RUSANGU RA MWOM
Nasha Yom Yawonsu Mulong wa Kumulondul Mwant
Panading ni mivu 16, tatuku wanleja anch: “Anch waya mu mudimu wa kulejan, kangal kand wachirik ku chikumbu cham. Anch wachirik, nikukumbukun mend.” Chawiy nakwata mupak wa kudiokal ku chikumbu. Kinak kawiy kapamp ka kusambish nasha yom yawonsu mulong wa kumulondul Yesu, Mwant wetu.
MULONG wak tatuku wading ukwet ujim mwamu? El nikurumburilany. Navadika machuku ma ngond 29 Ngond wa 7, 1929, ni napamina mu ul wading mu teritwar wa Bulacan mwi ngand ya Philippines. Twadingap ni nfalang jivud, ni mwom wetu wading uswapel. Chisu nading nsand, amasalay a mu Japon andama mwi ngand ya Philippines ni njit jasambisha. Pakwez, ul wetu wading kuns, chawiy njit jatushikap kamu kwinikwa. Twadingap ni radio, televizion ap ma jurnal, chawiy twateshang kwetu piur pa njit kudi antu akwau.
Nading ni anamakwam amakundj nau amband sambwad, ni pinawanyisha mivu chinan, angakam ansenda mulong wa kushakam nau. Ap anch twading in Katolik, ngak ikundj wakatang kwambamb piur pa relijon ni witiyijang mikand ya chirelijon yamwinkishangau kudi arund nend. Nivurikin chisu chanlejay buku utazukinau anch Protection, Sécurité et Dévoilées mu dizu dia Tagalog, * (tal mazu ma kwinshin) pamwing ni Bibil. Nasangerang kutang Bibil, pakampwil nakatang ma Evanjil manying. Kusal mwamu kwasala anch nikata kamu kulondul chilakej cha Yesu.—Yohan 10:27.
KWILEJ KUMULONDUL MWANT
Yisak ya amasalay a mu Japon adiokala mwi ngand ya Philippines mu muvu wa 1945. Pa chisu chinicha, anvajam anleja kuchirik ku chikumbu. Ngakam ikundj wankasikesha kuya, ni chawiy naya.
Mwi Ngond wa 12 muvu wa 1945, Atuman a Yehova a mu musumb wa Angat eza kulejan rusangu ruwamp mu ul wetu. Kaman umwing ipal weza ku chikumbu chetu ni waturumburila yom yilondinay Bibil piur pa “machuku ma kwisudiel.” (2 Timote 3:1-5) Watutazuka ku dilejan dia Bibil mu ul wading piswimp netu. Naya, ap anch anvajam kayap kwau. Kwading antu piswimp 20, ni amwing ipulang yipul piur pa Bibil.
Nateshap kamu yom yading yilondinau, chawiy nakwata mupak wa kuya. Pakwez asambisha kuwang miminy ya Want. Nakata kamu miminy, chawiy nashakama. Kupwa kwa muminy ni malembil, atutazuka etu awonsu kuya ku chikumangan chikusadika mu ul wa Angat Diarumbing dikwezap ed.
Chikumangan chinech chasadikina mu chikumbu cha dijuku dia Cruz, ni amwing pakach petu twenda akilometre chinan mulong wa kushik kwinikwa. Antu piswimp 50 akumangana ni nashimoka pa kuman an akemp akat kwakul ku yipul piur pa yom yikash ya mu Bibil. Kupwa kwa kukumangan ku yikumangan tupamp tuvud, Damian Santos, mukurump wa chikumangen wading chibol ni wasadinau mudi ntakel wa musumb, wantazuka kushakam kwol kwend uchuku wawonsu. Uchuku wawonsu, twisambang kwetu milong ya Bibil.
Pa chisu chinicha, antu ayibatishang kwau kupwa kwa kwilej malejan ma pa dishin ma Bibil. Kupwa kwa kuya ku yikumangan machuku makemp, akadivar angipula pamwing nau akwetu anch: “Ov, ukatinany kutambul dibatish?” Nakula anch: “Mwaning, nikatin.” Nijika anch nikatin ‘kumusadin Mwant, Kristu.’ (Kolosay 3:24) Twaya ku kawit wading piswimp, ni atubatisha antu aad machuku ma ngond 15 Ngond wa 2, muvu wa 1946.
Nijika anch in Kristu abatishinau kal afanyidina kulejan chisu chawonsu mudi mwasalangay Yesu. Tatuku watonga anch nichidi kal mwanikanch mulong wa kulejan ni anch kutambul dibatish kwinsadinap anch nikal mwin kulejan. Namurumburila anch ridi rusot ra Nzamb rawiy rilondina anch tufanyidin kulejan rusangu ruwamp ra Want wa Nzamb. (Mateu 24:14) Nalonda kand anch niswirikedin kulam kushilamu kwam kudi Nzamb. Chawiy chisu chalonday tatuku mazu ma kwimbukun mend najimbulang kwisambishil oku. Wakwata kamu mupak wa kwikangesh kusal mudimu wa kulejan. Kawiy kapamp ka kusambish nasha yom, ap kwipan nakash, mulong wa kumusadin Yehova.
Dijuku dia Cruz diantazuka kushakam nau mu ul wa Angat. Ankasikesha kand am ni mwanau changadim, Nora, chakwel tusambisha kusal mudimu wa uchibol. Etu awonsu aad twasambisha mudimu wa uchibol machuku ma ngond 1 Ngond wa 11, muvu wa 1947. Nora waya kusadin mudimu wa uchibol mu musumb ukwau, pakwez am nashala mu Angat.
MUTAPU UKWAU NASHA YOM
Kupwa kwa kusal mudimu wa uchibol mu mivu yaad, Earl Stewart, mukadivar wa ku Betel wasala diskur diateshau kudi antu 500 ni kusut pa ndond ya pibur mu musumb wa Angat. Wasala diskur mu Inglish, ni kupwa am nadikarumuna mu wiswimp mu dizu dia Tagalog. Dined diawiy diskur dia kusambish pakach pa madiskur mavud nakarumuna mu mivu yivud. Mutapu ik natwisha kusal mwamu? Ap anch naya kwam ku shikol mivu sambwad, alej am asadinang nakash Inglish. Chikwau kand, nileja mikand yetu yivud mu Inglish mulong kwading kwau mikand yikemp yimedina pa Bibil mu dizu dia Tagalog. Yom yiney yankwasha nakash kutesh Inglish nawamp chakwel nitwisha chad kukarumun madiskur.
Mukadivar Stewart waleja chikumangen cha pa ul winiwa anch amishoner akimbin kudiokal mulong
wa kuya ku chitentam cha “Accroissement de la théocratie” cha muvu wa 1950, mu New York, mwi ngand ya États-Unis. Chawiy biro wa mutiy wakimba anch mukadivar umwing ap aad akwasha Betel. Nading pakach pa akadivar atazukau. Kapamp kakwau kand, nasha yom nasadinang mulong wa kusal ku Betel.Nashika ku Betel machuku ma ngond 19 Ngond wa 6, muvu wa 1950. Betel wading mu chikumbu chimwing chijim ni chikur chinyingumukinau kudi mitond yijim mu chiwandj cha ektar umwing. Piswimp akadivar ajich dikum ni aad asalang kwinikwa. Pamanch kamu nakash, nakwashang kwi mpish. Kupwa, kusambish saa wa chidivu, nakomang masun. Yom yiney nayisalang kand kupwa kwa midi. Ap kupwa kwa kuchirik kwa amishoner ku chitentam cha pa mangand mawonsu, am nashala ku Betel. Nasalang yom yawonsu yanlejangau akadivar kusal. Nalongijang mikand mu ma karton mulong wa kuyitum, nasala pa ndond ya kutambul mikand ni nasala kand mudimu wa kwak antu.
NADIOKALA MU PHILIPPINES MULONG WA KUYA KU SHIKOL YA GILEAD
Mu muvu wa 1952, akadivar akwau musamban a mu Philippines ni am atutazuka mulong wa kuya kwilej kalas ka 20 ka Shikol ya Gilead. Nasangara nakash! Pitwading mu États-Unis, twamana yom yivud yisu. Mwom wading ushalijadin kamu nakash ni unading nich mu ul ukemp unadiokala.
Nau arund nam amwing a ku shikol ya Gilead
Chilakej, twileja mutapu wa kusadin mashin kushalijan ni yom yikwau yitwading twakad kal kumanangap. Ap ni chisu chading chishalijadin ni cha kwol kwetu! Dichuku dimwing pinalanka pamanch, namana yom yawonsu yatokang kal pol too. Kawiy kading kapamp kam ka kusambish kuman mbundu. Jading jiwamp nakash, pakwez najingunina kapamp kamwing anch jading jikwet mashik nakash!
Nasangera kamu kufumb kuwamp natambula ku Gilead, chawiy kutenchik kwinoku kwanziyishap bwat. Antu afundisha ading alej awamp nakash ni atuleja mutapu wa kwilej ni wa kukimbijol mu yichap. Kufumb natambula ku Gilead kwankwasha kamu kukasikesh urund wam ni Yehova.
Panapwisha shikol, antuma mudi chibol wa pakampwil mu chisu chikemp mu Bronx mu Musumb wa New York. Chawiy mwi Ngond wa 7 muvu wa 1953, nakumangana ku chitentam chading ni mutu wa mulong anch “La société du monde nouveau,” chasadika mu Bronx. Kupwa kwa chitentam, anchirisha mu Philippines.
KUSHA YOM YIWAMP YA MU MUSUMB
Akadivar a ku Betel antuma mulong wa kusal mudimu wa munyingumuku. Chinech changinkisha mitapu ya kumwimburij Yesu, wasalang weny mu mal ni mu misumb mulong wa kuyikwash antu a Yehova. (1 Pita 2:21) Munyingumuku wam wading usendin ndond yijim ya Luzon wa pakach, didia ditung dijim nakash mu Philippines. Munyingumuku winou wading ni ma provens wa Bulacan, Nueva Ecija, Tarlac, ni wa Zambales. Mulong wa kwendin misumb yimwing, nafanyina kusutin mu Mikandu ya mayal ya Sierra Madre. Kwayangangap motak yikemp ap train ku jindond jinej, chawiy nayitang in kwendish motak yijim chakwel nishakama pa mbau jasendangau. Tupamp tuvud anyitiyinang, pakwez wadingap mutapu uwamp wa kusal weny.
Yikumangen yivud yading yisu ni yikemp. Chawiy akadivar ading ni musangar nakash chisu nayikwasha kurijek yikumangan ni kurijek nawamp mudimu wa kulejan.
Kupwa, antuma mu munyingumuku wading usendina chikunku chijim cha rejon wa Bicol. Mwi ndond yiney, mwading yisak yading kulemp nakash mwading mulejenau kudi ayibol a pakampwil mwadingau kand kal ashikamu kudi Atuman. Ku chikumbu chimwing, musalany wading kwau dibuku dipundinau pansh kupwa atekap yibar yaad ya mutond pakach ni pakach. Panadjata pa yibar ya mitond yiney, yawila mu dibuku, niyamam nawa. Changita chisu chilemp mulong wa kowal ni kwirijek mulong wa chakudia cha pamanch!
Chisu nading nisadina mu munyingumuku winou, nasambisha kumutong Nora, wasambisha kusal mudimu wa uchibol pinasambisha niyam. Pa chisu chinicha, wading chibol wa pakampwil mu Musumb wa Dumaguete ni naya kumutal. Kupwa kwa yom yiney, twafundijadinang mikand mu chisu kanang, ni mu muvu wa 1956, twatijana. Kupwa kwa kwatijan twasutisha rubing ra kusambish mu kwendin chikumangen cha mu Ditung dia Rapu Rapu. Kwinikwa twafanyina kukaninik mikandu ni kusal weny ku jindond kulemp, pakwez etu awonsu twading ni musangar ni kuyikwash akadivar adia ku jindond jilemp.
KUTAZUK MULONG WA KUSADIN KAND KU BETEL
Kupwa kwa kusal mudimu wa munyingumuku piswimp mivu yinying, akadivar atutazuka kwez ku biro wa mutiy. Twasambisha kusal kwinikwa mwi Ngond wa 1 muvu wa 1960. Mu mivu yivud nasadina ku Betel, nileja yom yivud mulong wa kusal nau akadivar akweta yisend yijim mu dirijek dia Yehova. Ni Nora wasangera yisend kushalijan ku Betel.
Nikat kusal diskur ku chitentam ni muntu ukarumwin mu dizu dia Cebuano
Chading chiyukish pa kuman antu avud nakash akat kumusadin Yehova mu Philippines. Chisu nandama ku Betel nading nsand mujich, kwading in kulejan piswimp 10 000 mwi ngand yawonsu ya Philippines. Nlel unou mudi in kulejan 200 000 ni kusut, yitot ya akadivar nau anambaz asadidin ku Betel mulong wa kukwash mudimu wa kulejan.
Mu kusut kwa chisu, twading tukwet kuswir kwa ndond yijim mulong wa kusal mudimu ku Betel. Chawiy Chisak Chitakedila chatuleja kukimb rupang rijim mulong wa kutungamu biro wa mutiy mujim. Kalam utadina mudimu wa kubudish mikand ni yamam twaya kudi antu ading piswimp ni mutiy ni kuyipul anch kudi muntu ukimbina kulandish rupang rend. Kwikil muntu watulandisha. Muntu umwing watuleja anch: “Antu a mu Chine kakulandishangap jipang. Alandining.”
Nikat kukarumun diskur dia Mukadivar Albert Schroeder
Pakwez, dichuku dimwing yom yimwing yakad kuchingejin yasambisha kushiken. Mutej netu umwing wading ukimbin kuya mu États-Unis, chawiy watwipula anch tukuland rupang rend. Mutej netu mukwau niyend wakwata mupak wa kulandish rupang rend, ni wayikasikesha antu akwau ading piswimp ni ndiy kusal mwamu. Twalanda kand ni rupang ra muntu walonda anch “antu a mu Chine kakulandishangap jipang.” Mu chisu chikemp, twambomba jipang jinej ni rupang ra biro wa mutiy, ni rikala rupang rumwing rijim. Nij anch Yehova wakata anch yom yiney yishiken.
Mu muvu wa 1950, yama nading nsand mukemp nakash wasalang ku Betel. Pakwez katat am ni mukajam yetu tudia amakurump nakash ku Betel. Nikwetap ushon ap pakemp mulong wa kumulondul Yesu chikalap nchik ndond yantumay. Ap anch anvajam angopata ku chikumbu chau, Yehova wanginkisha dijuku dijim nakash dia antu ankatina. Nikwet kamu kashinsh anch Yehova ukat kutwinkish chom chin chawonsu tukweta nich kuswir, chikalap nchik chisend chetu. Am ni Nora tumujikitishin Yehova nakash mulong wa yom yawonsu yiwamp, ni tuyikasikeshin antu niyau kumupak Yehova.—Malakiy 3:10.
Yesu amwinend wamutazuka mwin kulambwish yitad watazukau anch Mateu Levi kwikal mwin kwilej wend. Yom ik yasalay Mateu? “Watumbuka, washa yom yawonsu, waya nend Yesu.” (Luka 5:27, 28) Nikala kand ni mutapu wa kusha yom yawonsu mulong wa kumulondul Yesu, ni nikat kuyikasikesh antu akwau kusal mwamu ni akwikal ni yiyukish yivud.
Nikwet musangar wa kudandamen kusadin mu Philippines
^ par. 6 Amupalangesha kudi Atuman a Yehova, pakwez kamuchapinap kand katat.