku Harmagedon tufanyidin kumekesh anch ‘tumwij Nzamb’ ni “kuziyil ku rusangu ruwamp ra Nsalejetu Yesu.” (2 Tes. 1:7-9) Tukulond anch ‘tumwij Nzamb’ anch twij yom yikatiningay ni yikisiningay ni kwijik kand mbil jend. Tukumekesh kand anch tumwij Nzamb anch twamukat ni kumuziyil ni anch twamwifukwil ching kusu ndiy. (1 Yoh. 2:3-5; 5:3) Pitumekeshina anch tumwij Nzamb, twitapidil dilau dia kwikal ‘ijikena kudi ndiy,’ ni chinech chikutukwash kupand ku Harmagedon! (1 Kor. 8:3) Mutapu ik? Mulong kwikal ‘ijikena kudi ndiy’ kukutwish kurumburik kwikal ni dilau dia Nzamb.

17. “Kuziyil ku rusangu ruwamp ra Nsalejetu Yesu” kurumburikin ik?

¹⁷ Mu “rusangu ruwamp ra Nsalejetu Yesu” mudi uyakin wawonsu wafundishay Yesu ututanina mu Dizu dia Nzamb. Tukat kuziyil ku rusangu  ruwamp anch twasadin yom twilejina mu mwom wetu. Kuziyil kwinoku kwitin kand kutek yisakin ya Want pa ndond ya kusambish, kushakam kukwatijan ni mbil ja Nzamb ni kulejan Want wa Nzamb. (Mat. 6:33; 24:14) Kupwa, kwitin kand kuyikwash akadivar a Kristu azizidilau many pawanyishinau yisend yau yijim.​—Mat. 25:31-40.

18. Mu mutapu ik ukumekeshau akadivar azizidilau many a Kristu ranaken kudi amikoku akwau ayikwasha?

¹⁸ Atushalapol a Nzamb azizidilau many akuyimekeshin “amikoku akwau” ranaken piswimp ap mulong wa ukwash wayinkishau. (Yoh. 10:16) Mutapu ik? Kurutu njit ja Harmagedon jisambisha, azizidilau many awonsu 144 000 akwikal ayil kal mwiur ni akwikal yitang ya mu spiritu yakad kufang. Akwikal chad pakach pa amasalay a mwiur akumushesha Gog ni kuchidij “chisak chipandakena kujimb” cha amikoku akwau. (Kuj. 2:26, 27; 7:9, 10, TMK) Mwaning, chisak chipandikena kujimb chikwikal ni musangar nakash mulong ayikwasha atushalapol azizidilau many chisu chadingau pa divu!

19-20. Chikalap nchik yakamish turishina nich, mutapu ik tukutwisha kushal ashinshamena pitusejina piswimp ni Harmagedon?

¹⁹ Mu machuku minam ma nsudiel ma mar nakash, atushalapol avud a Yehova arishin ni yakamish. Ap mwamu tukutwish kujijaman nich musangar. (Jak. 1:2-4) Chom cha usey nakash tufanyidina kusal chidi kudandamen kulembil. (Luka 21:36) Kupwa kwa kulembil tufanyidin kand kutang Dizu dia Nzamb dichuku diawonsu ni kutongijokin pa yom tutangina, kuwejaku ni uprofet wisambidina yom yisadikina pa chirung chetu. (Kus. 77:12) Anch twasal yom yiney ni twipan chipandikena mu mudimu wa kulejan, ritiy ni ruchingej retu yikwikal yikash!

²⁰ Tong musangar ukwikala nich chisu chikusheshau Babilon Mujim ni chisu chikupwa njit ja Harmagedon! Cha usey nakash, tongin kand pa musangar ukwikala nich chisu chikulimishay muntu mwawonsu dijin dia Nzamb ni ukaleng wend! (Ezek. 38:23) Chakin kamu, Harmagedon ridi rusangu ruwamp kudi antu amwija Nzamb, amuziyidila Mwanend, ni akujijamana djat ni kwinsudiel.​—Mat. 24:13.